Read majang Lukaas 13 Bible Online

Lukaas 13 - majang bible

Lukaas 13

¹Saaɓak kurakɓa joop a omoŋ omoŋ son lak Yeeseek, nɛɓa tonurgeeɗ sinɔ kɛ joop Gɛlilaak saaɓa widerkiɗ uduŋeetik nɛɓa ɓokor sɛɛg Pilatoos nɛ repɛ yɛrom nɛŋk a uduŋeet nɛŋkik,

²nɛɓa Yeese jumur sɛɛga kɛ, "Nɛ koɓiir kɛ joop sigi Gɛlilaak laŋirki rakatɛ sini agut sinɔ tikitaanak a kaalɛr joop Gɛlilaak ɔgɔ baŋɛk?

³Moko! tona kɔnaaŋ, Ɔkɔnkɔɔ kirkɔ weerit tikiyɛɛkɛ Waakoyotaŋ, badɛɛrkɔɔ oko sinɛk iinak baŋɛ.

⁴Maɓɔrɛ joop sigɛɓa aarin a tula jiitik sigɛɓa rikitɗiik sɛɛga rektaank Sɛlihoomek nɔɓa rɛrark koɓiir kɛ agut sinɔɓa tikitaanak a kaalɛr joop sigɛ beeɗir Yorsaleemek baŋɛk?

⁵Moko! tona kɔnaaŋ, Ɔkɔnkɔɔ kirkɔ weerit tikiyɛɛkɛ Waakoyotaŋ, badɛɛrkɔɔ oko sinɛk iinak baŋɛ."

⁶Tonuɓa sɛɛga Yeese rɔmɛ sini kɛkar kɛ, "Lakɛɓa iɗit om sinɔɓa waayi kɛɛt bɛlɛɛsik taawoy nɛɛkɛk wɛynik nɛɓa kus kɛnɔ gun laŋiiɗ taamɛ, nɛɓa kɛɛ any sinɔ laŋiɗik.

⁷Nɛɓa tonu ijaagenta sinaana taawak kɛ, 'Weeweriikaakɔ a emeyi jiit kɛnɔgun laŋa taamɛ keet sineene bɛlɛɛsik, yakana kɛɛ any sinɔkɔ laŋiiɗak. Yawuk sisɔ! Boŋu nyon sɔkɔn agut jikon?'

⁸"Nɛɓa sɛŋk jumurgeeɗ kɛ, 'Suumi naakɛ, toŋoɗure eme sineene. Kɔɔwitargiɗakɔɔ tookɛɛta nɛ ijaaggiɗa any sinɔ in ɓɔlɔɔrɛk.

⁹Nɛ ɔkɔnkɔɔ gaɓɛ taamɛ eme sinɔɔnɛŋ, nɛ mentanŋ. Ma ɔkɔnkɔɔ ki gaamitiŋ, nɛkɔɔ yawunŋ.' "

¹⁰Rɔɔriyaaɓa Yeese godeey tolɛɛɗoŋk Ayuuduk omalte wawuy sambatɛyoŋk Ayuuduk.

¹¹Maɓa lakɛ saadi jarti om sinɔɓa sɛɛn ruŋer wɛɛŋa sigɔ somkaanakik a emeyi aarin a tula jiitik. Ruŋɗiiɓa ɓeetɔk gɛɛnɛ nɛ ki oolɛ a ɓɔŋgɔɔrɛ ɛɛkiŋ adaktan.

¹²Saaɓa dɛnɛɛɗ Yeeseek, nɛɓa riyiri nɛ tongeeɗ kɛ, "Iin jarti sini, bɔdukunkɔ goriɗ nookɛkiŋ."

¹³Nɛɓa riiɓeeɗ ari nɛɛk raŋk, nɛɓa sisa ɛtɛ kɛ sɛm nɛ pɔɔsɛ Waakoyo.

¹⁴Nɛɓa ɔɗɔwen sinɛ gode tolɛɛɗoŋk ŋadi agut sinɔɓa Yeese ebɔdiɗiiɗ waawuy Sambatɛyoŋk, nɛɓa tonu joopa gɛɛna kɛ, "Lakɛ wawuyk a tula om sigɔ ijaagɗiikɛ sɛɛgeŋɔŋk. Nɛ in kusɛɛ wawuykɛ sigaagɛ nɔkɔnu kusɛɛ ebɔdɛɛ, ma ki gayɛ waawuy Sambatɛyoŋk."

¹⁵Nɛɓa Suumii jumurgeeɗ kɛ, "Iinak joop sigi gayar joop sigɔ mentaanaŋɔŋk! Iinakɛ kɔɔr, kiikito iɗit omaay woorɛ taŋ nɛɛk maŋk kuroy nɛɛk waawuy Sambatɛyoŋk nyon nɛɛkɛ ɗeegarɔɔnoŋk nɛ diile kɛnɔ ute maawu?

¹⁶Anɛ jarti sini komoy Abrahamuk sinɛɓa korkor setank a emeyi aarin a tula jiitik, moko liki saa woorkuɗɛ sɛɛn korkoɗɔɔn sinaanɛ rakatɛɛɗik waawuy Sambatɛyoŋk?"

¹⁷Saaɓa toniiɗ sinik baŋiya, nɛɓa joop sigɛ ɓooyur sɛɛnik latu keeny. Ma joop sigɛ ɓɔɔkaak yaa sɛɛga agut sɔɔriyɛ sigɛɓa ijaag sɛɛgik baŋɛ.

¹⁸Tonuɓa Yeese kɛ, "Burɛ Waakoyotoŋk gayi a jikon? Maŋk rɔɔmii a jikon?

