Read majang Maatiyoos 15 Bible Online

Maatiyoos 15 - majang bible

Maatiyoos 15

¹Saadi baŋiya joop Paarisik a rɔɔriytaanak higi Muuseek sigɛɓa kurak Yorsaleemek wideetarɓa ɛɛk son lak Yeeseek nɛ tonurgeeɗ kɛ,

²"Kir nomtaanak goonɛk eemɛyɔɔn barɛ bɔɔlɔŋeeroŋk agut jikon? Ɗami a kir aadi arin."

³Nɛɓa jumur sɛɛga Yeese kɛ, "Kiir eemɛyɔɔn sekiyɛ Waakoyotoŋk agut barɛ noŋk agut jikon?

⁴Saa Waakoyot toniiɗ kɛ, 'Eemɛy ŋaaŋa a ɓaaɓa, iɗit sinɔ nyɔɔn ɛmɛs maŋk ɛpɛnik in ɓokotɛ.'

⁵Yakana sɔɔk ɔkɔn iɗit omaay tonu ɛpɛna maŋk ɛmɛsa kɛ, 'Tɔkɔny sinɛ gun laŋiir eetek wideerakɔ a tigi Waakoyotaŋ,'

⁶nɛ sɔɔk toniir kɛ, 'Ki eta sinaana ɗɛyɛ a eemɛy ɛmɛs maŋk ɛpɛniŋ.' Nɛ aalɛɛr pɛɛni Waakoyotoŋk agut barɛ noŋk.

⁷Iinak joop sigɔ gayar joop sigɔ mentaanaŋɔŋkuk, eekeer any sinɛɓa tonu Isaayas pɛrkaakɛ agut iinak kɛ,

⁸'Joop sigi eemɛyarti atutunɛ gɛŋk, ma ɓayɛtunɛɛkɛ gɛŋk yowɛrju eeteeŋ.

⁹Ugumerta kanysɛya, a rɔɔriyaaɗ rɔɔriyɔn barɛ etoŋk.'"

¹⁰Riyiriɓa Yeese joop sigɛ ɓɔɔkaak kɛnɔ widerki ɛɛk son lak sɛɛnik nɛ tonu sɛɛga kɛ, "In tiyɛɛ, ɛ in koɓɛɛ.

¹¹Arɗi iɗit a somkan any sinɛ waasɛ ad nɛɛkɛkik, ma moko ɗama sinɛ gaɓɛ ada nɛɛkaakik."

¹²Wideetarɓa ɛɛk nomtaanak gɛɛnɛ son lak sɛɛnik nɛ tonurgeeɗ kɛ, "Ɗegerin kɛ tiyɛrkɔ joop Paarisik any sinɛkɔ tonunk, nɛ ŋadirŋ?"

¹³Nɛɓa sɛɛga tonu kɛ, "Kɛɛt sinɔɓa ki waayɛ Baabɛ dariyoŋkuk baŋɛ montɛɛkoyŋ.

¹⁴In ŋɔɗurɛɛ sɛɛg, sɛɛg ɔɗɔweer sigɔ motakik sigɔ diiler motakik. Ɔkɔn diile mot motuŋ, nɛ gaagami a getu pɛɛy, nɛ ɗiirtar utula takana."

¹⁵Nɛɓa Petros tongeeɗ kɛ, "Wooru tina rɔmɛ nɛɛk."

¹⁶Nɛɓa Yeese tonu sɛɛga kɛ, "In kiir koɓiiɗ nɔ mɛlɛɛɗa sisɔwa?

¹⁷Kiir ɗegerɔɔn kɛ ɗama sinɛ guuguny adak baŋɛ, nɛ ɗeyiir amɗa nɛ saadi ŋaariri walasa?

¹⁸Ma any sinɛ waasɛk ŋɛɛwɛnŋɔŋk ŋaarkiɗ ɓayaay takik sinɛ ari iɗit a somkank sɛɛn sini.

¹⁹Ŋaaraki ɓayaay etoŋk koɓi sinɔ ŋɛɛwɛnŋɔŋk, ɓokotiit etoŋk, ibe, ruunyikeen, agɛy, waasiyɛ nyonoŋk a sɔɔkiyɛ tiriya etoŋkuk.

²⁰Ola sigɛ arir iɗit a somkank sɛɛg sigi, ma ɗama a kɛɛ aadi arink ki ariiɗ iɗit a somkan."

²¹Ŋaarɓa Yeese saadi, nɛ mɛlɛ ɗooka Tiiroos a Sidoonaak.

²²Ŋaarkiɓa saadi jarti om sinɔ moko Ayuuduk, nɛ kus son lak Yeeseek nɛ ooyɛ kɛ, "Iin Tɔɔn Daawitik, Suumi naakɛ, tɔkɔny tin. Tɔɔn naak sinɔ peetik gaamurkanre wɛɛŋa sigɔ somkaanakik, nɛ rakatɛŋ jɛt."

