Read majang Markoos 7 Bible Online

Markoos 7 - majang bible

Markoos 7

¹Kurakɓa joop Paarisik a rɔɔriytaanak higi Muuseek a omoŋ omoŋ Yorsaleema, nɛɓa tolɗi Yeesee tookɛɛta.

²Nɛɓa dɛnɛr nomtaanak Yeeseek a omoŋ omoŋ a ɗami ma kir aadi arin gɛŋk.

³Joop Paarisik a joop Ayuuduk baŋɛ koorɛrɓa barɛ bɔɔlɔŋeeroŋk nɛɓa kir ɗamiit ma kir aadi arin gɛŋk kɛ ɗɔm.

⁴Ɔkɔn kir aadi saa weeriikiɗ gabiyoykuŋ, nɛ kir ɗamiit. Koorɛrɓa barɛɗak a ɓɔɔkaaŋ ola sigɔ ito aadi any tuutoŋk a kebet a ola sigɔɓa ijaagɛɛ awɛytiirɛɛk, a aadi bɛɛroyoŋk, ɛɓa koorɛr barɛɗak ɔgɔ a ɓɔɔkaaŋ.

⁵Nɛɓa joop Paarisik a rɔɔriytaanak higi Muuseek kɔɔniyar Yeesee kɛ "Sɔɔkɛr noomtaanak goonɛk barɛ bɔɔlɔŋeerɔŋk nɛ ɗamar ɗama ma kir aadi arin gɛŋk agut jikon?"

⁶Nɛɓa sɛŋk jumur sɛɛga kɛ, "Iinak joop sigɔ gayar joop sigɔ mentaanaŋɔŋk! Eekeer any sinɛɓa tonu Isaayaas pɛrkaakɛ agut iinak kɛ, 'Eemɛyarti joop sigi ad nɛŋk dakɛɗa, ma ɓayɛ nɛŋk yowɛɛɗ eeteeŋ.

⁷Ŋaadirti kanysɛya, ege rɔɔriyɔn nɛŋk sekiyɛ etoŋk.'

⁸Agut sini ŋɔɗari sɔɔk nomɛ sekiyɛɛkɛ Waakoyotoŋk, ma nomɛrɗɔ rɔɔriyɔn barɛ etoŋk."

⁹Tonuɓa sɛɛga Yeese kɛkar kɛ, "Ŋɔɗari sekiyɛ Waakoyotoŋk agut koorɛɛt barɛ noŋkuk.

¹⁰Tonuɓa Muuse kɛ, 'Eemɛyi ŋaaŋa a ɓaaɓa, iɗit sinɔ nyɔɔn ɛmɛs maŋk ɛpɛnik, in ɓokotɛ.'

¹¹Mayakana sɔɔk toniir kɛ ɔkɔn iɗit omaay tonu ɛpɛna maŋk ɛmɛsa kɛ, 'Any sinɛ gun kɔnu kɔnyɛɛɗak nɛkɔ gaɓa a tigi Waakoyota.'

¹²Nɛ ariir iɗit sinɛ a kiigeeɗ ɗɛyɛ a ijaag any om ɛmɛsa maŋk ɛpɛnaaŋ.

¹³Aalɛɛr sekiyɛ Waakoyotoŋk agut koorɛɛt barɛ noŋkuk. Ijaagiir ola sigɔ gayi a sigik a ɓɔɔkaaŋ."

¹⁴Riykɓa Yeese joop gɛɛŋk kɛkar son lak sɛɛnik nɛ tonu sɛɛga kɛ, "Inta geleewɛɛ iinak baŋɛ, ɛ in koɓɛɛ.

¹⁵Any sinɛ ari iɗit a somkank sinɛ waasɛ ad nɛɛkɛkik ŋɛɛwɛnŋɔŋk, ma moko ɗama sinɛ gabɛ ada nɛɛkaakik."

¹⁶["Sisɔ iɗit sinɔ lak weena sinɔ tiiɗiŋɔŋk, in tiyɛɗ."]

¹⁷Saaɓa Yeese ŋɔrɗu joop sigɛ ɓɔɔkaaŋɔŋk nɛ guuguny godeyak, nɛɓa nomtaanak gɛɛnɛ kɔɔniyar agut rɔmɛ nɛɛk.

¹⁸Nɛɓa sɛŋk jumur sɛɛga kɛ, "In kiir koɓiiɗ nɔ mɛlɛɛɗa sisɔwa? Kiir ɗegerɔɔn kɛ ɗama sinɛ gaɓɛ iɗit adak baŋɛ kɛɛ any sinɔ ari sɛɛn a somkank?

¹⁹Agut sinɔ ɗama ki mɛlɛ ɓayaaya, ma ɗoyu sinɔɔnɛ amɗoŋk nɛ ŋaariri walasa." Yaaŋɛɓa Yeese sinɔ kɛ mentaana komoyɛ ɗamatoŋk baŋɛŋɔk.

²⁰Tonuɓa Yeese kɛkar kɛ, "Ma any sinɛ waasɛk ŋɛɛwɛnŋɔŋk ŋaarkiɗ ɓayaayk sinɛ ari iɗit a somkank sɛɛn sini.

