Read majang Maatiyoos 5 Bible Online

Maatiyoos 5 - majang bible

Maatiyoos 5

¹Saaɓa Yeese dɛnɛɛɗ joop sigɔ ɓɔɔkaaŋɔŋkuk, nɛɓa kɔtɔɔŋɛ kurkuma nɛ kɛɛ dokuɗe. Nɛɓa nomtaana gɛɛnɛ wideetar ɛɛk son lak sɛɛnik,

²nɛɓa tuke sɛɛg rɔɔriyɔɔna kɛ,

³"Iinak joop sigɛ sankaanak wɛɛŋakɛɛk, iinak geetitaanak, agut sinɔ ege burɛ dariyoŋk noŋk.

⁴Iinak joop sigɛ ɓakɛydiik, iinak geetitaanak, agut sinɔ ege gaananit Waakoyotoŋk noŋk.

⁵Iinak joop sigɛ rikiter ɛɛk nɛŋkik, iinak geetitaanak, agut sinɔ ege ɗook baŋɛ noŋk.

⁶Iinak joop sigɛ ɗɛyɛr any sinɔ mentan taamɛkɛ Waakoyotoŋk jɛtik, iinak geetitaanak, agut sinɔ ege ɓooɗorɔn any sinɔ yaaŋɔŋk noŋk.

⁷Iinak joop sigɛ maariyɗik, iinak geetitaanak, agut sinɔ ege maariyeet Waakoyotoŋk noŋk.

⁸Iinak joop sigɛ mentaana ɓayɛtunɛɛkɛ gɛŋkik, iinak geetitaanak, agut sinɔkoy dɛnɛrɗɔ Waakoyoŋɔŋk.

⁹Iinak joop sigɛ ijaagir taakiyɛk, iinak geetitaanak, agut sinɔ ege Waakoyot Ɓaaɓa noŋk.

¹⁰Iinak joop sigɛ epapayɛɛk agut any sinɔ mentan taamɛkɛ Waakoyotoŋkuk, iinak geetitaanak, agut sinɔ ege burɛ dariyoŋk noŋk.

¹¹Iinak geetitaanak saa kɔnu sɔɔkɛrɗik joop a saa kɔnu epapayarɗik ɛ saa kɔne tonurɗu any sinɔ ŋɛɛwɛnŋɔŋk a nyɔɔna sigɔ ɓɛɛlɛr kundiyaakɛk baŋɛ agut eetik.

¹²In kɔna yaa jɛt agut sinɔ obi gati sinɛkoy laŋiir darikiŋ. Epapayɛɛɓa joop pɛrkaakoŋk sigɛɓa ɓɛɛlɛr iinakɛ ɔɗɔɔkɛk oko sinik.

¹³"Iinak mooyi ɗookoŋk. Mayakana ɔkɔn ki mooyi luuluwukaaŋ, nɛkɔɔ oolɛ a luuluwe kɛkar ɛk? Kɛɛ any sinɔ kɔnykuk, ɔkɔn mokokɔɔ oriirɛ walasa nɔ torookar joop.

¹⁴Iinak pɛɗɛrka joopa ɗookoŋk. Katamɛ sinɔ ar kurkum raŋk ki oolɛ a dugiɗiiŋ.

¹⁵Kɛɛ iɗit sinɔ idaawu ɗaawan nɛ turkuuke kebetik, ma riiɓe soodi dɛnɛɛɗɛ pɛɗɛrka nɛɛk, kɛnɔ pɛɗɛɛɗ joopa sigaaga atu godeey takik baŋɛ.

¹⁶Oko sinik in ɗaawu pɛɗɛrka noŋk joope taamɛkɛ, kɛnɔ dɛnɛr joop ijaag noŋk sinɔ mentanŋɔŋk, kɛnɔ eemɛyar Ɓaaɓa noŋk dariyoŋk.

¹⁷"Kat koɓiir kɛ kusaakan kɛnɔ aala higi Muuseek a pɛɛni joop pɛrkaakoŋk. Kusaakan kɛnɔ gayɛ any baŋɛ a eekeer, ma mokokan kɛnɔ aala.

¹⁸Eekeer tona kɔnaaŋ, nɔkoy ɗoyiɗ ɗook a darik gayɛkoy any baŋɛ a eekeer higii baŋɛ, makoy kɛɛ aalɛt higii pɛɛni sɔstan a omoŋ.

