Read majang Maatiyoos 9 Bible Online

Maatiyoos 9 - majang bible

Maatiyoos 9

¹Teeŋɛɓa Yeese emɗa, nɛ ekaŋki gɔrɔ sinɛ obiiŋɔŋk nɛ mɛlki katamɛya nɛɛka.

²Diilerkiɓa saadi joop iɗit om sinɔ nyɔŋtank beeɗi son lak Yeeseek. Nɛɓa Yeese dɛnɛ ŋaadiyɛ gɛŋk, nɛ tonu nyɔŋtaana nɛɛka kɛ, "Iin tɔɔn sini ɓaŋkaawurk, ranyjɛɛrɛ kɔne tikiyɛ gooŋkuŋ."

³Saaɓak koɓurɓa rɔɔriytaanak higi Muuseek a omoŋ omoŋ ɓayɛtunɛɛkɛ gɛŋk kɛ, "Nyɔɔn iɗit sini tiriya Waakoyotoŋk!"

⁴Nɛɓa Yeese ɗeger koɓiɗak gɛŋk, nɛ tonu sɛɛga kɛ, "Koɓiir any sini ŋɛɛwɛnŋɔŋk ɓayɛtunɛɛkɛ goŋk agut jikon?

⁵Sini kɛ, 'Ranyjɛɛrɛ kɔne tikiyɛ gooŋkŋɔŋk,' a sini kɛ, 'Teŋar raŋana nɔ ŋaarink' bala won?

⁶Mayakana kɛnɔ ɗegerari kɛ, "Lak Tɔn Etoŋk ɗook raŋk ɓaŋkawuka sinɔ ranyjɛɛɗ tikiyɛkiŋ." Nɛɓa Yeese tonu nyɔŋtaana saa kɛ, "Ŋaar raŋana, nɔ boŋun beeɗi nook nɔ ŋaarin nyaka nookaak."

⁷Nɛɓa ŋaar raŋana nɛ ŋaar nyaka nɛɛka.

⁸Nɛɓa joop sigɛ ɓɔɔkaak dɛnɛr, nɛ reemɗi ɓayɛtun gɛŋk, nɛ eemɛyar Waakoyo sinɛɓa gaɓɛ ɓaŋkawuka sini ɛtɛ oko sinik joopak.

⁹Ŋaarɓa Yeese saadi, nɛ dɛnɛɛr iɗit sinɔ yayawu worik, sinɔ riyɛ kɛ Maatiyosuk a beeber nyon sinɔɔnɛ yayawuɗɛ worik, nɛ tongeeɗ kɛ, "Nomate." Nɛɓa Maatiyos ŋaar raŋana nɛ nomɛɗiŋ.

¹⁰Saaɓa ɗamiiɗi Yeese woy Maatiyosuk, nɛɓa kurak joop sigɔ yayawar worik a tikitaanak a ɓɔɔkaaŋ, nɛ ɗami a sɛɛn a nomtaanak gɛɛŋk.

¹¹Nɛɓa joop Paarisik dɛnɛr, nɛ tonur nomtaanaka gɛɛna kɛ, "Rɔɔriytan noŋk ɗami a joop sigɔ yayawar worik, a tikitaanak agut omoŋ agut jikon?"

¹²Nɛɓa Yeese tiyɛ sini, nɛ tonu sɛɛga kɛ, "Ɗɛyɗigeeɗ akiimi gortaanak, ma moko bɔdtaanak."

¹³In kɛɛɗɛɛ nɔ koɓɛɛ nɔ ɗegerɛɛ sinɛɓa tonu kɛ, 'Ɗɛya saak maariyeet, ma moko ɗɛya uduŋeet.' Kusaakan saak kɛnɔ riyka tikitaanak tikiyɛɛkɛ Waakoyota, ma mokokan kusa kɛnɔ riyka joop sigɔ mentaanaŋɔŋk Waakoyota.

