Read maale ያይቆኦቤ ኪኢቶ'' 5 Bible Online

ያይቆኦቤ ኪኢቶ'' 5 - maale bible

ያይቆኦቤ ኪኢቶ'' 5

¹ሃሣ ዒንሢ ዖርጎጮ ዓሳ ሃኒ ዬዒ ዋይዙዋቴ፤ ፑርታ ሜታ ዒንሢዳ ሄላ''ንዳሢሮ ዒላቲ ዒላቲ ዬኤኩዋቴ።

²ዒንሢኮ ቆላ'' ቢያ ዎዒ ፑርቴኔ፤ ዓፒሎዋ ዒንሢኮ ቁንቁና ሙዔኔ።

³ዒንሢኮ ዓኣ ዎርቆና ቢሮ''ና ሳልፔኔ፤ ዬይ ሳልፒፃ ዒንሢም ማርካ ማዓንዳኔ። ሃሣ ዒንሢኮ ዓሽኮ ዓዳ'' ታሚጉዲ ሙዓንዳኔ፤ ጋፒንፆ ኬሎ''ም ዬያ ዺቦ'' ቆሎ'' ዒንሢ ቡኩሴኔ።

⁴ያዺ ማዓዛ፡ ሃሣ ጎዦይዳ ዒንሢም ማኣሎ'' ቡሪ ፔኤቄ ዓሶም ኮይሳ ባኮ ዒንሢ ጪጊባኣሢሮ ሃይሾ ዒንሢ ዔያታ ቆፂ ዒላታ ዒላቶ ዔያቶኮ ቢያ ባኮ ዎይሣ ጎዳሢ ዋይዜኔ።

⁵ሳዖይዳ ኮሺ፤ ሃሣ ሚርጌና ዎዛሳ ናንጊ ዒንሢ ናንጊፆና ዑፆ ዒንሢሲ ዒንሢ ዓዳ'' ሹኪንታኒ ጊኢጌ ቡዋጉዲ ማሊ''ሴኔ።

⁶ጌኤዣሢ ዒንሢ ሉኡዙሞና ዻቤያ ማሂ፥ ዎዺያ ዒንሢ ዒዛ ዎዼኔ፤ ጋዓንቴ ዒንሢ ዒዚ ዒፂ ማኩዋሴ።

⁷ታ ዒሾንሦ! ታ ሚሾንሦ! ዓካሪ ጎዳሢኮ ሙኮ ጊቢ'' ካፑዋቴ፤ ጎሽካ ዓሲ ሌዖ ዒሮና ሲሎ'' ዒሮና ዴንቃንዳያ ሄላ''ንዳኣና ጊቢ'' ቃራ ዓኣፒ ሳዓፓ ዴንቃኒ ካፓኔ፤

⁸ዒንሢያ ዬያጉዲ ጊቡ''ዋቴ፤ ጎዳኮ ሙኮ ዎዳ'' ዑኬሢሮ ዎዛና ዶዱዋቴ።

⁹ታ ዒሾንሦ! ታ ሚሾንሦ! ዒንሢ ጊዶይዳ ዎጊንቱዋጉዲ ሴካና ሃንጋና ዎላ'' ማርሚፖቴ፤ ሃይሾ ዎጋሢ ሙካንዳ ዎዳ'' ሄሌ''ኔ።

¹⁰ታ ዒሾንሦ! ታ ሚሾንሦ! ጎዳሢ ሱ'ንፆና ፆኦሲ ማሊፆ ኬኤዛ ዓሳ ሜቶ ጊቢ'' ዔኪፆና ኮኦኪንሢ ዒንሢም ማዔያታሢ ዔሩዋቴ።

¹¹ሃሢ ጊቢ'' ዶዴ ዓሶ «ዓንጂንቴያኬ» ኑ ጋዓኔ፤ ዒዮቤ ጎዖሢ ዎዲ'' ጊቤያታቴያ ዒንሢ ዋይዜኔ። ጊንሣ ጋፒንፆይዳ ፆኦሲ ዒዛም ማዼ ኮዦ ባኮዋ ዒንሢ ዛጌኔ፤ ዬያይዲፆና ጎዳ ማኣራያ፥ ሃሣ ሚርጌ ሚጪንታያ ማዔሢ ዒንሢ ዔሬኔ።

