Read maale ዮሓኒሴም ፆኦሲ ፔጋሲ ዻዌ ባኮ 18 Bible Online

ዮሓኒሴም ፆኦሲ ፔጋሲ ዻዌ ባኮ 18 - maale bible

ዮሓኒሴም ፆኦሲ ፔጋሲ ዻዌ ባኮ 18

¹ዬካፓ ሃሣ ዼኤፒ ቢታንቶ ዓኣ፥ ሜሌ'' ኪኢታንቾስኬይ ጫሪንጫፓ ኬዳ''ንዳቴ ታ ዛጌኔ፤ ዒዛኮ ቦንቾ ፖዖ ሼኤሪፃፓ ዔቄያና ሳዓ ፖዔኔ፤

²ዒዚ ዼኤፒ ዑኡሲና፦ «ዼኤፖ፥ ባብሎኔ ካታሜላ ሎኦሜኔ! ሎኦሜኔ! ፃላሄኮዋ ናንጊ ቤሲ ማዔኔ! ሃሣ ፑርቶ ዓያኖኮዋ ዎይሢ ቤሲ ማዔኔ፤ ፑርታ ሃሣ ሻኣካያ ማዔ፥ ካፖኮ ቢያ ዎይሢ ቤሲ ማዔኔ።

³ዴራ'' ቢያ ዒዞኮ ፑርቶ ሱኡኮ ማዾ'' ዑዦ ዑሽኬኔ፤ ዓጮ'' ካኣታ'' ዒዞና ዎላ'' ዞኦዛ ኮኦሜኔ፤ ሃሣ ዓጮ''ይዳ ኮርሞ ኮርማ ዓሳኣ ዑሣ ዓኣዼ ዒዛ ሳኣ ናንጊም ጊኢጋያታሢሮ ዖርጎጬኔ» ጌዒ ዒላቴኔ።

⁴ሓሣ ሜሌ'' ዑኡሲ ጫሪንጫፓ፦ «ታ ዴሬዮቴ! ዒዛ ማዻ ጎሞ ዒንሢ ማዹዋጉዲ ዒዞም ዓጎና ባይሲንቶና ዒንሢያ ባይቁዋጉዲ፤ ዒዞይዳፓ ኬስኩዋቴ።

⁵ዓይጎሮ ጌዔቴ ጎማ ዒዞኮ ኩሊንቲ ጫሪንጮ ሄሌ''ሢሮ ፆኦሲ ዒዞኮ ፑርቱሞ ጶቂሤሢሮኬ።

⁶ዒዛ ዒንጌማጉዲ ማሂ ዒንጉዋቴ፤ ዒዛ ማዼ ማዾ''ኮዋ ጳንጬ ዒዞም ማሁዋቴ፤ ዒዛ ሲኢሪ ዒንጌ ዑዦ፥ ጳንጬ ማሂ ሲኢሪ ዒዞም ዒንጉዋቴ።

⁷ዒዛ ፔና ቦንቺሲ ሳኣ ናንጊም ጊኢጋያ ማሄማጉዲ ዒዞ ሜታሲ ዖዪሱዋቴ፤ ዒዛ ፔኤኮ ዒኖና፦ ‹ታኣኒ ካኣቲ ማዒ ዴዔኔ፤ ዓኒ ታኣኮ ሓይቄያቱዋሴ፤ ፔቴ''ታዖ ዖዪያ ታ ዖዩዋሴ› ጌዒ ጌዒ ሄርሺንታኔ።

⁸ዬያሮ ዒዞም ዓጎና ባይሲንታ ፔቴ'' ኬሊ'' ዒዞ ሄላ''ንዳኔ፤ ሓይቢና ዖዪሢና ናይዚና ዒዞ ሄላ''ንዳኔ፤ ዒዞይዳ ዎጋ ጎዳ ማዔ ፆኦዛሢ ዼኤፒ ማዔሢሮ ታሚና ዒዛ ሚቺንታንዳኔ» ጋዓንቴ ታ ዋይዜኔ።