¹⁹Iɗit sinɔ aasi aalɛ sekiyɛɛkɛ sigeege sinɔ omoŋɔŋk balaaŋɔŋk ɛ rɔɔriy joop ɔgɔ kɛnɔ ijaagir oko sinik, gagiɗɛkoy Burɛɛ dariyoŋk nyon sinɔ ar ɗookuk. Mayakana iɗit sinɔ dusanɛ sekiyɛ baŋɛk ɛ rɔɔriy joop ɔgɔ kɛnɔ ijaagir oko sinik, gagiɗɛkoy Burɛɛ dariyoŋk nyon sinɔ ar rakaayk.

²⁰Tona kɔnaaŋ, ɔkɔnkoy ki kaalɛt mentanka noŋk taamɛkɛ Waakoyotoŋkuk mentanka rɔɔriytaanak higi Muuseekiŋ a joop Paarisikiŋ, kiirkoy guugunyɔn Burɛya dariyoŋk adaktan.

²¹"Tiyɛɛrɓa sinɛɓa tonɛɛ joopa sigaagaɓa ɗeeŋk kɛ 'Kat ɓokotɗiikinkiŋ, iɗit sinɔ ɓokotu iɗitik pɛrɛdɛɛɗɛɛkoyŋ.'

²²Yakana saak tona kɔna kɛ, ɔkɔn goopun masookoy sɔkɔn diilɛɛ kɔɔnu higiya. Ɔkɔn nyɔɔnun iɗit kɛ, 'Iin badtanŋ' guugunyunkɔɔ pirdiya joop sigɔ gaɓɛr woorank. Ɔkɔn nyɔɔnakin kɛ, 'Iin gaagɛŋ' koorɛni pirdi maɗ siiooluk.

²³Saa widerkiɗin tigi sinɔ uduŋɛɛŋɔŋk nyona sinaana uduŋeetoŋk Waakoyotak, ɛ koɓukun masookoy sinɔ kɔna ŋadiŋɔŋkuŋ,

²⁴nɛ toŋoɗu tigi nɛɛk nyon sinaanɛ uduŋeetoŋk taamɛkɛ. Nɔ tuki nɛɛkɛ kɛɛɗin nɔ taakiɗikar a masookoy, nɛ saadi baŋiya murkun nɛ wideerin any sinɛ uduŋɛɛk.

²⁵Saa kaarɗɔ a iɗit sinɛ manɗiikarik godeya pirdiyoŋkuk, nɛ in mɛyikɛ a gorgor a in atukari gopɛ. Ma ɔkɔnkɔɔŋ nɛ kɔɔnu gaɓɛ ɔɗɔwenta pirdiyoŋk, nɛ kɔɔnu ɔɗɔwen sinɛ pirdiyoŋk gaɓɛ amaasiniya, nɛkɔɔ guugunyun godeya korkoɗɔɔnoŋk.

²⁶Eekeer tona kɔnaaŋ, kii kinkɔɔ ŋaarin saadi ɔɔtɛya sɛkɔɔ koyiiɗin taaribɛ sinɛ pedtank.

²⁷"Tiyɛɛrɓa sinɛɓa tonɛɛ kɛ, 'Kat ibiɗiikinkiŋ.'

²⁸Yakana, saak tona kɔnaaŋ, iɗit sinɔ dɛnɛ peet nɔ ɗɛyɛk ibiɗiikɔ sisa ɓayaay nɛɛkɛ a sɛɛniŋ.

²⁹Ɔkɔnnu ooɗɛ taama nookɛ gɔɔ sinɛ ɗiɗikkiŋ ɔɔtɛ tikiyɛɛkoŋkuŋ, kɔɔkɔyak nɔ orun. Ɔɔtɛ sinɔɔnɛ gun oriiɗɛ ɛɛk nook baŋɛ siioolak nɛna dɔɔs a sanin ɛɛk nook nyon om.

³⁰Ɔkɔnnu ooɗɛ ari nookɛ gɔɔ sinɛ ɗiɗikkiŋ ɔɔtɛ tikiyɛɛkoŋkuŋ, yawak nɔ orun. Ɔɔtɛ sinɔɔnɛ gun oriiɗɛ ɛɛk nook baŋɛ siioolak nɛna dɔɔs a sanin ɛɛk nook nyon om.

³¹"Tonɛɛɓa kɛ, 'Iɗit sinɔ pakakati a jarti nɛɛkik in gageeɗ wargatɛ sinɛ pakakatoŋk.'

