Read majang Lukaas 11 Bible Online

Lukaas 11 - majang bible

Lukaas 11

¹Ɓeny omalte ɗanɗamaaɓa Yeese nyon omalte. Saaɓa ruumeeɗ ɗanɗamɔn nɛɛkik, nɛɓa nomtan nɛɛkɛ omaay tongeeɗ kɛ, "Suumi naakɛ, rɔɔriy tin ɗanɗamɔɔn oko sinɛɓa Yowanis rɔɔriyɗi nomtaanak gɛɛŋk ɗanɗamɔɔnuk."

²Nɛɓa sɛŋk tonu sɛɛga kɛ, "Saa ɗanɗamaaɗɔɔk in tonɛ kɛ, 'Iin Baabɛɛ naŋk sinɛ arkin darik, in geetitaanak tiriya goonɛk, in mɛlki Burɛ nookɛk.

³Gaɓ tina kiiwu naŋk ɓɛɛnyɔwoŋk ɓɛɛnyɔwɛ gɛɛŋk baŋɛ.

⁴Toŋoɗar tine tikiyɛ gaŋk, oko sinɛ ŋɔɗiikarkiɗii joope sigaagɛ tina tikiɗiik baŋɛk. Kat tin ŋɔɗurun nɔ guugunyii paariita.' "

⁵Tonuɓa sɛɛga kɛkar kɛ, "Kaɗɛɛŋ kɔne iɗit omaay lak piraa, nɛ iɗit sinɛ kɛɛ kaalt kɔɔr waa piraa nɛɛkik nɛ kɛɛ tongeeɗ kɛ, 'Iin piraa naak, in reene masa kiiwakɔ a jiit,

⁶agut sinɔ mɛlkikɔta piraa naak om gopɛ sinɔɔnɛ yowɛɛɗŋɔŋk, nɛ kɛɛ ɗama sinɔ gagiɗak,'

⁷anɛ iɗit sinɛ ar godeey takik tongeeɗ kɛ, 'Katti ooɗun, deeɗɛɛkɔ gode nɛɛkiŋ, ma tɔɔmɔk gaanɛ ɗeegarar a eet agut omoŋ, kaa oolɛ a ŋaara raŋana nɔna gaɓaaŋ?'

⁸Tona kɔnaaŋ, agut sinɔ piraa nɛɛk kɛygun ki ŋaarin raŋana nɔ gageeɗiŋ, ma agut kalɛyit nɛɛk sinɛ ɓaŋkawuŋɔŋk dakɛɗa, gageeɗ any sinɛ ɗɛyɛk baŋɛ.

⁹"Agut sini tona kɔnaaŋ kɛkar, in kalɛyɛɛ, gaɓɛɛkɔɔ kɔnaaŋ. In warɛɛ, laŋiir kɔɔŋ. In ɓɔɔkɛyɛɛ, kekɛ nɛɛk tayɛɛkɔɔ kɔnaaŋ.

¹⁰Agut sinɔ iɗit sinɛ kalɛyik baŋɛ, boŋukɔɔŋ. Iɗit sinɛ warɛk baŋɛ, laŋkɔɔŋ. Iɗit sinɛ ɓɔɔkɛyɛ, kekɛ nɛɛkik taygiɗɛɛkɔɔŋ.

¹¹Iinakɛ, kɔɔr wooɗ sinɛ kalɛyiɗ tɔn nɛɛkɛ [kiiwu nɛ gageeɗ giɗeek?] Maŋk kalɛyiɗ olt nɛ gageeɗ kookoŋ?

¹²Maŋk kalɛyiɗ totokan nɛ gageeɗ rokokoowenŋ?

¹³A iinak tikitaanak nɛ ɗegerari gaɓɛɛ any sinɔ mentanŋɔŋk tɔɔmɔka goŋkuŋ, nɛ Ɓaaɓa noŋk dariyoŋk ki gaamit Wɛɛŋa sigɔ Geetitaanakik a kaalɛŋ ɛk joopa sigaaga kalɛyirk?"

