Read majang Maatiyoos 7 Bible Online

Maatiyoos 7 - majang bible

Maatiyoos 7

¹"Kat pɛrɛdɛɛ joope ɔgɔɔkɛ kɛnɔ mokoy kɔne pɛrɛdɛɛ.

²Pɛrɛdɛɛkoy kɔne oko sinɛ pɛrɛdɛrɗɔ joopek. Saparɛɛkoy ɓɔrɛ kɔna ant sinaanɛ saparɛrɗɔk.

³Dɛnin aalaakan sinɛ lak masookooy taamtuk, ma kin taanta doori sinɛ lakin taamt nookɛkik agut jikon?

⁴A kin taant doori sinɛ lakin taamtuk, nɛ oolun a tonun masookoya kɛ inne boŋka aalaakan sinɛ lakin taamtuk ɛk?

⁵Iin iɗit sinɔ gay iɗit sinɔ mentanŋɔŋkuk, boŋa tɛɛnan doori sinɛ lakin taamtuk. Nɛkɔɔ saadi baŋiya dɛnin aalaakan sinɛ lak masookooy taamtuk kɛ ɗɔm kɛnɔ boŋkun.

⁶Kat gaɓɛɛ any sinɔkɔ geetɛŋɔŋk wartuna. Kat orɛɛ wori noŋk kuturɛɛkɛ taamɛkɛ, agut sinɔ torookarkɔɔ kuturɛɛk. Nɛkɔɔ murarki wartun nɛ kakawar kɔnuŋ.

⁷"In kalɛyɛɛ, gaɓɛɛkɔɔ kɔnaaŋ. In warɛɛ, laŋiir kɔɔŋ. In ɓɔɔkɛyɛɛ kekɛ nɛɛk, tayɛɛkɔɔ kɔnaŋ.

⁸Agut sinɔ iɗit sinɛ kalɛyik gagidɛɛkɔɔŋ, iɗit sinɛ warɛk laŋkɔɔŋ, iɗit sinɛ ɓɔɔkɛyɛ kekɛ nɛɛkik taygiɗɛɛkɔɔŋ.

⁹Wooɗ sinɛ iinakɛ ɔkɔn kalɛyiɗ tɔn nɛɛkɛ kiiwu, nɛ gageeɗ giɗeek?

¹⁰Maŋk kalɛyiɗ olt, nɛ gageeɗ kookoŋ?

¹¹A iinak tikitaanak nɛ ɗegerari gaɓɛɛ any sinɔ mentanŋɔŋk tɔɔmɔka goŋkuŋ, nɛ Ɓaaɓa noŋk dariyoŋk ki gaamit any sinɔ mentanŋɔŋk a kaalɛŋ ɛk joopa sigaaga kalɛyirk?

¹²"Any sinɛ ɗɛyɛɛr a kɔna ijaagir joopk baŋɛ, nɛ ɓɔrɛ iinak in ijaagɛɛ sɛɛga oko sinɛk. Rɔɔriyɔn higi Muuseek a joop Pɛrkaakoŋk tonur oko sinɛk.

¹³"In guugunyɛɛ tugaat sinaanɛ tokoolŋɔŋk, tuga sinɛ dilɗi badɛɛɗak bakaanyiŋ, gopan sinɛ dilɗi badɛɛɗak obiiŋ. Joop sigɛkoy guugunyar sinaanɛk ɓɔɔkaaŋ.

¹⁴Mayakana tuga sinɛ dilɗi wɛɛŋakaak tokooluŋ, gopan nɛɛk ooɗiiŋ joop sigɛkoy laŋirk tekerŋ.

¹⁵"In koorɛɛ ɛɛk joope pɛrkaakoŋk sigɔɔgɛ nyonkaanakik. Mɛlɛrki sɛɛk iinaka a gayi ɛɛkan gɛŋk a jiŋkuyɛ, ma takana gɛŋk ito tuwookak sigɔ ɗamiiŋɔŋk.

