Read majang Lukaas 1 Bible Online

Lukaas 1 - majang bible

Lukaas 1

¹Iin Tewopiloos sinɛ eemɛyɛɛk, Taapɛrɓa joop aɓɔɔkaaŋ Waasiyɛ sigɔ yaaŋɛr ola sigɛɓa ijaagɛɛ sɛɛg eteŋkɛ kɔɔruk.

²Ege sigi tuki nɛɛkɛ waasiyɛ sigɔɓa tina yaaŋɗi joop sigɛɓa dɛnɛr taamtuk a tukiɗi tuki nɛɛkɛkik, a joop sigɛɓa ijaageer pɛɛni Waakoyotoŋkuk.

³Maɓɔrɛ saak aɓa tukuka tuki nɛɛkɛk saaɓa mermenɗa any baŋɛ kɛ ɗɔmk baŋiya, nɛkan dɛna ata mentan a inna taapɛɛra waasiyɛ gɛɛŋk a ɓɛɛlɛr patan.

⁴Nɔkan ijaagiiɗa oko sinikik kɛnɔ ɗegerin kɛ eekeer rɔɔriyɔn sinɛkanni rɔɔriyɗɛɛk.

⁵Eme sinaanɛɓa ege Herodis tapaɗ ɗoo Yuudaak, lakɛɓa tapaɗ ŋaadiyɛɛkoŋk sinɔ riyɛ kɛ Jakariyaasik pakatiit tapaaɗikeenoŋk Aabiyakeek. Egeɓa jarti nɛɛkɛ komoy tɔɔmɔk Aaroonuk, riyɛɓa kɛ Elsaabeet.

⁶Mentaanaɓa sɛɛk agetu pɛɛy taamɛkɛ Waakoyotoŋkuŋ, koorɛrɓa sekiyɛ a dambiyɛ Waakoyotoŋk baŋɛ a kɛɛ any sinɔ tikerk.

⁷Yakanaɓa kɛɛ sɛɛge tɔɔn agut sinɔɓa ege Elsaabeet tersikank, maɓa sɛɛk bɔɔlɔŋeer a getu pɛɛy.

⁸Ɓeny omalte pony ijaag tapaaɗikeenoŋkuk Jakariyaasik egeɓa ɔɔtɛ nɛɛkɛ sinɔ ijaagɗiɗ sɛŋk Godeey sinaanɛ Geetitank, nɛɓa ar ijaag tapaaɗikeenoŋk taamɛkɛ Waakoyotoŋk.

⁹Ɗirgeeɗɓa ɔɔtɛ sinɔ guugunyɗu Godeya sinaana Geetitank Waakoyotoŋk kɛnɔ uduŋe itaanɛ oko dambi ijaag tapa ŋaadiyɛɛkoŋkuk.

¹⁰Saaɓa uduŋeeɗ itaanɛ Godeey sinaanɛ Geetitank takik, maɓa joop sigɛ ɓɔɔkaak baŋɛ ɛtɛr walas nɛ ɗanɗamaaŋ.

¹¹Nɛɓa yaaŋɛ ɛɛk wosɛytan Suumiyoŋk Jakariyaasa a ɛtɛtɛr nyon sinaanɛ uduŋeetoŋk goy sineene ɗiɗikaak.

¹²Saaɓa Jakariyaas dɛnɛɛɗik, nɛɓa ŋaati a ɓuriiŋ.

¹³Yakanaɓa tongeeɗ wosɛytan nɛɛkɛ kɛ, "Iin Jakariyaas, kat ɓuriikin. Tiyɛɛ kɔna ɗanɗamɔn nookuŋ. Ɓartɛ kɔɔna jarti nookɛ Elsaabeet tɔɔn sinɔ mooyk, nɛkɔɔ riyin kɛ Yowanis.

¹⁴Laŋinkɔɔ sɛɛne yaaka jɛt, maɓɔrɛ yaakɔɔ joopa a ɓɔɔkaaŋ agut ɓartɛɛt nɛɛkiŋ,

¹⁵obiikoy sɛŋk taamɛkɛ Suumiyoŋkuŋ. Kikoy sɛŋk tuu ogool wɛynik a tuu om sinɔ pɔɔyɛɛŋɔŋk, enyɛɛrikoy sɛŋk Wɛɛŋa sigɔ Geetitaanakik a in ar ɛmɛse amɗ.