¹²ታ ዒሾንሦ! ታ ሚሾንሦ! ቢያ ባኣዚ''ኮ ቤርታ ጫሪንቺና ማዖም ሳዓና ሃሣ ሜሌ'' ዓይጎ ባኣዚ''ናታዖ ጫኣቂፖቴ፤ ጌኤዛ ዒንሢኮ ጎኔና «ሂዮ» ማዔቶ ሂዮ ማዖንጎ፤ ሃሣ «ዔይዔ» ማዔቶ ጎኔና ዔይዔ ማዖንጎ፤ ያዺ ማዒባኣቶ ጋዓንቴ ዒንሢዳ ዎጊንታንዳኔ።

¹³ዒንሢ ባኣኮ''ይዳ ሜታ ሄሌ'' ዓሲ ዓኣቶ ሺኢቆንጎ፤ ሃሣ ዎዛዻ ዓሲ ዓኣቶ ፆኦሲ ጋላቲ ጋላቲ ዓይናዾንጎ።

¹⁴ዬያጉዲ ዒንሢ ባኣኮ''ይዳ ሃርጊንቴ ዓሲ ዓኣቶ ሺኢጲፆ ማኣሮ ጪሞ ፔ ባንሢ ዔኤሎ''ንጎ፤ ዔያታ ሙካዖ ሃርጊንቴ ዓሢ ጎዳ ሱንፆና ዛይቶ ቲዦ ቲሽኪ ዒዛም ሺኢቆንጎ።

¹⁵ዬያጉዴ ጉሙርቂሢዳ ዶዲ ዔቂ ሺኢቆ ሺኢጲሢ ሃርጌ ዓሢ ዻቂሻኔ፤ ጎዳሢያ ዒዛ ሃርጎይዳፓ ፖዒሳንዳኔ፤ ሃሣ ዬይ ዓሢ ማዼ ጎሜ ዓኣቶዋ ዓቶም ጌይንታኔ።

¹⁶ዬያሮ ዒንሢ ሃርጎፓ ፖዓኒ ዒንሢኮ ጎሞ ሴካና ሃንጋና ዎሊም ቡኡፂንቱዋቴ፤ ሃሣ ፔቴ''ሢ ባጋሢም ሺኢቆንጎ፤ ጌኤሺ ዓሲ ሺኢጲሢኮ ሚርጌ ባኣዚ'' ማዻ፥ ዼኤፒ ዎልቄ ዓኣኔ።

¹⁷ዔኤሊያሴ ጎዖሢ ኑጉዴያ ዓሲታዖ፥ ዒርዚ ሳዖይዳ ዋርቁዋጉዲ ሺኢቄ ዎዶ''ና ሃይሦ ሌዔና ላሆ'' ዓጊኒና ፔቴ''ታዖ ዒርዚ ዋርቂባኣሴ።

¹⁸ሃሣ ጊንሣ ዒዚ ሺኢቄ ዎዶ''ና ጫሪንጫፓ ዒርዚ ዋርቄኔ፤ ሳዓ ጊንሣ ሃኣኮ ካሤኔ።

¹⁹ታ ዒሾንሦ! ታ ሚሾንሦ! ዒንሢዳፓ ፔቴ'' ዓሲ ጎኑሞ ጎይፃፓ ኬስኬያ ማዔም ባጋሢ ዬያ ዓሢ ጎኑሞ ጎይፆ ባንሢ ማሄቶ፥

²⁰ጎሞ ዓሢ ዻቢንቴ ጎይፃፓ ማሃሢ፥ ጎሞ ዓሢኮ ሼምፖ ሃይቢዳፓ ዻቂሻያ ማዒፆና ሃሣ ዬያ ዓሢም ሚርጌ ጎሜኮ ዓቶም ጌዒሢ ዴንቂሳያ ማዔሢ ዔሮንጎ።