Read maale ዮሓኒሴም ፆኦሲ ፔጋሲ ዻዌ ባኮ 11 Bible Online

ዮሓኒሴም ፆኦሲ ፔጋሲ ዻዌ ባኮ 11 - maale bible

ዮሓኒሴም ፆኦሲ ፔጋሲ ዻዌ ባኮ 11

¹ዬካፓ ዖዶሱሞና ዳልጉሞና ሃሣ ዔጶና ዋርቆያ ዎኦሺ ማላ ሚሢ ታኣም ዒንጊንታዖ፦ «ዓኣዺ፥ ፆኦሲኮ ጌኤዦ ማኣሮና ፆኦሲም ዒንጊፆ ዒንጎ ቤዞና ዋርቄ፤ ሃሣ ዒኢካ ካኣሽካ ዓሶዋ ፓይዴ፤

²ጌኤዦ ማኣሮኮ ዙላ'' ዓኣ ጶኦኮ'' ጋዓንቴ ዋርቂፖ፥ ሃሼ''፤ ዬይ፦ ሜሌ'' ዴሮ''ም ዒንጊንቴ ቤሲኬ፤ ዔያታ ፆኦሲም ዱማዼ ካታሜሎ ዖይዲታሚ'' ላምዖ ዓጊኒ ጉቤ ባሺ ዎይሣንዳኔ፤

³ላምዖ ታኣኮ ማርኮንሢ ሲዬ ፓቲሌ ማይንቲ ፔቴ'' ሺያና ላምዖ ፄኤታና ላሂ''ታሚ'' ኬሊ'' ታ ማሊሢ ኬኤዛንዳጉዲ ዎልቄ ታ ዔያቶም ዒንጋንዳኔ» ጌይንቴኔ።

⁴ዬንሢ ማርኮንሢ ሳዖይዳ ጎዳ ቤርታ ዔቃ፥ ላምዖ ሪሚቶ ሚፆንሢና ላምዖ ፖዖ ጌሦ ሻርኖንሢናኬ፤

⁵ዖኦኒያ ዔያቶ ማኣሳንሣኒ ማሌቶ ታሚ ዔያቶ ዻንጋፓ ኬስኪ ዬያቶ ሚቻንዳኔ፤ ዔያቶ ማኣሳንሣኒ ኮዓሢ ቢያ ሓይቃንዳ ጎይፃ ዬያይዲኬ።

⁶ዔያታ ታ ማሊፆ ኬኤዛ ዎዶ''ንሢዳ ዒርዚ ዋርቁዋጉዲ ጫሪንጮ ዲርቃኒ ዔያቶኮ ቢታንቶ ዓኣኔ፤ ዬያጉዲ ዋኣፆ ሱጉሢ ማሂ ላኣማኒ ኮዔ ዎዶ''ና ቢያ ዓይጎ ባኣዚ''ናኣ ማዖም ሳዖ ባይዛንዳ ባኣዚ''ና ጳርቃኒ ቢታንቶ ዔያቶኮ ዓኣኔ።

⁷ዔያታ ፔኤኮ ማርካቶ ጋፒሴሢኮ ጊንፃ ዼኤፖ፥ ዒጊቻ ዔታፓ ኬስካንዳ ቦዓሢ ዔያቶና ዖልቲ ባሻንዳኔ፤ ዎዺያ ዔያቶ ዎዻንዳኔ።

⁸ሌዛ ዔያቶኮ ኮኦኪንሢና ሶዶኦሜ፥ ሃሣ ጊብፄ ጌይንታ ዼኤፖ ካታሜሎኮ ዓሳ ቡካ ጶኦካ'' ኬኤሪንታንዳኔ፤ ዬና ካታሜላ ዔያቶኮ ጎዳሢ ሱፂንቴ ካታሜሎኬ።

⁹ዱማ ዱማ ዜርፃፓ፥ ቶኦካ''ፓ ሓሣ ዱማ ዱማ ሙኡቺ ጌስታ ዓሶና ዴሮ''ናይዳፓ ማዔ ዓሳ ሓይሦ ኬሊ''ና ዛላና ማዓንዳኣና ሌዞ ዔያቶኮ ዒኢካ ዓኣንቴ ዛጋንዳኔ፤ ሌዛ ዔያቶኮ ዱኡኪንቱዋጉዲ ላኣጊንታያ ማዓንዳኔ፤

¹⁰ዬንሢ፥ ላምዖ፥ ፆኦሲ ማሊፆ ኬኤዛዞንሢ ሳዖይዳ ናንጋ ዓሶ ሜታሴሢሮ ሳዖይዳ ናንጋ ዓሳ ዔያታ ሓይቄሢሮ ዎዛዻንዳኔ፤ ዬያ ዎዛ''ፓ ዔቄያና ዔያቶኮ ሓይቦ'' ኬሎ'' ቦንቾ ኬሊ'' ማሂ፥ ዎሊም ዒንጎ ባኣዚ''ያ ዒንጋንዳኔ፤

