Read majang Lukaas 14 Bible Online

Lukaas 14 - majang bible

Lukaas 14

¹Saaɓa Yeese guugunyɗu waawuy Sambatɛyoŋk Ayuuduk omalte waa ɔɗɔwen joop Paarisik om kɛnɔ ɗamiik, nɛɓa joop mermenar jɛt kɛnɔ dɛnɛr any sinɛ ijaagik.

²Lakɛɓa saadi sɛɛne taamɛkɛ iɗit sinɔɓa ŋayor ɛɛk nɛɛkik baŋɛ ɔɔtɛ goriɗoŋkuk.

³Nɛɓa Yeese kɔɔniy rɔɔriytaanak higi Muuseek a joop Paarisik kɛ, "Liki ebɔdɛɛt gortaanakoŋk waawuy Sambatɛyoŋkuk? Maŋk moko liki?"

⁴Nɛɓa sɛɛk dakɛr kɛ many, nɛɓa gaamu Yeese iɗit sinɛ nɛ ebɔdɛ nɛ ŋɔɗuruŋ.

⁵Nɛɓa tonu sɛɛga kɛ, "Iinakɛ kɔɔr wooɗ sinɛ ɔkɔn ɗiirirkiɗ tɔn nɛɛkɛ maŋk taŋ nɛɛkɛ utula waawuy Sambatɛyoŋk, nɛ kiiki boŋiiɗ a gorgorŋɔŋk?"

⁶Nɛɓa sɛɛk kɛɛ any sinɔ jumurar omoŋɔŋk anta sineenak.

⁷Dɛnɛɓa Yeese joop sigɛɓa wɔɔrɛɛk saa daamarɗi nyon beeɗitoŋk eemɛyɔɔnoŋk, nɛɓa sɛɛga tonu rɔmɛ sini kɛ,

⁸"Ɔkɔnnu iɗit omaay riy wɔɔra waawanoŋkuŋ, kat kɛɛɗin beeɗin nyon beeɗitoŋk sinɔɔnɛ eemɛyɛɛŋɔŋk. Ɔkɔnkɔ riyɛ iɗit sinɔ kaalɛ iin eemɛyɔɔnkuŋ,

⁹nɛkɔɔ mɛlki iɗit sinɛkɔ kɔnu wɔɔrɛk nɛna tonu kɛ, 'Toŋoɗu nyon sini eta sineena.' Nɛkɔɔ rikitkin ɛɛk nyona sinɔɔna ar ɗookuk a lakin keeny.

¹⁰Yakana saani riyɗɛɛk, kɛɛɗin dɛnin saan ar ɗookuk nɛ dokuɗe. Nɛ saakɔɔ mɛlkiɗ iɗit sinɛkɔ kɔnu wɔɔrɛk nɛna tonu kɛ, 'Iin piraa naak, wida ɛɛk seena dɔɔsuk nɔ beeɗin.' Nɛkɔɔ sisa eemɛyɛɛni joope sigaagɛ beeɗiir sɛɛg nyon ɗamatoŋkuk baŋɛ taamɛkɛ.

¹¹Iɗit sinɔ ɓɔŋgɔɔrɛ ɛɛk nɛɛk rakaayak arkoy ɗook, ma iɗit sinɔ rikite ɛɛk nɛɛk ɗookak arkoy rakaay."

¹²Tonuɓa Yeese eta sinaanakan wɔɔrɛ sɛɛnik kɛ, "Saa ijaagiiɗin wɔɔr ɗama waawuyoŋk, maŋk ajigeyoŋkuk, kat ŋaadin kɛ nɔkɔɔta jumurar ɔɔtɛ nɛŋk, kat riyin joop sigɛ porunk, a masookoyak, a tekaaneer gooŋk, a joop sigɛ beeɗiir jɔkikentik, a joop sigɔ latu worik.

¹³Mayakana, saa ijaagiiɗin wɔɔrk tiri sankaanak, a joop sigɔ jɔɔlɛytaanak eekeer gɛŋkik, a nyɔŋtaanak, a motak,

¹⁴nɛkoynu geetɛɛŋ. Agut sinɔ joop sigi kirɗi oolɛ ana jumurarŋɔŋk. Jumurɛkoyna masɛ nook saakoy ŋaararkiɗ ret walasa joop sigɛ mentaana taamɛkɛ Waakoyotoŋk."

¹⁵Joop sigɛɓa beeɗir a Yeesee agut omoŋ nyon ɗamatoŋkuk, tiyɛɓa omaay any sini nɛ tonu kɛ, "Iɗit sinɔ ɗami Burɛɛ Waakoyotoŋkuk geetitan."

¹⁶Nɛɓa Yeese tongeeɗ kɛ, "Ijaagɓa iɗit omaay wɔɔr sinɔ obiiŋɔŋk nɛ riy joop a ɓɔɔkaaŋ.

