Read majang Maatiyoos 21 Bible Online

Maatiyoos 21 - majang bible

Maatiyoos 21

¹Saaɓa Yeese a nomtaanak gɛɛŋk woontukuɗ Yorsaleemak, nɛɓa mɛlɛr mɛndɛra Beetɛ paagek sinaana ar kurkum Dɛbirɛ Jɛytik, nɛɓa Yeese wosɛyɛ nomtaanak gɛɛŋk a pɛɛy,

²atonu sɛɛga kɛ, "In ɗeykuunɛɛ mɛndɛra sinɔɔna ar kɔne ɔɗɔɔkɛk. Nɛ saakɔɔ mɛlɛrɗɔ saanak, nɛkɔɔ laŋirkɔɔ kuroy om sɛɛn a tɔɔn nɛɛk a ar tuseeɗ, nɛ in woorkɛɛ nɔ ɗɔkɛɛ sɛɛg son lak eetik.

³Nɛ ɔkɔn lakɛ iɗit sinɔ kɔna tonu any omoŋɔŋkuŋ, nɛ tonguɗɛɛ kɛ, 'Ɗɛyɛ sɛɛg Suumii. Wosɛyɛkikɔɔ sɛɛg sise.'"

⁴Nɔ ɓɛɛlɛɛɗ sinik dusanɛɛ sinɛɓa tonɛɛ ete pɛrkaakoŋk Isaayase kɛ,

⁵"In tonɛɛ joopa Yorsaleemuk, 'In dɛnɛɛko, Suumi noŋk kus son lak iinakik. Sɛɛn mentanŋ, beeɗi kuroy raŋk, aasi toomoy kuroyoŋk raŋk.'"

⁶Nɛɓa nomtaanak gɛɛnɛ kaar, nɛ ijaagir oko sinɛkɔ sɛɛga toniiɗ Yeeseek.

⁷Ɗɔkarkiɓa kuroy nɛɛk a tɔɔn nɛɛk, nɛ epatar abiyak gɛŋk toomoy sinaanɛ kuroyoŋk raŋk, nɛɓa beeɗiɗ Yeese.

⁸Epatarɓa joop a ɓɔɔkaaŋ abiyak gɛŋk gopan takan, ma ɔgɔɔk kɛtɛrki rɛkɛnak kɛɛnoŋk nɛ epatar sɛɛg gopan takan.

⁹Ooyɛrɓa joop sigɛɓa ɗeyir sɛɛne ɔɗɔɔkɛk a sigɛɓa nomɛrɗi baŋik kɛ, "Hosaaina[3] Tɔɔna Daawitik! Iɗit sinɔ kus tiriyaakɛ Suumiyoŋkuk geetitan! In dakɛr pɔɔsiyɛɛk Waakoyota sinaana ar darik!"

¹⁰Saaɓa Yeese mɛlɛɗ Yorsaleemak, nɛɓa ŋaatir joop katamɛ nɛɛkik baŋɛ, nɛ tonur kɛ, "Wooɗ sini?"

¹¹Nɛɓa joop sigɛ ɓɔɔkaak tonur kɛ, "Ege sini iɗit pɛrkaakoŋk Yeesee sinɛkɔ kus ɗook Gɛlilaak katamɛɛ Naajireetik."

¹²Saadi baŋiya guugunyɓa Yeese Godeya sinaana Geetitank, nɛɓa ɔɔyku joop sigɔ ɓaɓalar ɓolaatuuruwɛ ɛ ɓalɗi ɓolaatuuruwɛɛkɛk baŋɛ kɛɛtɛɓa tarbesɛyɛ joop sigɔ wonooyar komoyeer woriyoŋkuk a ola beeɗitoŋk joop sigɔ ɓalɗi kulɓeerakɛk.

¹³Tonuɓa sɛɛga kɛ, "Taapɛɛɓa Wargatɛɛ Waakoyotoŋk kɛ, 'Riyɛ gode naak kɛ gode ɗanɗamɔɔnoŋk.' Yakana, sɔɔk ariir a nyon dugeeɗoŋk agaltiiroŋk."

