Read majang Markoos 5 Bible Online

Markoos 5 - majang bible

Markoos 5

¹Ekaŋɛrɓa gɔrɔ sinɔ obiiŋɔŋk Gɛlilaak nɛ mɛlɛr ɗooka Gerasenoonuk.

²Saaɓa Yeese worworiikiɗ emɗ nɛɛkɛkik, nɛɓa sisa pepeti a iɗit sinɔɓa gaamur wɛɛŋa sigɔ somkaanakik a ŋaarki nyon piyakɔkoŋk.

³Beeberɓa iɗit sinɛ nyon piyakɔkoŋk, kɛɛ iɗit sinɔɓa aasi oolɛ a korkor meltikɛ awɛytiiroŋkuk.

⁴Korkokoɗɛɛɓa meltikɛ awɛytiiroŋk derakoŋk a arnoŋk agut ɓɔɔkaaŋ, yakanaɓa pupuɗ melti sigɛ awɛytiir derakoŋk a arnoŋk nɛ o'or sɛɛgiŋ. Nɛɓa kɛɛ iɗit sinɔ oolɛ a gaamu nɔ ari a beeɗiŋɔŋk ara.

⁵Weeweriiɓa a oo'oy ɓɛɛnyɔwɛ gɛɛŋk baŋɛ a ki nyɛyɛ waawuy a kaay sinɔɔnɛ nyon piyakɔkoŋkuk a sinɔɔnɛ kurkumɛ raŋank, yayawuɓa ɛɛk nɛɛk giɗeekɛ a lak doosoyɛ.

⁶Saaɓa iɗit sinɛ dɛnɛrkiɗ Yeesee a yowɛɛɗŋɔŋk, nɛɓa reeriir son lak sɛɛnik nɛ ugumgeeɗiŋ.

⁷Nɛɓa ooyɛ a ɗooruŋ a tongeeɗ kɛ, "Iin Yeesee, Tɔɔn Waakoyo sinɛ Obi Jɛtik, ooɗunti agut jikon? Kalɛyaani tiriyaakɛ Waakoyotoŋk, adarat katreeti laaŋoyin."

⁸Nɔɓa toniiɗ sinik agut sinɔɓa tongeeɗ kɛ, "Iinak wɛɛŋa sigɔ somkaanakik, in ŋaarɛ ete sineenek."

⁹Nɛɓa Yeese kɔɔniy kɛ, "Riyɛni kɛ wooɗ?" Nɛɓa jumurgeeɗ kɛ, "Agut sinɔ ɓɔɔkaakiɗiiŋɔŋk riyɛti kɛ Leegiwoon[1]

¹⁰Kalɛyirɓa sɛɛn a ɓaŋkawuŋ kɛnɔ kat ɔɔyɛ sɛɛg ɗook sinaanɛ.

¹¹I'irɛɛɓa saadi pony kuturɛ sigɔ ɓɔɔkaaŋɔŋk kurkum derɛ.

¹²Nɛɓa kalɛyir kɛ, "Adarat pɛgɛdire tina nɔ kɛɛɗii guugunyii kuturɛɛka sigɔɔga."

¹³Nɛɓa Yeese pɛgɛdɛ sɛɛgaŋ. Nɛɓa wɛɛŋa sigɛ somkaanakik ŋaararki ete sinaanɛ nɛ guugunyar kuturɛɛka gɛɛnaak. Nɛɓa kuturɛ sigɔ kumɛɛ pɛɛyk reerir a gorgorŋ sirpɛya nɛ ɗiirtar, nɛ ɗam sɛɛg gɔrɔ sinɔ obiiŋɔŋk.

¹⁴Nɛɓa irtaana sigɛ kuturɛɛkoŋk gonar nɛ kaar yaaŋɛr ɔɔtɛ nɛɛk katamɛɛ a sinɔɔnɛ kɛntɛyoŋk joopa. Nɛɓa joop ŋaarark kɛnɔ dɛnɛr any sinɛ ɓɛɛlɛk.

