Read maale ዔብሬ ዓሶም ዳኪንቴ ኪኢታ 7 Bible Online

ዔብሬ ዓሶም ዳኪንቴ ኪኢታ 7 - maale bible

ዔብሬ ዓሶም ዳኪንቴ ኪኢታ 7

¹ዬይ ሜልኬፃዲቄ ጎዖሢ ሳላሜ ጌይንታ ካታሞኮ ካኣቲ፤ ሃሣ ዼኤፖ ፆኦዛሢማኣ ማዻ ቄኤሴኬ፤ ዬይ ዓሢ፡ ሚና ዓብራሃሜ ካኣቶ'' ዖሎና ባሺ፥ ማዒ ሙካንቴ ጎይፃ ካኣሚ ዓብራሃሜ ዓንጄኔ።

²ዓብራሃሜያ ዒማ''ና ዔኪ ሙኬ ባካፓ ታጶይዳፓ ፔቴ''ማ ኬሲ'' ኬሲ'' ዒዛም ዒንጌኔ፤ ዒዛ ሱ'ንፆኮ ቡሊ''ፃ ላምዖኬ፤ ፔቴ''ዛ፦ «ፂሉ''ሞ ካኣቲ» ጌይንታዛ፥ ባጋ፦ «ሳላሜ ካታሞ ካኣቲኬ»፥ ዬና ጌይፃ ኮሹሞ ካኣቲ ጌይሢኬ።

³ሜልኬፃዲቄኮ ዓዶና ዒንዶና ሃሣ ዒ ሾይንቴ ዜርሢያ ባኣያኬ፤ ዒዚ «ዬማፓ ዬማ ሄላ''ንዳኣና ናንጌኔ» ጌይንቲ ዔርቱዋያ፥ ናንጎኮ ዒዛኮ ጋፒንሢ ባኣያኬ፤ ዒዚ ፆኦሲ ናዓሢኮ ኮኦኪንሢ ማዒ ናንጊና ቄኤሴ ማዒ ናንጋኔ።

⁴ሂንዳ ዬይ ዓሢ ዎማዒ ዼኤፒታቴያ ዛጉዋቴ! ዒስራዔኤሌ ማኣሮ ዓሶ ፃጶኮ ዓዳሢ ማዔ፥ ዓብራሃሜታዖ ዒዚ ዖሎና ዲዒ ዔኬ ባኮይዳፓ ታጶይዳፓ ፔቴ''ማ ዒዛም ዒንጌኔ።

⁵ቄኤሴ ማዓንዳጉዲ ጌሢንቴ ሌዊ ዜርፃ ፔ ዓሶይዳፓ ታጶፓ ፔቴ''ማ ፔቴ''ማ ዔካንዳጉዲ ዔያቶም ዓይሢንቴኔ፤ ዬይ ያዺ ጌይንቴሢ ዓብራሃሜ ዜርፃፓ ዔካንዳጉዲኬ።

⁶ዬይ ሜልኬፃዲቄ ሌዊ ዜርፃፓ ማዒባኣያታቴያ ዓብራሃሜ ዒንጌ ታጳሢዳፓ ፔቴ''ማ ፔቴ''ማ ዔኬኔ፤ ሃሣ ሃጊ ማዓንዳ ዎዛ'' ዒንጊንቴ ዓብራሃሜያ ዒ ዓንጄኔ።

⁷ዓንጆ ዓንጂንታሢዳፓ ዓንጃሢ ባሼ ማዒፃ ዔርቴያኬ።

⁸ቄኤሳ ማዻ ጎይፆና ታጳፓ ፔቴ''ማ ፔቴ''ማ ዔካዞንሢ ሓይቃ ዓሲ ማዔ፥ ሌዊ ዓሶኬ፤ ፔቴ'' ዛሎ''ና ጊንሣ ታጶይዳፓ ፔቴ''ማ ፔቴ''ማ ዔካሢ ባይቁዋያ ማዒ ናንጋያታሢ ማርካዺንቴ ሜልኬፃዲቄኬ።