⁹ዒዞና ዎላ'' ዞኦዛ ኮኦሚ፥ ጊኢጋ ናንጊ ናንጌ፥ ሳዖ ካኣታ'' ዒዛ ሚቺንታ ዎዶ''ና ኬስካ ጩቦ'' ዛጊ ዒዞሮ ዒላቲ ዒላቲ ዬኤካንዳኔ።

¹⁰ዔያታ ዒዞይዳ ሄሌ'' ሜታሢ ዛጎ ዒጊጪ፥ ሃኬ ዔቂ፦ «ኔኤኒ ሓና'' ዼኤፖ ካታሜሌ! ኔኤኒ ሓና'' ፑኡፒ ማዔ፥ ባብሎኔ! ፑርቶ ዎጋ'' ኔ ጊዳ'' ዑኬና ሙኬሢሮ ባዴዔ ኔና! ባዴዔ ኔና!» ጋዓንዳኔ።

¹¹ዔያቶኮ ዋኣፆ ካኣሚላ ጫኣኔ ባኮ ሃካፓ ሴካ ሻንቃ ዓሲ ባኣሢሮ፥ ሳዖይዳ ኮርሞ ኮርማ ዓሳ ዒዞ ዛሎ'' ዬኤኪ ዖያንዳኔ፤

¹²ዔያታ ዋኣፆ ካኣሚሎይዳ ጫኣኔ ባካ፦ ዎርቄ፥ ቢራ ዓንጊ፥ ቦንቺንታ ሹቺ፥ ሚዛጲ ሹቺ፥ ቦኦሬ ሻኣዣ ዓፒላ፥ ጮልዔ ዲንኪ ማኣዓ፥ ሱኡፔ ዓፒላ፥ ዞቄ ዓፒላ፥ ቃራ ሳውቃ ዱማ ዱማ ሚሢ፥ ዳርሲ ዓቺንታ ሚርጌ ሚኢሼ ዔካ ሚሢንታ ሞኦና ዓንጊንታ ሜሌ'' ዓንጎንታ ቦኦሬ ሚዛጶ ሹጮንታይዳፓ ኮሺ''ንቴ ባካ ቢያ፥

¹³ሳውቃ ሚሢ ቁኡሪ፥ ዱማ ዱማ ሳውቃ ዼኤሻ፥ ካርቤ፥ ቲሺ፥ ዑንጄ፥ ዎይኖ ዑዣ፥ ሪሚቶ ዛይታ፥ ሺኢቺ ዺኢሊ፥ ዛርጌ፥ ባይ፥ ማራይ፥ ፓራ፥ ሳርጌላ ዖይታ፤ ዬያጉዲ ሃሣ ዓይሎ'' ማዔ ዓሶንታ ዖሎና ዲዒ ዔኮና ዓሶንታኬ።

¹⁴ዬንሢ ኮርሞ ኮርማዞንሢ፦ «ኔኤኒ ናሽካ ኮዦ ባካ ቢያ ኔ ጊዳ''ፓ ቤቲ፥ ዴንዴኔ፤ ኔኤኮ ዖርጎቹሞና ፓልሞና ቢያ ባይቄኔ፤ ማይ ዬይ ባካ ኔኤም ጊንሣ ጴዻዓኬ» ዒዞም ጋዓኔ።

¹⁵ዬያ ባኮ ዒዞይዳፓ ሻንቂ ኮርሚ ዖርጎጬ ኮርማ ዓሳ ዒዞይዳ ሄሌ'' ሜቶ'' ዒጊጪሢና ሃኬ ዒዞኮ ዔቃንዳኔ፤ ሃሣ ዔያታ ዒዞ ዛሎ'' ዬኤኪ ዬኤኪ ዖያንዳኔ፤

¹⁶ዑኡዞዋ ዔያታ ዼ'ጊዲ፦ «ሻኣዦ ዓፒሎንታ ዲንኮ ዞቄ ዓፒሎንታ ማይንታዞ ዎርቆና ሚዛጶ ሹጮና ፓልሚንቴዞ ዼኤፖ፥ ካታሜሎ ባብሎኔም ባዴዔ! ባዴዔ!

