Read majang Maatiyoos 27 Bible Online

Maatiyoos 27 - majang bible

Maatiyoos 27

¹Saaɓa aayirkiɗik nɛɓa waasiɗi ɔɗɔweer tapa ŋaadiyɛɛkoŋk a gutarɛyɛ ɗookoŋk kɛnɔ ɓokotɛɛ Yeesee.

²Saadi baŋiya korkoɗarɓa Yeesee nɛ diiler nɛ kaar gaɓɛr Pilatoosa sinaana ɗumaat ɗookak.

³Saaɓa ɗegerɗi Yuuda sinɛɓa gaɓɛ Yeeseek kɛ pɛrɛdɛɛɗɛkɔɔŋɔŋk nɛɓa koɓi kɛ moko liki any sinɛkɔ ijaagaak, nɛɓa jumur biriyatɔk sigɛ ruumer iɗit a aarink ɔɗɔweera tapa ŋaadiyɛɛkoŋk a gutarɛyɛɛka.

⁴Nɛ tonu sɛɛga kɛ, "Tikiɗiikakɔŋ, gaɓaakɔ iɗit sini kiiɗɛ tikiyɛɛk." Nɛɓa sɛɛk tonurgeeɗ kɛ, "Rakatii seek jikon, giroy nook."

⁵Nɛɓa Yuuda oru biriyatɔk gɛɛŋk Godeey sinaanɛ Geetitank tak, nɛ ŋaar nɛ kɛɛ laalawu ɛɛk nɛɛk, nɛ rɛrŋ.

⁶Nɛɓa ɔɗɔweer tapa ŋaadiyɛɛkoŋk boŋur biriyatɔk gɛɛŋk nɛ tonur kɛ, "Ki higii pɛgɛdɛɛt nɔ gaɓɛrii sanduka tigiyoŋkuŋ agut sinɔ gati wɛɛŋa yɛromoŋkuk."

⁷Nɛɓa waasiɗiigeeɗ nɛ ɓalɛɛ wori nɛɛkɛ nyon sinɔ kɔwuɗɛ konank ete sinɔɔnɛ kɛkɛny suɓoyk.

⁸Agut sini riyɛ nyon sini mɛlɛɛɗa ɓɛɛnyɔwase kɛ, "Ɗoo Yɛromoŋk."

⁹Dusanɛɛ sineene sinɛɓa taapɛ iɗit pɛrkaakoŋk Ermiyaas kɛ, "Boŋur tɔɔmɔk Israeelik biriyatɔk a ruumer iɗit a aarin sigɛɓa loomark a gati nɛɛkik.

¹⁰Koyurɗuɓa ɗoo iɗit sinɛ kɛkɛny suɓoyk, oko sinɛɓata toniiɗ Suumiik."

¹¹Saaɓak wideerɓa ɛɛk Yeese son lak ɗumaat ɗookak taamɛka Pilatoosuk nɛɓa sɛŋk ɗumaat ɗooka kɔɔniy kɛ, "Iin, tapaɗ Ayuuduk?" Nɛɓa Yeese jumurgeeɗ kɛ, "Oko sinɛ toniiɗink."

¹²Ɔɗɔweer tapa ŋaadiyɛɛkoŋk a gutarɛyɛ saaɓa ooɗɛrɗik kɛɛ any sinɔɓa jumurk ara.

¹³Saadi baŋiya tongeeɗɓa Pilatoos kɛ, "Kin weenta kɛ ooɗɛrni olaatɛ sigɔɔgɛ ɛtɛr ɛkik?"

¹⁴Nɛɓa kɛɛ any sinɔ jumur Yeesek a reemɗi ɓayɛ Pilatoosuk.

¹⁵Lakɓa iɗit sinɛ ɗumaat ɗookak barɛ sinɔ woorkuɗ korkortan a omoŋ sinɛ kɔɔniyar joopk kɛnɔ sɛɛga woorkɛɛ Ba'aale Ɗoyiɗoŋk.

¹⁶Saaɓak lakɛɓa korkortan sinɔɓa ɗegerɛɛŋɔŋk sinɔɓa riyɛ kɛ Bɛrbaanik.

¹⁷Saaɓa atukuɗ joop tolɛɛɗik nɛɓa Pilatoos tonu sɛɛga kɛ, "Bɛrbaan a Keresee sinɛ riyɛ kɛ Yeeseek ɗɛyɛɛr a kɔna woorka wooɗ?"

¹⁸Ɗegerɓa Pilatoos kɛ gaɓɛrgeeɗkan agut sinɔ porurɗu ɛkan gɛŋkik."

