Read maale ጴፂሮሴ ኪኢቶ'' 1 5 Bible Online

ጴፂሮሴ ኪኢቶ'' 1 5 - maale bible

ጴፂሮሴ ኪኢቶ'' 1 5

¹ዓካሪ፡ ታኣኒ ዔያቶና ዎላ'' ሺኢጲፆ ማኣሮኮ ጪሞ ማዔሢ፥ ኪሪስቶሴ ሜቶ''ኮዋ ማርካ ማዔሢ፤ ሃሣ ሃጊ ቤርታ ጴዻንዳ ዎዞ'' ዔያቶና ዎላ'' ዴንቃንዳሢ፥ ዒንሢ ባኣካ'' ዓኣ ሺኢጲፆ ማኣሮ ጪሞ ታ ዞራኔ።

²ዒንሢም ሃዳራና ዒንጊንቴ ፆኦሲ ማራቶ ሄንቁዋቴ፤ ዒንሢ ሄንቃ ዎዶ''ና ዖኦኒያ ዎልቃዼምቱዋንቴ ፆኦሲ ናሽካ ጎይፆ ናሹሞና ሄንቃያ ማዖንጎ፤ ሃሣ ሚኢሼ ናሹሞናቱዋንቴ ዒንሢኮ ማዻኒ ዓኣ ዒናፓ ማዔ ማሊሢና ማዖንጎ።

³ዬያጉዲ ሃሣ ዒንሢኮ ዴማ'' ዓኣ ዓሶ ሜታሲ ዎይሥሢናቱዋንቴ ማራቶም ኮሺ ኮኦኪንሢ ማዓ ባኣዚ'' ዻዊሢና ማዖንጎ።

⁴ያዼ ዒንሢ ማዼቶ ማራቶ ሄንቃ ዓሶኮ ሱኡጋሢ ሙኬ ዎዶ''ና ፑርቲ ባይቁዋ፥ ቶኦካ'' ዓጎ ቦንቾ ባኮ ዒንሢ ዔካንዳኔ።

⁵ዬያጉዲ ዒንሢ፥ ዼጌዞቴ! ጋርቾ ዓሶም ዓይሢንቱዋቴ፤ ቢያሢ ሼሌዑሞ ዓዳ'' ማኣዖጉዲ ማይንቲ ፔቴ''ይ ባጋሢም ዓይሢንቲ ማዾንጎ፤ ዓይጎሮ ጌዔቶ ጌኤዦ ማፃኣፖይዳ፦ «ፆኦሲ ዖቶርቃ ዓሶ ዒፃኔ፤ ኮዦ ዓሶም ጋዓንቴ ዒዚ ፔ ኮሹሞና ዒንጋ ዒንጊፆ ዒንጋኔ» ጋዓሢሮኬ።

⁶ዓካሪ፡ ፆኦሲ ፔ ማሊ ጌሤ ዎዶ''ና ዒንሢ ዼ'ጊዳንዳጉዲ ፆኦሲኮ ዼኤፖ ዎልቆ ዴማ'' ዒንሢ ቶኦኮ'' ሂርኪሱዋቴ።

⁷ዒዚ ዒንሢ ዛሎ'' ማላያታሢሮ ዒንሢ ሜታሳ ማሊፆ ጉቤ ዒዛ ዑፃ ጌሡዋቴ።

⁸ዒንሢ ቶኦኮ'' ዔሪ ናንጉዋቴ፥ ሃሣ ጴጩዋቴ፤ ዓይጎሮ ጌዔቶ ዒንሢኮ ሞርካሢ፥ ፃላሄ ዓዳ'' ዔኤዻንዳ ባኣዚ'' ኮዒ ጉዻ ዞቢ''ጉዲ ዒንሢ ዓጮ ሺሪ ሺሪ ዒንሢ ካታ''ኔ።

⁹ዓጮ'' ቢያይዳ ዓኣ ዬሱሴ ጉሙርቂ ጎናሲ ዔኬ፥ ዒንሢኮ ጌርሲንሢንታ ጌሮንሢንታ ማዔ ዓሳ ዬያጉዴ ሜቶ'' ዔካያ ማዔሢ ዔሪጋፓ ፆኦሲ ጉሙርቂፆና ዶዲ ሞርካሢ ማኩዋቴ።

¹⁰ኪሪስቶሴ ዛሎ''ና ፔኤኮ ናንጊና ናንጎ ቦንቾ ባንሢ ዒንሢ ዔኤሌ''፥ ዒዛይዳፓ ማዔ ኮሹሞ ዒንጊፆኮ ቢያ ፆኦዛሢ' ዻካ'' ዎዴ ዒንሢ ሜታዼስካፓ ዒ ፔኤሮ ዒንሢ ዶዲሺ ዔቂሳንዳኔ።

¹¹ናንጊና ቦንቾና ዎልቄና ዒዛም ማዖንጎ! ዓኣሜን።

¹²«ታኣኮ ጉሙርቂንታ ጌርሲኬ» ጌዒ ታ ማላ ሲልዋኖሴ ጎዖሢ ዑፆይዳ ሃኖ' ኪኢቶ'' ዻካ''ና ታ ዒንሢም ፃኣፔኔ፤ ታ ፃኣፔሢያ ዒንሢ ዞራኒና ዬይ ባካ ፆኦሲ ፔ ኮሹሞና ዒንጌ ጎኔ ዒንጊሢ ማዔሢ ማርካዻኒ ጌዒኬ፤ ዬያሮ ሃያ፥ ፆኦሲኮ ኮሹሞ ዒንጊፆና ዶዲ ዔቁዋቴ።

¹³ባብሎኔይዳ ዓኣ ዒንሢኮ ጌሮ ማዒ ዒንሢጉዲ ዶኦሪንቴ ሺኢጲፆ ማኣሬላ ዒንሢ «ኮሺዳ» ጋዓኔ፤ ሃሣ ታኣኮ ናዓሢ ማርቆሴያ ዒንሢ «ኮሺዳ» ጋዓኔ።

¹⁴ዬሱሴ ጉሙርቂ ጎናሲ ዔኬ ዓሲ ጎይሢ ናሹሞና ሴካና ሃንጋና ዎሊ ኮሺ ዔኤሊ''ሢ ዔኤሉ''ዋቴ። ኪሪስቶሴሮ ማዔ ዓሶ ዒንሢ ቢያሢም ኮሺ ማዖንጎ።