Read maale ዮሓኒሴም ፆኦሲ ፔጋሲ ዻዌ ባኮ 2 Bible Online

ዮሓኒሴም ፆኦሲ ፔጋሲ ዻዌ ባኮ 2 - maale bible

ዮሓኒሴም ፆኦሲ ፔጋሲ ዻዌ ባኮ 2

¹ሓሣ ኬኤዛዖ፦ «ዔፕሶኔ ሺኢጲፆ ማኣሮ ኪኢታንቻሢም ሂዚ ጌይ ፃኣፔ፤ «ሓይ፡ ላንካዎ ዦኦጋሢ ፔኤኮ ሚዛቆ ኩጫ ዓርቄሢና ላንካዎ ዎርቆ ሻርኖ ባኣኮ''ይዳ ሃንታ ዓሢ ኬኤዜያኬ፤

²ኔኤኮ ማዾ''፥ ዶዲ ኔ ማዻ ማዾ'' ሃሣ ጊቢ'' ዳንዳዒፆዋ ታ ኔኤሲ'' ዔራኔ፤ ፑርቶ ዓሶ ዛጊ ኔ ዚቲ ጌይባኣሢ፤ ሃሣ ፆኦሲ ማዾ''ም ዳኪንቲባኣያታዖ ‹ኑ ዳኪንቴያኬ› ፔና ጋዓዞንሢ ዛጊ ዱማሲ ሉኡዚ ዔያታ ማዔሢ ኔ ዔሬሢያ ታ ዔራኔ።

³ዬያጉዲ ጊቢ'' ዳንዳዒ፥ ኔኤኮ ዶዲፆና ታ ሱ'ንፆሮ ቤልፃዹዋዖ ዶዲ ሜታሢ ኔ ዔኬሢ ታ ዔራኔ።

⁴ጋዓንቴ ፔቴ'' ታ ኔኤኮ ቦሃ ባኣዚ'' ዓኣኔ፤ ዬና ዓይጎዳይ ጌዔቴ ኔኤኮ ቤርታኣ ናሹሞ ኔ ሃሼ''ኔ፤

⁵ዓካሪ ኔ ሓኣዒ ሎኦማንዳሢኮ ቤርታ ዎካ ኔ ዓኣቴያ ማሊ ጶቂሤ፥ ጎሞዋ ኔኤኮ ቡኡፄ፤ ቤርታ ማዻሢጉዲ ማዼ፤ ዬያ ቢያ ኔ ማዺባኣቴ ታ ኔ ኮይላ'' ሙካንዳኔ፤ ጎሞዋ ኔ ቡኡፂባኣቴ ፖዖ ጌሦ ሻርኖ ቤዛፓ ታ ኔኤኮ ሺኢሻንዳኔ።

⁶ጋዓንቴ ታ ኔና ሄርሻ ፔቴ'' ባኣዚ'' ዓኣኔ፤ ዬና፦ ታኣኒ ዒፃ፥ ኒቆላ ዓሶኮ ማዾ'' ኔኤኒያ ዒፄሢኬ።

⁷«ሺኢጲፆ ማኣሮ ዓሶም ዓያና'' ጋዓ ባኮ ዋይዛ ዋይዚ ዓኣሢ ዋይዞንጎ! ዖሎና ባሼሢ፡ ፆኦሲ ኮሼ''፥ ኮዦ ቤዛ ዓኣ ሼምፖ ዒንጋ ሚፃሢ ዓኣፖ ታ ሙኡዛንዳኔ።»

⁸ሃሣ ዒዚ ኬኤዛዖ፦ «ሴሜርኔሴ ሺኢጲፆ ማኣሮ ኪኢታንቻሢም ሂዚ ጌዒ ፃኣፔ፤ «ሓይ፡ ዓይፃሢና ጋፒንፃሢና ማዔያ ሃሣ ሃይቄዖዋ ሼምፖና ዓኣያ ማዔሢ ኬኤዜያኬ፤

⁹ኔኤኮ ሜታሢና ማንቃቶና ታ ዔራኔ፤ ያዺ ማዔቴያ ኔ ዖርጎቺኬ፤ ዓይሁዴ ዓሲቱዋዖ ‹ኑ ዓይሁዴኬ› ፔና ጋዓ ዓሶንታ ፃላሄ ዓሲ ማዔ ዓሶንታ ሱ'ንፆ ኔኤኮ ፑርቲሳሢ ታ ዔራኔ፤

