Read majang Markoos 12 Bible Online

Markoos 12 - majang bible

Markoos 12

¹Tonuɓa sɛɛga Yeese rɔmɛ om kɛ, "Waayiɓa iɗit omaay wɛyin, nɛ isɛyɛ tookɛɛta, nɛ kɔwu utul anta tayakoŋk wɛynik, nɛ ijaag peem teeɓoŋk. Nɛɓa gaɓɛ taawa nɛɛk ijaageera kɛnɔkoy kaasiɗi, ma ŋaar ɗooka omalta.

²Nɛ saaɓa gayɛrɗi taamɛ gɛɛnɛkik, wosɛyɛɓa ijaagen nɛɛk son lak ijaageer gɛɛŋk taawa wɛynik kɛnɔ kaar ɗɔkatageeɗ taamɛ wɛynik.

³Yakanaɓa ijaager gɛɛnɛ sigɛ taawa wɛynik gaamur ijaagen nɛɛk, nɛ ɗiŋer, nɛ ɔɔyɛr a ɓɛɛlɛ sɔkɔn.

⁴Nɛɓa ɗuma wosɛyɛ ijaagen om kɛkar. Nɛ ijaager gɛɛnɛ sigɛ taawa wɛynik baabaalar ɔɗɔ nɛɛk giɗeekɛ, nɛ sɔɔkɛr nɛ ɔɔyɛrŋ.

⁵Nɛ wosɛykɛ om nɛ ɓokoturŋ. Nɛ wosɛykɛ a ɓɔɔkaaŋ nɛ ɗiŋer ɔgɔɔŋ, ma ɓokootar ɔgɔɔŋ.

⁶Ŋayɗiiɗi sisɔ wosɛ tɔɔn nɛɛk sinɛ poruk dakɛɗa. Nɛɓa pediya nɛɛka wosɛyɛ tɔɔn nɛɛk sinɔ omoŋɔŋk a koɓu kɛ, 'Kaɗɛɛŋ eemɛyarkɔɔ tɔɔn naakiŋ.'

⁷Yakanaɓa ijaager sigɛ taawa wɛynik tonur ɛkanɛɛkɛ gɛŋk kɛ, 'Ege sini sinɛkɔɔ boŋu ɗoo nɛɛkik. In kusɛɛ nɔ kusii ɓokotii nɔkɔɔ ɗoo nɛɛkɛ naŋk.'

⁸Nɛɓa gaamur tɔɔn nɛɛk, nɛ ɓokoturŋ, nɛ oriitar taawoy sinaanɛ wɛynik walasa.

⁹Ari sisɔ ɗuma sinɛ taawa wɛynik jikon? Kus sɛɛn ɗuma nɛ ɓokor ijaageer sigɛ taawa wɛynik. Nɛ gaɓɛ taawa sinɛ wɛynik joopa ɔgɔɔka.

¹⁰Kiirɓa ambabɛɛt sinɛɓa taapɛɛ Wargatɛɛ Waakoyotoŋk kɛ, 'Giɗee sinɛɓa daraayɛr joop sigɛ kɛnyar godeyik giɗeekɛk, dakɛ a giɗee sinɛ obi giɗeekɛ baŋɛk.

¹¹Ege sini ijaag Suumiyoŋk, ege ijaag nɛɛkɛ sɔɔriyɛ taamɛka gaŋk."'

¹²Ɗegerarɓa ɔɗɔwer Ayuuduk kɛ mermen rɔmɛ sinɛ tonu Yeeseek sɛɛg. Nɛɓa ɗɛyɛr gaamita, yakanaɓa ɓurer joop sigɛ ɓɔɔkaak nɛ ŋɔɗarŋ.

¹³Wosɛykɛɛɓa joop a omoŋ omoŋ sigɔ komoy joop Paarisik a Herodisik son lak Yeeseek kɛnɔ kaŋir waasiyɛɛkɛ gɛɛnɛk.

¹⁴Nɛɓa wideetargeeɗ ɛɛk nɛ tonurgeeɗ kɛ, "Rɔɔriytaano, ɗegerii kɛ iin eekerkan. Kɛɛ any sinɔ ijaagin a ɓuriiɗin a lagiɗin keenyk. Mermenin joop baŋɛ a koɓi omoŋ. Rɔɔriyaaɗin gopan Waakoyotoŋk eekeerɛ. Anɛ ɗɛyɛ a koyɛɛ gibiri Keesaara Roomukuŋ? Maŋk ki ɗɛyɛ? Koyɗiikiiŋ? Maŋk kat koyɗiikii?"

¹⁵Nɛɓa Yeese ɗeger koɓi nɛŋk sinɔ ŋɛɛwɛnŋɔŋk nɛ tonu sɛɛga kɛ, "Ɗɛyɛɛrti kaŋiɗa agut jikon? Inta yaaŋɛɛ wori sinɛ koyɛɛ a gibirik."

