Read majang Maatiyoos 28 Bible Online

Maatiyoos 28 - majang bible

Maatiyoos 28

¹Saaɓa ɗoyiiɗ waawuy Sambatɛyoŋk Ayuuduk waawuy Sambatɛyoŋk romiɗ gibi Maariyam Mɛgdooluk a Maariyam om kaarɓa kɛnɔ dɛnɛr pii nɛɛk.

²A gorgorŋ lakɛɓa yike ɗookoŋk sinɔ obiiŋɔŋk, agut sinɔɓa worworiikiɗ wosɛytan Waakoyotoŋk dari nɛ girgiɗe giɗee sinɛɓa koriiɗɛɛ pii nɛɛkik nɛ beeɗiɗ raŋk.

³Ɗaawurɓa taamɛ wosɛytan nɛɛkik a ito nyaalan, tupeenyɓa abii nɛɛkɛ a ito malwan.

⁴Ɓurerɓa koortaana gɛɛnɛ wosɛytan nɛɛk nɛ piiɗer a ɓɛɛlɛr a ito joop sigɔkɔ rɛrŋɔŋk.

⁵Tonuɓa wosɛytan Waakoyotoŋk jartiyatɔka sigaaga kɛ, "Iinakɛ kat ɓuriikɛɛ, ɗegera kɛ ɗɛyɛɛr Yeesee sinɛkan laalawɛɛk.

⁶Kɛɛ seedi, ŋaarkikɔŋ oko sinɛkan toniiɗik. In kusɛɛ dɛnɛɛ saan kɔ ɗuɗuŋɗuɗek.

⁷Sisɔ in ŋaarɛɛ a gorgorŋ nɔ kɛɛɗɛɛ tonɛɛ nomtaanaka gɛɛna kɛ, 'Ŋaarkikɔ ret walasaŋ, ɗeykunkɔɔ kɔne ɔɗɔɔkɛ Gɛlilaaka laŋiirkɔɔ sooy.' Sisɔ tonakɔ kɔnaaŋ."

⁸Ŋaararɓa jartiyatɔk sigɛ saadi pii nɛɛkɛ a gorgorŋ a tuɓur a yaaka sinɔ obiiŋɔŋk. Nɛɓa reerir nɛ kaar tonur nomtaanaka gɛɛnaak.

⁹Nɛɓa sisa laŋki sɛɛg Yeese gopɛ nɛ tonu sɛɛga kɛ, "Digoy kɔna." Nɛɓa sɛɛk wideetar ɛɛk son lak sɛɛnik, nɛ gaamur derak gɛɛŋk nɛ ugumergeeɗiŋ.

¹⁰Tonuɓa sɛɛga Yeese kɛ, "Kat ɓuriikɛɛ in kɛɛɗɛɛ tonɛɛ manyaakaka eeta nɔ kaar Gɛlilaaka dɛnɛrkɔɔtu sooy."

¹¹Saaɓa atukuɗ jartiyatɔk sigɛ gopɛk, nɛɓa amaasiniyɛɛkɛ gɛɛnɛ a omoŋ omoŋ kaar katamɛya nɛ tonur any sinɛkan ɓɛɛlɛk baŋɛ ɔɗɔweera tapa ŋaadiyɛɛkoŋk.

¹²Ɔɗɔweer tapa ŋaadiyɛɛkoŋk a gutarɛyɛ tolɗiiɓa agut omoŋ nɛ waasiɗi nɛɓa gaɓɛr wori a obiiŋ amaasiniyɛɛka gɛɛnaak,

¹³nɛ tonur sɛɛga kɛ, "Toniirkɔɔ joopa kɛ, 'Kurakkɔ agalir nomtaanak gɛɛnɛ buusɛ Yeeseek kaalt ma ɗeegariiŋ.'

¹⁴Ɔkɔnkɔɔ tiyɛ any sini ɗumaat ɗookaŋ, tonguɗiikɔɔ any nɛɛkiŋ ariikɔɔ a kɛɛ rakatɛ sinɔkɔɔ laŋirkɔɔk."

¹⁵Nɛɓa amaasiniyɛ gɛɛnɛ boŋur wori nɛɛk nɛ ijaagir oko sinɛkɔ toniiɗɛɛ sɛɛgak, totonɛɛ any sini sooy lak joop Ayuuduk nɔ mɛlɛɛɗa ɓɛɛnyɔwase.

¹⁶Kaarɓa nomtaanak sigɛ aarin a omoŋɔŋk saanakan sɛɛga yaaŋɛ Yeese kɛnɔ kaargeeɗik kurkuma sinaana ar Gɛlilaakeek.

¹⁷Saaɓa dɛnɛrɗik nɛ ugumergeeɗiŋ, ma joop a omoŋ omoŋ latugeeɗ koɓiɗak a pɛɛy.

¹⁸Wideerɓa Yeese ɛɛk son lak sɛɛgik nɛ tonu sɛɛga kɛ, "Gaɓɛɛɓata ɓaŋkawuka baŋɛ dari a ɗook.

¹⁹Sisɔ in kɛɛɗɛɛ nɔ kaar ariir joop ɗookoŋk baŋɛ a nomtaanak nɔ aadiir sɛɛg tiriyaakɛ Ɛpɛn eteŋkaak a Tɔɔn nɛɛkik a Wɛɛŋa sigɔ Geetitaanakik,

²⁰in rɔɔriyɛɛ sɛɛg kɛnɔ ijaagir any sinɛkɔ kɔna tonaak. Eet a iinak agut omoŋ ɓɛɛnyɔwɛ gɛɛŋk baŋɛ nɔkoy mɛlɛɛɗa pediya ɗookoŋk."