¹⁴Nɛɓa widikɛɛ motak a joop sigɔ kamarŋɔŋk son lak Yeeseek Godeey sinaanɛ Geetitank tak, nɛɓa ebɔdɛ sɛɛgiŋ.

¹⁵Ŋadirɓa ɔɗɔweer tapa ŋaadiyɛɛkoŋk a rɔɔriytaanak higi Muuseek saaɓa dɛnɛrɗi sɔɔriyɛ sigɛɓa ijaag sɛɛg Yeeseek, a saaɓa tiyɛrɗi tɔɔmɔk sigɛ ooyɛr kɛ, "In dakɛr Pɔɔsiyɛɛk Tɔɔna Daawitik!"

¹⁶Nɛɓa sɛɛk tonurgeeɗ kɛ, "Tiyin any sini tonur tɔɔmɔk sigikiŋ?" Nɛɓa Yeese tonu sɛɛga kɛ, "Ii, tiyaaŋ. Kiirɓa ambabɛɛt sinɛɓa taapɛɛ Wargatɛɛ Waakoyotoŋk kɛ, 'Ragadinɓa pɔɔsiyɛ ad tɔɔmɔkoŋk, a sasalɛyɛ sigɔ aapokaŋɔŋkuk?'"

¹⁷Nɛɓa ŋɔr sɛɛg saadi nɛ ŋaar katamɛya Bitaniyaak, nɛ kɛ ɗeegar sooy.

¹⁸Saaɓa Yeese mumurkuɗ katamɛya nɛɛkaak romiɗik, nɛɓa lak ŋaawu.

¹⁹Nɛɓa dɛnɛɛr kɛɛt bɛlɛɛsik gopana kɛntɛya, nɛ kɔrurgeeɗiŋ, nɛɓa kɛɛ any sinɔ laŋiɗik ɓɛɛlɛrɓa peeŋɔk gɛɛŋk dakɛɗa. Nɛɓa tongeeɗ kɛ, "Katkoy lakin taamɛ kɛkar adaktan." Nɛɓa paalor kɛɛt sinɛ bɛlɛɛsik sisa.

²⁰Nɛɓa dɛnɛr nomtaanak gɛɛnɛ any sinɛɓa ɓɛɛlɛk, nɛ reemɗi ɓayɛtun gɛŋk a tonur kɛ, "Paalor kɛɛt sini bɛlɛɛsik a gorgorŋ ɛk?"

²¹Nɛɓa Yeese tonu sɛɛga kɛ, "Eekeer tona kɔnaaŋ, ɔkɔn latukari ŋaadiyɛ ɛ kɔne kɛɛ koɓiɗak a pɛɛyiŋ, nɛ moko any sinɛkɔ ijaagiɗɛ kɛɛt sini bɛlɛɛsik dakɛɗa, ɔkɔn toniir kurkuma sineena kɛ, 'Ŋaari seedi nɔ orun ɛɛk gɔrɔwa sinɔɔna obiiŋɔŋk,' nɛ aasi kɔna gayɛŋ.

²²Any sinɛ kalɛyiir ɗanɗamɔɔn ma ŋaadiiriŋɔŋk laŋiir kɔɔŋ."

²³Nɛɓa Yeese guuguny Godeya sinaana Geetitank, nɛ saaɓa arkiɗ rɔɔriyɔɔnuk widerkiɓa ɛɛk ɔɗɔweer tapa ŋaadiyɛɛkoŋk a gutarɛyɛ ɗookoŋk nɛ kɔɔniyar kɛ, "Ijaagin ola sigi baŋɛ ɓaŋkawukaat jikoŋk? Makanna gaɓi ɓaŋkawuka nɛɛk wooɗ?"

