Read maale ጴፂሮሴ ኪኢቶ'' 1 1 Bible Online

ጴፂሮሴ ኪኢቶ'' 1 1 - maale bible

ጴፂሮሴ ኪኢቶ'' 1 1

¹ዬሱስ ኪሪስቶሴ ፔ ማዾ''ም ዳኬ ጴፂሮሴይዳፓ፦ ጳንፆሴይዳ፥ ጋላቲያይዳ፥ ቄጶዶቂያይዳ፥ ዒሲያይዳ፥ ቢታኒያ ዓጮ''ይዳ ዳኪንቲፆና ላኣሊንቲ ዴንዲ ናንጋ ዓሶም፤

²ፆኦሲ ዓዳሢና ቤርታዺ ዔርቲ ዶኦሪንቴዞንሢም፥ ሃሣ ዬሱስ ኪሪስቶሴም ዓይሢንታኒና ዒዛኮ ሱጉፆና ፑጪንቲ ማስቲ ጌኤሽካኒ ዓያኖ ጌኤዦና ዱማዼዞንሢም፥ ፆኦሲኮ ኮሹሞ ዒንጊፆንታ ኮሹሞንታ ዒንሢም ዺቦንጎ።

³ዬሱስ ኪሪስቶሴኮ ሓይባ''ፓ ዔቂፆ ዛሎ''ና ናንጊ ማዔ ዎዞ'' ኑም ዒንጌሢ፥ ዼኤፖ ማኣሪፆና ዓኪ ሾይንቲ፥ ፔ ናይ ኑና ማሄሢ ሃሣ ኑ ጎዳሢ ዬሱስ ኪሪስቶሴኮ ዓዶ ማዔ ፆኦዛሢ[1] ጋላቲንቶንጎ፤

⁴ዒዚ ጫሪንጮይዳ ዓኣ ባይቁዋያና ፑርቱዋያ፥ ሓሣ ጪንቁዋያ ማዔ ዒንጊንታ ዓጮ'' ኑ ዻካላንዳጉዲ ኑም ጊኢጊሼኔ።

⁵ዒንሢያ ጋፒንፆ ኬሎ''ና ፔጋዻንዳ ዻቂንቶም ጉሙርቂሢ ዛላና ፆኦሲኮ ዎልቆና ካፒንቲ ዓኣኔ።

⁶ኮይሳ ባኣዚ'' ማዒ ጴዼም ዱማ ዱማ ዓይጎ ሜቶናታዖ ዒንሢ ዓኣያታቶዋ ዬኖ ባኮና ዒንሢ ዎዎዛዹዋቴ።

⁷ሃይ ሜታ'' ዒንሢ ሄሌ''ሢ ዒንሢኮ ጉሙርቂፆኮ ጎኑሞ ዛጋኒኬ፤ ሳዖይዳ ባይቃ ዎርቄ ጎዖ ባካታዖ ታሚዳ ዓጊ ጎኑማ ዛጊንታኔ፤ ዒንሢኮ ጋዓንቴ ዎርቆይዳፓ ባሼ ማዔ ቦንቺንቴ ጉሙርቂፃ ዬያጉዲ ዛጊንታኒ ኮይሳኔ፤ ዬያይዲ ዒንሢኮ ዛጊንቴ ጉሙርቂፃ ዬሱስ ኪሪስቶሴ ሙካኣና ጋላታንታ ቦንቾንታ ሃሣ ዼ'ጊ ጌዒሢያ ዒንሢም ማዓንዳኔ።

⁸ዬሱስ ኪሪስቶሴ ዛጊባኣያ ማዔያታቶዋ ዒንሢ ዒዛ ናሽካኔ፤ ሃሣ ያዺ ዒንሢ ዛጊባኣያ ማዔቴያ ዒዛ ጉሙርቂ፥ ዻንጋና ኬኤዛኒ ዳንዳዒንቱዋያ ቦንቺንቴ ዎዛና ዒንሢ ዎዛዼኔ።

⁹ዓይጎሮ ጌዔቶ ጉሙርቂፆ ዒንሢሲኮ ማሊፆ ማዔ ዒንሢ ሼምፓሢ ዻቂንቶ ዒንሢ ዔኪ ዔኪ ዓኣሢሮኬ።

¹⁰ዬኖ ዻቂንቶ ባኮ ፆኦሲ ማሊፆ ኬኤዛ ዓሳ ኮሺ'' ኮዒ ዛጌኔ፤ ዬያሮ ዔያታ ፆኦሲ ዒንሢም ዒንጋንዳ ኮሹሞ ዒንጊፆ ቤርታዺ ኬኤዜኔ።

¹¹ዔያቶ ጊዳ'' ዓኣ ኪሪስቶሴኮ ዓያና'' ሜሲሔይዳ ሄላ''ንዳ ሜቶ''ና ሜቶ''ኮ ጊንፆይዳ ዒዚ ዴንቃንዳ ቦንቾ ቤርታዺ ዔያቶም ዻዌኔ፤ ዔያታኣ ዬይ ቢያ ዎማ ዎዶ''ና፥ ሃሣ ዎይቲ ማዓንዳቴያ ማሊ ኮሺ'' ዛጌኔ፤

