Read majang Maatiyoos 11 Bible Online

Maatiyoos 11 - majang bible

Maatiyoos 11

¹Saaɓa Yeese ruumeeɗ sekiyɛ nomtaanaka gɛɛna sigɛɛga aarin a pɛɛyk. Nɛɓa ŋaar rɔɔriyɔɔna a laaganyɔɔna katamɛɛka Gɛlilaak.

²Saaɓa arkiɗ Yowanis godeey korkoɗɔɔnoŋkuk. Nɛɓa tiyɛ ijaag agut Kereseek, nɛɓa wosɛyɛ nomtaanak gɛɛŋk,

³nɛɓa kɔɔniyar Yeesee kɛ, "Iin sinɛɓa tonɛɛ kɛ mɛlkikoynɔŋɔŋk, maŋk in koorii iɗit om?"

⁴Nɛɓa Yeese jumur sɛɛga kɛ, "In kɛɛɗɛɛ tonɛɛ Yowanisa any sinɛkɔ tiyɛɛrik a sinɛkɔ dɛnɛɛrik.

⁵Dɛnɗi motak, ŋawiiter nyɔŋtaanak, bɔdɛr joop sigɔ gorur dɔɔɓɔyk, tiiɗi joop sigɔɓa kir tiiɗitik, ŋaararki joop sigɔɓa rɛrarŋɔŋk ret walasa, waasɛɛ Pɛɛni sinɔ Ɓɛlkɛɛstank sankaanaka.

⁶Iɗit sinɔ ki toŋoɗ ŋaadiyɛ eeteek geetitan."

⁷Saaɓa ŋaararɗi nomtaanak Yowanisik, nɛɓa Yeese tonu agut Yowanis joopa sigaaga ɓɔɔkaak kɛ, "Ŋaararkɔɔ paatoona kɛnɔ dɛnɛɛr jikon? Iɗit sinɔ weewer koɓi nɛɛk a ito sombal sinɔ yike yoŋgoyk?"

⁸Maŋk ŋaararkɔɔ kɛnɔ dɛnɛɛr jikon? Iɗit sinɔkan kadi abiyak sigɔ obi gati nɛɛkɛŋɔŋk? Joop sigɔkan kadir abiyak sigɔ obi gati nɛɛkɛŋɔŋk ɓɛɛlɛr godeey suumiyɛɛkoŋkuŋ.

⁹Ŋaararkɔɔkan kɛnɔ dɛnɛɛr jikon? Iɗit pɛrkaakoŋk? Eekeerɛ tona kɔnaaŋ, Ii, Sɛɛn sinɛ iɗit pɛrkaakoŋkuk.

¹⁰Taapɛɛɓa Wargatɛɛ Waakoyotoŋk agut sɛɛn kɛ, 'Wosɛyɛɛrakoy wosɛytan naak iine ɔɗɔɔkɛ, sinɔkoy isiise gopan nook iine ɔɗɔɔkɛ.'

¹¹Eekeer tona kɔnaaŋ, kɛɛ iɗit sinɔ kaalɛ Yowanis sinɛ A'aadiik, joope sigaagɛɓa ɓartɛɛk baŋɛk kɔɔr, mayakana burɛɛ dariyoŋk iɗit sinɛ tɛmk kaalɛ sɛɛniŋ.

¹²Ŋuujɛɛ burɛ dariyoŋk jɛt aɓa tukiɗi eme Yowanis sinɛ A'aadiik nɔ mɛlɛɛɗa sisɔwa. Paarir joop boŋiɗa ɓaŋkawukaat.

¹³Joop pɛrkaakoŋk baŋɛ a higi Muuseek nɔ mɛlɛɛɗa Yowanisa, tonurɓa pɛrkaaŋ.

¹⁴Ɔkɔn doomɛɛri a boŋiiriŋ, Eliyaas sinɛɓa tonɛɛ kɛ mɛlkikoyŋɔŋk Yowanis sini.

¹⁵Iɗit sinɔ lak weena sinɔ tiiɗiŋɔŋk, in tiyɛɗ.

¹⁶"Joop eme sinik rɔɔma sɛɛg a jikon? Gayi a tɔɔmɔk sigɔ beebeɗar nyon gabiyeyoŋk, nɛ riyar piraakak gɛŋk kɛ,

¹⁷'Gotii kɔna seetɛɛ nɛ kiir duubiyeet. Ariikɔna googiyoo, nɛ kiir wuɗaat.'