¹⁷ዬይ ቆላ'' ቢያ ኔጉዋዖ ኔኤኮ ባይቂባይ!» ጋዓንዳኔ። ዋኣፆ ካኣሚሎኮ ሱኡጋ ቢያ፥ ዋኣፆ ካኣሚሎ ቶጊ ዓኣዻ ዓሳ ቢያ፥ ዋኣፆ ካኣሚሎይዳ ማዻ ዓሶንታ ባዞ'' ዑፃ ሃንቲ ሃንቲ ኮርማ ዓሳ ቢያ ዒዞኮ ሃኬ ዔቃንዳኔ፤

¹⁸ዒዛ ሚቺንታኣና ኬስካ ጩቦ'' ዛጋዖ፦ «ሃኖ' ዼኤፖ ካታሜሎጉዴያ ሜሌ'' ካታማ ዎካዳይ?» ጌይ ጌይ ዔያታ ዒላቴኔ።

¹⁹ሃሣ ዔያታ ፔኤኮ ቶኦካ'' ሲላሊ ዋሂ፥ ዖዪ ዬኤኪ ዬኤኪ፦ «ባዞ''ይዳ ዋኣፆ ካኣሚላ ዓኣ ዓሳ ቢያ ዒዞ ቆሎ''ና ዖርጎጬ ዓሳ ዼኤፖ ካታሜላ ዑኬና፥ ኔጉዋዖ ባይቄሢሮ ባዴዔ! ባዴዔ!

²⁰ጫሪንቺዮ! ዒዛ ባይቄሢሮ ዎዛዼ፤ ዒንሢ ፆኦሲም ዱማዼዞንሢና ፆኦሲ ማዾ''ም ዳኪንቴዞንሢዮ ሓሣ ፆኦሲ ማሊፆ ኬኤዛዞንሢዮ ዎዛዹዋቴ፤ ዓይጎሮ ጌዔቴ፦ ፆኦሲ ዒንሢዳ ዒዛ ሄሊ''ሴ ሜቶ''ሮ ጌዒ ዒዞ ፑርታና ዎጌኔ» ጌይ ጌይ ዒላቴኔ።

²¹ዬካፓ ሃሣ ፔቴ'' ዼኤፒ ኪኢታንቻስኬይ ፑኡፒ ዎንሢ ሹቺጉዴ ሹቺ ዔኪ ባዞ''ይዳ ኬኤራዖ፦ «ዼኤፖ ካታሜላ፥ ባብሎኔ ሓኣዺዲ ዎልቄና ኬኤሪንታንዳኔ፤ ሓካፓ ሴካ ዒዛ ጴዻዓኬ፤

²²ጎኦሎ'' ዋርቃ ዓሶንታ ዓይኑሞ ዓይናዻ ዓሶ ዑኡዛ ሹሉንጎንታ ዛያሢንታ ዋርቃ ዓሶ ዑኡዛ ላሚ ኔ ጊዳ'' ማይ ዋይዚንታዓኬ፤ ዱማ ዱማ ባኣዚ'' ሃኣማቶና ማዻ ዓይጎ ዓሲያ ሃይፓ ሴካ ኔ ጊዳ'' ጴዻዓኬ፤ ዎንሢ ዎዺንታያኣ ማይ ኔ ጊዳ'' ዋይዚንታዓኬ።

²³ፖዓ፥ ፖዒያ ኔ ጊዳ'' ሓይፓ ሴካ ፖዓዓኬ፤ ዔፒ ሃይሴያ ሃይፓ ሴካ ኔ ጊዳ'' ዋይዚንታዓኬ። ኔ ዓጮ''ኮ ኮርሞ ኮርማ ዓሳ ዓጮ'' ቢያይዳ ዔርቴ ዼኤፖ ዓሶኬ፤ ኔኤኮ ማርሾና ዓሶ ቢያ ኔ ዻቢሼኔ።

²⁴ዒዞይዳ ፆኦሲ ማሊፆ ኬኤዛዞንሢንታ ፆኦሲም ዱማዼዞንሢንታ ሳዖይዳ ዎዺንቴ ዓሶኮዋ ቢያ ሱጉፃ ጴዼኔ» ጌዔኔ።