⁹ዓካሪ፡ ታጶይዳፓ ፔቴ''ማ ዔካንዳያ ኮይሳሢ ሌዊ ፔ ቶኦኪና ዓብራሃሜ ዛሎ''ና ሜልኬፃዲቄም ዒንጌኔ ጌይሢኬ።

¹⁰ዎይቲ ጌዔቴ ሜልኬፃዲቄ ዓብራሃሜና ካኣሜ ዎዶ''ና ሌዊ ሃጊ ፔ ዓዶ፥ ዓብራሃሜይዳፓ ሾይንቲ ባኣያታሢሮኬ።

¹¹ዓካሪ ዒስራዔኤሌ ዴሮ''ም ዎጋ'' ዒንጊንቴሢ ሌዊ ዜርፃ ቄኤሴ ማዒ ማዻ ዳምቦናኬ፤ ዬይ ዜርፃ ቢያ ባኮ ኩንሢ ማዻኒ ዳንዳዔያ ማዔያታቴ ዓኣሮኔ ቄኤሴ ማዒ ማዼ ጎይፆቱዋንቴ ሜልኬፃዲቄጉዲ ዶኦሪንቴ ሜሌ'' ቄኤሴ ሙካኒ ኮይሲንዱዋያታንቴኬ።

¹²ሃሢ ጋዓንቴ ቄኤሳ ላኣሚንቲ፥ ሜሌ'' ሙካኣና ዎጋ''ኣ ላኣሚንታንዳያ ኮይሳኔ።

¹³ሓይ ቢያ ዒዛ ዛሎ'' ኬኤዚንቴ ቄኤሳሢ ሜሌ ፃጳፓኬ፤ ዬኖ ፃጳፓ ዖኦኒያ ፆኦሲም ዒንጊ ካኣሽኮ ቤዛ ሙኪ ፆኦሲም ማዼይ ባኣሴ።

¹⁴ኑ ጎዳሢ ዪሁዳ ዜርፃፓ ሙኬሢ ዔርቴያኬ፤ ጋዓንቴ ሙሴ ቄኤሶ ዛሎ'' ኬኤዛዖ ዪሁዳ ማኣሮ ዛሎ'' ኬኤዜ ባኣዚ'' ፔቴ''ታዖ ባኣሴ።

¹⁵ዬይ ባካ ኮሺ'' ፔጋዺ ዔርታንዳሢ ሜልኬፃዲቄጉዴያ ሜሌ'' ቄኤሴ ሙካዛኬ፤

¹⁶ዒዚ ቄኤሴ ማዔሢ ዓሲ ዎጌና ዶኦሪንቲቱዋንቴ ባይቁዋያ ማዔ፥ ናንጊና ናንጋ ዎልቄና ዶኦሪንቲኬ፤

¹⁷ዎይቲ ጌዔቴ፦ «ሜልኬፃዲቄ ቄኤሴ ማዒ ዶኦሪንቴሢጉዲ፥ ኔኤኒ ናንጊና ናንጋንዳ ቄኤሴኬ» ጌይንቲ ዒዛ ዛሎ'' ማርካዺንቴኔ።

¹⁸ቤርታኣ ዎጋ'' ዶዲ ማዒ ዴዓኒ ዳንዳዒባኣሢሮ ሃሣ ፓሡዋያ ማዔሢሮ ዓቴ''ኔ፤

¹⁹ዓይጎሮ ጌዔቴ ሙሴ ዎጋ'' ዓይጎ ባኣዚ''ያ ፒዚሲ ጊኢጊሻኒ ዳንዳዒባኣሢሮኬ፤ ሃሢ ጋዓንቴ ፆኦሲ ባንሢ ዒዛና ኑ ዑካንዳያ ባሼ ኮሺ ማዔ፥ ሃጊ ማዓንዳ ዎዛ ኑም ሙኬኔ።

