Read maale ዮሓኒሴም ፆኦሲ ፔጋሲ ዻዌ ባኮ 17 Bible Online

ዮሓኒሴም ፆኦሲ ፔጋሲ ዻዌ ባኮ 17 - maale bible

ዮሓኒሴም ፆኦሲ ፔጋሲ ዻዌ ባኮ 17

¹ላንካዎ ዑዦ ዓንጎ ዔኪ ዓኣ፥ ላንካዎ ኪኢታንቾንሢፓ ፔቴ''ይ ታ ባንሢ ሙካዖ ታኣም፦ «ሓኒ ሙኬ፤ ሚርጌ ዋኣፆ ዑፃ ዴዒ ዓኣ፥ ዞኦዛ ኮኦማ ላኣሌሎም ዒንጊንታንዳ ሜታሢ ታ ኔና ዻዋንዳኔ፤

²ዓጮ'' ካኣታ'' ዒዞና ዎላ'' ዞኦዛ ኮኦሜኔ፤ ሃሣ ዓጮ''ይዳ ናንጋ ዓሳ ዒዞኮ ዬያ ፑርቶ ሱኡኮ ማዾ'' ዑዦና ማሢንቴኔ» ጌዔኔ።

³ዬካፓ ኪኢታንቻሢ ዓያና ጌኤሺ ማሊፆይዳ ታና ጌልዚ፥ ዓሲ ናንጉዋ ዳውሎ'' ዔኪ ዓኣዼኔ፤ ዒኢካ ጫሺ ዑፆይዳ ቢያ ፃኣፒንቲ ዓኣ፥ ላንካይ ቶኦኪና ታጶ ጉራኒና ዓኣ፥ ዞቄ ቦዖስኬያኮ ዑፃ ዴዒ ዓኣ ፔቴ'' ላኣሊ ታ ዴንቄኔ።

⁴ላኣሌላ ጮልዔ ዲንኪ ማኣዖና ዞቄ ማኣዖና ማይንቲ ዓኣኔ፤ ጊንሣ ዎርቄና ዱማ ዱማ ሚዛጶ ሹጮና ፓልሚንቲ ዓኣኔ፤ ኩጮይዳ ሃሣ ዒዛ ሻኣካ ባኣዚ''ና ዒዞኮ ፑርቶ ሱኡኮ ማዾ''ና ኩሜያ፥ ዎርቄና ኮሺ''ንቴ ዑሺ ዓንጊ ዔኪ ዓኣኔ።

⁵ዒዞኮ ባሊቶይዳ፦ «ዞኦዛ ኮኦማ ዓሶና ዓጮ''ይዳ ፑርቶ፥ ዒኢቴ ማዾ''ናኮ ዒንዶ ማዔ ዼኤፖ ካታሜሎ ባብሎኔ» ጌይንታያ ዓኣሺንታያ፥ ዔርቱዋ ሱ'ንሢ ፃኣፒንቲ ዓኣኔ።

⁶ዬና ላኣሌላ ፆኦሲም ዱማዼ ዓሶኮ ሱጉፆና ዬሱስ ኪሪስቶሴ ዛሎ'' ማርካዻ ዓሶኮ ሱጉፆና ማሢንቲ ዓኣንቴ ታ ዛጌኔ፤ ታ ዒዞ ዴንቃዖ ሚርጌና ዲቃቲ ሄርሼኔ።

⁷ኪኢታንቻሢ ጋዓንቴ ታኣም፦ «ዓይጎሮ ኔ ዲቃቲ ሄርሻይ? ላኣሌሎና ዒዛ ዴዒ ዓኣ፥ ላንካዎ ቶኦኮ''ና ታጶ ጉራኖና ዓኣ ቦዓሢናኮ ዓኣሺንታያ ማዔ ዔርቱዋ ባኮ ታ ኔኤም ጋፒሲ ኬኤዛንዳኔ፤

⁸ኔኤኒ ዛጌ ቦዓሢ ቤርታ ዓኣያኬ፤ ሃሢ ጋዓንቴ ባኣሴ፤ ሃጊ ዼኤፖ፥ ዒጊቻ ዔቶይዳፓ ኬስኪ ባይቆሮ ዓኣዻንዳኔ፤ ዒማ''ና ሳዓ ማዢንቴማፓ ዓርቃዖ ሱ'ንፃ ናንጎ ማፃኣፖይዳ ፃኣፒንቲባኣያ፥ ሳዖይዳ ናንጋ ዓሳ፦ ቦዓሢ ቤርታ ዓኣያ፤ ሃሢ ጋዓንቴ ባኣያ ጊንፃፓ ሙካንዳያታሢ ዛጋዖ ዲቃቲ ሄርሻንዳኔ።