¹⁸Agut sinɔ kusaakɛɓa Yowanis a ki ada ɗama ɛ ki tuu ogool wɛynik, nɛɓa joop tonur kɛ, 'Lak nɔ wɛɛŋa sigɔ somkaanakik.'

¹⁹Kusɓa Tɔn Etoŋk a ɗami ɛ utiɗi ogool wɛynik, nɛɓa joop baŋɛ tonur kɛ, 'Ɗami a obiiŋ ɛ utiɗi, poru joop sigɔ yayawar worik a tikitaanak.' Ɗegerɛɛ ɗegerɔn ɛɛkoŋk iɗit sinɔ mentan taamɛkɛ Waakoyotoŋk ant sinaanɛ laŋɛɛ ijaagik."

²⁰Gɔɔnyɛɓa Yeese joop katamɛɛ sigɛɓa ijaag sɛɛga sɔɔriyɛ sigɔ ɓɔɔkaaŋɔŋkuk, agut sinɔɓa kirkiɗ weeriit tikiyɛɛkɛ Waakoyotak aɓa tonu sɛɛga kɛ,

²¹"Durikoy kɔna, iinaka joop Korajiinik! Durikoy kɔna, iinaka joop Beetɛsaydaak! Sɔɔriyɛ sigɛɓa ijaagɛɛ sɛɛg iinakɛ kɔɔr, ɔkɔnɓa ijaagɛɛ sɛɛg joopa Tiiroosuk a Sidoonaak, gunɓa gaɓɛr ɛɛka abiyak wuɗakoŋk ɗeeŋk, nɛ bokuyer ɛɛk taɗaput nɛ weeriik tikiyɛɛkɛ Waakoyota.

²²Eekeer tona kɔnaaŋ, ɓeny sinaanɛkoy pirdiyoŋk iinakɛ sɔgɔɔsɔyk, balaageeɗkoy pirdi nɛɛkɛ Tiiroos a Sidoonaa.

²³Iin Kipirnahoom, ɗɛyin a ɓɔŋgɔɔrun ɛɛk dariya? Kina gayɛ, guugunyunkoy siioola. Sɔɔriyɛ sigɛɓa ijaagɛɛ sɛɛg iinek, ɔkɔnɓa sɛɛg ijaagɛɛ Sɛdoome gunɓa beeɗ mɛlɛɛɗa ɓɛɛnyɔwase.

²⁴Eekeer tona kɔnaaŋ, ɓeny sinaanɛkoy pirdiyoŋk iinakɛ sɔgɔɔsɔyk balaageeɗkoy pirdi nɛɛkɛ ɗoo Sɛdoomuk."

²⁵Saaɓak tonuɓa Yeese kɛ "Iin Baabɛɛ sinɛ Suumi dariyoŋk a ɗookoŋkuk, pɔɔsaniŋ agut sinɔkɔ dugeeɗin any sini joope sigɔɔgɛ ɗegerar ɛɛkik, makɔ yaaŋin tɔɔmɔkaak.

²⁶Ii, Baabɛ, egekɔ sini ɗɛyan nook.

²⁷"Gaɓɛɓata Baabɛ any baŋɛ, kɛɛ iɗit sinɔ ɗeger Tɔɔn nɛɛkik ɗegeera Ɛpɛn dakɛɗa, kɛɛ iɗit sinɔ ɗeger Ɛpɛnik ɗegeera Tɔɔn nɛɛk dakɛɗa a iɗit sinɔ ɗɛyɛ Tɔn nɛɛkɛ a yaaŋgeeɗŋɔŋk.

²⁸"Iinak joop sigɛ bɔɔlaak sigɛkɔna ɗili diilk baŋɛ, in kusɛɛ son lak eetik, gaɓaakoy kɔna imiinyiŋ.

²⁹In ɓatakɛɛ toloy naak, in barɛɛ ɛɛk eete, eet iɗit sinɔ koɓi joopak ɛ iɗit sinɔ rikita ɛɛk naak ɗooka ɓayaay naakɛkik. Laŋiirkoy imiiny wɛɛŋaka goŋkuŋ.

³⁰Nyolnyol toloy naakɛŋ, maɓɔrɛ pɔyɔɔ diil naakɛŋ."