³²Yakana tona kɔnaaŋ, iɗit sinɔ pakakati a jarti nɛɛkik ɔkɔnkɔ moko jarti nɛɛkɛ ibiɗiiŋ, nɛ ari jarti nɛɛk a ibiɗiiŋ, iɗit sinɛ boŋu jarti sinɛkɔ pakakatiikɛkik ibiɗiiŋ.

³³"Tiyɛɛrɓa sinɛɓa tonɛɛ joopa sigaagaɓa ɗeeŋkiŋ kɛ in dusanɛɛ pɛɛni sinɛɓa gaɓɛɛr Suumiya wogoykuŋ. Ma kat aalɛɛr pɛɛni noŋk wogoyoŋk.'

³⁴Yakana saak tona kɔnaaŋ, kat wogoyɛɛr adaktan. Kɛygun dari kat wogoyɛɛrɗ agut sinɔ ege dari barsum Waakoyotoŋk.

³⁵Kɛygun ɗook kat wogoyɛɛrɗ agut sinɔ ege ɗook nyon sinɔ riiɓeeɗ Waakoyot derakik. Kɛygun Yorsaleeme kat wogoyɛɛɗɛ agut sinɔ ege Yorsaleem katamɛ Suumi sinɛ Obiikik.

³⁶Kɛygun aɗoy nookɛ kat wogoyun, agut sinɔ kin oolɛ a arin amun nook a omoŋ a tupeenyiŋ maŋk a kɔjuŋ.

³⁷Nɛ waasiyɛ goŋk ɔkɔn kɛ 'Ii' nɛ in 'Ii', ma ɔkɔn kɛ 'Moko' nɛ in 'Moko', ma pɛɛni sinɔ ŋayɗiiki sineenek setanik.

³⁸"Tiyɛɛrɓa sinɛɓa tonɛɛ kɛ 'Iɗit sinɔ kataki taama etoŋkuk nɛ katakɛ taama nɛɛk. Iɗit sinɔ orku ŋedan etoŋkuk nɛ orkɛ ŋedan nɛɛk.'

³⁹Yakana saak tona kɔnaaŋ, kat jumurɛ eta sinɔɔna ijaag any sinɔ ŋɛɛwɛnŋɔŋkuk. Iɗit sinɔ paaŋi pariiwan nookuk gɔɔ sinɛ ɗiɗikik weergeeɗ gɔɔ om.

⁴⁰Ɔkɔnne iɗit omaay ɗɛyɛ boŋiɗa abii nook sinɛ takanenkiŋ, toŋoɗargeeɗ ɓɔrɛ abii nook sinɛ raŋanenk nɔ boŋuɗ.

⁴¹Ɔkɔnnu remɛ iɗit omaay kɛ koy kɛɛɗii gopan sinɔ yowɛɛɗiŋɔŋkuŋ, nɛ in kɛɛɗɛ gopan sinɔ suɗaktank.

⁴²Tigi iɗit sinɔnu kalɛyiŋɔŋk, kat ɓaarin iɗit sinɔne ɗɛyɛ masɛk.

⁴³"Tiyɛɛrɓa sinɛɓa tonɛɛ kɛ, 'Poru iɗit sinɛ beeɗiir jɔkikentik, ma ɓooyu gumaaken nookuŋ.'

⁴⁴Yakana saak tona kɔnaaŋ, in porɛ gumaakeer goŋk, in ɗanɗamaakɛ joopa sigaaga kɔnu epaayark.

⁴⁵Ɔkɔn ijaagiir oko sinikiŋ, iinak koy tɔɔmɔk Ɓaaɓa noŋk sinɛ ar darik. Gaɓɛ Waakoyot waawuy nɛɛk joopa sigaaga ŋɛɛwɛk a joopa sigaaga mentaanakiŋ a tul joopa sigaaga mentaanak a joopa sigaaga ŋɛɛwɛkiŋ.

⁴⁶Ɔkɔn poriir joop sigɛ kɔnu porurk, nɛ latukari gati kɛ jikon? Joop sigɔ yayawar worik a moto ijaagir siniŋ?

⁴⁷Ɔkɔn digoyɛɛr masookoyak dakɛɗaŋ, nɛ kaalɗiɗɔ jikon sinɛ latukarik sinɛkɔ ijaagiirk? Ijaagir aasi joop sigɛ moko Ayuuduk oko sinik.

⁴⁸In iinak joop sigɔ ijaagiir any sinɔ likik oko sinɛ ijaagiiɗ Ɓaaɓa noŋk dariyoŋk any sinɔ likik.