¹⁴Ɓeny omalte ɔɔykuɓa Yeese wɛɛŋa sigɔ somkaanakik sigɔ arir iɗit a ki tonɗiitik. Saaɓa ŋaararkiɗ wɛɛŋa sigɛ somkaanakik baŋiya, nɛɓa iɗit sinɛ ki tonɗiitik tonɗiiŋ. Nɛɓa reemɗi ɓayɛtun joop gɛɛŋkiŋ.

¹⁵Yakanaɓa sɛɛge a omoŋ omoŋ tonur kɛ, "Ɔɔyɛ wɛɛŋa sigɔ somkaanakik ɔɗɔwente sineene wɛɛŋa sigɔ somkaanakik, Biel jebuule."

¹⁶Maɓa ɔgɔɔk ɗɛyɛr paariita, nɛ kalɛyir kɛnɔ sɛɛga yaaŋɛ sɔɔriyɛ dari.

¹⁷Nɛɓa Yeese ɗeger koɓiɗa gɛŋk nɛ tonu sɛɛga kɛ, "Maŋgisti sinɔ pakakat ɛɛk nɛɛkik ɗiiriŋ. Joop sigɔ beeɗir godeey sinɔɔnɛ omoŋɔŋk ɔkɔn pakakatiiŋ, kir oolɛ a beeɗir agut omoŋ.

¹⁸Ɔkɔn setan pakar ɛɛk nɛɛkiŋ, nɛ burɛ nɛɛkɛ oolɛ a ɛtɛ ɛk? Mayakana toniir kɛ ɔɔyanɔ wɛɛŋa sigɔ somkaanakik Biel jebuule.

¹⁹Sisɔ ɔkɔn ɔɔya wɛɛŋa sigɔ somkaanakik Biel jebuuleŋ, anɛ tɔɔmɔk goŋk ɔɔyɛr sɛɛg wooɗe? Agut sini pɛrɛdɛrkoy sɛɛk kɔneeŋ.

²⁰Mayakana ɔkɔn ɔɔya wɛɛŋa sigɔ somkaanakik ɓaŋkawukaat Waakoyotoŋkuŋ, nɛ ege sini sinɔ kɛ mɛlkikɔ Burɛ Waakoyotoŋk son lak iinakikiŋ.

²¹"Iɗit sinɔ ɓaŋkawuŋɔŋk ɔkɔn kadi any kaarinoŋk ɛ koorɛ gode nɛɛkiŋ, nɛ kɛɛ wori nɛɛk boŋiɗ.

²²Mayakana ɔkɔn mɛlki iɗit sinɔ ɓaŋkawu a kaalɛ sɛɛnikiŋ ɛ lɔsɛ sɛɛniŋ, nɛ boŋiiɗ any kaarinoŋk sinɛkɔ ŋaadik, nɛ boŋiiɗ wori nɛɛk baŋɛ nɛ kaasɛ joopa ɔgɔɔka.

²³Iɗit sinɔ moko eet a sɛɛnik ɓooyutuŋ, joop sigɔ kir tolɗiit a eetik kɛɛtiɗiikoyŋ.

²⁴"Saa ŋaararkiɗ wɛɛŋa sigɔ somkaanakik etek, nɛ weeweri a warɛr nyon imiinyoŋk sinɔɔnɛ kiiɗɛ maawuk yakana kir laŋiiɗ. Nɛ saadi tonur kɛ, 'Koy weerikii godeya sinaanakan arkiɗiik.'

²⁵Nɛ murarki nɛ laŋirki gode nɛɛk a ɓɛɛlɛ sɔkɔn a kan ragadɛ a gaalɛɛŋ.

²⁶Nɛ ŋaarar saadi nɛ kaar ɗɔkarki wɛɛŋa sigɔ somkaanakik a tula pɛɛy sigɔ kaalɛr sɛɛnik. Nɛ guugunyar eta sinaana nɛ beeɗirŋ. Nɛ ɔɔtɛ iɗit sinɛk kaalɛ sinɛkan jeemɛk."

²⁷Saaɓa Yeese toniiɗ any sinik, nɛɓa jarti omaay joope sigaagɛ ɓɔɔkaak kɔɔr tonu a ɗooruŋ kɛ, "Geetitan jarti sinɛɓani ɓartɛk nɔɓa aapokunk."