¹⁵Kurakɓa son lak Yeeseek. Nɛɓa dɛnɛr iɗit sinɛɓa gaamur wɛɛŋa sigɔ somkaanakik a lak abii eek a beeber saadi a ɗeger ɛɛk ɔɗɔ nɛɛkɛŋ, nɛɓa ɓuriiŋ.

¹⁶Joop sigɛɓa dɛnɛr any sinɛɓa ɓɛɛlɛk ete sinaanɛɓa gaamur wɛɛŋa sigɔ somkaanakik a kuturɛɛkɛ gɛɛnɛkik, yaaŋɛrɓa any sini joopa baŋɛ.

¹⁷Nɛɓa joop gɛɛnɛ kalɛyir Yeesee kɛnɔ ŋaar ɗook nɛŋk.

¹⁸Saaɓa Yeese arkiɗ teeŋɛt emɗak, nɛɓa kalɛyi sɛɛn iɗit sinɛɓa gaamur wɛɛŋa sigɔ somkaanakik kɛnɔ kaar agut omoŋ.

¹⁹Yakanaɓa Yeese kiigeeɗ pɛgɛdɛɛt, maɓa tongeeɗ kɛ, "Mak nyaka nooka, nɔ kɛɛɗin waasin joopa wɛy nookuk any sinɛ obiiŋɔŋk sinɛ kɔna ijaag Suumiik a sinɛ kɔnu maariyeeɗik."

²⁰Nɛɓa iɗit sinɛ ŋaar ɗooka sinɔɔna riyɛ kɛ Katamɛɛ sigɔ Aarink nɛ waasɛ joopa baŋɛ any sinɛkan ijaaggeeɗ Yeeseek. Nɛɓa ŋaatir joop baŋɛ.

²¹Saaɓa Yeese ekaŋɛɗ emɗ ɗɛɛgasɔ gɔrɔ sinɔ obiiŋɔŋk, nɛɓa tolɗi joop a ɓɔɔkaaŋ sɛɛne tookɛɛta goroo nɛɛkɛ jɔk.

²²Kusɓa iɗit om son lak Yeeseek sinɔ riyɛ kɛ Iyairoosuk sinɔ ɔɗɔwen gode tolɛɛɗoŋk Ayuuduk, nɛɓa ɗiiri sɛɛne taamɛkɛ.

²³Nɛ kalɛyi a ɓaŋkawuŋ kɛ, "Tɔɔn naak sinɔ peetik sinɛ tɛmk ɗɛyɛ rer. Waɗire nɔ kɛɛɗin riiɓeeɗin ari nook raŋk. Nɔ bɔdɛ nɔ beeɗ wɛɛŋakɛ."

²⁴Nɛɓa Yeesee kaar a sɛɛn agut omoŋ, nɛɓa nomɛrɗi joop a ɓɔɔkaaŋ a diri sɛɛne tookɛɛta.

²⁵Lakɛɓa saadi joope sigaagɛ kɔɔr jarti om sinɔɓa rakakat a yɛrorom a emeyi aarin a pɛɛyk.

²⁶Ɛnyɛnyɛɓa akiimaka a ɓɔɔkaaŋ a rakakat aɓa dusanɛ wori nɛɛk baŋɛ, yakanaɓa taŋge sisa aɓa kiigeeɗ laka eera.

²⁷Tiyɛɓa sɛŋk ɔɔtɛ Yeeseek, nɛɓa kus joope sigaagɛ ɓɔɔkaak kɔɔr goyse baŋiyaak, nɛ ɓeesɛ abii nɛɛk.

²⁸Nɔɓa ijaagiɗ sinik lakɓa koɓi sinɔ kɛ, "Ɔkɔnkɔɔ aasi ɓeesa abii nɛɛk dakɛɗaŋ, bɔdakɔɔŋɔŋk."

²⁹Nyɛyɛɓa yɛrom sinɛɓa yɛroromk sisa, nɛɓa yoguku eek nɛɛkɛ a ɗeger kɛ bɔdukukɔ goriɗ nɛɛkɛŋ.