¹⁹Saaɓa Pilatoos arkiɗ beeɗit barsum pirdiyoŋkuk nɛɓa jarti nɛɛkɛ wosɛyɗitaageeɗ kɛ, "Kat lakɛ any sinɔ ijaagin ete sineene mentanŋɔŋk raŋk. Laaŋoyɛɛkɔtu ɓenyse kaalt jɛt pɛrkiyɛɛkɛ agut iɗit sini."

²⁰Ɔɗɔweer tapa ŋaadiyɛɛkoŋk a gutarɛyɛ remɛrɓa joop kɛnɔ kalɛyir kɛnɔ sɛɛga woorkɛɛ Bɛrbaan ma sɛŋk ɓokotɛɛ Yeeseeŋ.

²¹Nɛɓa iɗit sinɛ ɗumaat ɗookak kɔɔniya kɛkar kɛ, "Joope sigaagɛ pɛɛyk ɗɛyɛɛr a kɔna woorkɛɛ wooɗ?" Nɛɓa sɛɛk jumurar kɛ, "Ɗɛyii atina woorkɛɛ Bɛrbaan."

²²Nɛɓa Pilatoos tonu kɛ, "Anɛ Keresee sinɛ riyɛ kɛ Yeeseek ara ɛk?" Nɛɓa tonur sɛɛg baŋɛ kɛ, "In laalawɛɛ!"

²³Kɔɔniyɓa sɛɛg Pilatoos kɛ, "Agut jikon ijaagkɔ tikiyɛ kɛ jikonak?" Yakanaɓa sɛɛk ooyɛr a kaalɛŋ kɛ, "In laalawɛɛ!"

²⁴Dɛnɛɓa Pilatoos any sini akɔɔ boŋku ooyan ma kiiɗɛ tɔkɔny, nɛɓa ari a diilagiɗɛ maawu nɛ aadi arin gɛɛŋk joope gɛɛnɛk taamɛkɛ nɛ tonu kɛ, "Moko eet ɔɗɔwen reta iɗit sini kiiɗɛ tikiyɛɛk. Ege ɔɗɔwikeen nɛɛkɛ noŋk."

²⁵Nɛɓa joop baŋɛ tonur kɛ, "Ege ɔɗɔwikeen nɛɛkɛ naŋk a tɔɔmɔk gaŋkik agut rer iɗit sinɛk."

²⁶Saaɓak woorkuɓa Pilatoos Bɛrbaan nɛ ŋɔɗuruŋ, ma Yeesee ari a ɗiŋɛɛ nɛ gaɓɛ amaasiniyɛɛka Roomuk kɛnɔ laalawar.

²⁷Saaɓak diilerɓa Yeesee amaasiniyɛ sigɛ ɗumaat ɗookak keera sinaana ɗumaat ɗookak, tolɗiiɓa amaasiniyɛ gɛɛnɛ baŋɛ sɛɛne tookɛɛta.

²⁸Boŋurkuɗɓa abii nɛɛk ɗooka nɛ gaɓɛrgeeɗ ɛɛka abii sinɔ dɛɛŋɔŋk.

²⁹Kɛnyarɓa dooroy ɓɛynikoŋk nɛ gaɓɛrgeeɗ ɔɗɔwa, gaɓɛrgeeɗɓa sombal ariita nɛɛka gɔɔta sinaana ɗiɗikik kɛnɔ gaamuɗ nɛ ɛtɛrgeeɗ korontunɛ nɛ daraayɛr a tonurgeeɗ kɛ, "Iin tapaɗ Ayuuduk, digoyna."

³⁰Topɛpɛyargeeɗɓa nɛ boŋurkuɗ sombal nɛɛk ariit nɛ mamalarɗi ɔɗɔ nɛɛk a totoparŋ.

³¹Daraayɛrɓa nɛ boŋurkuɗ abii sinɛ dɛɛŋɔŋk, nɛ gaɓɛrgeeɗ ɛɛka abii sinɛɓa nɛɛk, nɛ diiler kɛnɔ laalawar.

³²Saaɓa ŋaararkiɗ keer sinaanɛ ɗumaat sinɛ ɗookak nɛɓa rookomar iɗit ɗoo Kɛrenaak sinɔ riyɛ kɛ Simionuk nɛɓa remɛrgeeɗ kɛnɔ ɓataki laalawutan nɛɛk.