²⁸Yakanaɓa Yeese tonu kɛ, "Geetitaanak joop sigɛ tiyɛr pɛɛni Waakoyotoŋk nɛ ijaagirŋɔŋk."

²⁹Saaɓa tolɗiitarkiɗ joop a ɓɔɔkaaŋ son lak sɛɛnik, nɛɓa Yeese tonu sɛɛga kɛ, "Joop eme sinik sigi ŋɛɛwɛnŋɔŋk, ɗɛyɛr a dɛnɛr sɔɔriyɛ, yakana kɛɛkoy sɛɛga gaamit sɔɔriyɛ ɔgɔ sɔɔriyɛɛkɛ sigaagɛɓa iɗit pɛrkaakoŋk Yoonaasik sɔgɔɔsɔyk.

³⁰Agut sinɔ oko sinɛɓa dakɛɛɗ Yoonaas a sɔɔriyɛ joopa Nɛnɛweek nɛɓɔrɛ Tɔn Etoŋk dakɛ a sɔɔriyɛ joopa eme sinik.

³¹Waawuy sinaanɛkoy pirdiyoŋk tapaɗ Saabaa ŋaararkikoy raŋana a joop eme sinik nɛ pɛrɛdɛr sɛɛneŋ, agut sinɔ kusɓa kɛntɛɛ ɗookoŋk kɛnɔ tiyɛ ɗegerɔn ɛɛkoŋk Salamoonuk. Ɓɛɛlɛ seedi iɗit sinɔ kaalɛ Salamoonuk.

³²Waawuy sinaanɛkoy pirdiyoŋk joop Nɛnɛweek ŋaararkikoy raŋana a joop eme sinik nɛ pɛrɛdɛr sɛɛneŋ, weerikɓa tikiyɛɛkɛ Waakoyota waasiyɛɛkɛ Yoonaasikiŋ. Ɓɛɛlɛ seedi iɗit sinɔ kaalɛ Yoonaasik.

³³"Kɛɛ iɗit sinɔ idaawu ɗaawan nɔ riiɓe soodi dugaaŋɔŋk maŋk turkuuke kebetik. Ma riiɓe soodi ar rakaayk kɛnɔ dɛnɛr ɗaawan nɛɛk joop sigɛ guugunyark.

³⁴Ɗaawan ɛɛk nookuk taama nook. Ɔkɔn taama nookɛ bɔdtan, nɛ ɛɛk nookɛ baŋɛ ɓɛɛlɛ a pɛɗɛrka. Ma ɔkɔn taama nookɛ moko bɔdtan, nɛ ɓɔrɛ ɛɛk nookɛ baŋɛ ɓɛɛlɛ a nyuugur.

³⁵Agut sini kooru ɛɛk kɛnɔkɔɔ pɛɗɛrka sinɛ lakin eekik kat dakɛ a nyuugur.

³⁶Ɔkɔn ɓɛɛlɛ ɛɛk nookɛ baŋɛ a pɛɗɛrkaaŋ, a kiiɗɛ soon ɓɛɛlɛ a nyuugurkuŋ nɛ ɗaawu ɛɛk nookɛ a ito tipeyɗi ɗaawan sinɔ ɗaawu jɛtik."

³⁷Saaɓa Yeese ruumeeɗ waasiyɛ gɛɛŋkik, nɛɓa iɗit omaay Paarisik wɔɔrɛ sɛɛn kɛnɔ ɗamar ɗama agut omoŋ. Nɛɓa guugunyar nɛ beeɗi nyon ɗamatoŋk.

³⁸Nɛɓa iɗit sinɛ Paarisik dɛnɛ Yeesee a ɗami a ki aadi arin, nɛɓa reemɗi ɓayɛ nɛɛkɛkiŋ.

³⁹Nɛɓa tongeeɗ Suumii kɛ, "Sisɔ iinak joop Paarisik aadiir any tuutoŋk a lɔkɔy raŋan nɛɛk dakɛɗa, mayakana enya takana goŋk weeweel a tikiyɛ.