²³Yakanaɓa sɛŋk kɛɛ any sinɔ jumurgeeɗik. Saaɓak wideetarɓa nomtaanak gɛɛnɛ ɛɛk son lak sɛɛnik nɛ tonurgeeɗ kɛ, "Nonom tine jarti sini a oo'oyŋ tɔkɔnyre nɔ ŋaar."

²⁴Nɛɓa sɛŋk jumur kɛ, "Wosɛykɛɓati agut joop Israeelik sigɛ badɛr a ito jiŋkuyɛk dakɛɗa."

²⁵Nɛɓa jarti sinɛ mɛlki nɛ ugume Yeeseya, nɛ tongeeɗ kɛ, "Suumi naakɛ, tɔkɔnytuk."

²⁶Nɛɓa jumurgeeɗ Yeese kɛ, "Ki gayɛ a boŋɛɛ ɗama tɔɔmɔkoŋk nɔ gaɓɛɛ wartuna."

²⁷Nɛɓa sɛŋk tongeeɗ kɛ, "Liki. Suumi naakɛ, ɗamar aasi wartun kootaayɔ sigɛ ɗiiɗirark lokoy suumii nɛŋkik."

²⁸Saaɓak tongeeɗɓa Yeese kɛ, "Iin jarti sini, ɓɔɔka ŋaadiyɛ goonɛŋ. Inna ɓɛɛlɛ oko sinɛkɔ ɗɛyɛɗink." Nɛɓa tɔn nɛɛkɛ bɔdɛ a tukiɗi ɔɔtɛ sinaanɛ.

²⁹Ŋaarkiɓa Yeese saadi, nɛ kɛɛ nyona sinɔɔna ar goroo Gɛlilaak jɔkuk. Nɛ kɔtɔɔŋɛ kurkuma nɛ dokuɗe saadi.

³⁰Nɛɓa joop a ɓɔɔkaaŋ diilerki, joop sigɔ kamarŋɔŋk, a motak, a nyɔŋtaanak, a joop sigɔ kir tonɗiitik a gortaanak ɔgɔ a ɓɔɔkaaŋ. Nɛɓa riiɓer sɛɛg Yeesee derakɛ goyse ɗeek, nɛɓa sɛŋk ebɔdɛ sɛɛgiŋ.

³¹Dɛnɛrɓa joop sigɛ ɓɔɔkaak joop sigɛɓa kir tonɗiitik a tonɗiiŋ, a bɔdɛr nyɔŋtaanak, a ŋawiiter kɛɗɔm joop sigɛɓa kamark, a dɛnɗi motak nɛɓa reemɗi ɓayɛtun gɛŋkiŋ. Nɛ eemɛyar Waakoyo Israeelik.

³²Riyiriɓa Yeese nomtaanak gɛɛŋk nɛ tonu sɛɛga kɛ, "Sanɗita joop sigi ɓɔɔkaaŋɔŋkuŋ agut sinɔ sɛɛgkɔ a eet agut omoŋ a ɗoŋ jiit. Nɛ kɛɛ sɛɛge any sinɔ ɗamarŋɔŋk. Kaa ɗɛyɛ a ŋɔɗura sɛɛg a kir ɗamiitiŋ agut sinɔ kɛnɔ mokɔɔ latu ŋaawu nɔ ɗiirar gopɛ tak."

³³Nɛɓa jumurargeeɗ nomtaanak gɛɛnɛ kɛ, "Nɛkɔɔ laŋii eet ɗama sinɔ gayɛ joopa sigeega ɛtɛr oko sinikik paaton sineene?"

³⁴Nɛɓa Yeese kɔɔniy sɛɛg kɛ, "Latukari kiiwakɔ a eger?" Nɛɓa sɛɛg jumurargeeɗ kɛ, "Lakii kiiwakɔ a tula pɛɛy a oltiir sigɔ temetuŋɔŋk a tekerŋ."

³⁵Nɛɓa Yeese tonu joopa gɛɛna kɛnɔ dokurɗe ɗook.

³⁶Nɛ gaamu kiiwakɔ sigɛ tula pɛɛyk a oltiir gɛɛŋk. Nɛ pɔɔsɛ Waakoyo nɛ ŋapati nɛ gaɓɛ nomtaanaka gɛɛnaak. Nɛ kaakasar joopa sigaaga ɓɔɔkaak.

³⁷Nɛɓa ɗami baŋɛ nɛ ɓooɗorarŋ, nɛɓa nomtaanak gɛɛnɛ ɓɔŋgɔɔrɛr kootaayɔ sigɛɓa ŋayɗiikik a kantɛyɛ tula pɛɛy a enyaataŋ.

³⁸Joop sigɛɓa ɗamiik kumɛɛɓa aŋan aɓa kɛɛ ikomiit jartiyatɔk a tɔɔmɔk.

³⁹Saaɓa Yeese ŋɔɗurkuɗ joop sigɛ ɓɔɔkaakik baŋiya, nɛɓa teeŋɛ emɗa nɛ ŋaar ɗooka Mɛgedoonuk.