Read maale ዮሓኒሴም ፆኦሲ ፔጋሲ ዻዌ ባኮ 19 Bible Online

ዮሓኒሴም ፆኦሲ ፔጋሲ ዻዌ ባኮ 19 - maale bible

ዮሓኒሴም ፆኦሲ ፔጋሲ ዻዌ ባኮ 19

¹ዬካፓ ሚርጌ ዓሲ ዑኡሲ ማላ፥ ዼኤፒ ዑኡሲ ጫሪንጮይዳ፦ «ፆኦሲም ጋላታ! ዻቂሺሢና ቦንቾና ሃሣ ዎልቄያ ኑ ፆኦዛሢሮ ማዔኔ፤

²ዒዚ ዎጋ ዎጊፃ ጎኔ፤ ሃሣ ፒዜኬ። ዞኦዛ ኮኦሚፆና ሳዖ ዒኢሴ ዞኦዛ ኮኦማ ዼኤፔሎ ፑርታና ዒ ዎጌኔ፤ ዒዞ ፑርታና ዎጊፆና ዒዛም ማዻ ዓሶኮ ሱጉፆ ማሄኔ፤

³ላሚ ሃሣ ፆኦሲም ጋላታ! ዒዞይዳፓ ጩባ'' ናንጊና ጩቢ ጩቢ ኬስካኔ» ጋዓ ዑኡሲ ታ ዋይዜኔ።

⁴ዒማ''ና ላማታሚ'' ዖይዶ ጋርቾንሢና ዖይዶ ባኮንሢ ካኣቱሞ ዖይታ'' ዴዒ ዓኣ፥ ፆኦዛሢም ባሊቶና ሳዖ ባንሢ ሂርኪ ጌይ፦ «ዓኣሜን፤ ፆኦሲም ጋላታ!» ጌዒ ጌዒ ዚጌኔ።

⁵ዬካፓ፦ «ዒዛ ዒጊጪ፥ ዒዛም ማዻ ዻኮ''ንታ ዼኤፖንታ ቢያ ኑ ፆኦዛሢ ጋላቱዋቴ!» ጋዓ ዑኡሲ ካኣቱሞ ዖይታ'' ዓኣ ቤዛፓ ዋይዚንቴኔ።

⁶ሃሣ ጊንሣ ሚርጌ ዓሲ ዑኡሲ፥ ዼኤፒ ዎታ'' ዎርዚ ዋኣሢና ዼኤፒ ጉጉንሢ ዑኡሲ ማላ ዑኡሲ፦ «ቢያ ባኣዚ'' ዳንዳዓ ጎዳ ማዔ ፆኦዛሢ ካኣታዼሢሮ ጋላቱዋቴ!

⁷ማራዓሢኮ ዔፓ ሄሌ''ሢሮ ዒዛኮ ዑኡቴላ ጊኢጊንቴሢሮ ዎዛ ኑም ማዖንጎ፥ ኑ ዎዛዾም፤ ቦንቺያ ዒዛ ኑ ቦንቾም።

⁸ዓኣፒዳ ዱካያ፥ ጌኤሺ ማዔ ሻኣዣ ዓፒላ ማይንታንዳጉዲ ዒዞም ዒንጊንቴኔ፤ ዬይ ቦኦሬ ሻኣዦ ዓፒላ ፆኦሲም ዱማዼ ዓሶኮ ፂሉ''ሞ ማዾ''ኬ» ጋዓንቴ ታ ዋይዜኔ።

⁹ኪኢታንቻሢ ሃሣ፦ « ‹ማራዓሢኮ ዔፖ ሙዖም ዔኤሊ''ንቴ ዓሳ ባሊቲና ዓኣያኬ› ጌይ ፃኣፔ» ታኣም ጌዔኔ፤ ሄሊ''ሳዖ ሃሣ፦ «ሓይ ፆኦሲኮ ጎኔ ቃኣላኬ» ጌዔኔ።

¹⁰ታኣኒ ዬያ ኪኢታንቻሢም ዚጋኒ ዒዛ ቶኮ ዴማ'' ባሊቶና ሂርኪ ጋዓዛ፥ ዒዚ ጋዓንቴ፦ «ሃሼ''! ሓያይዲፖ! ታኣኒያ ኔናንታ ዬሱሴ ዛሎ'' ማርካዻ ዒሾንሢንታ ዎላ'' ማማዻያኬ፤ ፆኦሲም ዚጌ። «ዬሱሴ ፔጋሲ ዻዌ ጎኑማ ፆኦሲ ማሊፆ ኬኤዛ ዓሶ ዻንጎና ኬኤዛ ዓያኖኬ» ጌዔኔ።

¹¹ዬካፓ ጫሪንጫ ቡሊ''ንቴም፥ ዒኢካ ቦኦሬ ፓሮ ታ ዴንቄኔ፤ ፓራሢ ቶጌሢ፦ «ጉሙርቂንታያ ሃሣ ጎኔ ዓሲ» ጌይንታያኬ፤ ዒዚ ፂሉ''ሞና ዎጋያ ሃሣ ዖልታያኬ።