¹⁶Nɛɓa sɛɛk ɗɔkatageeɗ wori nɛɛkiŋ nɛ tonu sɛɛga kɛ, "Ege sini dɛnɛɛ worii sineene raŋk tipi wook? Ma sigɛɓa taapɛɛk tiriya wook? Nɛɓa sɛɛk tonurgeeɗ kɛ, "Keesaarik."

¹⁷Nɛɓa Yeese tonu sɛɛga kɛ, "Sisɔ in gaɓɛ Keesaarik Keesaara, ma Waakoyotoŋk Waakoyota." Nɛɓa reemɗi ɓayɛtun gɛŋk agut toni siniŋ.

¹⁸Widerkiɓa ɛɛk joop Saaduukuk sigɛɓa ŋaadir kɛ kɛɛ iɗit sinɔkoy ŋaarki ret walsak a omoŋ omoŋ, son lak Yeeseek. Nɛɓa kɔɔniyar Yeesee kɛ,

¹⁹"Rɔɔriytaano, tonuɓa Muuse kɛ, "Ɔkɔn iɗit omaay rɛr makan jarti nɛɛkɛ kiigeeɗ ɓartɛɛt tɔɔnuŋ, nɛ in boŋu manya jarti iɗit sinɛkɔ rɛrkik nɔ tuuke komoy nɛɛk."

²⁰Anɛɓatɔ lakɛ masiikeenak a tula pɛɛy, nɛɓa iɗit sinɛ bɔɔlɔŋ sɛɛga baŋɛk boŋu jarti nɛ rɛr ma in kiigeeɗ ɓartɛɛt tɔɔn.

²¹Nɛ manya sinɛ pɛɛyeen nɛɛkik boŋu jarti sinɛ nɛ rɛr ma in kiigiɗɛ ɓartɛɛt tɔɔn. Nɛɓɔrɛ jiiteen nɛɛkɛ ɓɛɛlɛ oko sinɛk.

²²Nɛɓa boŋur jarti sinɛ a getu tula pɛɛy nɛ rɛrar ma in kir tuukɛ komoy. Nɛ sɛɛge baŋɛ baŋiya, rɛr jarti sinɛ.

²³Masiikeenak sigɛ tula pɛɛyk boŋurɓa momogunɛɛkɛ. Nɛ saakoy ŋaararkiɗ joop ret walsak, jartikoy iɗit wonk?"

²⁴Nɛɓa jumur sɛɛga Yeese kɛ, "Moko babadariŋ agut sinɔ kirɗɔ ɗegerɔɔn Wargatɛyɛ Waakoyotoŋk a ɓaŋkawuka Waakoyotoŋkuk?

²⁵Saakoy ŋaararkiɗ ret walsak ɓɛɛlɛrkoy joop oko wosɛytaanak dariyoŋk, makoy kir boŋɗiit ɛkoy kir waawan.

²⁶Agut ŋaarin ret walsak, kiirɓa ambabɛɛt wargatɛɛ Muuseek sinɛɓa tonu Waakoyot Muuseya maɗ sinɔɔnɛ ar rukoyɛkɛ takik? Sinɛɓa tonu Waakoyot Muuseya kɛ, Eet Waakoyo Abrahamuk, Waakoyo Iisiyaakik, Waakoyo Yaykoobuk.'

²⁷Agut sini ege Waakoyot Waakoyo bɔdtaanakoŋk, ma moko Waakoyo reteeroŋk. Iinak joop Saaduukuk, tikeerkɔŋ jɛt."

²⁸Rɔɔriytaanakɛ higi Muuseek om tiyɛɓa palamɛ nɛŋkiŋ. Nɛɓa ɗeger kɛ jumurkɔ Yeese kɔɔniyɔn nɛɛk kɛ ɗɔm nɛ kɔɔniy kɛ, "Sekiyɛ sigɛ kaalɗi baŋɛk sɛɛg wook?"

²⁹Nɛɓa Yeese jumurgeeɗ kɛ, "Sekiyɛ sigɛ kaalɗi baŋɛk sigɔ tonur kɛ, 'Iin Israeel, tiyik. Suumi Waakoyo naŋk Suumi omoŋ dakɛɗa.

³⁰Poru seŋk Suumi Waakoyo nook, ɓayaay nookɛ baŋɛ, wɛɛŋakɛ gooŋkɛ baŋɛ, koɓiɗ nookɛ baŋɛ, ɓaŋkawukaat nookɛk baŋɛ.'

³¹Sekiyɛ pɛɛyeen nɛɛk sinɔ gayi a sinik sinɔ tonu kɛ, "Poru iɗit sinɛ beeɗiir jɔkikentik oko sinɛ poriiɗin ɛɛk nookuk.' Ege sekiyɛ sigi pɛɛyk sigɛ kaalɗi baŋɛk."

