Read majang Maatiyoos 23 Bible Online

Maatiyoos 23 - majang bible

Maatiyoos 23

¹Saadi baŋiya tonuɓa Yeese joopa sigaaga ɓɔɔkaak a nomtaanaka gɛɛna kɛ,

²"Rɔɔriytaanak higi Muuseek a joop Paarisik latu ɓaŋkawuka kɛnɔ rɔɔriya higii Muuseekiŋ.

³Nɛ in ijaagɛɛ any sinɛ kɔna tonurk baŋɛ ɛ in koorɛɛ, mayakana kat nomɛɛ ijaag nɛŋk kir ijaagɛ oko sinɛ tonurɗuk.

⁴Korkoɗar diil sinɔ ɗiliŋɔŋk a ooɗiiŋɔŋk, nɛ arir eta a ɓatakiŋ, ma aasi sɛɛk kir ɗɛyɛɛ a kɔnyɗi ant sinɔɔnɛ tɛmŋɔŋkuŋ.

⁵"Ijaagir any baŋɛ joope taamɛkɛ kɛnɔ dɛnɛr sɛɛg, ijaagir ola gɛŋk sigɔ tuseeɗɛɛ tɛpɛnk sigɔɓa taapuguɗɛɛ sekiyɛ Waakoyotoŋkuk a omoŋ omoŋ a bakaanyjuŋ, kadir abiyak sigɔ jɛɛriyɛɛ a jeeɗuwatuŋɔŋk.

⁶Porur beeɗit nyon eemɛyɔnoŋk nyon wɔɔroŋk, ɗɛyɛr beeɗit ant beeɗitoŋk sinɔɔnɛ tuktank godeey tolɛɛɗoŋk.

⁷Ɗɛyɛr a sɛɛga joop baŋɛ gaɓɛr digoy eemɛyɔnoŋk, nyon gabiyeyoŋk a riyar sɛɛg kɛ rɔɔriytaan.

⁸"Mayakana sɔɔk kat kɔnu riyɛ kɛ rɔɔriytaan, ege rɔɔriytan noŋk omoŋ, ma sɔɔk ito iinak masiikeenak sigɔ rɔmaaŋɔŋk baŋɛ.

⁹Kat lakɛ iɗit sinɔ riyari ɗook raŋk kɛ baabɛɛk agut sinɔ latukuɗɔ Baaɓa noŋk a omoŋ sinɛ ar darik.

¹⁰Kat kɔnu riyɛ kɛ suumi agut sinɔ Suumi noŋk Keresee sinɛ omoŋɔŋkuk.

¹¹Iɗit sinɛ iinakɛ kɔɔr obi joope baŋɛk dakɛkoy a ijaagen noŋk.

¹²Iɗit sinɔ ɓɔŋgɔɔrɛ ɛɛk nɛɛk rakaayak daraayɛɛkoyŋ, iɗit sinɔ daraayɛ ɛɛk nɛɛkik eemɛyɛɛkoyŋ.

¹³"Durikoy kɔna, iinak rɔɔriytaanak higi Muuseek a joop Paarisik! Iinak joop sigɔ gayar joop sigɔ mentaanaŋɔŋkuk. Agut sinɔ korurɗɔ joope tuga kɛnɔ kat guugunyar burɛya dariyoŋkuk, iinak kiirkoy ɓɔrɔ guugunyɔn ɛkoy kiir ariiɗ a guugunyar joop sigɛ ɗɛyɛrkɛ guugunyɔnkuŋ.

¹⁴[Durikoy kɔna, iinak rɔɔriytaanak higi Muuseek a joop Paarisik! Iinak joop sigɔ gayar joop sigɔ mentaanaŋɔŋkuk. Ariir godeyik jartiyatɔk sigɔɓa rɛrar sɛɛge babuyk a ɓɛɛlɛr sɔkɔn. Ɗanɗamaakari a jeeɗoŋ a gayari joop. Boŋiirkoy goopan sinɔ kaalɛŋɔŋk.]