¹²ዬያታ ፆኦሲ ማሊፆ ኬኤዛ ዓሳ ማዼሢ ዒንሢም ማዓንዳፓዓቴም ፔኤም ማዒባኣሢ ዔያቶም ፔጋዺ ዔርቴኔ፤ ዔያታ ዒንሢም ማዼሢ' ጫሪንጫፓ ዳኪንቴ ዓያኖ ጌኤዦ ዛሎ''ና ሃሢ ኮዦ ሃይሶ ዒንሢም ኬኤዛ ዓሳ ኬኤዜ ባኮ ፔጋሲሢናኬ፤ ዬያ ባኮ ፆኦሲ ኪኢታንቻታዖ ዛጋኒ ኮሺ'' ሱኡካዼኔ።

¹³ዬያሮ ዒኖ ዒንሢኮ ማዾም ጊኢጊሺ፥ ኮይሳ ናንጊ ዳምቤና ናንጊ፥ ዬሱስ ኪሪስቶሴ ሙካኣና ዒንሢ ዴንቃንዳ ኮሹሞ ዒንጊፆ ዛሎ''ና ጉቤ ማዔ ሃጊ ማዓንዳ ዎዛ ዒንሢኮ ዓኣያ ማዖንጎ።

¹⁴ፆኦሲም ዓይሢንታ ናይ ዒንሢ ማዔሢሮ ዔራቶ ዓቲሢና ቤርታ ዒንሢኮ ዓኣ ፑርቶ ማዾ'' ሱኡኮ ኩንሢፖቴ፤

¹⁵ጋዓንቴ ዒንሢ ዔኤሌ'' ፆኦዛሢ ጌኤሺ ማዔሢጉዲ ዒንሢያ ዒንሢ ናንጎና ቢያ ጌኤሺ ማዑዋቴ፤

¹⁶ዓይጎሮ ጌዔቶ ጌኤዦ ማፃኣፖይዳ፦ «ታኣኒ ጌኤሺ ማዔሢሮ ዒንሢያ ጌኤሺ ማዑዋቴ» ጌይንቲ ፃኣፒንቴኔ።

¹⁷ዖኦማኣ ዱማሱዋዖ ፔቴ'' ፔቴ''ሢዳ ማዾ'' ማዾ'' ጎይፆ ዎጋ ፆኦዛሢ «ኑ ዓዳሢ» ጌዒ ዔኤላ''ያ ዒንሢ ማዔቶ፥ ሃያ ሳዖይዳ ሾኦቹሞና ዓኣዖ ዒዛ ዒጊጪሢና ናንጉዋቴ።

¹⁸ዒንሢኮ ዓዶንሢዳፓ ዒንሢ ዻካሌ ማኣዱ''ዋ ናንጎይዳፓ ዒንሢ ጊንሣ ሻንቂንቴሢ ባይቃ ባኣዚ''፥ ሚኢሼና ዎርቄና ማዒባኣሢ ዒንሢ ዔራኔ፤

¹⁹ጋዓንቴ ዒንሢ ሻንቂንቴሢ' ፑርታ ባኣዚ''ና ፓጬ ባኣዚ''ባኣ ማራይ ማዔ ኪሪስቶሴኮ ቢያፓ ባሻ ሱጉፆናኬ።

²⁰ዒዚ ዶኦሪንቴሢ ሳዓ ማዢንታንዳሢኮ ቤርታዺ ማዓዛ ሃሢ ጋዓንቴ ጋፒንፆ ዎዶ''ይዳ ዒንሢ ዛሎ''ሮ ጌዒ ዒ ፔጋዺ ጴዼኔ።

²¹ሃሣ ዬሱሴ ሃይቦ''ይዳፓ ዔቂሲ ዒዛም ቦንቾ ዒንጌ ፆኦዛሢ፥ ዒዛ ዒንሢ ዬሱሴ ዛሎ''ና ጉሙርቃኔ፤ ዬያሮ ዒንሢኮ ጉሙርቂፆንታ ሃጊ ማዓ ዎዞ''ንታ ፆኦሲዳኬ።

²²ዑሣ ናሽኮ ናሹሞቱዋንቴ ጎኔ ናሹሞ ዬሱሴ ጉሙርቂ ዔኬ፥ ዒንሢኮ ጌርሲንሢም ዓኣያ ዒንሢኮ ማዓንዳጉዲ ጎኑሞም ዓይሢንቲሢና ዒንሢ ዒ'ንሢ ቶኦኮ'' ጌኤሼኔ፤ ዬያሮ ጉቤ ዒናና[2] ሴካና ሃንጋና ዎሊ ኮሺ'' ናሽኩዋቴ።

²³ዒንሢ ላሚሣ ሾይንቴሢ ናንጊና ናንጋያ ማዒ ዶዲ ናንጋ ፆኦሲ ቃኣሎ''ና ባይቁዋ ፃጲዳፓኬ፥ ባይቃ ፃጲፓቱዋሴ፤

²⁴ዓይጎሮ ጌዔቶ ጌኤዦ ማፃኣፓ፦ «ዓሲ ቢያ ማኣቲጉዴያኬ፤ ቦንቻ ቢያ ካይዚዳ ዓኣ ቡኒጉዴያኬ፤ ማኣታ'' ሹሊ'' ሜላኔ፥ ቡና''ኣ ዲኢናኔ፤

²⁵ፆኦሲኮ ቃኣላ'' ጋዓንቴ ናንጊና ዶዲ ናንጋኔ» ጋዓኔ። ዬያሮ ኮሺ ሃይሴ ማዒ ዒንሢም ሚርጌና ኬኤዚንቴ ቃኣላ'' ዬያኬ።