³²Nɛɓa rɔɔriytan sinɛ higi Muuseek tonu Yeeseya kɛ, "Rɔɔriytaano, mentan sinɛkɔ jumurunkuŋ. Liki sinɛkɔ toniiɗin any sinik. Suumi Waakoyo omoŋ dakɛɗa kɛɛ Waakoyo om ara.

³³Agut sini iɗit ɗɛygeeɗ a poru Waakoyo ɓayɛ nɛɛk baŋɛ, koɓi nɛɛk baŋɛ, ɓaŋkawukaa nɛɛk baŋɛ, ɛ ɗɛygeeɗ a poru iɗit sinɛ beeɗiir jɔkikentik oko sinɛ poriiɗ ɛɛk nɛɛkik. Ege sigi sekiyɛ sigɛ kaalɛ uduŋeet sinɛ gaɓii Waakoyotak baŋɛk."

³⁴Nɛɓa Yeese dɛnɛ akɔ jumurgeeɗ ɗegerɔɔn ɛɛkoŋk nɛ tongeeɗ kɛ, "Kin seŋk yowɛrka Burɛɛ Waakoyotoŋkuŋ" Nɛɓa saadi baŋiya kɛɛ iɗit sinɔ oolɛ a wideer kɔɔniyɔn Yeeseyaak.

³⁵Saaɓa Yeese rɔɔriyaaɗ Godeey sinaanɛ Geetitank, nɛɓa kɔɔniya kɛ, "Rɔɔriytaanak higi Muuseek tonur kɛ, 'Ege Keresee tɔɔn Daawitik,' agut jikon?

³⁶Tonuɓa Daawit ɓaŋkawukaat Wɛɛŋa sigɔ Geetitaanakik kɛ, 'Tonuɓa Waakoyot Suumiya naaka kɛ, Beeɗi ɗiɗikakɛ gaanɛk, nɔ mɛlɛɛɗa nɔkoyna ariiɗa gumaakeer gooŋk ana ɛtɛr korontunɛ derakɛ goonɛ goyse ɗeekik.'

³⁷Ɔkɔn Daawit ɔɗɔwa nɛɛka riy kɛ 'Suumiŋ', nɛ Keresee dakɛ a tɔɔn nɛɛk ɛk?" Geleewɛrgeeɗɓa joop a ɓɔɔkaaŋ yaakat."

³⁸Saaɓa Yeese rɔɔriyaaɗik tonuɓa kɛ, "In koorɛɛ ɛɛk rɔɔriytaanakɛ higi Muuseek. Sɛɛg kadir abiyak sigɔ jeeɗuwatuŋɔŋk a ɗɛyɛr a weeweri gɔɔtaase kɛ gɔɔtaase sinɔɔnɛ gabiyeyoŋk a boŋur digoy eemɛyɔɔnoŋk.

³⁹Ɗɛyɛr barsum sinɛ kaalɗi baŋɛk godeey tolɛɛɗoŋk, ɗɛyɛr barsum sinɛ kaalɗi baŋɛk nyon wɔɔroŋk.

⁴⁰Arir godeyik jartiyatɔk sigɔ kɛɛ sɛɛge babuykuk a ɓɛɛlɛr sɔkɔn. Ijaagir ɗanɗamɔn sinɔ jeeɗoŋɔŋk kɛnɔ kat ɗegerɛ sɛɛge, agut sini mɛlkikoy sɛɛga goopan sinɔ kaalɛŋɔŋk."

⁴¹Saaɓa Yeese beeberɗi Godeey sinaanɛ Geetitank tak saadi lak any sinɛ ririɓɗɛ tigik jɔkuk, nɛɓa dɛnɛ joop a ɓɔɔkaaŋ saa gaɓɛrɗi wori sanduka nɛɛka takanak. Joop sigɔ latu worik gaɓɛrɓa wori a obiiŋ.

⁴²Nɛɓa mɛlki sankan om sinɔ kiiɗɛ baabuyk nɛ gaɓɛ taaribɛɛ a pɛɛy.

⁴³Nɛɓa Yeese riyiri nomtaanak gɛɛŋk nɛ tonu sɛɛga kɛ, "Eekeer tona kɔnaaŋ, jarti sini sankank sini kiiɗɛ baabuyk gaɓɛkɔ a kaalɛ joope sigeegekɔ gaɓɛr wori sanduka sineenak baŋɛ.

⁴⁴Gaɓɛrkɔ joop ɔgɔɔk sinɛkɔ ŋayɗiik wori nɛŋkik, ma sɛŋk sɛɛn sankan nɛkɔ gaɓɛ sinɛ lakik baŋɛ a kɛɛ sinɔ ŋɔrk."