²⁴Nɛɓa Yeese jumur sɛɛga kɛ, "Kɔɔniya ɓɔra kɔnu kɔɔniyɔɔn sinɔɔnɛ omoŋɔŋk. Nɛ ɔkɔn kɔɔta jumurariŋ, nɛ kɔɔɓɔra kɔna tona kɛ ijaaga ola sigi ɓaŋkawukaat jikoŋkuŋ.

²⁵Aadi sinɛɓa aadiɗiiɗ Yowanisik kusɓa eet? Dari maŋk joope?" Nɛɓa sɛɛk tonɗi ɛkanɛɛkɛ gɛŋk kɛ, "Ɔkɔnkɔɔ tonii kɛ, 'Dariŋ,' nɛkɔɔtina tonu kɛ, 'Nɛ kiir ŋaadit agut jikon?'

²⁶Ma ɓɔrɛ ɔkɔnkɔɔ tonii kɛ, 'Joopeŋ,' nɛ ɓurii joop sigɛ ɓɔɔkaak, agut sinɔ ŋaadirɗi joop baŋɛ Yowanis kɛ iɗit pɛrkaakoŋkuk."

²⁷Agut sini jumurarɓa Yeeseya kɛ, "Kii ɗegerɔɔn." Nɛɓa sɛŋk tonu sɛɛga kɛ, "Kaa ɓɔra kɔna toniiɗ kɛ ijaaga ola sigi ɓaŋkawukaat jikoŋk."

²⁸Tonuɓa sɛɛga Yeese kɛ, "Gayi kɔna a jikon? Lakɛɓa iɗit om sinɔ lak tɔɔmɔk sigɔ moojakik a pɛɛyk. Nɛ kɛɛ son lak tɔɔn nɛɛk sinɛ tukik, nɛ tongeeɗ kɛ, 'Iin tɔɔn naak, mak ɓenyse taawa wɛynik nɔ kɛɛɗin ijaagɗikin.'

²⁹Nɛ tongeeɗ tɔn nɛɛkɛ kɛ, 'Kaa deran,' nɛ saadi baŋiya kɛ weeriki koɓiiɗ nɛɛkɛɛk nɛ kɛɛŋ.

³⁰Nɛ kɛɛ son lak tɔɔn nɛɛk sinɛ pɛɛyeen nɛɛkik, nɛ tongeeɗ oko sinɛkɔŋk. Nɛ tongeeɗ tɔn nɛɛkɛ kɛ, 'Dɔɔs, baabɛ, kɛɛɗaaŋ.' Mayakana dakɛ a ki deran.

³¹Nɛɓa ijaagɗi ɗɛyan ɛpɛnaak won sigaagɛ pɛɛyk?" Nɛɓa sɛɛk tonurgeeɗ kɛ, "Tɔɔn sinɛ tukik." Tonuɓa sɛɛga Yeese kɛ, "Eekeer tona kɔnaaŋ, guugunyarkoy kɔne ɔɗɔɔkɛ burɛya Waakoyotoŋk joop sigɔ yayawar worik a ruunykaanak.

³²Kusɓa Yowanis son lak iinakik kɛnɔ kɔna yaaŋɛ gopan mentanka taamɛkɛ Waakoyotoŋkuk, nɛɓa kiir ŋaadit sinɛɓa tonu sɛŋkik mayakanaɓa sɛɛk ŋaadir joop sigɔ yayawar worik a ruunykaanaŋ. Saa aasi dɛnɛrɗɔ sinik baŋiya, nɛ sɔɔk kirkɔ weeriit tikiyɛɛkɛ Waakoyota ɛ kiir ɗɛyɛ boŋiiɗa a ŋaadiita sɛɛn.

³³"In tiyɛɛ rɔmɛ om kɛkar. Lakɛɓa ɗumaat taawa wɛynik a omoŋ, nɛɓa ijaag isɛ taawoy nɛɛkɛ tookɛɛta, nɛ kɔwu utul tayakoŋ wɛynik, nɛ ijaag peem koorɛtoŋk. Nɛɓa gaɓɛ taawa nɛɛk ijaageera kɛnɔkoy kaasiɗi, ma ŋaar ɗooka omalta.