¹⁰ኔና ሄላ''ንዳ ሜታሢ ዒጊጪፖ፤ ሓኣዛጉዋቴ፡ ፃላሄ ዒንሢ ዎይታቴያ ዛጋኒ ዒንሢዳፓ ፔቴ'' ፔቴ'' ዓሶ ቱኡሲ ማኣሪ ጌልዚ ቱኪ''ሴም፥ ታጶ ኬሊ'' ዒንሢ ሜታዻንዳኔ፤ ጋዓንቴ ሓይቢ ሄላ''ንዳኣና ጉሙርቂንታያ ማዔ፤ ቦንቺ ዒንጎ ባኣዚ'' ማሂ ዒንጊንታ ናንጎ ታ ኔኤም ዒንጋንዳኔ።

¹¹«ሺኢጲፆ ማኣሮም ዓያና'' ጋዓ ባኮ ዋይዛ ዋይዚ ዓኣሢ ዋይዞንጎ! ዖሎና ባሼሢ፡ ላምዓሳ ሓይባ'' ዎኦታንዳ ባኣዚ'' ባኣሴ» ጌዔኔ።

¹²ሓሣ ዒ ኬኤዛዖ፦ «ጴርጋሞኔ ሺኢጲፆ ማኣሮ ኪኢታንቻሢም ሂዚ ጌዒ ፃኣፔ፤ «ሓይ፡ ላምዖ ዛላ'' ዋርቂንቴ ጬንቾ ዓፓሮ ዓርቄሢ ኬኤዜያኬ፤

¹³ኔኤኒ ፃላሄኮ ካኣቱሞ ዖይታ'' ዓኣ ቤዛ ዓኣሢ ታ ዔራኔ፤ ያዺ ማዔቴያ ታ ሱ'ንፆ ዶዲ ኔ ዓርቄኔ፤ ካኣዦዋ ኔ ሃሺ''ባኣሴ፤ ሃሣ ታኣኮ ጉሙርቂንታ ማርካ ማዔ ዓንቲጳሴ ዬያ ፃላሄ ካኣታዼ፥ ዒንሢ ካታማ ዎዺንቴ ዎዶ''ናታዖ ኔ ታና ጉሙርቂፆ ሃሺ''ባኣሴ።

¹⁴ያዺ ማዔቴያ ታ ኔኤኮ ቦሃ ፔቴ'' ፔቴ'' ባኣዚ'' ዓኣኔ፤ ዬና ዓይጎዳይ ጌዔቴ ባኣላኣሜ ጎዖሢኮ ዔርዚፆ ዓርቄ ፔቴ'' ፔቴ'' ዓሲ ዒንሢ ባኣካ'' ዓኣኔ፤ ዬይ ባኣላኣሜ ዒስራዔኤሌ ዴራ'' ሜሌ'' ካኣሺም ሹኪንቴ ዓሽኮ ሙዓንዳጉዲና ማቾ ሃሣ ዓኒ ማዒባኣያና ላሂ፥ ዻቢንታንዳጉዲ ማሆም ጌዒ ባኣላኣቄ ጎዖሢ ዒ ዞሬ ዞሮ''ኬ።

¹⁵ዬያጉዲ ሃሣ ኒቆላ ዓሶኮ ዔርዚፆ ዓርቄ ዓሲያ ዒንሢ ባኣካ'' ዓኣኔ፤

¹⁶ዬያሮ ጎሞ ኔኤኮ ቡኡፄ! ሃንጎ ዑኬና ታ ኔ ኮይላ'' ሙኪ፥ ታ ዻንጋፓ ኬስካ ጬንቾ ዓፓሮና ታ ዔያቶ ጫርጋንዳኔ።

¹⁷«ሺኢጲፆ ማኣሮም ዓያና'' ጋዓ ባኮ ዋይዛ ዋይዚ ዓኣሢ ዋይዞንጎ! ዖሎና ባሼሢም ዓኣቺ ጌሦና፥ ማና'' ጌይንታ ሙዖ ታ ዒንጋንዳኔ፤ ሃሣ ጊንሣ ዓኪ ሱ'ንሢ ጊዳ'' ፃኣፒንቴ፥ ቦኦሬ ሹቺ ታ ዒዛም ዒንጋንዳኔ፤ ዬኖ ዔኬ ዓሢዳፓ ዓታዛ ሜሌ'' ዖኦኒያ ዬኖ ሱንፄሎ ዔራንዳያ ባኣሴ» ጌዔኔ።