¹⁹Gayi a iɗit sinɔ boŋu wɛykon kɛ yɛroy nɛ soowɛ taawoy nɛɛkɛkik. Ma saakoy ɓɔlɔɔrɛɗik nɛkoy kaalɛ ŋɔnyi baŋɛ a gayɛ a kɛɛt, nɛ mɛlɛrki teetɔɔk, nɛ kɛnyarɗi wɛykɔk rɛkɛnakɛ gɛɛnɛk."

²⁰Nɛɓa tonu sɛɛga Yeese kɛkar kɛ, "Burɛ Waakoyotoŋk rɔɔmii a jikon?

²¹Gayi a irso sinɔɓa boŋu jarti omaay nɛ gupatɛɛr otiya sinɔɔna ookok jiitik takana. Nɛɓa ari malɛytan nɛɛk a gupuuye baŋɛk."

²²Saadi baŋiya saaɓa Yeese kɛɛɗi Yorsaleemak, nɛɓa rɔririyi raŋan sinɔɔnɛ katamɛɛkoŋk a sinɔɔnɛ mɛndɛrakoŋk.

²³Nɛɓa iɗit omaay widaageeɗ ɛɛk nɛ tongeeɗ kɛ, "Suumi naakɛ, bɔdɛrkoy joop sigɔ tekeriŋɔŋk dakɛɗa?" Nɛɓa sɛŋk tonu sɛɛga kɛ,

²⁴"In paarɛɛ guugunyɔn a ɓaŋkawuŋ tugaat sinaanɛ tokoolŋɔŋk. Tona kɔnaaŋ, ɓɔɔka joop sigɛ paarir guugunyɔn tugaat sineenekiŋ, yakana kikoy sɛɛga gayɛ.

²⁵Saakoy ŋaarɗi ɗuma godeya nɛɛka nɛ koru tuga nɛɛkik baŋiya, nɛkoy ɛtɛɛr walas nɛ tukeer ɓɔɔkɛyɛɛta tuga nɛɛk nɛ toniir kɛ, 'Suumi naakɛ, taya tina.' Yakanakoy sɛŋk jumur kɔna kɛ, 'Kaa ɗegerɔɔn kɛ iinak wooɗak. Kaa ɗegerɔɔn kɛ kurakkɔɔ eet.'

²⁶Saakoyk tonurguɗɔkoy kɛ, 'Ɗamikiiɓa a iin agut omoŋ, utiɗiikiiɓa agut omoŋ, rɔɔriyaakinɓa teteekɛ gaŋkiŋ.'

²⁷Nɛkoy sɛŋk tonu kɔna kɛ, 'Kaa ɗegerɔɔn kɛ iinak wooɗak. Kaa ɗegerɔɔn kɛ kurakɔɔ eet. Iinak tikitaanak, inte wideerɛ ɛɛk.'

²⁸Abraham, a Yisihaak, a Yaykoob, a joop pɛrkaakoŋk baŋɛ dɛnɛɛtaarɔkoy sɛɛg a atu burɛɛ Waakoyotoŋk tak, makoy sɛŋk iinak oriirɛɛ walasa, nɛkoy sisa lakɛ duri a ɗama ŋedakoŋk.

²⁹Kurakkoy joop goyse mɛlkiɗ waawuyk, a goyse ɗiirirgeeɗ waawuyk, a ɗook goyse kantunaak, a goyse ɗiɗikaak, nɛkoy beeɗir nyon ɗamatoŋk burɛɛ Waakoyotoŋk.

³⁰In dɛnɛɛko, joop sigɛ baŋiyeerk ɔgɔ ɔɗɔweerkoy, ma joop sigɛ ɔɗɔweerk ɔgɔ baŋiyeer koy."

³¹Saaɓa joop Paarisik a omoŋ omoŋ wideetarkiɗ ɛɛk son lak Yeeseek nɛ tonurgeeɗ kɛ, "Ŋaari seedi nɔ kɛɛɗin nyona omalta agut sinɔ ɗɛyɛni Herodis ɓokotiita."

³²Nɛɓa Yeese tonu sɛɛga kɛ, "In kɛɛɗɛ tonɛɛ waŋgoya saa kɛ tonanɔ kɛ, 'Ɔɔykakɔɔnɔ ɓenyse makɔɔ ɓɔrɛ alɛ wɛɛŋa sigɔ somkaanakik joope, ɛkɔɔ ebɔda gortaanak, ruumakɔɔ ijaag naak ɗoŋikɛ jiiteene nɛɛkɛk.'

³³Ɓenyse makɔɔ ɓɔrɛ alɛ makɔɔ ŋaara aytinaan Yorsaleema agut sinɔ iɗit pɛrkaakoŋk kikɔɔ rerin nyon omalte Yorsaleeme sɔgɔɔsɔyk.

³⁴"Iin Yorsaleem, Yorsaleem, ɓokootar joop goonɛ joop pɛrkaakoŋk, ɛ baabaalar joop sigɛkan wosɛyɛɛr sɛɛg Waakoyotuk giɗeekɛ ɗɛyaɓa joop katamɛ nɛɛkik tolɛɛɗa agut eger oko sini tolɛɛɗ koogelees nyawukak gɛɛŋk tɔɓɔyikɛ gɛɛnɛkik, yakanaɓa sɔɔk kiirti ɗɛyɛ.

³⁵Agut sini dakɛkoy gode noŋk a ɓɛɛlɛ sɔkɔn. Tona kɔnaaŋ, kiir koyti taanta kɛkar mɛlɛɛɗa nɔkoy tonurɗɔ kɛ, 'Ege iɗit sinɔ kus tiriyaakɛ Suumiyoŋkuk geetitan.' "