Read majang Lukaas 12 Bible Online

Lukaas 12 - majang bible

Lukaas 12

¹Saaɓak tolɗiiɓa joop a ɓɔɔkaaŋ sigɔ ikomɛɛ sɛɛg kumɛɛkɛk, ɓɔɔkaaɓa a diri a torookar ɛkan gɛŋk. Nɛɓa Yeese tuki nɛɛkɛ tonu nomtaanaka gɛɛna kɛ, "In koorɛɛ ɛɛk irsoke joop Paarisik sɛɛn tagay a joop sigɔ mentaanaŋɔŋkuk.

²Any sinɔɓa miinyɛɛŋɔŋk ki dakɛ a koy kɛɛ yaaŋɛɛt. Any sinɔɓa dugɛɛŋɔŋk ki dakɛ a koy kɛɛ ɗegerɔɔn.

³Agut sini any sinɛ toniir nyuugurk baŋɛ tiyɛɛkoy pɛɗɛrkaat. Any sinɛ yɛɛyɛgɛɛr weenta godeey sinɔɔnɛ kortank tonɛɛkoy soodi pɛɗɛɛɗŋɔŋk.

⁴"Iinak sigɛ kɔnu poraak, tona kɔnaaŋ. Kat ɓurɛ joop sigɔ ɓokotur buusɛ dakɛɗa, ma kɛɛ saadi any sinɔ oolɛr a ijaagirk.

⁵Yaaŋa kɔna iɗit sinɛ ɓurɛɛkiŋ Waakoyo sinɛ lak ɓaŋkawuka sinɔ ɓokotɗiiɗ nɛ ori maɗa goopanoŋkuk. Eekeer tona kɔna kɛ in ɓurɛɛ sɛɛn.

⁶Wesiyak a tuul mokoto ɓalɗiiɗɛɛ a tɛm gati nɛɛkɛŋ? Mayakana aasi sɛɛge sinɔ omoŋɔŋk kɛɛ sinɔ monɗi sooy lak Waakoyok.

⁷Ami aasi goŋk ɔɗɔwoŋk baŋɛ ikomtaanak a kɛɛ sinɔ dakɛ omoŋɔŋk. Kat ɓuriikɛɛ, kaalɛɛr wesiyak sigɔ ɓɔɔkaaŋɔŋk.

⁸"Tona kɔnaaŋ kɛkar, iɗit sinɔ waasɛ eet joope taamɛkɛk, waasaakoy ɓɔra sɛɛn Eet sinɛ Tɔɔn Etoŋk taamɛkɛ wosɛytaanak Waakoyotoŋkuk.

⁹Ma, iɗit sinɔ kaaɗɛ eet taamɛkɛ joopoŋkuk, kaaɗakoy ɓɔra sɛɛn taamɛkɛ wosɛytaanak Waakoyotoŋkuk.

¹⁰Iɗit sinɔ waasɛ any sinɔ ŋɛɛwɛnŋɔŋk Toomoy Etoŋk raŋk ŋɔɗurkuɗɛɛkoyŋ, mayakana iɗit sinɔ nyɔɔn Wɛɛŋa sigɔ Geetitaanakik kir kiɗɛkoy toŋoɗ.

¹¹"Saakoy kɔnu diilerɗi joop godeya tolɛɛɗoŋk Ayuuduk, a son lak ɗumaag ɗookak, a son lak suumiyɛɛk, kat ɓakɛyɗiikɛɛ kɛ jumuriikɔɔ jikon maŋk kɛ toniikɔɔ ɛk,

¹²agut sinɔ sayitii saakoyk rɔɔriyarkoy kɔnu Wɛɛŋa sigɔ Geetitaanakik ant sinaanɛ kɔna ɗɛyɛ a waasɛɛrŋɔŋkuŋ."

¹³Joope gɛɛnɛ kɔɔr tonuɓa iɗit omaay Yeeseya kɛ, "Rɔɔriytaano, tonu manya eeta kɛnɔta kaasɛ ɗoo a wori sinɛ ɓatina ŋɔr baabɛɛk."

¹⁴Nɛɓa Yeese tongeeɗ kɛ, "Iin iɗit sini, wooɗ sinɛti ari kɛnɔ pɛrɛda iinakɛ kɔɔrk?"

