Read majang Markoos 4 Bible Online

Markoos 4 - majang bible

Markoos 4

¹Tukeɓa Yeese rɔɔriyɔn kɛkar goroo sinaanɛ obiiŋɔŋk jɔk. Agut sinɔɓa kurakiɗ joop a ɓɔɔkaaŋɔŋk, son lak sɛɛnik nɛ tookɛr sɛɛnŋɔŋk, nɛɓa Yeese teeŋɛ emɗa raŋana nɛ dokuɗe. Maɓa joop sigɛ ɓɔɔkaak baŋɛ atu goroo sinaanɛ obiiŋɔŋk jɔk.

²Nɛɓa rɔɔriy sɛɛg olaatɛ sigɔɔgɛ ɓɔɔkaaŋɔŋk rɔmɛɛɗakɛ. Tonuɓa sɛɛga kɛ,

³"In tiyɛ! Ŋaarkiɓa ijaagen om kɛnɔ soowɛ wɛykon.

⁴Saaɓa soowuɗiɗik, nɛɓa wɛykɔk a omoŋ omoŋ ɗiirtar gopana kɛntɛya, nɛ mɛlɛrki teetɔ nɛ ɗamar sɛɛgiŋ.

⁵Ma wɛykɔk a omoŋ omoŋ ɗiirtar soona lak ɗoo a tɛmŋɔŋk ɓɛɛlɛ a giɗeek, nɛ agut sinɔ tɛmkuɗ ɗoo nɛɛkɛŋɔŋk ɗiigarkiɓa a gorgorŋ.

⁶Yakana saaɓa toolɛɛɗ waawuyk nɛ waaŋɛrŋ, agut sinɔ kiiɗɛ tiltilɛɛk nɛɓa paalorarŋ.

⁷Ma wɛykɔk a omoŋ omoŋ ɗiirtarɓa ɓɛynika kɔɔra nɛ ɓɛyni gɛɛnɛ gaamitar ɗooka nɛ dakɛɛtarŋ, nɛ kir gaamit taamɛ.

⁸Ma wɛykɔk ɔgɔɔk ɗiirtar ɗooka sinɔɔna mentanŋɔŋk nɛ ɗiigararkiŋ, nɛ gaɓɛr taamɛ a ɓɔɔkaaŋ, gaɓɛ omaay taamɛ a ruumer iɗit a aarin, ma omaay gaɓɛ a pɔlpɔlɛ joop jiitik ma omaay gaɓɛ a ɗibɛ."

⁹Nɛɓa Yeese tonu kɛ, "Iɗit sinɔ lak weena sinɔ tiiɗiŋɔŋk, in tiyɛɗ."

¹⁰Saadi baŋiya saaɓa Yeese sɛɛn mowank a joop sigɛɓa nonomarɗik a nomtaanak gɛɛŋk sigɛ aarin a pɛɛyk, kɔɔniyarɗiɓa wooran rɔmɛɛɗa gɛɛŋkik.

¹¹Nɛɓa Yeese tonu sɛɛga kɛ, "Gaɓɛɛɓa iinaka ɗegerɔn any sinɔ dugaaŋɔŋk burɛ Waakoyotoŋkuŋ. Mayakana joop sigɛ atu walasik tonɛɛ sɛɛga ola baŋɛ rɔmɛɛɗ.

¹²Agut sinɔ, 'Dɛnɛ dɛnɗiiŋ, nɛ kir mermenɛ, tiyan tiiɗiŋ, nɛ kir koɓiiɗ, kɛnɔ kat weeriiki son lak Waakoyok, nɛ kiirɛ sɛɛge toŋoɗ tikiyɛ gɛŋk."'

¹³Tonuɓa sɛɛga Yeese kɛ, "Kikɔna mɛlɛ rɔmɛ sini? Anɛkɔɔ mɛlɛrkɔna rɔmɛɛɗak ɔgɔɔk baŋɛ ɛk?

¹⁴Iɗit sinɛ soowuɗik ito iɗit sinɔ rɔɔriyaaɗ pɛɛni nɛɛkik.

¹⁵Saaɓa soowɛɗɛ pɛɛni nɛɛkik, wɛykɔk sigɛkan ɗiirtar gopana kɛntɛyak, yaaŋɛ joop sigɔ saa tiyɛrɗi pɛɛni nɛɛkik, nɛ mɛlki setan sisa nɛ boŋu sɛɛge pɛɛni sinɛkan soowɛ sɛɛge ɓayɛtu nɛɛkɛk.

¹⁶Maɓɔrɛ sigɛkan soowɛ ɗook sinɔɔnɛ ɓɛɛlɛ a giɗeek, yaaŋɛ joop sigɔ tiyɛr pɛɛni nɛɛk nɛ sisa bɔŋur yaakatik.

¹⁷Mayakana ɔɔtɛya sinɔɔna balaaŋɔŋk kɛɛ sɛɛge tiltilɛ, ɔɔtɛ sinɔɔnɛ dinyŋɔŋk saa mɛlkiɗ rakatɛ, maŋk epapay agut pɛɛni nɛɛkik nɛ sisa ɗiirarŋ.

¹⁸Ma sigɛkan soowɛ sɛɛg ɓɛynikɛ kɔɔrk yaaŋɛ joop sigɔ tiyɛr pɛɛni nɛɛk.

¹⁹Mayakana koɓi ɗoo sini raŋan nɛɛkik, a ɗɛyan woriyoŋk, a ɗɛyan ɓolaatuuruwɛ ɔgɔɔk guuguny sɛɛga ɓayaaya nɛ gaamitar pɛɛni nɛɛk ɗooka nɛ dakɛ a kiiɗɛ taamɛ.

