Read majang Markoos 9 Bible Online

Markoos 9 - majang bible

Markoos 9

¹Tonuɓa sɛɛga Yeese kɛ, "Eekeer tona kɔnaaŋ, joope sigeege ɛtɛr seedik kɔɔr a omoŋ omoŋ dɛnɛrkoy burɛ Waakoyotoŋk a mɛlki ma in kiir rerin. Mɛlkikoy burɛ Waakoyotoŋk a ɓaŋkawuka sinɔ obiiŋɔŋk."

²Ɗoŋikɛ sigɔɔgɛ tula omk baŋiya diileɓa Yeese Petros, a Yaykoob, a Yowanis, nɛ kɔtɔɔŋɛr kurkuma sinɔɔna jeeɗoŋɔŋk raŋana. Kɛɛ iɗit sinɔɓa sɛɛn a sɛɛgik ara. Nɛɓa mɛyɛ ɛɛk Yeeseek sɛɛge taamɛkɛ,

³nɛɓa nyaalɛ abii nɛɛkɛ jɛt, tupeenyɓa a kɛɛ ɗook raŋk iɗit sinɔ oolɛ a aadiɗi a ɛtɛ oko sinɛkik.

⁴Saaɓak dɛnɛɛɓa Eliyaas a Muusee, nɛɓa tuker waasiyɛ a Yeesee.

⁵Nɛɓa tonu Petros Yeeseya kɛ, "Rɔɔriytaano, mentantina beeɗit seedikiŋ. Nɛkoy kɛnyii paapɛyɛ a jiit, nɛ omaay nook, ma omaay Muuseek, ma omaay Eliyaasik."

⁶Kiɓa ɗegerɔɔn Petros kɛ tonu ɛk, agut sinɔɓa ŋaatirɗi a getu jiitik.

⁷Nɛɓa mɛlki gumoy nɛ miinye sɛɛgiŋ, nɛ gumoy nɛɛkɛ tak tiyɛɛ koŋgoy sinɔ ɗooru kɛ, "Tɔɔn Naak sinɛ poraak sɛɛn sini. In geleewɛɛ sɛɛna."

⁸Nɛɓa sisa kolɛɛnyɛr nɛ mermena, nɛ dɛnɛr Yeesee dakɛɗa a sɛɛn a sɛɛg.

⁹Saaɓa ɓurɓuɗiikiɗ kurkum nɛɛkɛkik, nɛɓa Yeese sekɛ nomtaanaka gɛɛna kɛ, "Kat lakɛ iɗit sinɔ tonurguɗɔ any sinɛkɔ dɛnɛɛrik nɔkoy ŋaarkiɗ Tɔn Etoŋk ret walsaak."

¹⁰Nɛɓa nomtaanak gɛɛnɛ boŋurŋ, yakanaɓa totoni ɛkanɛɛkɛ gɛŋk kɛ, "Ama ŋaarin ret walsak jikon?"

¹¹Kɔɔniyarɓa Yeesee kɛ, "Tonur rɔɔriytaanak higi Muuseek kɛ dɔɔs a tɛɛnan mɛlki Eliyaas agut jikon?"

¹²Nɛɓa sɛŋk jumur sɛɛga kɛ, "Eekeerɛ, mɛlkikoy ɔɗɔɔkɛ Eliyaas nɛkoy isiise any baŋɛ. Yakana taapɛɛɓa Wargatɛɛ Waakoyotoŋk kɛ laŋkikoy Tɔn Etoŋk rakatɛ ɛkoy daraayɛɛ ɛk?

¹³Tona kɔnaaŋ, mɛlkiɓa Eliyaas jeemɛ, ijaagirɗiɓa joop any sinɛ ɗɛyɛrkiŋ oko sinɛɓa taapɛɛɗɛ Wargatɛɛ Waakoyotoŋk agut sɛɛnik."

¹⁴Weeriikiɓa sɛɛk son lak nomtaanak gɛɛŋk sigɛkan dakɛrk, nɛɓa dɛnɛr joop a ɓɔɔkaaŋ a tolɗi sɛɛge tookɛɛta. Palamɗiɓa rɔɔriytaanak higi Muuseek a nomtaanak gɛɛŋk.

¹⁵Saaɓa joop baŋɛ dɛnɛrɗi Yeeseek, nɛɓa ŋaatir a ɓuriiŋ. Nɛɓa reeritar son lak sɛɛnik nɛ kaar digoyɛrŋ.

¹⁶Nɛɓa kɔɔniy Yeese nomtaanak gɛɛŋk kɛ, "Palalamigiɗɔ a joop sigɛ pɛɛni kɛ jikon?"

¹⁷Nɛɓa joope sigaagɛ ɓɔɔkaak iɗit omaay jumur kɛ, "Rɔɔriytaano, ɗɔkakɔ tɔɔn naak sinɔkan gaamur wɛɛŋa sigɔ somkaanakik nɛ ki tonɗiitik son lak iinik.