¹⁵"Durikoy kɔna, iinak rɔɔriytaanak higi Muuseek a joop Paarisik! Iinak joop sigɔ gayar joop sigɔ mentaanaŋɔŋkuk. Agut sinɔ ŋawiiteer sinɔɔnɛ gɔrɔ sinɔ obiiŋɔŋk a sinɔɔnɛ paalkiŋɔŋk a warɛɛri iɗit sinɔ omoŋɔŋk kɛnɔ guuguny ŋaadiyɛɛka Ayuuduk, nɛ saa ŋaadiɗiiɗik ariir sɛɛn a iɗit sinɔkoy guuguny siioola a kaalɛ iinak a suɗaktaanak pɛɛy.

¹⁶"Duri koy kɔna, iinak ɔɗɔweer sigɔ motakik toniir kɛ, 'Ɔkɔn iɗit omaay kuumɗi Godeey sinaanɛ Geetitankiŋ kɛɛ any, mayakana ɔkɔn kuumɗi workee sinaanɛ ar Godeey sinaanɛ Geetitank takikiŋ, mɛlageeɗkoy kuumeet nɛɛkɛŋ.'

¹⁷Iinak gaagɛyɛ sigɔ motakik! Worke a Gode sinɛ Geetitank sinɛ ari worke nɛɛk a geetitank kaalɗi won?

¹⁸Toniir kɛ, 'Ɔkɔn iɗit omaay kuumɗi nyon uduŋeetoŋkuŋ kɛɛ any, mayakana ɔkɔn kuumɗi tigii sinaanɛ arkiɗ raŋkiŋ, mɛlageeɗkoy kuumeet nɛɛkɛŋ.

¹⁹Iinak motak, tigi a nyon sinɛ uduŋeetoŋk sinɛ ari tigi nɛɛk a geetitank kaalɗi won?

²⁰Iɗit sinɔ kuumɗi nyon sinaanɛ uduŋeetoŋkuk, kuumɗi nyon sinaanɛ uduŋeetoŋk a ant sinaanɛ arkiɗ raŋk.

²¹Maɓɔrɛ iɗit sinɔ kuumɗi Godeey sinaanɛ Geetitank, kuumɗi Godeey sinaanɛ Geetitank a Waakoyote sinaanɛ beeɗ Godeey sinaanɛ Geetitank takik.

²²Iɗit sinɔ kuumɗi darik kuumɗi barsum eemɛyɔnoŋk Waakoyotoŋk a Waakoyote sinaanɛ beeɗ barsum nɛɛkɛ raŋk.

²³"Durikoy kɔna, iinak rɔɔriytaanak higi Muuseek a joop Paarisik! Iinak joop sigɔ gayar joop sigɔ mentaanaŋɔŋkuk. Gaɓɛɛr a asiraat joomuy a naatiloy a ola uusetoŋk ɔgɔ ma ŋɔɗari ola sigɛ dɔɔsuk atu higii nɛɛkɛkiŋ, sɛɛg pirdi maariyeet a eekeerikeen, gun ijaagiir ola sigi a kiir sɛɛg toŋoɗ.

²⁴Iinak ɔɗɔweer sigɔ motakik boŋurkɔ any sinɔ tɛm a ito meltit nɛ oriiriŋ, ma geenyɛɛr any sinɔ obi a ito tagak.

²⁵"Durikoy kɔna, iinak rɔɔriytaanak higi Muuseek a joop Paarisik! Iinak joop sigɔ gayar joop sigɔ mentaanaŋɔŋkuk. Aadiir any tuutoŋk a lɔkɔy raŋan nɛɛk ma takana gɛŋk enya weeweel ɓolaatuuruwɛkoŋk a bakaanyka amɗoŋk.

²⁶Iin iɗit Paarisik sini motuk! Aadi tɛɛnan jeemɛ any sinɛ tuutoŋk a lɔkɔy nɛɛk takan nɛɛk, nɛkɔɔ ɓaane raŋan nɛɛkɛ aaditan.