²¹Sigɛ ŋaararki ete ɓayaayk, koɓi sinɔ ŋɛɛwɛnŋɔŋk, ruunyikeen, agɛy, ɓokotiit etoŋk,

²²ibe, golɛ, ŋɛɛwɛnka, raamiyɛ, molkotɔn, epɛɛran, sɔɔkiyɛ tiriya etoŋkuk, ɓɔŋgɔɔrɛɛt ɛɛkoŋk, dɔɔtɛyikeen.

²³Ola sigi somkanakik baŋɛ ŋaararki ɓayaay etoŋk nɛ arir iɗit a somkan."

²⁴Ŋaarɓa Yeese saadi nɛ kɛɛ mɛndɛra sinɔɔna ar katamɛɛ Tiiroosuk jɔkuk. Nɛɓa guuguny godeya omalta a ɗɛyɛ a kat lakɛ iɗit sinɔ ɗeger ɓɛɛl nɛɛk saadik, yakanaɓa kiigeeɗ gayɛ a dugiɗiiŋ.

²⁵Lakɛɓa jarti sinɔɓa gaamur tɔɔn nɛɛk sinɔ peetik wɛɛŋa sigɔ somkaanakik. Nɛɓa tiyɛ ɔɔtɛ Yeeseek, nɛɓa kus sisa nɛ ɗiiri sɛɛne taamɛkɛ.

²⁶Mokoɓa jarti sinɛ Ayuudenkaay, maɓa Girikenkaay sinɔ komoy Pinisiyaak, ɗoo Siropiniyaak. Nɛɓa sɛŋk kalɛyi Yeesee kɛnɔ ɔɔyku wɛɛŋa sigɔ somkaanakik toomoy nɛɛkɛk.

²⁷Nɛɓa Yeesee tongeeɗ kɛ, "In tɛɛnan ɗami tɔɔmɔk nɔ ɓooɗorar. Agut sinɔ ki gayɛ a boŋɛɛ ɗama tɔɔmɔkoŋk sinɔ geetitank nɔ gaɓɛɛ wartuna."

²⁸Nɛɓa sɛŋk jarti sinɛ jumurgeeɗ kɛ, "Eekeer, Suumi naakɛ. Ɗamar wartun kootaayɔ sigɛ ɗiiɗirark lɔkɔyk tɔɔmɔkɛ ɗookak."

²⁹Nɛɓa Yeese tongeeɗ kɛ, "Jumurunkɔta any sinɔ mentanŋɔŋk. Ŋaari nyaka nookaak. Ŋaararkɔ wɛɛŋa sigɛ somkaanakik toomoy nookɛŋ."

³⁰Weeriɓa jarti sinɛ nyaka nɛɛka nɛ kɛɛ laŋki tɔɔn nɛɛk a kɔ ŋɔɗar wɛɛŋa sigɛ somkaanakik a ɗuɗuŋɗe bɛɛroy raŋk a ɓɛɛlɛ bɔdɛɛɗ.

³¹Ŋaarɓa Yeese ɗook Tiiroosuk nɛ kɛɛ Sidoonaa. Nɛ ɗoyu sinɔɔnɛ Katamɛɛ sigɔ Aarink nɛ mɛlɛ gɔrɔwa sinɔɔna obiiŋɔŋk Gɛlilaak.

³²Nɛɓa saadi ɗɔkarki joop iɗit sinɔ ki tiiɗitik ɛ ki tonɗiitik son lak sɛɛnik, nɛɓa kalɛyir kɛnɔ riiɓeeɗ ari raŋk kɛnɔ bɔdɛɗ.

³³Nɛɓa Yeese pakati iɗit sinɛ joope gɛɛnɛk mowan nɛ diile nɛ kɛɛ gageeɗ pɔlpɔlɛ weena, nɛ topaayɛ ɗeewa gɛɛŋk, nɛ kumeeɗ kaɗa nɛɛk.

³⁴Nɛ ɓɔŋgɔɔrɛ taamɛ dariya nɛ orku Wɛɛŋa nɛ tonu eta sinaana kɛ, "Epata!" wooran nɛɛk sini kɛ, "Tayaak."

³⁵Nɛɓa iɗit sinɛ sisa tiiɗi ɛ tonɗi kɛ ɗɔm.

³⁶Nɛɓa Yeese tonu joopa gɛɛna kɛnɔ kat lakɛ iɗit sinɔ yaaŋɛrgeeɗ any sinik. Yakanaɓa waasɛr a obiiŋ, a ɛtɛ oko sinɛɓa toniiɗɛ sɛɛga kɛnɔ kat yaaŋɛrk.

³⁷Reemɗiɓa ɓayɛtun joop sigɛɓa tiyɛrk baŋɛ nɛ tonur kɛ, "Mentan any sinɛkɔ ijaag Yeesee baŋɛkiŋ. Ijaag joop sigɔ kir tiiɗitik a tiiɗiŋ, ma sigɛ kir tonɗiitik tonɗiiŋ."