Read majang Maatiyoos 8 Bible Online

Maatiyoos 8 - majang bible

Maatiyoos 8

¹Saaɓa ɓurɓuɗiikiɗ Yeese kurkumk nɛɛkik, nɛɓa nomɛrɗi joop sigɔ ɓɔɔkaaŋɔŋk.

²Nɛɓa saadi iɗit omaay sinɔ goru dɔɔɓɔyk[2] wideer ɛɛk son lak Yeeseek, nɛ ɛtɛ korontunɛ sɛɛne taamɛkɛ, nɛ tongeeɗ kɛ, "Suumi naakɛ, ɔkɔn ɗɛyin, oolun ati ebɔdun."

³Nɛɓa Yeese keri ari nɛɛk nɛ ɗaaɗapɛ, nɛ tongeeɗ kɛ, "Ɗɛyaaŋ, bɔduk." Nɛɓa iɗit sinɛ bɔduku dɔɔɓɔy nɛɛkɛ sisa.

⁴Nɛɓa Yeese tongeeɗ kɛ, "Kat lakɛ iɗit sinɔ tonguɗun any sinik, mayakana mak nɔ kɛɛɗin yaaŋin ɛɛk nook tapaɗa ŋaadiyɛɛkoŋk, nɔ widikin tigi sinɛɓa tonu Muuse agut bɔdɛ nookuk kɛnɔkoy dakɛ a misikiri joopa baŋɛ."

⁵Saaɓa mɛlɛɛɗ Yeese Kipirnahoomak, nɛɓa wideer ɛɛk iɗit omaay Roomuk son lak sɛɛnik sinɔ ɔɗɔwen amaasiniyɛ sigɔ ɗibɛk nɛ kalɛyi sɛɛn.

⁶Nɛɓa tongeeɗ kɛ, "Suumi naakɛ, dakɛɓa ijaagen naakɛ a nyɔŋtan nɛ ɗuɗuŋɗe godeey a rakatɛŋ jɛt."

⁷Nɛɓa Yeese jumurgeeɗ kɛ, "Kɔrakɔɔ nɛ kɛɛɗa ebɔdaaŋ."

⁸Nɛɓa ɔɗɔwen sinɛ amaasiniyɛ sigɔ ɗibɛk jumurgeeɗ kɛ, "Suumi naakɛ, moko eet iɗit sinɔ ɗegeera a guugunyun godeya naakaaŋɔŋk. Tonu pɛɛni a omoŋ dakɛɗa, bɔdɛkɔɔ ijaagen naakɛŋ.

⁹Tiiɗika ɓɔra ɔɗɔweera gaanaaŋ, laka amaasiniyɛ eete ɗɛɛgaaŋ. Ɔkɔn tona omalta kɛ, 'Makiŋ,' nɛ kɛɛŋ, ma ɔkɔn tonguɗa kɛ, 'Waɗiŋ,' nɛ kusuŋ. Ɔkɔn tona ijaagenta naaka kɛ ijaag any siniŋ, nɛ ijaagiŋ."

¹⁰Saaɓa Yeese tiyɛɛɗ sinik, nɛɓa reemɗi ɓayɛ nɛɛkɛkiŋ, nɛ tonu joopa sigaagaɓa nomɛrɗik kɛ, "Eekeer tona kɔnaaŋ, kiikaaɓa laŋiiɗ Israeele iɗit sinɔ omoŋɔŋk sinɔ lak ŋaadiyɛ sigɔ ɓaŋkaawar oko sinikik.

¹¹Tona kɔnaaŋ, joop sigɔ ɓɔɔkaaŋɔŋk kurakkoy goyse mɛlkiɗ waawuyk a goyse ɗiirirgeeɗ waawuyk, nɛkoy beeɗir nyon ɗamatoŋk agut omoŋ a Abraham a Isiyaak a Yaykoob burɛɛ dariyoŋk.

¹²Joop sigɛ gunkoy laŋir burɛ Waakoyotoŋkuk, oriirɛkoy sɛɛg nyuugura sinaana ar walasik. Nɛkoy saadi lakɛ duri a ɗama ŋedakoŋk."

¹³Nɛɓa Yeese tonu ɔɗɔwenta sinaana kɛ, "Mak, inna ɓɛɛlɛ oko ŋaadiyɛ gooŋk." Nɛɓa ijaagen nɛɛkɛ bɔdɛ sisa.

¹⁴Guugunyɓa Yeese waa Petrosuk, nɛ dɛnɛ keerɛɛk Petrosuk a goru moɗɛ ɛɛkoŋk a ɗuɗuŋɗe.

¹⁵Nɛɓa kume ari nɛɛk, nɛ sɛɛn ŋɔr moɗɛ sinɛ ɛɛkoŋk sisa, nɛ ŋaar raŋana nɛ wɔɔrɛ sɛɛniŋ.

¹⁶Saaɓa ɗiirirkiɗ waawuyk, nɛɓa joop ɗɔkarki gortaanak sigɔɓa gaamur sɛɛg wɛɛŋa sigɔ somkaanakik sigɔ ɓɔɔkaaŋɔŋk son lak Yeeseek, nɛɓa Yeese ɔɔyɛ wɛɛŋa sigɔ somkaanakik pɛɛnii sinɔɔnɛ omoŋɔŋk, nɛ ebɔdɛ gortaanak baŋɛ.