¹⁸Saa tukiɗiitageeɗik nɛ orur sɛɛniŋ. Nɛ kusuɗ kuru ad nɛ ɗam ŋedak gɛɛŋk nɛ paalor ɛɛk nɛɛkɛ a ito iɗit sinɔkɔ rɛrŋɔŋk. Nɛkɔ kalɛykaaya nomtaanak gooŋk kɛnɔgun ɔɔyɛrɗi wɛɛŋa sigɛ somkaanakik, nɛkɔ kir oolɛ."

¹⁹Nɛɓa Yeese tonu sɛɛga kɛ, "Iinak joop sigi kir ŋaadiɗitik, beeɗiikoy Eet a iinak agut omoŋ nɔkoy okoɗak? Ɓaŋkaawurakoy kɔna oolaan nɔkoy okoɗak? In ɗɔkɛ tɔɔn nɛɛk son lak eetik."

²⁰Nɛɓa sɛɛk ɗɔkatageeɗ tɔɔn nɛɛkiŋ. Saaɓa wɛɛŋa sigɛ somkaanakik dɛnɛrɗi Yeeseek, nɛɓa orur tɔɔn sinɛ nɛ dirkiyaŋ, nɛɓa girgiɗi tɔn nɛɛkɛ ɗook a kusuɗ kuruu.

²¹Nɛɓa Yeese kɔɔniy ɛpɛn tɔɔna sinaana kɛ, "Ɛtɛ ɔɔtɛ nɛɛkɛ ɛk sinɛkan tukiɗikaageeɗ gori sinik?" Nɛɓa ɛpɛna tongeeɗ kɛ, "Tukiɗikaageeɗɓa sasalikent nɛɛkɛk."

²²O'orar sɛɛn wɛɛŋa sigɔ somkaanakik agut ɓɔɔkaaŋ maɗa a gɔrɔwa kɛnɔ ɓokotur sɛɛn. Ɔkɔnna gayɛŋ, inrena sanɗika. Maariyreeta."

²³Nɛɓa Yeese tongeeɗ kɛ, "Tonun kɛ, 'Ɔkɔnna gayɛŋ,' agut jikon? Iɗit sinɔ ŋaadiɗiiŋɔŋk, gaygeeɗ any baŋɛ."

²⁴Nɛɓa sisa ɛpɛna tɔɔna sinaana ooyɛ kɛ, "Ŋaadiyɛ ŋaadaaŋ. Mayakana tɔkɔnytu nɔte ŋaar any sinɛ kiiɗa ŋaaditik."

²⁵Dɛnɛɓa Yeese joop a kurak a reerirkiŋ, nɛɓa lamɛ wɛɛŋa sigɛ somkaanakik kɛ, "Iinak wɛɛŋa sigi kir tonɗiitik a kir tiiɗitik," tona kɔna kɛ, "In ŋaarkɛ toomoy sineene a katkoy murarkɔ nɔ guugunyargiɗɔ kɛkar."

²⁶Nɛɓa wɛɛŋa sigɛ somkaanakik ooyɛr a ɗooruŋ nɛɓa tɔn nɛɛkɛ dirkiyaŋ jɛt nɛ ŋaararɗiŋ. Ɓɛɛlɛɓa a iɗit sinɔkɔ rɛrŋɔŋk. Nɛɓa joop a ɓɔɔkaaŋ tonur kɛ, "Rɛrkɔŋ."

²⁷Yakanaɓa Yeese gaamu ari tɔɔn sinɛk nɛ ɓɔŋgɔɔrɛ, nɛ ɛtɛŋ.

²⁸Saadi baŋiya, saaɓa Yeese arkiɗ godeey tak sɛɛn a nomtaanak gɛɛŋk mowank, nɛɓa kɔɔniyar sɛɛn kɛ, "Nɔ seek kiiɗi oolɛ a ɔɔykii wɛɛŋa sigɔ somkaanakŋɔŋk agut jikon?"

²⁹Nɛɓa sɛŋk jumur sɛɛga kɛ, "Sinɔ ito sinik ŋaarki ɗanɗamɔɔn dakɛɗa."

³⁰Ŋaararɓa Yeese a nomtaanak gɛɛŋk saadi, nɛ ɗoyur sinɔɔnɛ Gɛlilaak. Ɗɛyɛɓa a kat lakɛ iɗit sinɔ ɗeger saan atukuɗuk.

³¹Ɗɛyɛɓa Yeese rɔɔriyɔɔna nomtaanak gɛɛŋk, nɛɓa tonu sɛɛga kɛ, "Gaɓɛɛkɔɔ Tɔɔn Etoŋk ariita joopoŋk. Nɛkɔɔ sɛɛk ɓokoturŋ, mayakana saakɔɔ ɓokotiiɗɛɛk baŋiya, ŋaarkikɔɔ ɗoŋikɛ sigɔɔgɛ jiitik."

³²Yakanaɓa sɛɛk ki sɛɛga mɛlɛ any sinɛ tonɛɛ sɛɛgak, nɛ ɓurer nɛ kir kɔɔniyɔɔn.

³³Kurakɓa Yeese a nomtaanak gɛɛŋk Kipirnahooma. Saaɓa Yeese guugunyɗu godeyak baŋiya, nɛɓa kɔɔniy nomtaanak gɛɛŋk kɛ, "Palalamarkoto gopɛ jikon?"