³⁰Yogukuɓa Yeese sisa akɔ ŋaarki sɛɛne ɓaŋkawuka ebɔdɛtoŋk, nɛ kolɛɛnyɛ joopa sigaaga ɓɔɔkaak nɛ kɔɔniya kɛ, "Wooɗ sinɛ kume abii naakik?"

³¹Nɛɓa jumurargeeɗ nomtaanak gɛɛnɛ kɛ, "A dɛnin joop sigɛ ɓɔɔkaak a nomɛrne a diriiŋ, nɛ tonun kɛ 'Wooɗ sinɛ kume abii naakik?"'

³²Yakanaɓa sɛŋk kolɛɛnyɛ kɛnɔ dɛnɛ iɗit sinɛkɔ ijaag any sinɛk.

³³Ɗegerɓa jarti sinɛ any sinɛkɔ ijaaggiɗɛɛk, nɛ ɓuri a piiɗe nɛ kus ɗiiri sɛɛne taamɛkɛ nɛ tongeeɗ eekeer gɛɛŋk baŋɛ.

³⁴Nɛɓa sɛŋk tongeeɗ kɛ, "Iin tɔɔn naak, ebɔdɛr kɔnu ŋaadiyɛ goonɛŋ. Ŋaari digoya. Bɔdu rakatɛɛ nookɛk."

³⁵A inɓa Yeese toton any sini nɛ joop a omoŋ omoŋ sigɛɓa kurak woy Iyairoosuk, tonurgeeɗ kɛ, "Rɛrkɔ tɔn nookɛŋ. Ooɗun rɔɔriytan sisɔ agut jikon?"

³⁶Yakanaɓa Yeese tiyɛ sini nɛ tonu ɔɗɔwenta sinaana gode tolɛɛɗoŋk Ayuuduk kɛ, "Kat ɓuriikin. Ma ŋaadi dakɛɗa."

³⁷Kɛɛ iɗit sinɔɓa pɛgɛdgeeɗ Yeese kɛnɔ nomɛɗik Petrose a Yaykoobe a manya Yaykooba, Yowanise sɔgɔɔsɔyk.

³⁸Saaɓa mɛlɛrɗi waa ɔɗɔwen sinɛ gode tolɛɛɗoŋkuk Ayuuduk, nɛɓa Yeese dɛnɛ joop gɛɛŋk a duriyer a wuɗaaŋ.

³⁹Nɛɓa guuguny godeya takana nɛ tonu sɛɛga kɛ, "Duriyɛɛ a wuɗakɛɛ oko sinik agut jikon? Ɗeegar tɔn siniŋ, kikɔ rerin."

⁴⁰Yakanaɓa joop gɛɛnɛ rɔgɛrɗiŋ. Ariɓa sɛɛg Yeese a ŋaarark walasa baŋɛ, nɛɓa boŋu ɛpɛn sinɛ tɔɔna nɛɛkaakik a ɛmɛs a nomtaanak gɛɛŋk nɛ guugunyar saana arkiɗ tɔn nɛɛkɛkik.

⁴¹Nɛɓa gaamu ari tɔɔn sinɛ peetik nɛ tongeeɗ kɛ, "Taltakum!", wooran nɛɛk sinɔ kɛ tonaana kɛ, "Iin tɔɔn sini peetik, ŋaar raŋanaak!"

⁴²Tɔɔn sinɛ egeɓa emeyi gɛɛnɛ aarin a pɛɛy, nɛɓa ŋaar raŋana sisa nɛ tuke ŋawit gɔɔtaase kɛ gɔɔtaase. Saaɓa ɓɛɛlɛɛɗ oko sinik, nɛɓa joop gɛɛnɛ reemɗi ɓayɛtun gɛŋk jɛt.

⁴³Nɛɓa Yeese tonu sɛɛga kɛnɔ kat lakɛ iɗit sinɔ ɗeger any sinik, nɛ tonu sɛɛga kɛ in gagiɗɛ any sinɔ ɗamŋɔŋk.