³⁴Saaɓa gayɛɗ ɔɔtɛ ɗootaanoŋkuk, nɛ wosɛyɛ ijaageer gɛɛŋk son lak ijaageer gɛɛŋkik taawak kɛnɔ kaar boŋur taamɛ sigɛ wɛynik.

³⁵"Nɛɓa ijaageer gɛɛnɛ sigɛ taawak gaamur ijaageer gɛɛŋk, nɛ ɗiŋer omoŋ, ma ɓokotur om, ma om bibitar giɗeekɛ.

³⁶Nɛɓa sɛŋk wosɛyɛ ijaageer gɛɛŋk ɔgɔ sigɔ kaalɛr sigɛkan jeemɛkik, nɛ ijaageer sigɛ ijaagir sɛɛge any sinɔ ito sinɛkan jeemɛk.

³⁷Wosɛyɛɓa tɔɔn nɛɛk pediya nɛɛka a koɓu kɛ, 'Eemɛyarkɔɔ tɔɔn naakiŋ.'

³⁸"Yakana saaɓa ijaager gɛɛnɛ sigɛ taawak dɛnɛrɗi tɔɔn nɛɛkik, nɛɓa tonur ɛkanɛɛkɛ gɛŋk kɛ, 'Ege sini sinɛkɔɔ boŋu ɗoo nɛɛkik. In kusɛɛ nɔ kusii ɓokotii nɔkɔɔ boŋii ɗoo nɛɛk.'

³⁹Nɛ gaamur, nɛ boŋitar taawoy nɛɛkɛk walasa, nɛ ɓokoturŋ."

⁴⁰"Anɛ gayi kɔna a saaɓa mɛlkiɗi ɗuma sinɛ taawak, ijaagɓa ijaageer sigɛ taawak ɛk?

⁴¹Nɛɓa sɛɛk tonurgeeɗ kɛ, "Joop sigɛ ŋɛɛwɛŋɔŋk ɓokor sɛɛg a ooɗi ɔɔtɛ nɛɛkɛŋ, nɛ gaɓɛ taawa nɛɛk ijaageera ɔgɔɔka kɛnɔkoy kaasiɗi sigɔɔgakoy gaɓɛrgeeɗ taamɛ sigɛ wɛynik ɔɔtɛ nɛɛkɛ a ɓɛɛlɛ kɛ ɗɔmk."

⁴²Tonuɓa sɛɛga Yeese kɛ, "Kiirɓa ambabɛɛt sinɛɓa taapɛɛ Wargatɛɛ Waakoyotoŋk kɛ, 'Giɗee sinɛɓa daraayɛr joop sigɛ kɛnyar godeyik giɗeekɛk, dakɛ a giɗee sinɛ obi giɗeekɛ baŋɛk. Ege sini ijaag Suumiyoŋk, ege ijaag nɛɛkɛ sɔɔriyɛ taamɛka gaŋk.'

⁴³"Tona kɔnaaŋ, boŋɛɛkoy iinakɛ burɛ Waakoyotoŋk, nɛkoy gaɓɛɛ joopa sigaaga ijaagir any sinɛ tonu Waakoyotuk.

⁴⁴Iɗit sinɔ ɗiiri giɗeeta sineena raŋanaak ŋuuŋuliiŋ, iɗit sinɔ ɗiirageeɗ giɗe sini raŋanaak kataki sɛɛniŋ."

⁴⁵Saaɓa ɔɗɔweer tapa ŋaadiyɛɛkoŋk a joop Paarisik tiyɛrɗi rɔmɛɛɗa gɛɛŋkik, nɛɓa ɗegerar kɛ tonɗi agut sɛɛg.

⁴⁶Nɛɓa ɗɛyɛrkɛ gaamita nɔ korkoɗar, nɛ ɓurer joop gɛɛŋk, agut sinɔɓa dɛnɛrɗi Yeesee a ito iɗit pɛrkaakoŋkuk.