³³Saaɓa mɛlɛrɗi nyona sinɔɔna riyɛ kɛ Golgotaak ma wooran nɛɛk ɛmɛɛnan ɔɗɔwoŋkuk,

³⁴gaɓɛrgeeɗɓa ogool wɛynik sigɔɓa lotɛɛ a any sinɔ ɓaayŋɔŋkuk kɛnɔ uteɗ, yakanaɓa sɛŋk lɛɛlɛmɛ nɛ ki ɗɛyɛ a uteŋ.

³⁵Nɛɓa laalawar nɛ orur ita abiyaka gɛɛna nɛ kaakasar sɛɛgiŋ.

³⁶Dokurɓaɗe saadi nɛ koorɛrŋ,

³⁷riiɓerɓa taapiyɛ sigɔ yaaŋɛr sɔɔkiyɛ gɛɛŋkik Yeesee goysɔ ɔɗɔwaak laalawutant nɛɛkɛ raŋk sigɔ tonur kɛ, "Ege sini Tapaɗ Ayuuduk."

³⁸Saaɓak laalawɛɛɓa joop sigɔ sɔɔkɛr ɓɛɛlk a pɛɛy a Yeesee agut omoŋ, om goyse ɗiɗikakɛk ma om goyse kantunakɛk.

³⁹Joop sigɛɓa ɗoyur sinaanɛ jɔkoŋkuk daraayɛrɓa a ŋɛɛŋɛyɛr ɔɗɔɔk.

⁴⁰Tonurgeeɗɓa kɛ, "Iin sininɔ aalin Gode sinɛ Geetitank nɛ kɛnyin ɗoŋikɛ sigɔɔgɛ jiitik, ebɔdutɔ ɛɛk nook! ɔkɔn iin Tɔɔn Waakoyotoŋk, worworakatɔ laalawutant ɗooka!"

⁴¹Maɓaɓɔrɛ daraayɛr ɔɗɔwer tapa ŋaadiyɛɛkoŋk sɛɛg a rɔɔriytaanak higi Muuseek a gutarɛyɛ agut omoŋ a tonur kɛ,

⁴²"Ebɔdɛ joop ɔgɔ ma ki oolɛ ebɔdɛɛt ɛɛk nɛɛkik. Ɔkɔnɓɔ sɛɛn Tapaɗ Israeelik, intɔ worworiik sisɔ laalawutant ŋaadiikɔɔ ɓɔreŋ.

⁴³Ŋaadikanɔtɔ Waakoyo. Ɔkɔnɓɔ poru sɛɛniŋ intɔ ebɔdɛ sɛɛn sisɔ, agut sinɔ totonkan kɛ, 'Eet Tɔɔn Waakoyotoŋk.'"

⁴⁴Joop sigɛɓa sɔɔkɛr ɓɛɛlk sigɛɓa laalawɛɛ sɛɛg a sɛɛnik nyɔɔnarɓa ɓɔrɛ sɛɛniŋ.

⁴⁵Ɓɛɛlɛɓa ɗook raŋk baŋɛ a nyuugur a tukiɗi sayitiyɛɛkɛ sigɔɔgɛ tula omk sigɔɔga tula aŋank.

⁴⁶Sayitiyɛɛkɛ sigɔɔgɛ tula aŋank duriyeɓa Yeese a ɗooruŋ kɛ, "Elohee, Elohee, lama sɛbɛktanii?" Wooran nɛɛk sini kɛ, "Waakoyo naakɛ, Waakoyo naakɛ, ŋɔɗunkɔtu agut jikonk?"

⁴⁷Joop sigɛɓa ɛtɛtɛɗar saadik a omoŋ omoŋ tiyɛrɓa duri nɛɛk nɛɓa tonur kɛ, "Riy Eliyaas."

⁴⁸Nɛɓa sɛɛge iɗit omaay sisa reeri nɛ boŋku abii sinɔ yuuse maawuk, nɛ yuusukuɗ ogool wɛynik sigɔ kowɛrŋɔŋk nɛ rokopɛ sombala, nɛ gaɓɛɛr Yeeseya kɛnɔ uteɗ.

⁴⁹Ma ɔgɔɔk tonur kɛ, "Kat dɛniikɔɔ saakɔɔ mɛlkiɗ Eliyaas nɔkɔɔ ebɔdɛɛɗikiŋ."

⁵⁰Nɛɓa Yeese duriye kɛkar a ɗooruŋ nɛ rɛrŋ.

⁵¹Saaɓak pɔɔkiɗɓa abii sinɛɓa biriitɛɛ Godeey sinaanɛ Geetitank a pɛɛy rakaay mɛlɛɛɗa ɗooka, yikiɗiiɓa ɗoo ɓadaayaɓa talaaɗɛyik.