¹⁶Jumurkukɔɔ sɛŋk joop Israeelik a ɓɔɔkaaŋ son lak Suumi nɛŋk Waakoyok.

¹⁷Maɓɔrɛ ragadkɔɔ joop gɛɛŋk Suumiya Wɛɛŋakɛ a ɓaŋkawukaat oko iɗit pɛrkaakoŋk Eliyaas. Jumurkukɔɔ ɓayɛtun ɛpɛnaakakoŋk son lak tɔɔmɔk gɛŋkik, a ɓayɛtun joop sigɛ kir ɗɛyɛ any sinɛ tonɛɛkik son lak ɗegerɔn ɛɛkoŋk joop sigɛ mentaana taamɛkɛ Suumiyoŋkuk."

¹⁸Nɛɓa sɛŋk Jakariyaas tonu wosɛytaana sinaana kɛ, "Ɗegerakɔɔ any sini kɛ eekeer jikoy? Eet bɔɔlɔŋ, maɓɔrɛ jarti naakɛ ɓɔɔka emeyi gɛɛnɛŋ."

¹⁹Nɛɓa tongeeɗ wosɛytan nɛɛkɛ kɛ, "Eet Gɛbireel sinɛ ɛtɛtɛɗa taamɛkɛ Waakoyotoŋkuk. Wosɛykɛɛkɔtu sooy lak Waakoyok kɛnɔna kusa waasa Pɛɛni sini Ɓɛlkɛɛstank.

²⁰Dɛnko. Agut sinɔ kiiɗin ŋaadit pɛɛni sinɛ kɔna tonaakik, kinkɔɔ oolɛ toni nɔkɔɔ ɓartɛɛɗɛɛ tɔɔn nɛɛkik. Dusanɛɛkɔɔ pɛɛni naak ɔɔtɛ nɛɛkɛk."

²¹Koorɛrɓa joop Jakariyaasiŋ. Nɛɓa reemɗi ɓayɛtun gɛŋk agut sinɔɓa beeɗirkiɗ kɛ many Godeya sinaana Geetitank takanak.

²²Saaɓa Jakariyaas ŋaarkiɗik, nɛɓa ki oolɛ toni a joopuk. Nɛɓa sɛɛk ɗegerar kɛ dɛnɛkɔ any om Godeey sinaanɛ Geetitank tak. Tonɗiiɓa sɛɛga a ijojopiiɗ ari, nɛɓa beeɗ oko sinɛk a ki oolɛ toni.

²³Saaɓa ruumeeɗɛɛ ɔɔtɛ sinɛ ijaagoŋkuk baŋiya, nɛɓa Jakariyaas ŋaar nyaka nɛɛkaak.

²⁴Nɛɓa gamɛ ɔɔtɛ sinɔɔnɛ balaaŋɔŋk jarti nɛɛkɛ Elsaabeetiŋ, nɛɓa beeɗ a dugiɗi godeey tak a ɛyɛkeer tuul.

²⁵Nɛɓa tonu kɛ, "Ijaagkɔta Suumii any sinɔ mentanŋɔŋk. Ijaagkɔta maariyeet nɛɛk, nɛkɔte ɔɔyɛ keeny sinɛkɔ laka joope kɔɔrkuŋ."

²⁶Saaɓa gamɛɛɗ Elsaabeetik ɛyɛkeerɛ tula ome nɛɛkɛk, wosɛykiɓa Waakoyot wosɛytan nɛɛk Gɛbireel Naajireeta. Naajireet katamɛ sinɔ ar ɗook Gɛlilaak.

²⁷Wosɛykɛɛɓa son lak peet sinɔ inɓa kir ɗeegarɔn a mooyk sinɔ riyɛ kɛ Maariyamuk. Sɛɛnɓa mɛyii iɗit sinɔ komoy Daawitik sinɔ riyɛ kɛ Yoosepuk.