⁹«ዔሪ ማላ ዒኔና ዓኣያ ማዓኒ ኮይሳሢ ዒማ''ናኬ፤ ላኣሌላ ዴዒ ዓኣ ቶኦኮ''ንሢ ላንካይ ዹካኬ፤

¹⁰ዔያታ ላንካይ ካኣቶ''ኬ፤ ዔያቶይዳፓ ዶንጋሢ ሎኦሜኔ፤ ፔቴ''ሢ ሃሢ ዓኣኔ፤ ባጋሢ ጋዓንቴ ሃጊ ሙኪባኣሴ፤ ዒ ሙካዖ ካኣታዺ ዴዓኒ ኮይሳሢ ዻካ'' ዎዴሮ ሌሊኬ።

¹¹ቤርታ ዓኣያ፥ ሃሢባኣ ቦዓሢ ሳላ''ሳ ካኣታ''ሢኬ፤ ዒዚ ላንካዎ ካኣቶ''ንሢፓ ፔቴ''ሢኬ፤ ዒዚያ ባይቆሮ ዓኣዻኔ።

¹²«ኔኤኒ ዛጌ ታጶ ጉራና ሓጊ ካኣታዺባኣ፥ ታጶ ካኣቶ''ኬ፤ ጋዓንቴ ኮሺ'' ዻካ'' ዎዴ ቦዓሢና ዎላ'' ካኣታዻንዳ ቢታንቶ ዔያታ ዴንቃንዳኔ።

¹³ዬንሢ ካኣቶ''ንሢኮ ማሊፃ ፔቴ''ኬ፤ ዔያታ ፔኤኮ ዎልቆና ቢታንቶና ቦዓሢም ዒንጋንዳኔ፤

¹⁴ዬያታ ማራዓሢና ዎላ'' ዖልታንዳኔ፤ ጋዓንቴ ማራዓሢ ጎዳቶኮ ጎዳ ሃሣ ካኣቶ''ኮዋ ካኣቲ ማዔሢሮ ዖሎና ዔያቶ ባሻንዳኔ፤ ዒዛና ዎላ'' ዓኣ፥ ዔኤሊ''ንቴዞንሢንታ ዶኦሪንቴዞንሢንታ ሃሣ ጉሙርቂንታዞንሢያ ዖሎና ባሻያ ማዓንዳኔ» ጌዔኔ።

¹⁵ሓሣ ኪኢታንቻሢ ታኣም፦ «ዞኦዛ ኮኦማ ላኣሌላ ዴዒ ዓኣንቴ ኔ ዛጌ ዋኣፃ' ዱማ ዱማ ዜርሢ፥ ቶኦኪ፥ ዴሬ ሃሣ ዱማ ሙኡቺ ጌስታ ዺቢ ዓሲኬ፤

¹⁶ቦዓሢና ኔ ዛጌ ታጶ ጉራኖንሢና ዬኖ ዞኦዛ ኮኦማ ላኣሌሎ ዒፂ፥ ጉሪ ካሎ'' ዒዞ ዓይሳንዳኔ፤ ዒዞኮ ዓሽኮዋ ሙዒ፥ ታሚና ዒዞ ዔያታ ሚቻንዳኔ።

¹⁷ፆኦሲ ፔኤኮ ማሊፆ ዔያታ ኩንሣንዳጉዲ ዬያ ዔያቶ ዒኖይዳ ጌሤኔ፤ ዓይጎሮ ጌዔቴ ፆኦሲ ቃኣላ'' ማዺንቲ ኩማንዳያ ሄላ''ንዳኣና ዔያታ ፔቴ'' ማሊሢና ዎላ'' ጊኢጊ፥ ዔያቶኮ ካኣቱሞ ቢታንቶ ቦዓሢም ዒንጋንዳጉዲኬ።

¹⁸«ዬና ኔ ዛጌ ላኣሌላ ዓጮ'' ካኣቶ'' ዑፃ ካኣታዻንዳ፥ ዼኤፖ ካታሜሎኬ» ጌዔኔ።