¹⁴Wideetarɓa ɛɛk nomtaanak Yowanisik son lak Yeeseek, nɛ kɔɔniyar kɛ, "Eteŋk a joop Paarisik soomii seekiŋ, ma sɛɛk nomtaanak goonɛk kir soomɛt agut jikon?"

¹⁵Nɛɓa Yeese jumur sɛɛga kɛ, "Toortaanak a ar iɗit sinɛ waawuguɗɛɛk sooy lak sɛɛgik, nɛ oolɛɛr a soomɛrŋ? Mayakana mɛlkikɔɔ ɔɔtɛ sinɛkɔɔ pakatiiɗ sɛɛge ɛɛk iɗit sinɛ waawuguɗɛɛkiŋ, nɛkɔɔ soomɛr sisa.

¹⁶Kɛɛ iɗit sinɔ ɗɛpoyɛɛr abii sinɔ tɛmŋɔŋk tɔɔnuk abiya sinɔɔna bɔɔlɔŋk raŋanaak. Agut sinɔ pɔɔpɔkkɔɔ abii sinɛ tɛmŋɔŋk tɔɔnuk abii sinɛ bɔɔlɔŋk, nɛ bakaanyir tool nɛɛkɛŋ.

¹⁷Maɓɔrɛ kɛɛ iɗit sinɔ gaɓɛ ogool wɛynik sigɔ tɔɔmɔkuk kaŋkaloota sinɔɔna bɔɔlɔŋk. Ma ɔkɔn ijaag oko sinikiŋ, nɛ ɓɛrɛ kaŋkalo nɛɛkɛŋ nɛ gupatɗi ogool sigɛ wɛyinikiŋ. Nɛ kɛɛ tɔkɔny kaŋkaloote nɛɛkɛ, ma gaɓɛɛ ogool wɛynik sigɔ tɔɔmɔkuk kaŋkaloota sinɔɔna tɔɔnuk, nɛ beeɗir sigɛ pɛɛyk a koorɛr ɛɛk nɛŋk kɛ ɗɔm."

¹⁸Saaɓa Yeese toniiɗ sinik, nɛɓa mɛlki ɔɗɔwen gode tolɛɛɗoŋk Ayuuduk om son lak sɛɛnik. Nɛ ɛtɛ korontunɛ Yeesee taamɛkɛ nɛ tongeeɗ kɛ, "Rɛrkɔreete tɔn naakɛ sinɔ peetik sise nɛ ɔkɔn kɛɛɗin riiɓeeɗin ari nook raŋkiŋ, muratageeɗkɔɔ wɛɛŋa gɛɛnɛŋ."

¹⁹Nɛɓa Yeese ŋaar raŋana nɛ nomɛ ete sinaanɛɛŋ, nɛɓa nomtaanak gɛɛnɛ kaar a sɛɛn agut omoŋ.

²⁰Lakɛɓa jarti om sinɔɓa rakakat a yɛrorom a emeyi aarin a pɛɛy baŋɛk, nɛɓa kus goyse baŋiyaak, nɛ ɓeesɛ abii nɛɛk kɛntɛ nɛɛk.

²¹Koɓuɓa ɓayaay nɛɛkɛ sinɔ kɛ, "Ɔkɔnkɔɔ aasi ɓeesa abii nɛɛk dakɛɗaŋ, bɔdakɔɔŋɔŋk."

²²Nɛɓa Yeese kolɛɛnyɛ nɛ dɛnɛ, nɛ tongeeɗ kɛ, "Iin, tɔɔn naak, ebɔdɛr kɔnu ŋaadiyɛ goonɛŋ." Nɛɓa jarti sinɛ bɔdɛ sisa.

²³Saaɓa Yeese mɛlɛɛɗ waa ɔɗɔwen sinɛk, nɛɓa dɛnɛ joop sigɔ gotɛr luuri wuɗakoŋk a joop sigɔ ooyɛrŋɔŋk.