⁵²Ɓuukiɗiiɓa piyakɔ nɛɓa ŋaararki joop sigɔ geetitaanakik sigɔɓa rɛrarŋɔŋk a ɓɔɔkaaŋ.

⁵³Ŋaararkiɓa piyakɔkɛ, nɛ saaɓa ŋaarkiɗ Yeese ret walasak baŋiya guugunyarɓa katamɛya sinaana Geetitank Yorsaleema, nɛɓa saadi dɛnɛr sɛɛg joop sigɔ ɓɔɔkaaŋɔŋk.

⁵⁴Ɔɗɔwen amaasiniyɛ sigɛ ɗibɛk sɛɛn a joop sigɛɓa koorɛr Yeeseek saaɓa dɛnɛrɗi yike sinɛ ɗookoŋk a ola ɔgɔɔk nɛɓa ɓuri jɛt nɛ tonur kɛ, "Egek ɔrɔ sini Tɔɔn Waakoyotoŋk eekeerɛ!"

⁵⁵Lakɛɓa saadi jartiyatɔk sigɔɓa mermemenik ayowɛɛɗŋɔŋk a ɓɔɔkaaŋ sɛɛg sigɛɓa nonomar Yeesee a kɔkɔnyar a tukiɗi Gɛlilaakeek.

⁵⁶Sɛɛge kɔɔr ɓɛɛlɛrɓa Maariyam Mɛgdooluk a Maariyam ɛmɛs Yaykooba a Yoosepa a ɛmɛs tɔɔmɔka Jɛbdiyoosuk.

⁵⁷Saaɓa kɔjururkuɗuk mɛlkiɓa iɗit sinɔ lak worik sinɔ riyɛ kɛ Yoosepuk Armaatiyaasik, sɛɛnɓa ɓɔrɛ nomtan Yeeseek.

⁵⁸Kɛɛɓa son lak Pilatoosuk nɛ kalɛyiɗ buusɛ Yeeseek, nɛɓa Pilatoos tonu amaasiniyɛɛka gɛɛna kɛnɔ gagiɗɛ.

⁵⁹Nɛɓa Yoosep boŋku buusɛ nɛɛk nɛ ɓuw abiye sinɔɔnɛ mentanŋɔŋk.

⁶⁰Nɛɓa riiɓe kaakak nɛɛkɛk sinɔɔnɛ tɔɔnuk sinɔɔnɛɓa ragadɛɛ a sɛpɛɛ talaaɗɛk nɛ girgiɗki giɗee sinɔ obiiŋɔŋk nɛ koriiɗ utul nɛɛk ato nɛɛk, nɛ ŋaariŋ.

⁶¹Maariyam Mɛgdooluk a Maariyam sinɛɓa omk beebeɗarɓa saadi pii nɛɛkɛ taamɛkɛ.

⁶²Romiɗ nɛɛkɛk ragad waawuy Sambatɛyoŋk Ayuuduk baŋiya, waawuy sinaanɛɓa ɗeyik ɔɗɔweer tapa ŋaadiyɛɛkoŋk a joop Paarisik wideetarɓa ɛɛk son lak Pilatoosuk, nɛ tonurgeeɗ kɛ,

⁶³"Suumi naŋk, iɗit sinɛ ari iɗit a tikiɗiiŋɔŋk koɓukii sinɛkan tonu saakan in arkiɗ wɛɛŋakɛ gɛɛnɛkik kɛ, 'Ŋaarkakɔɔ ret walasa ɗoŋikɛ sigeege jiitik baŋiyaak.'

⁶⁴Agut sini tonu kɛnɔ koorɛɛ pii nɛɛk jɛt a ɗoŋ jiit kɛnɔ mokɔɔ kurak agalir nomtaanak gɛɛnɛ buusɛ nɛɛk nɔkɔɔ tonur joopa sigaaga ɓɔɔkaak kɛ, 'Isikɔ ŋaarki ret walasak. Ma ɔkɔn kɔɔŋ tikiyɛ sigɛkɔɔ pediyaak kaalɛrkɔɔ sigɛkan tukik.' "

⁶⁵Nɛɓa Pilatoos tonu sɛɛga kɛ, "Isgi koortaanak latukarik in kɛɛɗɛɛ arɛɛ a koorɛɛ oko sinɛ ɗegerarɗɔɔk."

⁶⁶Nɛɓa kaar biter giɗee nɛɛk nɛ girɛyɛr nɛ arir a koorɛr pii nɛɛk amaasiniyɛɛk.