²⁷"Durikoy kɔna, iinak rɔɔriytaanak higi Muuseek a joop Paarisik! Iinak joop sigɔ gayar joop sigɔ mentaanaŋɔŋkuk. Gayikari a piiyakɔ sigɔkan puusɛ raŋana gɛŋk puyoy a mentaanaŋɔŋk, ma takanak gɛŋk enya ɛmɛɛk joop sigɔkan rɛrarŋɔŋkuk a ola sigɔkan mojɛrŋɔŋk baŋɛ.

²⁸Iinak gayikari raŋana goŋk joopa a joop sigɔ mentaanaŋɔŋk, mayakana takana goŋk enya tagay a joop sigɔ mentaanaŋɔŋkuk a tikiyɛ.

²⁹"Durikoy kɔna, iinak rɔɔriytaanak higi Muuseek a joop Paarisik! Iinak joop sigɔ gayar joop sigɔ mentaanaŋɔŋkuk. Ijaagiir piiyakɔ joop pɛrkaakoŋkuk, ŋaɗɛɛr piiyakɔ joop sigɔ mentaanaŋɔŋkuk.

³⁰Toniir kɛ, 'Ɔkɔnɓa ɓɛɛlii eme saaɓa ɔrɛyak gaŋkiŋ gunɓa kii sɛɛg tokony ɓuuraan yɛrom joop pɛrkaakoŋkuk.'

³¹"Yaaŋɛɛr ɛkan goŋk ant sineene kɛ iinak tɔɔmɔk ɔrɛyak goŋkuk sigɛɓa ɓokootar joop pɛrkaakoŋkuk.

³²Sisɔ in ruumɛɛ ijaag sinɔ ŋɛɛwɛnŋɔŋk sinɛɓa tuker ɓaaɓakak pediya.

³³"Iinak kookowɛ! Iinak tɔɔmɔk gumiyoŋk! Oolɛɛrkoy a bɔdɛɛr goopan siiooluk ɛk?

³⁴Agut sini wosɛyɛɛrakoy kɔna joop pɛrkaakoŋk a joop sigɔ ɗegerar ɛɛkik a rɔɔriytaanak higi Muuseek, nɛ sigeege ɓokootari ɔgɔɔŋ, ma laalawari ɔgɔɔŋ ma ɗiŋeeri ɔgɔ godeyikɛ gɛŋk tolɛɛɗoŋk Ayuuduk epaayari sɛɛg katamɛɛ katamɛya.

³⁵Agut sini iinak kɔɔniytaanak agut yɛrom sinɛɓa ɓuurik ɗook raŋk mentanŋɔŋk baŋɛ, a tukiɗi yɛrom Abeelik sinɛɓa mentan taamɛkɛ Waakoyotoŋkuk, nɔ mɛlɛɛɗa yɛroma tɔɔn Barakiyuuk Jakariyaasik sinaanaɓa ɓokotiirk sinɛɓa ɓuuriki Godeey sinaanɛ Geetitank a nyon uduŋeetoŋk kɔɔrk.

³⁶Eekeer tona kɔnaaŋ, goopɛɛkoy joop eme sinik agut any sinɛɓa ɗeyik baŋɛŋ.

³⁷"Iin Yorsaleem, Yorsaleem! Iin sinɛ ɓokootar joop goonɛ joop pɛrkaakoŋk ɛ baabaalar giɗekɛ joop sigɛkan wosɛyɛɛr sɛɛg Waakoyot iinak. Ɗɛyakoy joop katamɛ nɛɛk tolɛɛɗa oko sini tolɛɛɗ koogelees nyawukak gɛɛŋk tɔɓɔyɔkɛ gɛɛnɛkik agut eger? Yakana sɔɔk kiirti ɗɛyɛ.

³⁸Dakɛkoy wɛy noŋk a ɓɛɛlɛ sɔkɔn.

³⁹Tona kɔnaaŋ, kiirkoytu taanta kɛkar mɛlɛɛɗa nɔkoy tonurɗɔ kɛ, 'Iɗit sinɔ kus tiriyaakɛ Suumiyoŋkuk Geetitank.'"