¹⁵Nɛɓa tonu sɛɛga Yeese kɛ, "In koorɛ ɛɛk! In koorɛ ɛɛk noŋk goltetikent baŋɛ. Moko iɗit beeɗ yaakat ma laŋi wori sinɔ obiiŋɔŋk dakɛɗa."

¹⁶Tonuɓa sɛɛga rɔmɛ kɛkar kɛ, "Lakɛɓa iɗit om sinɔ lak worik, sinɔ lak taawa, sinɔ lak ɗama jɛtik.

¹⁷Nɛɓa iɗit sinɛ koɓu ɓayaay nɛɛkɛ kɛ, 'Agut sinɔte kiiɗɛ nyon sinɔ tolɛɛɗa ɗama naakik, araa jikon?'

¹⁸"Nɛɓa tonu kɛ, 'Araakɔɔ oko sinik. Aala palɛyik sigɛ ɓɛɛlɛrk nɛkɔɔ ijaaga palɛyik ɔgɔ sigɔ bakanyjuŋɔŋk. Nɛkɔɔ gaɓa ɗama naak a ɓolaatuuru gaaŋk baŋɛ saana.'

¹⁹Nɛ tona ɛɛka naaka kɛ, "Tola kɔna wori sinɔ kɔɔna gayɛ a emeyi ɓɔɔkaaŋɔŋk. Sisɔ imiinyik, ɗama, uta, inna yaa!"

²⁰"Yakana tongeeɗ Waakoyot kɛ, 'Iin gaagɛ sini! Ɗɛyɛɛ a kɔɔne boŋɛ wɛɛŋa gooŋk kaalt sineene ɓenysek. Nɛkɔɔ wook wori sinɛkɔ tolun ɛɛka nookaakik?'

²¹"Iɗit sinɔ tolɛ wori ɛɛka nɛɛkaakik, ma taamɛkɛ Waakoyotoŋk kiiɗɛ worik, pedi nɛɛk ɓɛɛlɛ oko sinɛk."

²²Saadi baŋiya tonuɓa Yeese nomtaanaka gɛɛna kɛ, "Agut sini tona kɔnaaŋ, kat ɓakɛyɗiikɛɛ agut beeɗit noŋk kɛ, 'Ɗamiikɔɔ jikon?' maŋk kɛ, 'Kadiikɔɔ jikon?'

²³Agut sinɔ wɛɛŋa kaalɛr ɗama, ma ɛɛk kaalɛ abiyak.

²⁴In dɛnɛɛ sɔɔliilaŋɛ ko. Kir soowuɗit, kir ɗootiɗiit, kir gaɓiit palɛya. Mayakana gije sɛɛg Waakoyot ɗamaŋ. A moko kaalɛɛr teetɔ jɛt?

²⁵Wooɗ sinɛ iinakɛ ɓakɛyɗi nɛ oolɛ a siipiki jeeɗokaata nɛɛka ɗunɗumtan a omoŋɔŋk?

²⁶Ɔkɔn aasi kiir oolɛ ijaag any sini balaaŋɔŋkuŋ, nɛ ɓakɛyɗiikari agut any om agut jikon?

²⁷"In mermenɛɛ makasɛ kɛ ɓɔlɔɔrɛr ɛk. Kir bɔɔlaat ijaag, ɛ kir tɛkɛny abiyak. Yakana tona kɔnaaŋ, Salamoon aasi sinɛɓa lak eemɛyɔn sinɔ obiiŋɔŋk sinɔ ito sinik baŋɛ, kiɓa kadiiɗ abii sinɔ mentanŋɔŋk oko makasɛkɛ sigeege om.

²⁸Ɔkɔn kadiɗi Waakoyot makasɛka ɗookoŋk sigeega dɛnɛɛ sɛɛg ɓeny sineene, makɔɔ alɛ orɛɛ sɛɛg maɗak oko sinikiŋ, anɛ iinak sigi kɔne bitak ŋaadiyɛkik! Ki kɔna kadiɗit a kaalɛŋ ɛk?

²⁹Agut sini kat ɓakɛyɗiikɛɛ a ɗɛyɛɛr kɛ, 'Ɗamiikɔɔ jikon? maŋk kɛ, 'Utiikɔɔ jikon?'

³⁰Joop ɗookoŋk baŋɛ sigɛ kir ɗegerɔɔn Waakoyok ɗɛyɛr ola sigiŋ, mayakana ɗeger Ɓaaɓa noŋk kɛ ɗɛyɛ kɔna ola sigi baŋɛŋ.