¹¹ሓይሦ ኬሊ''ና ዛላና ማዔሢኮ ጊንፃ ጋዓንቴ ሼምፖ ዒንጋ፥ ፆኦሲኮ ዑኡዛ ፆኦሲዳፓ ሙኪ ሌዛ ዔያቶኮ ጌሌም፥ ዔያታ ዔቄሢሮ ዔያቶ ዛጌ ዓሳ ሚርጌና ዒጊጬኔ።

¹²ዬካፓ ላምዖ ፆኦሲ ማሊፆ ኬኤዛዞንሢ፦ «ሓንጋ ኬስኩዋቴ!» ጋዓ ዼኤፒ ዑኡሲ ጫሪንጫፓ ዋይዜኔ፤ ዬማና ዔያቶኮ ሞርካ ዔያቶ ዛጋ ጎይሣ ዓኣንቴ ሻኣሬና ሌካ ጫሪንጮ ዔያታ ዓኣዼኔ።

¹³ዒማ''ና ሳዓ ሚርጌ ዓጊፄኔ፤ ካታሜሎኮዋ ታጶይዳፓ ፔቴ''ማ ማዓ፥ ቤዛ ቢያ ዶዒ ጋፔኔ፤ ዬያይዲ ዓጊፂፆና ላንካይ ሺያ ዓሲ ሓይቄኔ፤ ሓይባ''ፓ ዓቴዞንሢ ሚርጌና ዒጊጪ፥ ጫሪንጮ ፆኦዛሢ ጋላቲ፥ ቦንቼኔ።

¹⁴ላምዓሳ ሜታሢ ዎዳ'' ጋፔኔ፤ ሓይሾ ዓካሪ ሃይሣሳ ሜታሢ ዎዳ'' ዑኬና ዬዓንዳኔ።

¹⁵ላንካሳ ኪኢታንቻሢ ዛያሢ ዋርቃዛ፥ ጫሪንጮይዳ፦ «ዓጮ'' ካኣቱማ ኑ ጎዳሢ ማዔ ፆኦዛሢና ዒዛኮ ሜሲሔናም ማዔኔ፤ ዒዚያ ናንጊና ካኣታዻንዳኔ» ጋዓ ዼኤፒ፥ ዼኤፒ ዑኡሲ ዋይዚንቴኔ።

¹⁶ፆኦሲ ቤርታ፥ ካኣቱሞ ዖይቶይዳ ዴዒ ዓኣ፥ ላማታሞ ዖይዶ ጋርቾንሢ ባሊቶና ሳዖ ባንሢ ሂርኪ ጌዒ ጉምዓቲ ፆኦሲም ዚጌኔ፤

¹⁷ዔያታ ዚጋ ዎዶ''ና፦ «ሓሢ ዓኣያ ሚናፓ ናንጋያ ቢያ ባኣዚ'' ዳንዳዓ ጎዳ ማዔ ፆኦዛሢዮ! ዼኤፖ ዎልቆ፥ ኔኤሮ ኔ ማሄሢሮ ሓሣ ኔ ካኣታዼሢሮዋ ኔና ኑ ጋላታኔ።

¹⁸ሜሌ'' ዴራ'' ሚርጌና ዻጋዼኔ፤ ሃሣ ኔ ዻጋ''ኣ ሙኬኔ፤ ሓይቄ ዓሶይዳ ኔ ዎጋ ዎዳ''ኣ ሄሌ''ኔ። ኔኤም ማዻ፥ ኔ ማሊፆ ኬኤዛዞንሢና ኔኤም ዱማዼዞንሢና ሱ'ንፆዋ ኔኤኮ ቦንቻዞንሢም ዻኮ''ና ዼኤፖ ማዔዞንሢናም ዔያታ ማዼሢ ዛሎ'' ማሂ ኔ ዒንጋንዳ ዎዳ'' ሓሣ ዓጮ'' ባይዜዞንሢያ ኔ ባይዛንዳ ዎዳ'' ሄሌ''ኔ» ጌዔኔ።

¹⁹ዬካፓ ጫሪንጫ ዓኣ፥ ፆኦሲኮ ጌኤዦ ማኣራ ቡሊ''ንታዛ ጋሮይዳ ዒዛኮ ጫኣቁሞ ሳኣፂና ዓኣያ ማዒ ጴዼኔ፤ ዬማና ዜኤሊንሢ ዜኤሊንሤኔ፥ ዼኤፒ ዑኡሲ ዋይዚንቴኔ፥ ጉጉንሢያ ጉጉንሤኔ፥ ሳዓኣ ዓጊፄኔ፥ ዼኤፒ ሻቺያ ኬዴ''ኔ።