Read maale ዮሓኒሴም ፆኦሲ ፔጋሲ ዻዌ ባኮ 12 Bible Online

ዮሓኒሴም ፆኦሲ ፔጋሲ ዻዌ ባኮ 12 - maale bible

ዮሓኒሴም ፆኦሲ ፔጋሲ ዻዌ ባኮ 12

¹ዬካፓ ዼኤፒ ሃሣ ዲቃሢ ሄርሺሳ ማላታ ጫሪንጮይዳ ጴዼኔ፤ ዒኢካ ዓቢ ማኣዖጉዲ ማይንቲ፥ ዓጊኖ ቶኪና ሄ'ርቂ ዔቂ፥ ሃሣ ታጶ ላምዖ ዦኦጌ ቦንቾሮ ዓጎ ባኮጉዲ ፔኤኮ ቶኦካ'' ዓጊንቲ ዓኣ ፔቴ'' ላኣሊስኬና ጴዼኔ።

²ዒዛ ጎጲና ዓኣያታዖ ሾይቺ ዓርቄም ሜታዺ ዒላቴኔ፤

³ዬያጉዲ ሃሣ ሜሌ'' ማላታ ማዔ ባኣዚ'' ጫሪንጫ ጴዼኔ፤ ዬይያ፦ ላንካይ ቶኦኪና ታጶ ጉራኒና ዓኣ፥ ዼኤፒ ዞቄ ፑኡፒ ሾኦሺ ጴዼኔ፤ ዒዚ ቶኦካ'' ቶኦካ'' ላንካይ ቦንቾሮ ዓጎ ባኮ ዓጊ ዓኣኔ፤

⁴ዒዚ ፔኤኮ ዑንኮና ዛላኮ ዛላ ጊንሢ ማዓ ዦኦጎ ቢያ ጫሪንጫፓ ጎቺ ዔኪ ሳዓ ኬኤሬኔ፤ ዬካፓ ላኣሌላ ሾዓዛ፥ ናዖ ሙዓኒ ላኣሌሎኮ ቤርታ ዔቄኔ፤

⁵ላኣሌላ ዓጮ'' ዴሮ'' ቢያ ባሺ፥ ዎይሣንዳ ዓቲንቄ ናይ ሾዔኔ፤ ናዓሢ ጋዓንቴ ሌካ ፆኦሲኮ ካኣቱሞ ዖይቶ ባንሢ ዔውቴኔ፤

⁶ዒማ''ና ላኣሌላ ዓሲ ናንጉዋ ዳውሎ'' ዓኣሺንቲ ዓኣዼኔ፤ ዒኢካ ፔቴ'' ሺያና ላምዖ ፄኤታና ላሂ''ታሚ'' ኬሊ'' ኮይሳ ባኣዚ'' ቢያ ዒንጊ ካፒንታንዳ ቤሲ ፆኦሲ ዒዞም ጊኢጊሼኔ።

⁷ዬካፓ ጫሪንጮይዳ ዖልዚ ዔቄኔ፤ ዒኢካ ሚካዔኤሌ ጌይንታ ኪኢታንቻሢና ዒዛም ዓይሢንቲ ማዻ ኪኢታንቻ ዼኤፖ ሾኦዣሢና ዒዛኮ ኪኢታንቾና ዎላ'' ዖልቲሢ ዓርቄኔ፤

⁸ጋዓንቴ ዼኤፖ ሾኦዣሢና ዒዛኮ ኪኢታንቾና ባሺንቴኔ፤ ዬማፓ ጫሪንጫ ዔያቶኮ ቤሲ ባይቄኔ።

⁹ዼኤፖ ሾኦዣሢ ሊካ ሳዓ ኬኤሪንቴኔ፤ ዬይ፦ ዓሶ ቢያ ዻቢሻሢ፥ ዲያቢሎሴ ሃሣ ጊንሣ ፃላሄ ጌይንታ ሚናኣ ሾኦዣሢኬ፤ ዒዛና ዎላ'' ዒዛኮ ኪኢታንቻኣ ኬኤሪንቴኔ።