³¹In ɗɛyɛɛ burɛ Waakoyotoŋk, siipiɗikkɔɔ kɔna ola sigi ŋayɗiikikiŋ."

³²"Iinak pony sinɛ tɛmŋɔŋk, kat ɓuriikɛɛ agut sinɔ yaakiɗ Ɓaaɓa noŋk dariyoŋk kɛnɔ kɔna gaɓɛ Burɛ nɛɛkŋɔŋk.

³³Any sinɛ latukarik in ɓalɗiiɗɛɛ nɔ gaɓɛɛ sankaanaka. In tolɛɛ wori sinɔkoy ki pediik soodi kiigeeɗ mɛlɛ agaltik soodi kiiɗ ada kuukut dari kosɛ sinɔɔnɛkoy kiiki bɔlɔŋurɔnk.

³⁴Ar ɓayɛ noŋk saadi, arkiɗ wori noŋkuk.

³⁵"In ragadɛɛ ɛɛk ijaaga ɓɛɛnyɔwɛ gɛɛŋk baŋɛ. In ɗaawan noŋk ɗaawuɗ.

³⁶In gayiikɛ a joop sigɔ koorɛr suumi nɛŋk nɔkɔɔ mɛlkiɗ sooy lak wɔɔr waawanoŋkuk. Nɛ mɛlki nɛ kus ɓɔɔkɛyɛ tuga nɛɛk maakɔ ragadir ɛɛk kɛnɔ tayɗigeeɗ sisak.

³⁷Ijaageer sigɔ mɛlki suumi nɛŋk nɛ kus sɛɛg laŋki a kɔ ragadir ɛɛkik geetitaanak. Eekeer tona kɔnaaŋ, ragadi ɛɛk suumi nɛŋk ijaaga nɛ riiɓe sɛɛg nyon ɗamatoŋk. Nɛ widiki ɛɛk nɛ wɔɔrɛ sɛɛgiŋ.

³⁸Ijaageer sigɔ mɛlki suumi nɛŋk kaalt kɔɔr maŋk kaalt kɔɔr goysɔ, nɛ kus sɛɛg laŋki maakɔ ragadir ɛɛkik pɔɔsɛɛ sɛɛgiŋ.

³⁹Mayakana in ɗegerɛ sini, Ɔkɔnkɔ ɗeger ɗuma godeya kɛ mɛlkikɔɔ agalt sayitii woneŋ, nɛ gunkɔ ki dakɛ kɛ many saa tayɛɛɗɛ gode nɛɛkik.

⁴⁰Mɛlkikoy Tɔn Etoŋk sayitii sinɔɔnɛkɔ kiir koɓiiɗik, agut sini in koorɛɛ a ragadkuunɛ ɛɛk."

⁴¹Tonuɓa Petros Yeeseya kɛ, "Suumi naakɛ, tonun rɔmɛ sini eteŋka dakɛɗa maŋk joopa baŋɛ?"

⁴²Nɛɓa Suumii jumur kɛ, "Ijaagen kɛ wooɗ sinɔ ɗeger ɛɛkik ɛ ŋaadɛɛk, sinɛkoy daam suumi nɛɛkɛ ijaageerɛ gɛɛnɛk kɛnɔ sɛɛga gaɓɛ ɗama nɛŋk ɔɔtɛ nɛɛkɛkik?

⁴³Geetitan ijaagen sinɔkoy mɛlki suumi nɛɛkɛ nɛ dɛnɛ a kɔ ijaag oko sinɛkik.

⁴⁴Eekeer tona kɔnaaŋ, daamkoy suumi nɛɛkɛ ijaagen sinɛ wori nɛɛkɛ baŋɛ raŋk kɛnɔ koorgeeɗ.

⁴⁵Mayakana ijaagen sinɛ ɔkɔn koɓu kɛ, 'Kiikikɔɔ suumi naakɛ mɛlɛɛ kɛ gonyuŋ beeɗiirkɔɔŋ', ɛ ɗiŋe ijaageer gɛɛŋk sigɛ moojakik a sigɛ peetakkiŋ, ɛ tuke ɗama a tuu a tɔpɔy oko sinɛ ɗɛyɛɛɗikiŋ,

⁴⁶Ijaagen sinɛ mɛlkikoy suumi nɛɛkɛ ɓeny sinɔɔnɛkɔ ki koɓiiɗik a sayitii sinɔɔnɛkɔ ki koɓiɗik. Goopkoy ijaagen sinɛ a ɓaŋkawuŋ ijaagkoy milki nɛɛk a joop sigɔ kir ŋaadiɗiitik.