²⁸Nɛɓa mɛlki son lak sɛɛnik nɛ tongeeɗ kɛ, "Digoyna, iin geetitan peetakɛ kɔɔr. Waakoyo a iin agut omoŋ."

²⁹Nɛɓa sɛŋk ŋaati jɛt agut waasiyɛ wosɛytan sinɛk, nɛ koɓu kɛ, "Ege sini digoy sinɔ ɓɛɛlɛ ɛkik."

³⁰Nɛɓa sɛŋk wosɛytan sinɛ tongeeɗ kɛ, "Iin Maariyam, kat ɓuriikin. Yaa ɓayɛ Waakoyotoŋk jɛt.

³¹Dɛnko, gamunkɔɔŋ nɛkɔɔ ɓartin tɔɔn sinɔ mooyk, nɛkɔɔ riyin tiriya gɛɛŋk kɛ Yeesee.

³²Obiikɔɔ sɛŋkiŋ, riyɛ kɛ Tɔɔn Waakoyo sinɛ Obiik. Gageeɗkɔɔ Suumii Waakoyot barsum ɔrɛɛ nɛɛk Daawitikik.

³³Beeɗkoy suumiikent Israeele nɔkoy nɔkoyk. Kɛɛ pedtan Burɛ nɛɛkɛk."

³⁴Nɛɓa Maariyam tonu wosɛytaana sinaana kɛ, "Eet inɓa kii ɗeegarɔn a mooy. Anɛkɔɔ gayɛ any sini ɛk?"

³⁵Nɛɓa jumurgeeɗ wosɛytan nɛɛkɛ kɛ, "Mɛlɛrkikɔɔna Wɛɛŋa sigɔ Geetitaanakik, dokukɔɔne ɓaŋkawuka Waakoyo sinɛ Obiik. Agut sini ege tɔn sinɛkɔɔ ɓartink geetitan, riyɛ kɔɔ kɛ Tɔɔn Waakoyotoŋk.

³⁶Dɛnko, tekaan nook Elsaabeet gamɛ tɔɔn sinɔ mooyk bɔlɔŋkaat nɛɛkɛk, ege sisɔ ɛyɛker gɛɛnɛ tula om sigɛkan gamɛɛɗik maɓa totonɛɛ kɛ sɛɛn nɔ tersikan.

³⁷Kɛɛ any sinɔ ooɗɛ Waakoyok ara."

³⁸Nɛɓa saadi baŋiya, tongeeɗ Maariyam kɛ, "Eet ijaagen Suumiyoŋk. Inta ɓɛɛlɛ oko sinɛ toniiɗink." Nɛɓa sisa wosɛytan sinɛ pakat ɛɛk nɛ ŋaarŋ.

³⁹Saaɓak ŋaarɓa Maariyam a gorgorŋ nɛ kɛɛ ɗooka sinɔɔna ar kurkumɛɛkɛ Yuudaak, nɛ mɛlɛ katamɛya omalta.

⁴⁰Nɛɓa guuguny godeya Jakariyaasik nɛ digoyɛ Elsaabeet.

⁴¹Saaɓa Elsaabeet tiyɛɛɗ digoy Maariyamuk, nɛɓa ɓeesiɗi tɔn sinɛ lak amɗukuŋ. Nɛɓa Elsaabeet enyɛɛri Wɛɛŋa sigɔ Geetitaanakik.

⁴²Nɛɓa tonu a ɗooruŋ kɛ, "Geeti kɔnu Waakoyot peetakɛ baŋɛ kɔɔr, geetitan tɔn sinɛkɔɔ ɓartink.

⁴³Ege eeta sini eemɛyɔn sinɔ ɓɛɛlɛ ɛkik, nɔ kusuɗ ɛmɛsa Suumiya naaka son lak eetik.

⁴⁴Saakɔ tiyɛɛɗa digoy nookuk, nɛkɔ ɓeesiɗi tɔn sinɛ laka amɗuk yaakat.