¹⁰ዬካፓ ፔቴ'' ዼኤፒ ዑኡሲ ጫሪንጮይዳ፦ «ዓካሪ፥ ዻቂሺሢና ዎልቄና ሃሣ ካኣቱሞዋ ኑ ፆኦዛሢም ማዔኔ፤ ቢታንቶዋ ሜሲሔም ማዔኔ! ዎይቲ ጌዔቴ ኑ ዒሾንሢና ኑ ሚሾንሢና ኑ ፆኦዛሢ ቤርታ ዋንቴና ሮኦሪና ‹ዔያታ ዻቤያኬ› ጌዒ ፑሽካሢ ኬኤሪንቴኔ።

¹¹ዔያታ ማራዓሢኮ ሱጉፆና ሃሣ ዔያታ ማርካዼ ማርካቶና ዖሊ ዔያታ ዒዛ ባሼኔ፤ ፔ ሼምፓሢ ሃሣ ዔያታ ሚጪንቱዋዖ ፔና ሃይቢም ዓኣሢ ዒንጌኔ፤

¹²ዬያሮ ጫሪንጮና ዒኢካ ናንጋዞንሢዮ ዎዛዹዋቴ! ሳዖንታ ባዞ''ንታ ዒንሢም ጋዓንቴ ባዴዔቴ! ዓይጎሮ ጌዔቴ ዲያቢሎኦሴ ዒ ማዻንዳ ዎዳ'' ዻካ'' ሌሊ ዓቴ''ሢ ዔሪ ዼኤፒ ዻጋና ዒንሢ ባንሢ ኬዴ''ኔ» ጋዓንቴ ታ ዋይዜኔ።

¹³ዼኤፖ ሾኦዣሢ ሳዖይዳ ኬኤሪንቴሢ ዛጋዖ ዓቲንቆ ናዓሢ ሾዔ ላኣሌሎ ዳውሴኔ፤

¹⁴ዬማና ላኣሌላ ዓሲ ናንጉዋ ዳውሎይዳ ዒዞም ጊኢጊሾና ቤዞ ባራኒ ዓኣዻንዳጉዲ ዼኤፒ፥ ኮኦኬ ጋኣሲ ማላ ላምዖ ጋኣሲ ዒዞም ዒንጊንቴኔ፤ ዬይያ፦ ዒኢካ ሾኦዣሢዳፓ ሃኪ ሓይሦ ሌዔና ዛላና ኮይሳ ባኣዚ'' ዒዞም ዒንጊንቴም ሜታ ባኣያ ናንጋንዳጉዲኬ።

¹⁵ላኣሌሎ ዲጲ ሙዓንዳጉዲ ሾኦዣሢ ዎርዚ ዋኣሢጉዴ፥ ዺቢ ዋኣሢ ዻንጋፓ ኬሲ'' ላኣሌሎ ጊንፆ ጮኦሽኬኔ።

¹⁶ሳዓ ጋዓንቴ ላኣሌሎ ማኣዳ''ኒ ሾኦኪንቲ፥ ዼኤፖ ሾኦዣሢ ፔ ዻንጋፓ ኬሲ'' ላኣሌ ዋኣፆ ዑሽኬኔ።

¹⁷ዒማ''ና ሾኦዣሢ ላኣሌሎይዳ ዻጋዺ ፆኦሲ ዓይሢፆ ካፓዞንሢና ዬሱሴም ጉሙርቂንታያ ማዒ ማርካዻ፥ ዒዞ ዜርፃፓ ዓቴዞንሢና ዖልታኒ ዓኣዼኔ።

¹⁸ዼኤፖ ሾኦዣሢ ባዞ'' ዓጫ ዓኣ፥ ማኣሻላ'' ዔቄኔ።