Read majang Maatiyoos 18 Bible Online

Maatiyoos 18 - majang bible

Maatiyoos 18

¹Saaɓak wideetarɓa ɛɛk nomtaanak gɛɛnɛ son lak sɛɛnik nɛ kɔɔniyar kɛ, "Wooɗ sinɛ kaalɗi joope baŋɛ burɛɛ dariyoŋkuk?"

²Riyiriɓa Yeese tɔɔn om nɛ ari a ɛtɛ sɛɛge kɔɔr,

³nɛ tonu sɛɛga kɛ, "Eekeer tona kɔnaaŋ. Ɔkɔnkɔɔ kiir weerɛɛt ɛɛkiŋ, ɛ ɔkɔnkɔɔ kiir ɓɛɛlɛt oko tɔɔmɔkuŋ, kiirkoy guugunyɔn burɛya dariyoŋk adaktan.

⁴Iɗit sinɛ kaalɗi joope baŋɛ burɛɛ dariyoŋkuk iɗit sinɔ rikite ɛɛk nɛɛk oko tɔɔn sinik.

⁵Iɗit sinɔ boŋu tɔɔn sinɔ ito sinik tiriyaakɛ gaanɛkik, boŋu Eet.

⁶"Joope sigeege ŋaadiɗi eeteek sigeege temetuŋɔŋk, iɗit sinɔ ooɗɛ om ɔɔtɛ tikiyɛɛkoŋkuk, dɔɔsgeeɗ, a kurɛygiɗɛɛ goori ŋɔɗɔka. Nɛ oriirɛɛ gɔrɔwa sinɔɔna obiiŋɔŋk ɓukuurŋɔŋk, nɛ ɗam gɔrɔ.

⁷Durikoy ɗooka sineena agut sinɔ lakiɗ ola sigɔ arɗi a tikiɗiikɛɛŋɔŋk. Kikɔɔ dakɛ a kiik mɛlɛ any sinɔ arɗi a tikiɗiikɛɛŋɔŋk. Mayakana iɗit sinɛ arɗi a tikiɗiikɛɛŋɔŋk durikoy sɛɛna.

⁸"Ɔkɔnnu ooɗɛ ari nookɛ maŋk deran nookɛ ɔɔtɛ tikiyɛɛkoŋkuŋ, yawak nɔ orun. Ɔɔtɛ sinɔɔnɛ gunnu oriiɗɛ maɗa sinaanakoy nɔkoy nɔkoyk, ma lakin arin a pɛɛy maŋk derak a pɛɛyk, nɛna dɔɔs a guugunyun wɛɛŋaka sigaagakoy nɔkoyk ma kaamunŋ maŋk iin gɔɔrɛ.

⁹Ɔkɔnnu ooɗɛ taama nookɛ ɔɔtɛ tikiyɛɛkoŋkuŋ, kɔɔkɔyak nɔ orun. Ɔɔtɛ sinɔɔnɛ gunnu oriiɗɛ maɗa siiooluk, ma lakin taamɛ a pɛɛyk, nɛna dɔɔs a guugunyun wɛɛŋaka sigaaga koy nɔkoyk ma lakin taama a omoŋ.

¹⁰"In koorɛɛ ɛɛk kɛnɔ kat daraayɛɛr joope sigeege temetuŋɔŋk om kɔɔr. Tona kɔnaaŋ, wosɛytaanak gɛŋk sigɛ atu darik dɛnɛr taamɛ Baabɛɛ sinɛ ar darik ɓɛɛnyɔwɛ gɛɛŋk baŋɛ.

¹¹[Kusɓa Tɔn Etoŋk kɛnɔ ebɔdɛ joop sigɛɓa badɛrk.]

¹²Tonuɓa Yeese kɛ, "Gayiikɔna a jikon? Ɔkɔn lak iɗit omaay jiŋkuyɛ a ɗibɛ, ɛ badɛɛɗ a omoŋ, nɛ ki toŋoɗ sigɛ pɔlpɔlɛ joop aŋank a aarin a tula aŋank kurkum raŋk nɔ kɛɛ warɛɗa sinaanakɔ badɛk?

¹³Eekeer tona kɔnaaŋ, yaageeɗ sinɛkɔ laŋɛɛk omoŋɔŋk sigaagɛ pɔlpɔlɛ joop aŋan a aarin a tula aŋank kan kir badɛk sɔgɔɔsɔyk.

¹⁴Nɛ ɓɔrɛ joope sigeege temetuŋɔŋk kɔɔr, ki ɗɛyɛ Ɓaaɓa noŋk sinɛ ar darik a badɛ sinɔ omoŋɔŋkuŋ.

¹⁵"Ɔkɔnnu tike masookooyuŋ, mak nɔ tonguɗun tikiyɛ gɛɛŋk ma iin a sɛɛn mowan. Nɛ ɔkɔnna tiyɛŋ nɛ arin a masookoy kɛkar.

¹⁶Ma ɔkɔnna ki weentiŋ, agut sinɔ gayɛɗ pɛɛnii baŋɛ, ant sinɔɔnɛ waasɛr misikiriyɛ sigɔ pɛɛy maŋk jiitik, nɛ diilii iɗit a omoŋ maŋk pɛɛy nɔ kaar waasiɗiikariɗ.