¹⁷Dusanɛɛ sineene sinɛɓa tonu iɗit pɛrkaakoŋk Isaayas kɛ, "Boŋu sɛŋk tine meetanak gaŋk, ɓataki goriɗak gaŋk."

¹⁸Saaɓa dɛnɛɛɗ Yeese joop sigɔ ɓɔɔkaaŋɔŋk a tolɗi sɛɛne tookɛɛtak, nɛɓa tonu nomtaanaka gɛɛna kɛnɔ ekaŋɛr ɗɛɛgasɔ gɔrɔ sinɛ obiiŋɔŋk.

¹⁹Saaɓak kusɓa rɔɔriytan higi Muuseek om son lak Yeeseek nɛ tongeeɗ kɛ, "Rɔɔriytaano, noma kɔɔne gopɛ sinaanɛ kɛɛɗink baŋɛ."

²⁰Nɛɓa Yeese jumurgeeɗ kɛ, "Latu waŋgoya utulakiŋ, maɓɔrɛ latu teetɔɔk wɛykɔkuŋ, ma Tɔɔn Etoŋk kiiɗɛ aasi nyon sinɔ imiinyeeɗik."

²¹Nɛɓa nomtaanakɛ gɛɛnɛ omaay tongeeɗ kɛ, "Suumi naakɛ, pɛgɛdita kɛnɔ tɛɛnan kɛɛɗa kɔɔwa baabɛɛ."

²²Nɛɓa Yeese tongeeɗ kɛ, "Noma seŋk eete, ma toŋoɗu reteer nɔ sɛɛg kɔwar reter gɛŋk."

²³Saadi baŋiya teeŋɛɓa Yeese emɗa, nɛɓa nomtaana gɛɛnɛ nomɛrɗiŋ.

²⁴Nɛɓa ŋaarki yoŋgoy sinɔ ɓaŋkawuŋɔŋk goroo sinaanɛ obiiŋɔŋk a yike apani nɛɛkɛ emɗ nɛɛk a enya maawu emɗ nɛɛkɛ, maɓa Yeese ɗeegarŋ.

²⁵Nɛɓa nomtaanak gɛɛnɛ wideetar ɛɛk son lak sɛɛnik nɛ ibeɗir kɛ, "Suumi naŋk, ebɔdu tin. A badiireŋ."

²⁶Nɛɓa Yeese tonu sɛɛga kɛ, "Iinak sigi kɔne bitak ŋaadiyɛɛkik, ɓuriikari agut jikon? Nɛ ŋaar raŋana nɛ koykoyɛ gɔrɔ sinɛ obiik a yoŋgoy nɛɛk. Nɛɓa lakɛ ɓɛɛl kɛ manyk sinɔ obiiŋɔŋk.

²⁷Nɛɓa joop reemɗi ɓayɛtun gɛŋk, nɛ tonur kɛ, "Ege sini wooɗ aasi tiiɗigeeɗ yoŋgoy a gɔrɔk?"

²⁸Kɛɛɓa Yeese ɗɛɛgasɔ gɔrɔ sinɔ obiiŋɔŋk ɗooka Gerasenoonuk, nɛɓa saadi ŋaarark joop sigɔ pɛɛyk piyakɔkɛ sigɔɓa gaamur sɛɛg wɛɛŋa sigɔ somkaanakik nɛɓa pepetiiŋ. Ŋɛɛwɛɓa sɛɛg jɛt aɓa kɛɛ iɗit sinɔ oolɛ a ɗeyi sinaanɛk.

²⁹Nɛɓa sɛɛk ooyɛr kɛ, "Iin Tɔɔn Waakoyotoŋk, ooɗun tin agut jikon? A in ki gayɛ ɔɔtɛ nɛɛkɛ kusunkɔ seena kɛnɔ tin goopun a ɓaŋkawuŋ?"

³⁰Nɛɓa lakɛ pony kuturɛ sigɔ ɓɔɔkaaŋɔŋk ɗaaɗamiŋɔŋk saadi atukuɗuk a yowɛɛɗ a tɛm.

³¹Nɛɓa ɔɗɔwer wɛɛŋa sigɔ somkaanakik kalɛyir Yeesee kɛ, "Ɔkɔn tin ɔɔyun, wosɛyi tin nɔ guugunyii ponya sinaana kuturɛɛkoŋk."

³²Nɛɓa Yeese tonu sɛɛga kɛ, "In kɛɛɗɛɛ." Nɛɓa wɛɛŋa sigɛ somkaanakik ŋaararki joope sigaagɛ nɛ guugunyar kuturɛɛka gɛɛnaak. Nɛɓa kuturɛ gɛɛnɛ baŋɛ reerir a gorgorŋ sirpɛya, nɛ ɗam sɛɛg gɔrɔ sinɛ obiiŋɔŋk.

³³Nɛɓa irtaana sigɛ kuturɛɛkoŋk gonar nɛ mɛlɛr katamɛya. Nɛ kaar waasɛr any sinɛkan ɓɛɛlɛk baŋɛ. Waasɛrɓa any sinɛkan ɓɛɛlɛ joope sigaagɛkan gaamur sɛɛg wɛɛŋa sigɔ somkaanakik baŋɛ.

³⁴Ŋaararkiɓa joop sigɛ katamɛ nɛɛkik baŋɛ kɛnɔ pepeti a Yeesee. Nɛɓa dɛnɛr, nɛ kalɛyir kɛnɔ ŋaar ɗook nɛŋk.