²⁴Nɛɓa tonu sɛɛga kɛ, "In ŋaarɛɛ seedi, ɗeegar tɔn sini peetikiŋ, kikɔ rerin." Nɛɓa sɛɛk rɔgɛrɗiŋ.

²⁵Saaɓa ɔɔyɛɗi joop gɛɛŋkik baŋiya, nɛɓa Yeese guuguny godeya. Nɛɓa gaamu ari nɛɛk, nɛ ŋaar raŋana.

²⁶Nɛɓa tiyɛɛ any sinɛ ɗook sinaanɛ baŋɛ.

²⁷Ŋaarɓa Yeese saadi, nɛ nomɛrɗi joop sigɔ motakik pɛɛyk aɓa oo'oyar kɛ, "Iin Tɔɔn Daawitik, tɔkɔny tin!"

²⁸Saaɓa guugunyɗu Yeese godeyak nɛɓa joop sigɛ motakik wideetar ɛɛk son lak sɛɛnik. Nɛɓa Yeese kɔɔniy sɛɛg kɛ, "Ŋaadiirti kɛ oola ɓuukan taamɛ goŋkuŋ? Nɛɓa sɛɛk jumurargeeɗ kɛ, "Ii, Suumi naŋk."

²⁹Saadi baŋiya kumeɓa Yeese taamɛ gɛŋk, nɛ tonu sɛɛga kɛ, "Bɔdɛɛrkɔɔŋ agut ŋaadiyɛ goŋk."

³⁰Nɛɓa ɓuukiɗi taamɛ gɛŋkiŋ. Nɛɓa tonu sɛɛga Yeese a ɓaŋkawuŋ kɛ, "Kat lakɛ iɗit sinɔ tonurguɗɔk."

³¹Yakanaɓa sɛɛk ŋaarar, nɛ waasɛr ɔɔtɛ Yeeseek ɗoo sinɛ baŋɛ.

³²Saaɓa ŋaararɗi joop sigɛɓa ɓuukiɗi taamɛ gɛŋkik, nɛɓa joop diilerki iɗit sinɔ ki tonɗiitik son lak Yeeseek agut sinɔɓa gaamurɗu wɛɛŋa sigɔ somkaanakik.

³³Nɛɓa Yeese ɔɔykuɗ wɛɛŋa sigɛ somkaanakik, nɛɓa joop sigɛ ɓɔɔkaak reemɗi ɓayɛtun gɛŋk, nɛ tonur kɛ, "Inɓa kɛɛ taanta Israeele any sinɔ ɛtɛ oko sinikik."

³⁴Yakanaɓa joop Paarisik tonur kɛ, "Ɔɔyku sɛŋk wɛɛŋa sigɔ somkaanakik ɔɗɔwente sineene wɛɛŋa sigɔ somkaanakik."

³⁵Weeweriiɓa Yeese sinɔɔnɛ katamɛɛkoŋk a sinɔɔnɛ mɛndɛrakoŋk baŋɛ, a rɔririyi godeyikɛ gɛŋk tolɛɗoŋk Ayuuduk, a rɔririyiiɗ Pɛɛni sinɔ Ɓɛlkɛɛstank agut burɛ Waakoyotoŋkuk, a ebɔdiɗi meetanakɛ a goriɗakɛ baŋɛ.

³⁶Saaɓa dɛnɛɗ Yeese joop sigɛ ɓɔɔkaak a ɓakɛyɗi a sanɛr tɔkɔnytan a ito jiŋkuyɛ sigɔ kɛɛ sɛɛge irtank, nɛɓa sanɗigeeɗiŋ.

³⁷Nɛɓa tonu nomtaanaka gɛɛna kɛ, "Obi ɗama sinɛ ɗootɛkiŋ, mayakana ijaager gɛɛnɛ tekerŋ.

³⁸Agut sini in kalɛyɛɛ ɗumaat sinɛ ɗamata nɛɛkakik kɛnɔ wosɛyki ijaageer ɗootaana sinaana ɗamatoŋk."