⁴⁰Iinak gaagɛyɛ! Waakoyo sinɛɓa riiɓe any sinɛ ar raŋk nɛɛkɛkik kiɓa ɓɔrɛ riiɓɛ any sinɛ ar takik?

⁴¹In gaɓɛɛ any sinɛ ar lɔkɔy takik a tigi sankaanaka, nɛkɔɔ saadi baŋiya mentan kɔna any baŋɛ.

⁴²"Duri koy kɔna, iinak joop Paarisik! Agut sinɔ gaɓɛɛr a asiraat joomuy a naatiloy a waayanak ɔgɔ, ma ŋɔɗari wooran a pori Waakoyotoŋk. Mayakana gunkɔ ijaagiir ola sigi a kiir toŋoɗ.

⁴³"Duri koy kɔna, iinak joop Paarisik! Agut sinɔ poriir godeey tolɛɛɗoŋk noŋk any beeɗitoŋk eemɛyɔnoŋk, a digoy gabiyoy kɔɔr.

⁴⁴"Duri koy kɔna! Agut sinɔ gayiɗɔ a pii sinɔ ar yomɛɛɗ nɛ ŋawiiterɗi joop raŋk a kir ɗegerɔɔnuk."

⁴⁵Nɛɓa joop sigɔ ɗegerar higi Muuseek a omoŋ jumurargeeɗ kɛ, "Rɔɔriytaano, saa toniiɗin oko sinɛkik, nɛtɔ nyɔɔnun eteŋk."

⁴⁶Nɛɓa Yeese tonu kɛ, "Iinak ɓɔrɛ joop sigɔ ɗegerar higi Muuseek duri koy kɔna! Agut sinɔ gaɓɛɛr joopa diil sinɔ ɗili a kir oolɛ a ɓatakirŋɔŋk, ma aasi sɔɔk kiir tukum polpolt noŋk.

⁴⁷"Duri koy kɔna! Agut sinɔ kɛnyarɗɔ piyakɔ joop pɛrkaakoŋk sigɛɓa ɓokootar sɛɛg ɔrɛyak goŋkuk.

⁴⁸Iinak misikiriyɛ sigɔ kɔnyɛɛr ɔrɛyak goŋkuk. Ɓokootarɓa sɛɛk joop pɛrkaakoŋk, nɛ sɔɔk kɛnyari piyakɔ gɛŋk.

⁴⁹Agut sini tonu Waakoyot ɗegerɔɔn nɛɛkɛ kɛ, 'Wosɛyɛɛrakoy sɛɛga joop pɛrkaakoŋk a nomtaanak, nɛkoy ɓokootar ɔgɔɔŋ ma ɔgɔɔka ijaagir rakatɛ.

⁵⁰Agut sini joop eme sinik kɔɔniytaanak agut yɛrom joop pɛrkaakoŋk baŋɛ sinɛɓa ɓuuriiki a tukiɗik saaɓa riiɓeeɗɛ ɗook.

⁵¹A tukiɗi yɛrom Abeelik nɔ mɛlɛɛɗa yɛroma Jakariyaasik sinaanaɓa gupatɗiik nyon uduŋeetoŋk a Godeey sinaanɛ Geetitank kɔɔrk, joop eme sinik kɔɔniyɛkoy sɛɛgiŋ. Tona kɔnaaŋ, joop eme sinik kɔɔniytaanak agut any sini baŋɛ.

⁵²"Iinak joop sigɔ ɗegerar higi Muuseek, duri koy kɔna! Agut sinɔ boŋiirɓa kulpiyɛ tuga ɗegerɔn ɛɛkoŋkuŋ. Kirgiɗɔkoy guugunyɔn ɓaararɗɔ joop sigɛ ɗɛyɛrkɛ guugunyɔnkuŋ."

⁵³Saaɓa Yeese ŋaarɗi saadik, nɛɓa rɔɔriytaanak higi Muuseek a joop Paarisik ɓooyur jɛt. Nɛɓa kɔɔniyar a kɔɔniyɔɔnak ɓɔɔkaaŋ jɛt.

⁵⁴Nɔɓa ijaagirɗi sinik ɗɛyɛrɓa a kaŋir waasiyɛɛkɛ gɛɛnɛk.