⁴⁵Geeti kɔnu Waakoyot agut sinɔ ŋaadiɗin kɛ ijaagkɔɔna Suumii any sinɛ kɔna tonukŋɔŋk.

⁴⁶Tonuɓa Maariyam kɛ, "Eemɛya Suumi wɛɛŋa gaaŋk baŋɛ.

⁴⁷Yaa ɓayɛ naakɛ, agut sinɔ ege Waakoyot Suumi naakik.

⁴⁸Dɛnɛti Waakoyot eet sinɛ ijaagen nɛɛk sinɛ balaaŋɔŋkuŋ. A tukiɗi ɓenyse ɓartiyɛ baŋɛ tonurkɔɔta kɛ geeti kɔnu Waakoyotuŋ.

⁴⁹Agut sinɔ ijaagkɔta Waakoyo sinɛ lak ɓaŋkawukaak any sinɔ obiiŋɔŋk, ege tiriya gɛɛnɛk geetitaanak.

⁵⁰Ijaag Waakoyot maariyeet nɛɛk joopa sigaaga ɓurer sɛɛnik baŋɛ, ɓartiyɛɛkɛ ɓartiyɛɛka.

⁵¹Yaaŋɛkɔ ɓaŋkawuka nɛɛk ariit nɛɛkɛ sinaanɛ ɓaŋkawuŋɔŋk, kɛɛtɛkɔ joop sigɛ ɓɔŋgɔɔrɛr ɛɛk nɛŋk rakaayak koɓiɗakɛ gɛŋkik.

⁵²Rikitkikɔ suumiyɛ barsumatɔkɛ gɛŋk, ma ɓɔŋgɔɔrɛ joop sigɛ atu ɗookuk rakaaya eemɛyɔɔn.

⁵³Joop sigɛ latu ŋaawuk arkɔ sɛɛg a ɓooɗorar any sinɔ mentanŋɔŋk, ma joop sigɛ latu worik ɔɔyɛ sɛɛg a ɓɛɛlɛr sɔkɔn.

⁵⁴Ijaageer gɛɛŋk joop Israeelik. Koɓukukɔ maariyeet nɛɛk.

⁵⁵Ijaagkɔ Waakoyot any sinɛɓa guugunygeeɗ kuumeeta ɔrɛya naŋk, Abrahama a tɔɔmɔka gɛɛnaakik nɔkoy nɔkoy."

⁵⁶Beeɗɓa Maariyam sooy lak Elsaabeetik a ɛyɛkeer jiit, nɛ ŋaar nyaka nɛɛkaak.

⁵⁷Gayɛɓa Elsaabeeta ɔɔtɛ ɓartɛɛtoŋk, nɛɓa ɓartɛ tɔɔn sinɔ mooyk.

⁵⁸Joop sigɛ beeɗir a sɛɛn jɔkikentik a tekaaneer gɛɛŋk tiyɛrɓa kɛ argeeɗkɔnɔ Suumii maariyeet nɛɛk sinɔ obiiŋɔŋkuŋ. Nɛɓa yaa sɛɛga a sɛɛn agut omoŋ.

⁵⁹Ɗoŋikɛ tula jiiteene nɛɛkɛk, kurakɓa kɛnɔ yawɛr sasalɛ nɛɛk. Ɗɛyɛrkɛɓa a gun riyar tiriyaakɛ ɛpɛnaak kɛ Jakariyaas.

⁶⁰Yakanaɓa ɛmɛsa tonu kɛ, "Moko! Oko sinɛk riyɛ kɛ Yowanis!"

⁶¹Nɛɓa sɛɛk tonurgeeɗ kɛ, "Kɛɛɓa tekaaneerɛ goonɛ sinɔɓa riyɛ tiriyaakɛ sigeegek."

⁶²Nɛɓa saadi baŋiya kɔɔniyar ɛpɛn yaaŋiyɛɛkɛ kɛ, "Ɗɛyin a riyɛ tɔɔn nook kɛ wooɗ?"

⁶³Nɛɓa kalɛyi Jakariyaas any taapɛɛtoŋk kɛnɔ gaɓɛrgeeɗ, nɛɓa taapɛ kɛ, "Riyɛ kɛ Yowanis." Nɛɓa reemɗi ɓayɛtun gɛŋk agut any sini.

