Read maale ዮሓኒሴም ፆኦሲ ፔጋሲ ዻዌ ባኮ 10 Bible Online

ዮሓኒሴም ፆኦሲ ፔጋሲ ዻዌ ባኮ 10 - maale bible

ዮሓኒሴም ፆኦሲ ፔጋሲ ዻዌ ባኮ 10

¹ዬካፓ ሃሣ ሻኣሬ ማይንቴያ፥ ሜሌ'' ዼኤፒ ኪኢታንቻ ጫሪንጫፓ ኬዳ''ንቴ ታ ዴንቄኔ፤ ዒዛኮ ቶኦኮ'' ዓጮ ሺሬ፥ ዡኡሎ ዓኣኔ፤ ዬያኮ ዓኣፖ ካራ'' ዓቢጉዴያ፥ ቶካ ዒዛኮ ሃሣ ቱርቱሪጉዲ ዔቄ ታሚ ማላያኬ፤

²ዒዚ ኩጮይዳ ዻካ'' ቡሊ''ንቲ ዓኣ፥ ማሪንቴ ማፃኣፔ ዔኪ ዓኣኔ፤ ዒማ''ና ዒ ሚዛቆ ቶኮና ባዞ''ይዳ፥ ሻውሎ ቶኮና ሳዖይዳ ሄ'ርቂ ዔቂ ዓኣኔ፤

³ሓሣ ዒ ዞቢ'' ዑኡሲ ማላ፥ ዼኤፒ ዑኡሲና ዒላቴኔ፤ ዒዚ ዒላታዛ ላንካዎ ጉጉንፆንሢ ፔ ዑኡዞና ዑኡዞና ጌስቴኔ።

⁴ዬያታ ፔ ዑኡዞና ጌስቴ ዎዶ''ና ታኣኒ ፃኣፓኒ ማሌኔ፤ ጋዓንቴ፦ «ላንካዎ ጉጉንፆንሢ ጌስቴ ባኮ ዓኣቺ ዓርቄ፤ ፃኣፒፖ» ጋዓ ዑኡሲ ጫሪንጫፓ ታ ዋይዜኔ።

⁵ዬካፓ ባዞ''ና ሳዖናይዳ ሄ'ርቂ ዔቂ ዓኣንቴ ታ ዛጌ ኪኢታንቻሢ ፔኤኮ ሚዛቆ ኩጮ ሌካ ጫሪንጮ ባንሢ ዔቂሳዖ፥

⁶ዒዚ ናንጊና ናንጋሢ፥ ጫሪንጮና ሳዖና ባዞ''ና ዬያቶይዳ ዓኣ ባኮ ቢያ ማዤ ፆኦዛሢ ሱ'ንፆና ጫኣቄኔ፤ ዒ ጫኣቄሢ፦ «ዓካሪ ማይ ኔጋዓኬ!

⁷ጋዓንቴ ላንካሳ ኪኢታንቻሢ ዛያሢ ዋርቃ ኬሎ''ንሢና ፆኦሲም ማዻ፥ ዒዛ ማሊፆ ኬኤዛዞንሢም ፔጋሲ ዔርዜ ጎይፆና ዒዛኮ ዓኣሺንቴ ማሊፃ ኩማንዳኔ» ጌይኬ።

⁸ዬካፓ ጫሪንጫፓ ታ ዋይዜ ዑኡዛ፦ «ባዞ''ና ሳዖናይዳ ሄ'ርቂ ዔቂ ዓኣ ኪኢታንቻሢ ፔ ኩጫ ዔኬ፥ ቡሊ''ንቲ ዓኣ፥ ማሪንቴ ማፃኣፔሎ ዴንዲ ዔኬ» ጌይ ላሚ ሃሣ ታኣም ኬኤዜኔ።

⁹ዬማና ታኣኒ ኪኢታንቻሢ ባንሢ ዓኣዺ፦ «ዻኮ''፥ ማሪንቴ ማፃኣፔሎ ታኣም ዒንጌ» ጋዓዛ፥ ዒዚያ፦ «ዔኪጋፓ፥ ዒዞ ሙዔ፤ ጎጶም ዒዛ ኔኤኮ ጫንቃንዳኔ፤ ዻንጋ ኔኤኮ ጋዓንቴ ዔኤሲጉዲ ዓኣፃንዳኔ» ታኣም ጌዔኔ።

¹⁰ታኣኒ ዻኮ''፥ ማሪንቴ ማፃኣፔሎ ኪኢታንቻሢ ኩጫፓ ዔኪ ሙዓዛ ዻንጋ ታኣም ዔኤሲጉዲ ዓኣፄኔ፤ ጊንፃፓ ታኣኮ ጎጳ ዒዛ ጫንቄኔ።

¹¹ዬካፓ ሃሣ፦ «ሚርጌ ዓሶ ዜርፆ ዛሎ''፥ ዱማ ዱማ ዴሮ''ና ዱማ ሙኡጮ ጌስታ ዓሶና ካኣቶ''ና ዛሎ'' ላሚ ሃሣ ፆኦሲ ማሊሢ ኬኤዛንዳያ ኔና ኮይሳኔ» ታኣም ጌይንቴኔ።