Read majang Maatiyoos 22 Bible Online

Maatiyoos 22 - majang bible

Maatiyoos 22

¹Tonuɓa sɛɛga Yeese rɔmɛ kɛkar kɛ,

²"Burɛ dariyoŋk gayi a suumi om sinɔ ijaagi wɔɔr waawana tɔɔn nɛɛkik.

³Nɛ suumi nɛɛkɛ wosɛyɛ ijaageer gɛɛŋk kɛnɔ kurak joop sigɛkan riyɛ sɛɛgik, yakana sɛɛk tonurku kɛ kiirii mɛlɛ.

⁴Nɛɓa wosɛyɛ ijaageer ɔgɔ kɛkar tonuɓa sɛɛga kɛ, 'In kɛɛɗɛ tonɛɛ joopa sigaagakan riyɛɛk kɛ ŋɔɔlakɔ jeguyatɔk a tɔgi gaaŋk sigɔ goontuŋɔŋk ragadakɔ wɔɔr nɛɛkiŋ ragadɛɛkɔ any baŋɛ in kusɛɛ waawana nɛɛka.'

⁵"Joop sigɛɓa riyɛ sɛɛgik kɛɛɓa sɛɛge ŋɔɗɔ nɛɛk, nɛɓa rootanɛrki tiriyaaka gɛɛnaak, nɛɓa omaay kɛɛ taawa nɛɛka ma omaay kɛɛ nagada nɛɛka.

⁶Nɛɓa joop sigɛ dakɛrkik gaamur ijaageer gɛɛŋk, nɛ laaŋoyɛr sɛɛg nɛ ɓokootar sɛɛgiŋ.

⁷Nɛɓa ŋadi suumi sinɛ nɛ wosɛyɛ amaasiniyɛ gɛɛŋk nɛ kaar ɓokootar joop sigɛɓa ɓokootar ijaageer gɛɛŋkiŋ, ɛ moɗɛ katamɛ nɛŋk.

⁸"Saadi baŋiya tonuɓa ijaageera gɛɛna kɛ, 'Ragadtan wɔɔr sinɛ waawanoŋk, mayakana agut sinɔkɔ kirɗi gayɛ joop sigɛkɔ riyɛɛk a ɗegeera a sɛɛgik.

⁹In ŋaarirɛɛ gopana wakasaka, nɔ riyarkɔ joop sigɛ laŋiirik baŋɛ, nɔ kurak, wɔɔra waawanoŋk.'

¹⁰Nɛɓa ijaager gɛɛnɛ ŋaartar gopana, nɛ tolɛrk joop sigɛ laŋirk baŋɛ sigɛ mentaanak a sigɛ ŋɛɛwɛk, nɛ enyɛɛrar gode sinɛ bakaanyŋɔŋk waawanoŋk konanɛ.

¹¹"Saaɓa guugunyɗu suumi sinɛ kɛnɔ dɛnɛ konan sigɛkɔ wɔɔrɛɛkik, nɛ dɛnɛ iɗit a omoŋ sinɔ kiiɗɛ abii waawanoŋk,

¹²nɛ tongeeɗ kɛ, 'Tekaan naakɛ, oolun a guugunykun seena mane kɛɛ abii waawanoŋk ɛk?' Nɛɓa kɛɛ any sinɔ jumur iɗit sinɛk.

¹³Nɛɓa suumi sinɛ tonu ijaageera gɛɛna kɛ, 'In korkoɗɛɛ arin gɛɛŋk a derak gɛɛŋk, nɔ boŋiirɛɛ nɔ oriirɛɛ nyuugura sinaana ar walasik. Lakɛkɔɔ saadi duri a ɗama ŋedakoŋk.'

¹⁴Ɓɔɔka joop sigɛkan riyɛɛkiŋ mayakana teker joop sigɛkan daamɛɛ sɛɛgkiŋ."

¹⁵Saadi baŋiya ŋaararɓa joop Paarisik, nɛ kaar waasiɗiigeeɗ gopan sinɔ kaŋirɗi Yeesee waasiyɛɛkɛ gɛɛnɛkik.

¹⁶Wosɛyɛrɓa nomtaanak gɛŋk a joop Herodisik agut omoŋ son lak Yeeseek nɛ tonurgeeɗ kɛ, "Rɔɔriytaano, ɗegerii kɛ iin eekerkan a rɔɔriyaakin gopɛ Waakoyotoŋk eekeerɛ. Kɛɛ any sinɔ ijaagin a ɓuriikin a lagiɗin keenyk. Mermenin joop baŋɛ a koɓi omoŋ.

¹⁷Gayi a jikon ton tina, pɛgɛdɛ higii nɔ koyɛ gibiri Keesaaraaŋ maŋk ki pɛgɛdɛɛt?"

¹⁸Nɛɓa Yeese ɗeger koɓi nɛŋk sinɔ ŋɛɛwɛnŋɔŋk nɛ tonu sɛɛga kɛ, "Iinak joop sigɔ gayar joop sigɔ mentaanaŋɔŋkuk, oolɛɛr a kaŋiirti waasiyɛɛkɛ ɛk?

¹⁹Inta yaaŋɛɛ wori sinɛ koyɛ a gibirik." Nɛɓa sɛɛk yaaŋɛrgeeɗ wori nɛɛk.

²⁰Nɛɓa sɛŋk tonu sɛɛga kɛ, "Ege sini dɛnɛɛ worii sineene raŋk tipi wook? Ma sigɛɓa taapɛɛk tiriya wook?"

²¹Nɛɓa sɛɛk tonurgeeɗ kɛ, "Keesaarik." Tonuɓa sɛɛga Yeese kɛ, "Sisɔ in gaɓɛɛ Keesaarik Keesaara, ma Waakoyotoŋk Waakoyota."