⁶⁴Nɛɓa sisa Jakariyaas oolɛ toni, nɛ tuke pɔɔsiyɛ Waakoyotoŋk.

⁶⁵Nɛɓa joop sigɛ beeɗir jɔkikentik ɓuriiŋ agut ola sigi baŋɛ, nɛɓa tiyɛɛ waasiyɛ gɛɛŋk ɗook Yuudaak sinaanɛ ar kurkum raŋk baŋɛ.

⁶⁶Kɔniniyiɓa joop sigɛɓa tiyɛr any sinik baŋɛ kɛ, "Tɔɔn sini ɓɛɛlɛkɔɔ ɛk?" Nɔɓa ɓɛɛlɛɛɗ oko sinikik agut sinɔɓa Suumi a sɛɛn agut omoŋ eekeerɛk.

⁶⁷Enyɛɛriɓa ɛpɛna tɔɔna nɛɛka, Jakariyaas Wɛɛŋa sigɔ Geetitaanakik nɛɓa waasɛ pɛrka kɛ,

⁶⁸"In dakɛr pɔɔsiyɛɛk Waakoyota Israeelik, agut sinɔkɔ kusuɗ son lak joop gɛɛŋk maariyeet nɛɛkɛ ɛkɔ ebɔdɛ sɛɛg tikiyɛɛkɛk.

⁶⁹Boŋkukɔ tina iɗit sinɔ eɓɔdiɗiiŋɔŋk sinɔ obiiŋɔŋk, ijaagente nɛɛkɛ komoy Daawitik,

⁷⁰oko sinɛɓa tonurɗu joop pɛrkaakoŋk sigɔ geetitaanak, sigaagɛɓa ɓɛɛlɛr a tukiɗi emeyikɛ sigaagɛɓa ɗeeŋkik.

⁷¹Ebɔdukukɔ tin ariit gumaakeer gaŋkik, a joop sigɛ manɗiikik baŋɛ.

⁷²Nɔkɔ ijaagiiɗ oko sinikik yaaŋɛ maariyeet nɛɛk ɔrɛyaka gaŋk, koɓuku kuumeet nɛɛk sinɔ geetitank.

⁷³Ege sini kuumeet sinɛɓa kuumɗiiɗi ɔrɛya naŋk Abrahamaak.

⁷⁴Bɔdukiikɔ gumakeerɛ gaŋk, kɛnɔ ijaagɗikii Waakoyota a kii ɓuriit,

⁷⁵Waakoyote taamɛkɛ a eteŋk geetitaanak a mentankii eme sinaanɛ ɓɛɛlɛɛɗii wɛɛŋakɛk baŋɛ.

⁷⁶Maɓɔrɛ iin tɔɔn naak sini, riyɛni kɛ iɗit pɛrkaakoŋk Waakoyotoŋk sinɛ lak ɓaŋkawukaak. Kɛɛɗinkɔɔ tuki Suumii ɔɗɔɔkɛ kɛnɔ ijaagin joop a ragadir ɛɛk mɛlɛɛɗa nɛɛkaak.

⁷⁷Gaɓunkɔɔ joopa gɛɛna ɗegerɔn ɛɛkoŋk bɔdɛɗoŋk sinɔ laŋirɗi tɔŋɔɗ tikiyɛɛkoŋkuk.

⁷⁸Agut maariyeet a pori Waakoyo naŋkik, tayɛkɔɔtina waawuy bɔdɛɗoŋk dari.

⁷⁹Tipeyɗi sɛŋk joopa sigaaga atu nyuugurk a sigaaga atu tipii retoŋkuk, ikekeɓi deraka gaŋk gopana bɔdɛɛɗoŋk."

⁸⁰Nɛɓa Yowanis ɓɔlɔɔrɛŋ nɛ ɓaŋkaawurŋ kalbii nɛɛkɛ. Nɛɓa beeɗ paaton mɛlɛɛɗa nɔɓa yaaŋɛɗ ɛɛk joopa Israeelik.