Read majang Maatiyoos 2 Bible Online

Maatiyoos 2 - majang bible

Maatiyoos 2

¹Eme saaɓa ege Herodis suumik, nɛɓa ɓartɛɛ Yeesee ɗook Yuudaak katamɛɛ Beeteleheemuk. Nɛɓa saadi baŋiya kurak joop sigɔ ɗegerar ɛɛkik goyse mɛlkiɗ waawuyk Yorsaleema.

²Nɛɓa kɔɔniya kɛ, "Suumi Ayuuduk sinɛkɔ ɓartɛɛk ar eet? Dɛniikɔ maryɔn nɛɛk goyse mɛlkiɗ waawuyk nɛ kusii kɛnɔ ugumii sɛɛna."

³Nɛɓa ŋaati Herodis sinɛ suumik saaɓa tiyɛɛɗ any sinikiŋ, ɛɓa ɓɔrɛ ŋaatir joop Yorsaleemuk baŋɛ a sɛɛn agut omoŋ.

⁴Nɛ agut sini riyɓa Herodis ɔɗɔweer tapa ŋaadiyɛɛkoŋk a rɔɔriytaanak higi Muuseek baŋɛ, nɛ kɔɔniy sɛɛg kɛ, "Ɓartɛɛkɔɔ Keresee eet?"

⁵Nɛɓa sɛɛk jumurargeeɗ kɛ, "Ɓartɛɛkɔɔ Keresee ɗook Yuudaak, katamɛɛ Beeteleheemuk agut sinɔ, taapɛɛɓa ete pɛrkaakoŋk pɛrka kɛ,

⁶'Iin katamɛ Beeteleheemuk sinɛ laŋɛɛ ɗook Yuudaak, kin tɛmka katamɛɛkɛ Yuudaak, ŋaarkikoy iine ɔɗɔwen, sinɔkoy koorɛ joop gaaŋk Israeelik.'"

⁷Saadi baŋiya riyɓa Herodis joop sigɛ ɗegerar ɛɛkik dugeeɗ nɛ kɔɔniy ɔɔtɛ sinɛkɔ dɛnɛɛɗɛ maryɔn nɛɛkik kɛnɔ ɗeger.

⁸Nɛɓa wosɛyɛ sɛɛg Beeteleheema kɛ, "In kɛɛɗɛɛ mermenɛɛ ɔɔtɛ sasalɛ nɛɛkik kɛ ɗɔm, nɛ saa laŋirɗɔɔk nɛ inta kusɛɛ tonɛɛ nɔɓɔra kɛɛɗa ugumguɗa."

⁹Saaɓa sɛɛk tiyɛrɗi pɛɛni suumi sinɛk baŋiya, nɛ ŋaararŋ, nɛɓa diile sɛɛg maryɔn sinɛɓa dɛnɛrk goyse mɛlkiɗ waawuyk nɔ mɛlɛɛɗa saanaɓa ɛtɛɛɗ saadi lak sasalɛ nɛɛkik.

¹⁰Saaɓa dɛnɛrɗi maryɔn nɛɛkik, nɛɓa sɛɛga yaaŋ jɛt.

¹¹Nɛɓa guugunytar godeya, nɛ dɛnɛr sasalɛ nɛɛk sɛɛn a ɛmɛs Maariyam agut omoŋ. Nɛ ɛtɛr korontunɛ nɛ ugumergeeɗiŋ. Nɛ ɓuuker sandukak gɛŋk, nɛ boŋurku tigi worke, a any sinɔ uduŋɛɛŋɔŋk, a any sinɔ ŋaa yaagɛrk riyɛ kɛ kɛrbeek.

¹²Saadi baŋiya tonuɓa sɛɛga wosɛytan Waakoyotoŋk pɛrkiyɛɛkɛ kɛnɔ kat weeri son lak Herodisik, nɛɓa weeri ɗooka nɛŋk gopɛ omalte.