¹⁶Ɗegerari sɛɛg ijaag nɛŋk sinɔɔnɛ ŋɛɛwɛnŋɔŋk. Riiɓe ɓɛyint taamɛ wɛyinikiŋ, ɛɓɔrɛ riiɓe migir taamɛ bɛlɛɛsikiŋ?

¹⁷Oko sinik kɛɛt sinɔ mentanŋɔŋk gaɓɛ taamɛ sigɔ mentaanaŋɔŋk, ma kɛɛt sinɔ ŋɛɛwɛnŋɔŋk gaɓɛ taamɛ sigɔ ŋɛɛwɛɛŋɔŋk.

¹⁸Kɛɛt sinɔ mentanŋɔŋk ki oolɛ a gaɓɛ taamɛ sigɔ ŋɛɛwɛɛŋɔŋkuŋ, ma kɛɛt sinɔ ŋɛɛwɛnŋɔŋk ki oolɛ a gaɓɛ taamɛ sigɔ mentaanaŋɔŋkuŋ.

¹⁹Kɛɛt sinɔ ki gaamit taamɛ sigɔ mentaanaŋɔŋk baŋɛ, yawɛɛkoy, nɛkoy orɛɛ maɗa.

²⁰Agut sini ɗegerari joop pɛrkaakoŋk sigɔ nyonkaanakik ijaag nɛŋk sinɔɔnɛ ŋɛɛwɛnŋɔŋk.

²¹"Joop sigɔta arir kɛ 'Suumi naakɛ, Suumi naakɛ, kirkoy guugunyɔn burɛya dariyoŋk baŋɛ, ma sigɛkoy guugunyar burɛya dariyoŋkuk joop sigɔ dusanɛr ɗɛyan Baabɛɛ sinɛ ar darik.

²²Waawuy saakoy pirdiyoŋk, joop sigɔ ɓɔɔkaaŋɔŋk tonurkoyta kɛ 'Suumi naakɛ, Suumi naakɛ, kiiɓato toniiɗ pɛrka tiriyaakɛ goonɛk, kikiiɓato ɔɔyɛt wɛɛŋa sigɔ somkaanakik tiriyaakɛ goonɛk, kiiɓato ijaagɛ sɔɔriyɛ sigɔ ɓɔɔkaaŋɔŋk tiriyaakɛ goonɛk?'

²³Tonaakoy saak sɛɛga waawuy saakoyk kɛ, 'Kaa kɔnu ɗegerɔɔn adaktan iinak joop sigi arir ola sigɔ ŋɛɛwɛŋɔŋk, inte wideerɛɛ ɛɛk sɔ.'

²⁴"Iɗit sinɔ tiyɛ pɛɛni naak nɔ ijaagik baŋɛ, gayi a iɗit sinɔ ɗeger ɛɛkik sinɔkan kɛny gode nɛɛk talaaɗe raŋk.

²⁵Ɛɛkɛ tul, nɛ gonarki maawu teeteyoŋk, yoŋgoyɛ yoŋgoy nɛ dire gode sinɛ nɛki ɗiirin agut sinɔkan kɛnyɗɛ talaaɗe raŋk.

²⁶Iɗit sinɔ tiyɛ pɛɛni naak nɛ ki ijaagɛk baŋɛ, gayi a iɗit sinɔ gaagɛk sinɔkan kɛny gode nɛɛk keeweet raŋk.

²⁷Ɛɛkɛ tul, nɛ gonarki maawu teeteyoŋk, yoŋgoyɛ yoŋgoy nɛ dire gode sinɛ nɛ ɗiiriŋ, nɛ ɓaŋkawuŋ ɗiirin nɛɛkɛ jɛt."

²⁸Saaɓa ruumeeɗ Yeese rɔɔriyɔn nɛɛkik, nɛɓa reemɗi ɓayɛtun joop baŋɛk agut rɔɔriyɔn nɛɛk,

²⁹agut sinɔ mokoɓa rɔɔriy sɛɛg oko rɔɔriytaanak higi Muuseek, maɓa rɔɔriy sɛɛg oko iɗit sinɔ lak ɓaŋkawukaak.