⁴⁷"Ijaagen sinɔ ɗeger sekiyɛ suumiyoŋk, nɛ ki ragadɛ ɛɛkik, maŋk ki ijaagɛ sekiyɛ suumiyoŋkuk, goopɛɛkoy a ɓaŋkawuŋ.

⁴⁸Mayakana ɔkɔn laŋkɛ maakɔ ijaag any sinɔ goopaagiɗɛŋɔŋk ma ki ɗegerɔɔn sekiyɛ suumiyoŋkuŋ, goopɛɛkoy a balaaŋ. Iɗit sinɔkan gagiɗɛɛ a obiiŋɔŋk, ɗɛyɛɗɛɛkoy a obiiŋ. Iɗit sinɔkan gagiɗɛɛ adarat a obiiŋɔŋk, koorɛɗɛɛ a obiiŋ.

⁴⁹"Ɗɔkakan saak maɗ ɗooka raŋana, nɛ ɔkɔnta lowu a gorgorŋ gunta yaa jɛt.

⁵⁰Yakana laka aadi rakatɛyoŋk sinɔkɔɔtu aadiiɗɛŋɔŋk, mɛlɛɛɗa nɔkɔɔ dusanɛɛɗɛk ɓakɛyɗiikaaŋ jɛt.

⁵¹Tona kɔnaaŋ, koɓiir kɛ ɗɔkakan yaaka ɗooka raŋana? Ɗɔkakan saak pakakat, ma moko yaaka.

⁵²A tukiɗi sisɔ joop sigɔ tuulk sigɔ atu godeey sinɔɔnɛ omoŋɔŋkuk pakakatiikɔɔŋ, ŋaararkɔɔ sigɛ jiitik sigaagɛ pɛɛyk, ma sigɛ pɛɛyk sigaagɛ jiitik raŋk nɛ kaararŋ.

⁵³Kaararkoy iɗit a tɔɔn nɛɛk sinɔ mooyk, ma tɔɔn sinɔ mooyk a ɛpɛn, ma ɛmɛs a tɔɔn nɛɛk sinɔ peetik, ma tɔɔn sinɔ peetik a ɛmɛs, ma keerɛɛk a keerɛɛk nɛ pakakatiiŋ."

⁵⁴Tonuɓa joopa gɛɛna kɛkar kɛ, "Dɛnɛɛr tiiman goyse ɗiirirgeeɗ waawuyk nɛ toniir kɛ, 'ɛɛkɛkɔɔ ɓenyseŋ.' Nɛkɔɔ ɛɛkɛ eekeerɛ.

⁵⁵Saa yoŋgoyɛɛɗ ɗook goyse ɗiɗikaak, nɛ toniir kɛ, 'Paakɛkɔɔ ɓenyse jɛt.' Nɛkɔɔ ɓɛɛlɛ oko sinɛk.

⁵⁶Iinak, joop sigɔ gayar joop sigɔ mentaanaŋɔŋk! Mermenari ɓɛɛlɛt ɗoo a darik nɛ ɗegerari any sinɛkɔɔ ɓɛɛlɛkiŋ. Nɛ kiir ɗegerɔɔn any sini ɓɛɛlɛ eme sineenek kɛ jikon agut jikon?

⁵⁷"Iinak kiir ɗegerɔɔn any sinɛ gun ijaagiirik agut jikon?

⁵⁸Ɔkɔnna daariɗi gumaaken nookɛ ɛɛni diile higiyaaŋ, nɛ a in atukari gopɛ tak paari a in taakiɗikɛ a gumaaken nook. Ma ɔkɔnkɔɔŋ, puruute kɔɔnu nɛkɔɔnu diile son lak ɔɗɔwenk, nɛ kɔɔnu ɔɗɔwen sinɛ higiyoŋk gaɓɛ amaasiniya nɛkɔɔnu amaasini sinɛ gaɓɛ godeya korkoɗɔɔnoŋk.

⁵⁹Tona naaŋ, kii kinkɔɔ ŋaarin saadi adaktan nɔkɔɔ koyiiɗin taaribɛ sinɛ pedtank."