¹³Ŋaararɓa joop sigɛ ɗegerar ɛɛkik, nɛɓa yaaŋɛ ɛɛk wosɛytan Waakoyotoŋk Yoosepa pɛrkiyɛɛkɛ nɛ tongeeɗ kɛ, "Dɛyɛ Herodis sasalɛ nɛɛk ɓokotiita, nɛ ŋaari nɔ boŋun sasalɛ nɛɛk a ɛmɛs nɔ gonun ɗooka Gibsik, nɔ kɛɛɗin beeɗin saadi nɔkoyna toniiɗaak."

¹⁴Nɛɓa ŋaar Yoosep kaalt, nɛ boŋu sasalɛ nɛɛk a ɛmɛs nɛ gon Gibsa.

¹⁵Nɛ kɛ beeɗ saadi ɔɔtɛya sinaanaɓa rɛrɗi Herodisik, nɔ ɓɛɛlɛɛɗ sinik dusanɛɛ sinɛɓa tonu Waakoyot ete pɛrkaakoŋk kɛ, "Riyra koy tɔɔn naak Gibsak."

¹⁶Saaɓa Herodis ɗegerɗi kɛ raamɛrkɔ sɛɛn joop sigɛ ɗegerar ɛɛkŋɔŋk, nɛɓa ŋadiŋ jɛt. Nɛɓa wosɛyɛ amaasiniyɛ gɛɛŋk Beeteleheema a mɛndɛraka sigaaga atukuɗ tookɛɛtak kɛnɔ ɓokootɛɛ sasalɛɛ sigɛ moojakik sigɛ emeyi gɛŋk pɛɛyk a sigɛ saadi ɗɛɛgaak. Nɔɓa ijaagiɗ sinik oko sinɛɓa kɔɔnɛɛɗi joope sigaagɛ ɗegerar ɛɛkik ɔɔtɛ sinɛɓa dɛnɛɛɗɛ maryɔn nɛɛkik nɔɓa ɗegerɗik.

¹⁷Oko sinik dusanɛɛ sinɛɓa tonɛɛ ete pɛrkaakoŋk Ermiyaase kɛ,

¹⁸"Tiyɛɛ koŋgoy wuɗa, a duri sinɔ obiiŋɔŋkuk katamɛɛ Raamaak. Wuɗaa Raheel agut tɔɔmɔk gɛɛŋk, agut sinɔkɔ rɛrarɗi tɔɔmɔk gɛɛnɛŋɔŋk garapkaayɛ nɛ ki nyɛyɛ."

¹⁹Saaɓa rɛrɗi Herodisik baŋiya, nɛɓa yaaŋɛ ɛɛk wosɛytan Waakoyotoŋk pɛrkiyɛɛkɛ Yoosepa Gibse nɛ tongeeɗ kɛ,

²⁰"Agut sinɔkɔ rɛrarɗ joop sigɛkan ɗɛyɛr sasalɛ nɛɛk ɓokotiitakiŋ, nɛ ŋaari nɔ boŋun sasalɛ nɛɛk a ɛmɛs nɔ kɛɛɗin ɗooka Israeelik."

²¹Nɛɓa Yoosep ŋaar raŋana nɛ boŋu sasalɛ nɛɛk a ɛmɛs nɛ weeriik ɗooka Israeelik.

²²Yakana saaɓa tiyɛɛɗ Yoosep kɛ dakɛkɔɔnɔ ɗook Yuudaak a suumi Arkelawoos ɔɔtɛ ɛpɛnaak Herodisik, nɛɓa ɓure ɛnyɛ saanakiŋ. Nɛɓa topugeeɗ wosɛytan Waakoyotoŋk pɛrkiyɛɛkɛ, nɛ ŋaar ɗooka Gɛlilaak.

²³Nɛ saaɓa mɛlɛɛɗ saanak, nɛɓa tuke beeɗit katamɛɛ Naajireetik. Nɔ ɓɛɛlɛɛɗ sinik dusanɛɛ sinɛɓa tonɛɛ pɛrkaakɛ kɛ, "Riyɛɛkoy kɛ iɗit Naajireetik."