²⁰ዬይ ቄኤሴ ማዒፃ ዒዛም ፆኦሲ ጫኣቂባኣንቴ ማዔያቱዋሴ፤ ሜሌ'' ቄኤሳ ጋዓንቴ ሃያኮ ቤርታ ቄኤሴ ማዓሢ ጫኣቆና ባኣዚ'' ባኣንቴኬ፤

²¹ዒዚ ቄኤሴ ማዔሢ ዒዛም ጫኣቆምኬ፤ ዎይቲ ጌዔቴ፦ «ጎዳ ‹ኔኤኒ ናንጊና ናንጋ ቄኤሴኬ› ጌዒ ዒዛም ጫኣቄኔ፤ ዬያ ማሊፆ ዒ ሺርሹዋሴ» ጌይንቲ ዒዛ ዛሎ'' ኬኤዚንቴያኬ።

²²ዬያ ጫኣቁሞ ዛሎ''ና ዬሱሴ ቢያፓ ባሼ ማዔ፥ ፆኦሲ ጫኣቁሞኮ ዖኦጪንታኒ ዔቄያ ማዔኔ።

²³ፔቴ'' ቄኤሴ ሓይቁዋዖ ማዺ ማዺ ናንጋኒ ዳንዳዒባኣሢሮ ቤርታ ዎንዴ ማዼ ቄኤሶኮ ፓይዳ'' ሚርጌኬ፤

²⁴ዬሱሴ ጋዓንቴ ናንጊና ናንጋያ ማዔሢሮ ቄኤሴ ማዒፃ ዒዛኮ ላኣሚንቱዋያኬ።

²⁵ዬያሮ ዒዛ ባንሢ ሙካ ዓሶ ዛሎ'' ሺኢቃኒ ናንጊና ባይቁዋያ ማዒ ናንጋሢሮ ዒዛ ዛሎ''ና ፆኦሲ ባንሢ ሙካዞንሢ ቢያ ጎኔና ዻቂሻኒ ዒ ዳንዳዓኔ።

²⁶ዓካሪ፤ ኑም ኮይሳያ፥ ፆኦሲም ዱማዼያ፥ ቦሂሳ ባኣዚ'' ባኣያ ማዔያ፥ ጌኤሺ ማዔያ፥ ጎሞ ዓሶፓ ዱማዼያ፥ ጫሪንጮኮ ዑፃ ዼ'ግ ጌዒ ቦንቺንቴያ፤ ያዺ ማዔ፥ ቄኤሴኮ ዑሢ ማዔያኬ ኑም ኮይሳሢ።

²⁷ዒዚ ሜሌ'' ቄኤሶኮ ዑፃ ማዔ ዓሶጉዲ ቤርታዺ ፔ ጎሞ ዛሎ''ሮ፥ ዬካፓ ዴሮ'' ጎሞ ዛሎ''ሮ ቢያ ኬሊ''ና ፆኦሲም ዒንጎ ባኮ ዒንጋኒ ዒዛ ኮይሱዋያኬ፤ ዓይጎሮ ጌዔቴ ዒዚ ፔና ዒንጎ ባኣዚ'' ማሂ ዒንጌ ዎዶ''ና ዬይ ባካ ላሚ ማይ ማዺንቱዋጉዲ፥ ፔቴ''ና ማዺ ዬያ ኩንሤሢሮኬ።

²⁸ሙሴ ዎጋ'' ቄኤሶኮ ዑፃ ማሂ ዶኦራሢ ላቤ''ያ ማዔ ዓሶኬ፤ ዎጎኮ ጊንፃፓ ሙኬ ፆኦሲ ጫኣቁማ ጋዓንቴ ናንጊና ናንጋያ ማዔ፥ ፒዜ ፆኦሲ ናዓሢ ዶኦሬኔ።