¹⁸ሓሣ ዒ ኬኤዛዖ፦ «ቲያፂሮኔ ሺኢጲፆ ማኣሮ ኪኢታንቻሢም ሂዚ ጌዒ ፃኣፔ፤ «ሓይ፡ ዔኤታ'' ታሚ ማላ ዓኣፒ ዓኣያ፤ ሃሣ ታሚዳ ዓጊ፥ ጊልፒ ዞቂሶና ዓንጊ ማላ ቶኪ ዓኣ፥ ፆኦሲ ናዓሢ ኬኤዜያኬ፤

¹⁹ታ ኔኤኮ ማዾ''፥ ናሹሞ፥ ጉሙርቂፆ ሃሣ ኔኤኒ ዔኤዒ ማዻ ማዾ''ንታ ጊቢ'' ዳንዳዒ ዶዲፆንታ ዔራኔ፤ ቤርታኣስካፓ ሃሢ ኔ ባሼ ማዻሢያ ታ ዔራኔ።

²⁰ጋዓንቴ ፔቴ'' ታ ኔኤኮ ቦሃ ባኣዚ'' ዓኣኔ፤ ዬና፦ ‹ፆኦሲ ማሊሢ ታ ኬኤዛያኬ› ጋዓ ላኣሌሎ፥ ዔልዛቤሎኮ ማዾ'' ኔ ዛጊ ዚቲ ጌዔኔ፤ ዒዛ ጋዓንቴ ታኣም ማዻ ዓሳ ማቾ ሃሣ ዓኒ ማዒባኣያና ላሃንዳጉዲና ሜሌ'' ካኣሺም ሹኪንቴ ዓሽኮ ሙዓንዳጉዲ ዔርዚሢና ዓሶ ዻቢሼኔ።

²¹ዒዛ ጎሞ ፔኤኮ ቡኡፃንዳጉዲ ቤሲ ታ ዒዞም ጌሤኔ፤ ዒዛ ጋዓንቴ ጎሞ ፔኤሲ'' ቡኡፃኒ ኮይባኣሴ።

²²ዬያሮ ሃርጊሺ ታ ዒዞ ላይሣንዳኔ፤ ዒዞና ዎላ'' ማዼ ፑርቶ ማዾ'' ቡኡፂ ሃሺ''ባኣቴ ዒዞና ዎላ'' ላሄ ዓሶ ቢያሢዳ ዼኤፒ ሜቶ ታ ዔኪ ዬዓንዳኔ፤

²³ዒዞና ዎላ'' ዬያ ማዻ ዓሶ ታ ዎዻንዳኔ፤ ሺኢጲፆ ማኣሮ ዓሳ ቢያ ዓሲኮ ዒኔ ማሊሢ ጋፒሲ ዛጊ ታኣኒ ዔራያ ማዔሢ ዔራንዳኔ፤ ዒንሢ ፔቴ'' ፔቴ''ሢም ዒንሢኮ ማዾ'' ጎይፆ ታ ዒንጋንዳኔ።

²⁴«ዒንሢ፡ ቲያፂሮኔይዳ ዓኣያታዖ ሓያ ፑርቶ ዔርዚፆ ዔኪ ባኣዞንሢም ቢያ ዬያጉዲ ፔቴ'' ፔቴ''ዞንሢ ‹ፃላሄኮ ሃይ ዓኣሺንቴ ማሊሢኬ› ጋዓ ማሊፆይዳ ጌሊባኣዞንሢም፥ ሜሌ'' ዴኤሢ ዓይሥሢ ታ ዒንሢም ዓይሣዓኬ፤

²⁵ጋዓንቴ ታኣኒ ሙካዳንያ ሄላ''ንዳኣና ዒንሢኮ ዓኣ ጉሙርቂፆ ዶዲሺ ዓርቁዋቴ ታ ጋዓኔ።

²⁶ዖሎና ባሼሢና ታኣኮ ማዾ'' ጋፒንሢ ሄሊ''ሲ ዶዲ ማዼሢም ሜሌ'' ዴሮ'' ዑፃ ቢታንቶ ታ ዒንጋንዳኔ፤

²⁷‹ዒዚ ዔያቶ ሄ'ርቂ ዎይሣንዳኔ፤ ዓጪና ማዦና ሜሄጉዲ ዎዺ ዒ ጋኣጫንዳኔ› ዬይ ቢታንታ ታኣኒ ታ ዓዶይዳፓ ዔኬ ጎይፆጉዴያኬ፤

²⁸«ዒ ባሻያ ማዒፆ ዔርዛኒ ካሪፆ ዦኦጎ ታ ዒዛም ዒንጋንዳኔ።

²⁹«ሺኢጲፆ ማኣሮም ዓያና'' ጋዓ ባኮ ዋይዛ ዋይዚ ዓኣሢ ዋይዞንጎ!» ጌዔኔ።