²²Saaɓa tiyɛrɗi sinik nɛɓa reemɗi ɓayɛtun gɛŋk nɛ ŋɔɗar nɛ ŋaararŋ.

²³Joop Saaduukuk a omoŋ omoŋ sigɛ ŋaadir kɛ kɛɛ iɗit sinɔkoy ŋaarki ret walasak, ɓeny sinaanɛɓak widerkiɓa ɛɛk son lak Yeeseek nɛ kɔɔniyar kɛ,

²⁴"Rɔɔriytaano, tonuɓa Muuse kɛ, 'Ɔkɔn rɛr iɗit omaay makan kiigeeɗ ɓartɛɛt jarti nɛɛkɛ tɔɔnuŋ, nɛ in boŋu manya jarti iɗit sinɛkɔ rɛrkik nɔ tuuke komoy nɛɛk.'

²⁵Lakɛɓa masiikeenak a tula pɛɛy sooy lak eteŋkik nɛɓa sinɛ tuktank boŋu jarti nɛ rɛr makan kiigeeɗ ɓartɛɛt tɔɔn jarti nɛɛkɛ, nɛ manya boŋu jarti nɛɛk.

²⁶Nɛɓɔrɛ pɛɛyeen nɛɛk a jiiteen nɛɛk nɔ mɛlɛɛɗa tula pɛɛya nɛɛka boŋur jarti sinɛ momogunɛɛkɛ nɛ rɛrarŋ.

²⁷Nɛ sɛɛge baŋɛ baŋiya rɛr jarti sinɛŋ.

²⁸Nɛ agut sinɔɓa boŋurɗu sɛɛg baŋɛk waawuy sinaanɛkoy ŋaarkiɗɛɛ ret walasak joope sigaagɛ tula pɛɛyk jartikoy wook?"

²⁹Nɛɓa jumur sɛɛga Yeese kɛ, "Babadariŋ agut sinɔ kirɗɔ ɗegerɔɔn Wargatɛ Waakoyotoŋk a ɓaŋkawuka Waakoyotoŋkuk.

³⁰Ŋaarin ret walasak baŋiya ɓɛɛlɛrkoy joop oko wosɛytaanak Waakoyotoŋk dariyoŋk, makoy kir boboŋɗiit ɛkoy kir wawaw.

³¹Kiirɓa ambabɛɛt sinɛɓa tonu kɔna Waakoyot agut ŋaarin ret walasak kɛ,

³²'Eet Waakoyo Abrahamuk, Waakoyo Isiyaakik, Waakoyo Yaykoobuk. Ege Waakoyot Waakoyo bɔdtaanakoŋk, ma moko reteeroŋk."

³³Saaɓa joop sigɛ ɓɔɔkaak tiyɛrɗi sinik, nɛɓa reemɗi ɓayɛtun gɛŋk rɔɔriyɔɔn nɛɛkɛŋ.

³⁴Tiyɛrɓa joop Paarisik kɛ arikɔnɔ Yeese joop Saaduukuk a dakɛr kɛ many, nɛɓa tolɗi agut omoŋ.

³⁵Nɛɓa sɛɛge iɗit sinɔ ɗeger higi Muuseek a omoŋ, ɗɛyɛ Yeesee paariita nɛ kɔɔniy kɛ,

³⁶"Rɔɔriytaano, higii baŋɛ sekiyɛ sigɛ kaalɗiik won?"

³⁷Nɛɓa sɛŋk tongeeɗ kɛ, "Poru Waakoyo Suumi nook ɓayɛ nook baŋɛ, wɛɛŋa gooŋk baŋɛ, koɓi nook baŋɛ.

³⁸Ege sigi sekiyɛ sigɛ kaalɗi baŋɛk a sinɛ tuktan nɛɛkik.

³⁹Pɛɛyeen nɛɛk gayi a sini, sɛɛn sinɔ tonu kɛ, 'Poru iɗit sinɛ beeɗiir jɔkikentik oko sinɛ poriiɗin ɛɛk nookuk.'

⁴⁰Higi Muuseek a rɔɔriyɔn joop pɛrkaakoŋkuk baŋɛ, ɛtɛrɗi sekiyɛ sigi pɛɛyk."

⁴¹Saaɓa joop Paarisik atukuɗ tolɛɛɗik, nɛɓa Yeese kɔɔniy sɛɛg kɛ,

⁴²"Toniir ɛk agut Keresee? Gayi kɔna a tɔɔn wook?" Nɛɓa sɛɛk jumurargeeɗ kɛ, "Tɔɔn Daawitik."

⁴³Nɛɓa Yeese tonu sɛɛga kɛ, "Anɛ Daawit riy kɛ Suumi naakɛ ɓaŋkawukaat Wɛɛŋa sigɔ Geetitaanakik agut jikon? Agut sinɔ tongeeɗ kɛ,

⁴⁴" 'Tonuɓa Waakoyot Suumiya naaka kɛ, "Beeɗi ɗiɗikakɛ gaanɛk, nɔ mɛlɛɛɗa nɔkoyna ariiɗa gumaakeer gooŋk ana ɛtɛr korontunɛ derakɛ goonɛ goyse ɗeekik.' "

⁴⁵Ɔkɔn riy Daawit kɛ Suumiŋ, anɛ Keresee dakɛ a tɔɔn nɛɛk ɛk?"

⁴⁶Kɛɛɓa iɗit sinɔ oolɛ a jumurgeeɗ any sinɔ omoŋɔŋkuk, maŋk a tukiɗi saaɓak kɛɛ iɗit sinɔ paari kɔɔniyɔɔnak.