Read maale ዮሓኒሴም ፆኦሲ ፔጋሲ ዻዌ ባኮ 15 Bible Online

ዮሓኒሴም ፆኦሲ ፔጋሲ ዻዌ ባኮ 15 - maale bible

ዮሓኒሴም ፆኦሲ ፔጋሲ ዻዌ ባኮ 15

¹ዬካፓ ሜሌ'' ዼኤፒ ሃሣ ዲቃሢ ሄርሺሳ ማላታ ጫሪንጫ ታ ዛጌኔ፤ ዬይያ፦ ፆኦሲ ዻጋ'' ዔያቶና ኩማያ ማዔ፥ ላንካይ ባይዛ ባኣዚ'' ዔኪ ዓኣ፥ ላንካይ ኪኢታንቾ ታ ዛጌኔ።

²ዒማ''ና ሃሣ ታሚ ሲኢሪንቴያ ሌማሌኤሼ ባዚ'' ማላያ ታ ዴንቄኔ፤ ዒኢካ ባዞ'' ዓጫ ቦዓሢና ቦዓሢኮ ማላቶና ሃሣ ዒዛ ሱ'ንፆ ፓይዶ'' ዖሊ ባሼ ዓሳ ዔቂ ዓኣንቴ ታ ዴንቄኔ፤ ዔያታ ፆኦሲዳፓ ዒንጊንቴ ጎኦላ'' ዔኪ ዓኣኔ፤

³ዔያታ ፆኦሲም ማዻ፥ ሙሴ ዓይኑሞና ማራዓሢናኮ ዓይኑሞ፦ «ቢያ ባኣዚ'' ዳንዳዓ ጎዳ ማዔ ፆኦዛሢዮ! ማዻ'' ኔኤኮ ዼኤፒ ሃሣ ዲቃሢ ሄርሺሳያኬ፤ ሚርጌ ዴሮ''ኮ ካኣታ''ሢዮ! ኔኤኮ ጎይፃ ፒዜ ሃሣ ጎኔኬ።

⁴ጎዳሢዮ! ኔና ዒጊጩዋያ ሓሣ ሱ'ንፆዋ ኔኤኮ ቦንቹዋይ ዖናዳይ? ኔኤኒ ሌሊ ዱማዼያኬ። ኔኤኮ ፒዜ ማዻ'' ፔጋዺ ዔርቴሢሮ ዺቦ'' ዴራ'' ቢያ ሙኪ ኔ ቤርታ ኔኤም ዚጋንዳኔ» ጌዒ ጌዒ ዓይናዻኔ።

⁵ዬካፓ ሃሣ ዓፒላና ማዢንቴ፥ ፆኦሲም ዱማዼ፥ ጌኤሺ ማኣሪ ጫሪንጫ ቡሊ''ንቲ ዓኣንቴ ታ ዛጌኔ፤

⁶ዒማ''ና ላንካዎ ባይዛ ባኮንሢ ዔኪ ዓኣ፥ ላንካይ ኪኢታንቻ ጌኤዦ ማኣራፓ ኬስኬኔ፤ ዬያታ ዓኣፒዳ ዱካ ቦኦሬ ማኣዖ ማይንቲ ዓኣኔ፤ ሃሣ ዳዶ''ይዳኣ ዎርቄና ኮሺ''ንቴ ቃልሾ ቱኡቲ ዓኣኔ።

⁷ዬኖና ዖይዶ ባኮንሢዳፓ ፔቴ''ሢ ናንጊና ናንጋ ፆኦዛሢኮ ዻጋ'' ኩሚ ዓኣ፥ ዎርቆና ኮሺ''ንቴ ላንካይ ዑሺ ዓንጊ ላንካዎ ኪኢታንቾንሢም ዒንጌኔ፤

⁸ሃሣ ጌኤዦ ማኣራ ፆኦሲኮ ቦንቾና ዎልቆናይዳፓ ኬስካ ጩቦ''ና ኩሜኔ፤ ላንካዎ ኪኢታንቾንሢኮ ላንካዎ ባይዛ ባኮንሢ ማዺንቲ ኩማንዳያ ሄላ''ንዳኣና ዖኦኒያ ጌኤዦ ማኣሮ ጌላኒ ዳንዳዒባኣሴ።