Read maale ዮሓኒሴም ፆኦሲ ፔጋሲ ዻዌ ባኮ 6 Bible Online

ዮሓኒሴም ፆኦሲ ፔጋሲ ዻዌ ባኮ 6 - maale bible

ዮሓኒሴም ፆኦሲ ፔጋሲ ዻዌ ባኮ 6

¹ዬካፓ ማራዓሢ ላንካዎ «ቡሎ''ፖ» ጌይ ዓይሦና ዔርዛ ማላቶንሢዳፓ ቤርታሳዞ ቡላ''ንቴ ታ ዛጌኔ፤ ዒማ''ና ዖይዶ ባኮንሢዳፓ ፔቴ''ሢ ጉጉንሢጉዴ ዑኡሲና «ሓኒ ዬዔ!» ጋዓንቴ ታ ዋይዜኔ።

²ዒማ''ና ቦኦሬ ፓሮ ታ ዴንቄኔ፤ ዬያ ፓራሢ ዓኣዛ ዓርቄ ዓሲ ቶጊ ዓኣኔ፤ ዒዛም ቦንቾሮ ቶኦካ'' ዓጎ ባካ ዒንጊንቴኔ፤ ዒዚያ ዖሎና ባሻያ ማዒ ባሺ ባሺ ዓኣዻኒ ኬስኬኔ።

³ማራዓሢ ላምዓሳ ዔርዛ ማላቶ ቡሌ'' ዎዶ''ና ላምዓሳ ባካሢ «ሓኒ ዬዔ!» ጋዓንቴ ታ ዋይዜኔ።

⁴ሓሣ ሜሌ'' ሱጉሢጉዲ ዞቄ ፓራ ኬስኬኔ፤ ዬያ ቶጌሢም ሳዖይዳ ኮሺ ናንጊ ባይዛንዳጉዲና ዓሲ ዎሊ ዎዻንዳጉዲ ማሃንዳ ቢታንቶ ዒንጊንቴኔ፤ ዼኤፒ ጬንቻ ዓፓሮዋ ዒዛም ዒንጊንቴኔ።

⁵ማራዓሢ ሃይሣሳ ዔርዛ ማላቶ ቡሌ'' ዎዶ''ና ሃይሣሳ ባካሢ «ሓኒ ዬዔ!» ጋዓንቴ ታ ዋይዜኔ፤ ዒማ''ና ታ ሃሣ ካርሢ ፓሮ ዴንቄኔ፤ ዬያ ፓራሢ ቶጌሢ ኩጫ ዴኤሡሞ ዔርዛ ባኣዚ'' ዔኪ ዓኣኔ።

⁶ዬካፓ ዖይዶ ባኮንሢ ባኣካ''ፓ ዑኡሲጉዴ ባኣዚ'' ታኣም ዋይዚንቴያ ማሌኔ፤ ዬና ዑኡዛ «ዛላ ኪሎ ማዓ ዛርጌ ፔቴ'' ኬሊ'' ማዾና ማዾ'' ዛላ ዒንጊንታያ፥ ፔቴ'' ኪሎና ዛላና ማዓ ዔልዓ ዬኖ ጎይፆ ፔቴ'' ኬሊ'' ማዾ ማዼም ዒንጊንታያ ማዖም፤ ዛይቶና ዎይናፓ ኮሾ''ና ዑዦና ጋዓንቴ ፑርቲሲ፥ ባይዚፖ» ጋዓንቴ ታ ዋይዜኔ።

⁷ማራዓሢ ዖይዳሳ ዔርዛ ማላቶ ቡሌ'' ዎዶ''ና ዖይዳሳ ባካሢ «ሓኒ ዬዔ!» ጋዓንቴ ታ ዋይዜኔ፤

⁸ዬማና ጋላፒ ፓሮ ታ ዴንቄኔ፤ ዬያ ቶጊ ዓኣ፥ ዓሢኮ ሱ'ንፃ ሓይቢ ጌይንታያኬ፤ ዒዛኮ ጊንፆ ዓርቂ ሓይቄ ዓሳ ኬዳ'' ቤዛ ሙኪ ሙኪ ዓኣኔ፤ ዔያቶም ሳዖኮ ዛሎ''ኮ ዛሎ'' ዖልዚና፥ ናይዚና፥ ፑርታ ዶርዖና ሃሣ ካይዚ ቦዖና ዎዺሺ ባይዛንዳጉዲ ቢታንቶ ዒንጊንቴኔ።