²⁰Ma sigɛkan soowɛ ɗook sinɔɔnɛ mentanŋɔŋkuk yaaŋɛ, joop sigɔ tiyɛr pɛɛni nɛɛk nɛ bɔŋur nɛ gaamurŋɔŋk, nɛ gaɓɛr taamɛ a ruumer iɗit a aarin, a pɔlpɔlɛ joop jiitik, a ɗibɛ."

²¹Tonuɓa sɛɛga Yeese kɛ, "Ɗɔku iɗit any sinɔ ɗaawanŋɔŋk nɛ riiɓe kebet tak maŋk ɓɛɛroy amɗuŋ? A moko riiɓe soodi dɛnɛɛɗɛŋɔŋk?

²²Any sinɔɓa dugɛŋɔŋk baŋɛ yaaŋɛɛkoyŋ, any sinɔɓa yomɛŋɔŋk baŋɛ ɗegerɛɛkoyŋ.

²³Iɗit sinɔ lak weena sinɔ tiiɗiŋɔŋk, in tiyɛɗ."

²⁴Tonuɓa sɛɛga kɛkar kɛ, "In koorɛɛ ɛɛk agut any sinɛkɔɔ tiyɛɛrik, saparɛɛkoy ɓɔrɛ kɔna ant sinaanɛ saparɛrɗɔk siipɛɛkoy kɔna a kaalɛŋ.

²⁵Agut iɗit sinɛ lakik gagiɗɛkɔɔŋ ma iɗit sinɛ kiiɗɛk boŋkuɗɛɛkoy aasi sinɛ lakikiŋ."

²⁶Tonuɓa Yeese kɛ, "Burɛ Waakoyotoŋk gayi a iɗit sinɔ soowɛ wɛykon ɗook raŋk.

²⁷Iɗit sinɛ ɗeegar kaaltiŋ, ma ɓeɗi waawuyŋ, nɛ ɗiigarki wɛykon nɛɛkɛ nɛ ɓɔlɔɔrɛŋ a ki ɗegerɔɔn.

²⁸Ɗoo ɔɗɔwa nɛɛka laŋiiɗɛɛ tɛɛnan jeemɛ nɛɛkɛ ɗiigartan, nɛ saadi makɛ nɛ makɛɛ nɛɛkɛ raŋk wɛykon.

²⁹Saa gayɛɗ ɗama nɛɛkɛkik, isiise iɗit nɛɛkɛ aarɛ ɗootaanoŋk nɛ tuke ɗootan agut sinɔ gayɛɗ ɔɔtɛ ɗootaanoŋkuk."

³⁰Tonuɓa Yeese kɛ, "Burɛ Waakoyotoŋk rɔɔmii a jikon? Yaaŋa rɔmɛ nɛɛk jikoy?

³¹Gayi a wɛykon sanoyik sinɛ tɛm wɛykɔkɛ sigaagɛ soowɛ ɗook raŋk baŋɛk.

³²Ma saakoy ɓɔlɔɔrɛɗik kaalɛkoy ola sigɛ soowɛɛk baŋɛ. Lak rɛkɛnak sigɔ boobɛrŋɔŋk a oolɛr teetɔ dariyoŋk a kɛnyarɗi wɛykɔk goy sineene ɗeekiŋ."

³³Tonuɓa Yeese pɛɛni nɛɛk joopa, goy sinaanɛ, mɛlɛɛɗ sɛɛgak rɔmɛɛɗakɛ sigɔɔgɛ ɓɔɔkaaŋɔŋk ɛtɛr oko sinikik.

³⁴Kɛɛ any sinɔɓa tonu sɛɛga a kiiɗɛ rɔmɛɛk, ma saaɓa sɛɛn a nomtaanak gɛɛŋk mowank yaaŋɛɓa sɛɛga ola baŋɛ.

³⁵Ɓeny sinaanɛɓak ajige tonuɓa Yeese nomtaanaka gɛɛna kɛ, "Koy ekaŋii ɗɛɛgasɔ gɔrɔ sini obiiŋɔŋk."

³⁶Pakatirɓa ɛɛk joope sigaagɛ ɓɔɔkaak, nɛ diiler Yeesee emɗ sinaanɛɓa arkiɗiik, ɓɛɛlɛrɓa emɗakɔ ɔgɔɔkuŋ a sɛɛg agut omoŋ.

³⁷Ŋaarkiɓa yoŋgoy sinɔ ɓaŋkawuŋɔŋk a yike apani nɛɛkɛ emɗ nɛɛk a enya maawu emɗ nɛɛkɛk.

³⁸Maɓa Yeese riiɓe any ɔɗɔwoŋk emɗ nɛɛkɛ goyse baŋiyaak nɛ ɗeegarŋ, nɛɓa nomtaanak gɛɛnɛ ebeɗir a tonurgeeɗ kɛ, "Rɔɔriytaano, A badiireeŋ. Dakin kɛ many?"

³⁹Nɛɓa sɛŋk ɓeɗiki nɛ lamɛ yoŋgoy nɛɛk, tonuɓa gɔrɔwa sinaana obiiŋɔŋ kɛ, "Nyɛyik! Dak kɛ many!" Nɛɓa yoŋgoy nɛɛkɛ sisa dakɛ kɛ many, lakɛɓa ɓɛɛl kɛ manyk sinɔ obiiŋɔŋk.

⁴⁰Nɛɓa Yeese tonu nomtaanaka gɛɛna kɛ, "Ɓuriikari agut jikon? Kɛɛ kɔne ŋaadiyɛ ɛk?"

⁴¹Nɛɓa sɛɛk ɓuri jɛt nɛ tonur kɛ, "Ege sini wooɗ aasi tiiɗigeeɗ yoŋgoy a gɔrɔ sinɔ obiiŋɔŋk?"