¹²ዓኣፓ ዒዛኮ ዔኤታ ታሚ ማላኔ፤ ሃሣ ዒዛኮ ቶኦኮ''ይዳ ቦንቾሮ ዓጎ ባካ ሚርጌ ዓጊንቲ ዓኣኔ፤ ዒዛይዳፓ ዓታዛ ሜሌ'' ዖኦኒያ ዔሩዋያ፥ ፃኣፒንቴ ሱ'ንሢ ዒዛይዳ ዓኣኔ፤

¹³ዒዚ ሱጉሢ ሄሊ'' ፑርቲሴ ማኣዖ ማይንቲ ዓኣኔ፤ ዒዛኮ ሱ'ንፃ «ፆኦሲ ቃኣላ» ጌይንታያኬ።

¹⁴ዒማ''ና ቦኦሬ ፓሮ ቶጌ፥ ቦኦሬ ጌኤሺ ዓፒላ ማይንቴ፥ ጫሪንጫ ዓኣ ዖሎ ዓሳ ዒዛ ጊንፆ ዓኣዻኔ፤

¹⁵ሜሌ'' ዴሮ'' ዖሊ ባሻንዳ ዓጬ፥ ጬንቻ ዓፓሮ ዒዛኮ ዻንጋፓ ኬስኬኔ፤ ዒዚ ሚጪንቱዋዖ ሄ'ርቂ ዔያቶ ዎይሣንዳኔ፤ ሃሣ ዒዚ ቢያ ባኣዚ'' ዳንዳዓ ፆኦዛሢኮ ዼኤፖ ዻጎና ዎይኖ ሄ'ርቂ ጩኡጶ ቤዛ ዎይኖ ሄ'ርቃንዳኔ፤

¹⁶ዒዛኮ ማኣዓሢና ጉባዞ''ናይዳ፦ «ካኣቶ''ኮ ካኣቲ፥ ጎዳቶኮ ጎዳ» ጋዓ ሱ'ንሢ ፃኣፒንቲ ዓኣኔ።

¹⁷ዬካፓ ሃሣ ፔቴ'' ፆኦሲኮ ኪኢታንቻ ዓቦ'' ዑፃ ዔቂ ዓኣንቴ ታ ዛጌኔ፤ ዒዚ ጫሪንጮይዳ ባራና ካፖም ዼኤፒ ዑኡሲና፦ «ፆኦሲ ጊኢጊሼ፥ ዼኤፖ ሙዖ ሙዓኒ ቡኪንቱዋቴ፤

¹⁸ዒንሢ ቡኪንታሢ ካኣቶ'' ዓሽኮ፥ ፖኦሊሶ ዓይሣ ዓሶ ዓሽኮ፥ ዖሎ ዖላ ዶዶ ዓሶ ዓሽኮ፥ ፓራሢ ቶጊ ዖላ ዓሶና ፓራሢና ዓሽኮ፥ ዎይሣ ዓሶና ዴማ'' ማዒ ዎርቃ ዓሶናኮ ዓሽኮ፥ ዻኮ'' ዓሶና ዼኤፖ ዓሶና ዓሽኮ፤ ዬያጉዲ ዓሲ ቢያኮ ዓሽኮ ሙዓኒኬ» ጌይ ዒላቴኔ።

¹⁹ሓሣ ቦዓሢንታ ሳዖ ካኣቶ''ንታ ፔኤኮ ዖላ ዓሶና ዎላ'' ቦኦሬ ፓራሢ ቶጌሢና ዒዛኮ ዖላ ዓሶና ዖልታኒ ቡኪንቲ ዓኣንቴ ታ ዛጌኔ፤

²⁰ጋዓንቴ ቦዓሢ ዓዺንቴኔ፤ ሃሣ ዒዛና ዎላ'' ዒዛ ቤርታ ዱማ ዱማ ዓኪ ባኣዚ'' ማዻ፥ ሉኡዙሞና ፆኦሲ ማሊፆ ኬኤዛሢያ ዓዺንቴኔ፤ ዒዚ ቦዓሢ ማላቶ ዔኪ ዓኣዞንሢና ዬያም ዚጋዞንሢ ዱማ ዱማ ዓኪ ባኣዚ'' ማዺ ዻዊሢና ዻቢሻኔ፤ ዒማ''ና ዬንሢ ላምዖንሢ ሼምፔና ዓኣ ጎይሣ ዓኣንቴ ዔኤታ ታሞ ባዞ''ይዳ ዓጊንቴኔ።

²¹ዓቴዞንሢ ሃሣ ቦኦሬ ፓራሢ ቶጌ ዓሢኮ ዻንጋፓ ኬስካ፥ ጬንቾ ዓፓራ ዎዼኔ፤ ዒማ''ና ካፓ ቢያ ዓሽኮ ዔያቶኮ ሙይ ሚሽኬኔ።