⁹ዶንጋሳ ዔርዛ ማላቶ ዒ ቡሌ'' ዎዶ''ና ፆኦሲ ቃኣሎ''ና ዔያታ ማርካዼ ማርካቶ ዛሎ''ናሮ ጌይ ዎዾና ዓሶኮ ሼምፓሢ ፆኦሲም ዒንጊ ካኣሽኮ ቤዞኮ ዴማ'' ዓኣንቴ ታ ዴንቄኔ፤

¹⁰ዔያታ ዼ'ጊ ጌዔ ዑኡሲና፦ «ዱማዼያ ሃሣ ጎኔ ማዔያ፥ ቢያሢኮ ዑፃ ማዔ ጎዳሢዮ! ሳዖይዳ ዓኣ ዓሶይዳ ኔ ዎጉዋኣሢና ኑ ሱጉፆ ዛሎ''ዋ ኮሞ ኔ ዔኩዋኣሢ ዎማ ሄላ''ንዳኣናዳይ!» ጌዒ ጌዒ ዒላታኔ።

¹¹ዬካፓ ፔቴ'' ፔቴ''ዞንሢም ቦኦሬ ማኣዓ ዒንጊንቴኔ፤ ሃጊ ዔያቶጉዲ ዎዾንዶ፥ ፆኦሲም ማዻያ ማዔ፥ ዔያቶኮ ላጎ ሃሣ ዒሾንሢ ማዔዞንሢኮ ፓይዳ'' ኩማንዳያ ሄላ''ንዳኣና ዻካ'' ዔያታ ጊቢ'' ዳንዳዒ ዴዓንዳጉዲ ዔያቶም ኬኤዚንቴኔ።

¹²ዬካፓ ማራዓሢ ላሃ''ሳ ዔርዛ ማላቶ ቡላ''ንቴ ታ ዛጌኔ፤ ዬማና ሳዓ ሚርጌና ዓጊፄኔ፤ ዓባ'' ካርሢ ዓፒላጉዲ ካርታዛ ዓጊና ጉቤና ሱጉሢጉዲ ዞቄኔ፤

¹³ዼኤፒ ዢባሬ ቤሌሴ ሚፆ ዓጊሣ ዎዶ''ና ካፂባኣ ዓኣፓ ሚፃፓ ዲኢናሢጉዲ ጫሪንጮ ዦኦጋሢያ ዲኢኔኔ።

¹⁴ጫሪንጫ፡ ማሪንቴ ማፃኣፖጉዲ ማዒ፥ ማርቲ ዴንዴኔ፤ ሃሣ ዹኮ''ንታ ዋኣፆ ሳዛ'' ዓኣ ዓጫ'' ዓኣ ቤዛፓ ሺኢኪ ባይቄኔ።

¹⁵ዓጮ''ኮ ዱማ ዱማ ካኣታ''፥ ዎይሣ ዓሳ፥ ፖኦሊሶ ዓይሣ ዓሳ፥ ዖርጎጮ ዓሳ፥ ዶዶ ዓሳ፥ ዴማ'' ማዒ ማዻ ዓሶንታ ማዺሻ ዓሶንታ ቢያ ዴኖ ባኣካ'' ዓኣ ዔቶና ዹኮ''ና ሃሣ ላሎ ቆኦፖናይዳ ዓኣሺንቴኔ፤

¹⁶ዬካፓ ዹኮ''ና ላሎናም፦ «ኑ ዑፆይዳ ዶዑዋቴ! ካኣቱሞ ዖይቶይዳ ዴዔሢና ማራዓሢናኮ ጎሪ''ንታፓ ኑና ዓኣቹዋቴ!

¹⁷ዓይጎሮ ጌዔቴ ዼኤፖ ዔያቶኮ ጎሪ''ንቶ ኬላ'' ሙኬሢሮ ዖኦኒ ዬያኮ ቤርታ ዔቃኒ ዳንዳዓንዳይ?» ጌዔኔ።