¹⁷Nɛ ɔkɔn ki tiiɗit sɛɛgaŋ nɛ tonu joopa gode Sambatɛyoŋkuk. Nɛ ɓɔrɛ ɔkɔn ki tiiɗit joopa gode Sambatɛyoŋkuŋ, nɛ ikomu a iɗit sinɔ moko Ayuuduk a iɗit sinɔ yayawu worik.

¹⁸"Eekeer tona kɔnaaŋ, any sinɛ korkoɗari ɗook raŋk baŋɛ korkortan dari, any sinɛ wooriir ɗookuk baŋɛ woortan dari.

¹⁹"Eekeer tona kɔnaaŋ kɛkar, ɔkɔn kalɛyiir any om a mɛyigiɗɔ a getukari pɛɛy ɗook raŋk, arikɔɔ kɔna Baabɛɛ naakɛ sinɛ ar darikiŋ.

²⁰Joope sigaagɛ tolɗi a getu pɛɛy maŋk jiitik tiriyaakɛ gaanɛkik, ɓɛɛla sɛɛge kɔɔr."

²¹Saaɓak wideerɓa ɛɛk Petros son lak Yeeseek nɛ tongeeɗ kɛ, "Suumi naakɛ, ɔkɔnta tikiɗi manya eetaaŋ, ŋɔrguɗa ɔɔtɛ agut eger? Gut tula pɛɛy?

²²Nɛɓa Yeese tongeeɗ kɛ, "Gut pɔlpɔlɛ joop jiitik a aarin agut tula pɛɛy, mana kaa toniiɗ kɛ gut tula pɛɛy dakɛɗa."

²³Burɛ dariyoŋk gayi a suumi sinɔ ɗɛyɛ ikomiita wori sinɔɓa ar ijaageerɛ gɛɛnɛ ariitik.

²⁴Saa tukeeɗ ikomiita wori nɛɛkik, nɛ ɗɔkɛ ijaagen om sinɔ lak asɛ wori sinɔ biriyatɔk kumɛɛ ɓɔɔkaaŋɔŋk.

²⁵Ijaagen sini agut sinɔ kiiɗ oolɛ koyi asɛ nɛɛkik, nɛɓa tonu suumi nɛɛkɛ kɛnɔ in ɓalɗiikɛɛ sɛɛne, a jarti nɛɛk, a tɔɔmɔk gɛɛŋk, a worii sinaanɛ lakik baŋɛ kɛnɔ koyɛ asɛ sinɛ lakik.

²⁶Saaɓak ɗiiriɓa ijaagen nɛɛkɛ korontunɛ derakɛ suumi nɛɛkik nɛ kalɛyi kɛ, 'Koorutuk, koyakɔɔna asɛ sinɛne lakaak baŋɛ.'

²⁷Nɛɓa sanɗi suumiya nɛɛka ijaagen nɛɛkɛ, nɛ ŋɔɗurkuɗ asɛ nɛɛk nɛ ŋɔɗuruŋ.

²⁸"Saaɓa ijaagen sinɛ ŋaarkiɗ suumii nɛɛkɛ taamɛkɛk, nɛ laŋki ijaagen sinɔ saakom nɛɛkik sinɔɓa lakiɗ asɛ sinɔ tɛmŋɔŋkuk, nɛ gaamu ŋoɗok, nɛ tongeeɗ kɛ, 'Koyuta asɛ kante lakink.'

²⁹"Nɛ ijaagen sinɛ saakom nɛɛkik ɗiiri sɛɛne taamɛkɛ nɛ kalɛyi kɛ, 'Koorutuk, koyɗiika kɔɔ naaŋ.'

³⁰"Yakanaɓa sɛŋk ki ɗɛyɛ a koorɛŋ. Nɛɓa gaɓɛ godeya korkoɗɔɔnoŋk mɛlɛɛɗa nɔɓa koyiiɗ asɛ sinɛɓa lakiɗik.

³¹Nɛɓa ŋadir jɛt ijaager ɔgɔɔk sigɛɓa dɛnɛr any sinɛɓa ɓɛɛlɛk. Nɛɓa ŋaarar, nɛ kaar tonur ɔɔtɛ nɛɛk baŋɛ suumiya nɛŋk.

³²"Nɛ saaɓak riyiriɓa suumi nɛɛkɛ ijaagen nɛɛk nɛ tongeeɗ kɛ, 'Iin ijaagen sini ŋɛɛwɛnŋɔŋk. Saa kanti kalɛyiɗink, nɛkanne ŋɔɗura asɛ sinɛkank baŋɛ,

³³gunkɔna ki ɗɛyɛ a maariyiin saakom nookuŋ oko sinɛkanni maariyeeɗak?'

³⁴Nɛɓa ŋadi nɛ gaɓɛ ijaageera gode korkoɗɔɔnoŋkuk sigɔɔga laaŋoyɗiiŋɔŋk mɛlɛɛɗa nɔɓa koyiiɗ asɛ sinɛɓa lakik nɔɓa ruumeeɗi baŋɛk.

³⁵"Oko sinik, iinak a omoŋ omoŋ ɔkɔnkɔɔ kiir toŋoɗ ɓayaay masookoyakaŋ, ijaagkoy ɓɔrɛ kɔna Baabɛ naakɛ sinɛ ar darik oko sinik."