³⁴Nɛɓa sɛɛk dakɛr kɛ many, agut sinɔɓa palalamiiɗ gopɛ kɛ, "Wooɗ sinɛ kaalɗi eteŋkɛ baŋɛk?"

³⁵Saaɓa dokiiɗiɗe Yeeseek baŋiya, riyiriɓa nomtaanak gɛɛŋk sigɛ aarin a pɛɛyk, nɛ tonu sɛɛga kɛ, "Iɗit sinɔ ɗɛyɛ a sɛɛn ɔɗɔwenk dɔɔsgeeɗ a sɛɛn pedtan a sɛɛn ijaagen joop baŋɛk."

³⁶Nɛɓa ɗɔku tɔɔn om nɛ ari a ɛtɛ sɛɛge kɔɔr. Nɛ gaamku ɛɛka nɛ tonu sɛɛga kɛ,

³⁷"Iɗit sinɔ boŋu tɔɔmɔkɛ sigeege ito sinik om, tiriyaakɛ gaanɛkik boŋu eet. Iɗit sinɔ boŋu eetik baŋɛ, nɛ moko boŋu eet dakɛɗa boŋu ɓɔrɛ Baabɛ sinɛ kanti wosɛykkiŋ."

³⁸Tonuɓa Yowanis Yeeseya kɛ, "Rɔɔriytaano, dɛniikɔ iɗit sinɔ ɔɔyku wɛɛŋa sigɔ somkaanakik tiriyaakɛ goonɛkik. Nɛkɔ tongiɗii kɛnɔ nyɛyɛɗ, agut sinɔ moko sɛɛn a eteŋk agut omoŋɔŋk."

³⁹Nɛɓa Yeese tonu kɛ, "Kat nyɛyɛɗ, agut sinɔ kɛɛ iɗit sinɔ ijaag sɔɔriyɛ tiriyaakɛ gaanɛ nɛ sisa tonu any sinɔ ŋɛɛwɛnŋɔŋk eete raŋk.

⁴⁰Iɗit sinɛ tin ki ɓooyɛɛk sɛɛn a eteŋk agut omoŋ.

⁴¹Eekeer tona kɔnaaŋ, iɗit sinɔ kɔna gaɓɛ maawu a gɔtɛ omoŋɔŋk tiriyakɛ gaanɛɛkik nɛ agut sinɔ iinak Kereseek, kikoy sanɛɛɗ gati nɛɛk.

⁴²"Sigeege temetuŋɔŋk ŋaadiɗi eeteek, iɗit sinɛ ooɗɛ iɗit om ɔɔtɛ tikiyɛɛkoŋkuk dɔɔsgeeɗ a kurɛygiɗɛ goori ŋɔɗɔka nɛ oriirɛɛ gɔrɔwa sinɔɔna obiiŋɔŋk.

⁴³Ɔkɔnnu ooɗɛ ari nookɛ ɔɔtɛ tikiyɛɛkoŋkuŋ, yawar nɔ orun. Ɔɔtɛ sɔgunnu oriiɗɛ maɗa gɛhanɛmuk ma lakin arin a pɛɛyk, nɛna dɔɔs a guugunyun wɛɛŋaka ma iin gɔɔrɛ.

⁴⁴[Gɛhanɛm soon kiiɗi rerin kurɓu nɛɛkɛ, ɛ kiiɗi laarin maɗ nɛɛkɛkik.]

⁴⁵Ɔkɔnnu ooɗɛ deran nookɛ ɔɔtɛ tikiyɛɛkoŋkuŋ, yawar nɔ orun. Ɔɔtɛ sɔgunnu oriiɗɛ maɗa gɛhanɛmuk ma lakin derak a pɛɛyk, nɛna dɔɔs a guugunyun wɛɛŋaka ma kaamuŋ.

⁴⁶[Gɛhanɛm soon kiiɗi rerin kurɓu nɛɛkɛ, ɛ kiiɗi laarin maɗ nɛɛkɛkik.]

⁴⁷Ɔkɔnnu ooɗɛ taama nookɛ ɔɔtɛ tikiyɛɛkoŋkuŋ, kɔɔkɔyak nɔ orun. Ɔɔtɛ sɔgunnu oriiɗɛ maɗa gɛhanɛmuk ma lakin taamɛ a pɛɛyk, nɛna dɔɔs a guugunyun Burɛya Waakoyotoŋk ma lakin taama a omoŋ.

⁴⁸Gɛhanɛm soon kiiɗi rerin kurɓu nɛɛkɛ, ɛ kiiɗi laarin maɗ nɛɛkɛkik.

⁴⁹Konɛyɛɛ joop baŋɛ maɗ.

⁵⁰Mentan mooyiiŋ. Mayakana ɔkɔn ki luuluwuka mooyiiŋ, nɛkɔɔ ariir a luuluweŋ jikoy? In ɓɔrɔ lakɛ any sinɔ mentan a ito luuluwuka mooyiyoŋk eek noŋk, in beeɗɛɛ bɔdɛɛɗ ɛkanɛɛkɛ goŋk."