¹⁷Nɛ saaɓa gayɛɛɗ ɔɔtɛ sinɛ wɔɔroŋkuk, nɛɓa wosɛyɛ ijaagen nɛɛk kɛnɔ kɛɛ riyiri konan sigɛkan wɔɔrɛɛk kɛ, 'Ragadɛɛkɔ any baŋɛ. In kusɛɛ.'

¹⁸"Yakanaɓa widerki joop sigɛɓa wɔɔrɛɛk baŋɛ a omoŋ omoŋ ɔɔtɛyɛ gɛŋk sinɔ kɛnɔ in dakɛrk. Nɛɓa tongeeɗ omaay kɛ, 'Ɓalaakɔ ɗoo sise, nɛta ɗɛyɛ a kɛɛɗa dɛnaaŋ. Ŋɔɗakarte.'

¹⁹"Ma omaay tonu kɛ, 'Ɓalaakɔ jeguyatɔk a reptaanak tuul, nɛ kɛɛɗa paara sɛɛgiŋ. Ŋɔɗakarte.'

²⁰"Ma omaay tonu kɛ, 'Agut sinɔ kɔta waawiɗɛŋɔŋk. Kiira mɛlɛ.'

²¹"Nɛɓa ijaagen sinɛ weeriki nɛ kus tonu suumiya nɛɛkaak. Nɛɓa ɗuma sinɛ waak ŋadi nɛ tonu ijaagenta nɛɛka kɛ, 'Ŋaaririn a gorgorŋ katamɛya gopaka sigaaga boobɛrk a sigaaga temetuk nɔ kɛɛɗin ɗɔkun sankaanak, a joop sigɛ jɔɔlɛytaanak eekeer gɛŋkik, a motak, a nyɔŋtaanak.'

²²"Nɛɓa ijaagen sinɛ weeriki nɛ kus tonu suumiya nɛɛka kɛ, 'Suumi naakɛ, ijaagaakɔ any sinɛ kɔta tonunk baŋɛ, yakana in lakɛ nyon sinɔ ŋaaytankiŋ.'

²³"Nɛɓa ɗuma sinɛ waak tonu ijaagenta nɛɛka kɛ, 'Mak gopaka sigaaga kɛɛɗɛ kɛntɛyak, a sigaaga boobɛrk. Nɔ kɛɛɗin ɗɔkun joop sigɛ laŋkink baŋɛ direeɗ nɔ guugunyarkiɗ kɛnɔ enya gode naakɛ.'

²⁴Nɛɓa tonu kɛ, 'Tona kɔnaaŋ, joope sigaagɛkan riyɛɛ sɛɛgik jeemɛk kikoy aasi iɗi sinɔ omoŋɔŋk paariit wɔɔr naak.' "

²⁵Saaɓa joop a ɓɔɔkaaŋ kaarɗi a Yeesee agut omoŋɔŋk, nɛɓa kolɛɛnyɛ sɛɛga nɛ tonu sɛɛga kɛ,

²⁶"Iɗit sinɔ kus son lak eetik, ɔkɔn poru ɛpɛn, a ɛmɛs, a jarti nɛɛk, a tɔɔmɔk gɛɛŋk, a manyaakak sigɛ moojakik a sigɛ peetakik, a aasi wɛɛŋa gɛɛŋk, a kaalɛ eetik, ki gayɛ a nomtan naakiŋ.

²⁷Ki gayɛ eeta iɗit sinɔ ki ragadɛ ɛɛk rakatɛya a reta nɔ nomɛ eeteekiŋ."

²⁸"Iinakɛ wooɗ sinɛ ɔkɔn ɗɛyɛ tɛkɛnya gode giɗeetoŋk, nɛ tɛɛnan jeemɛ ki dokiiɗe nɔ ikomu wori sinɛkɔɔ ruumeeɗ nɔkɔɔ gayɛɗik.

²⁹Ɔkɔn riiɓe ola sigɛ kɛnyiiɗɛɛk ɛ dakɛ a ki tɛkɛny gode nɛɛk nɔ ruumeŋ, nɛ daraayɛr sɛɛn joop sigɛ dɛnɛr sɛɛnik baŋɛ.

³⁰Tonur kɛ, "Iɗit sini tukukɛkɔ tɛkɛny godeyoŋk nɛ ki oolɛ ruumeet nɛɛk.

³¹"Maŋk tapaɗ kɛ wooɗ sinɛ lak amaasiniyɛ a kumɛɛ aarin nɛ ŋaar raŋana kɛnɔ kaarar a tapaɗ om sinɔ kusaageeɗ a amaasiniyɛ sigɔ kumɛɛ ruumer iɗitik, nɛ jeemɛ ki dokiiɗe nɔ ki waasiɗiit kɛ ŋaadi amaasiniyɛ sigɛkiŋ?

³²Ɔkɔn ki oolɛɛŋ, nɛ wosɛyɛ wosɛytaanak gɛɛŋk a in ar suumi sinɛ omaayk a yowɛɛɗiŋ, nɛ kalɛyi taakiyɛ.

³³Oko sinik iinakɛ iɗit sinɔ ki toŋoɗ any sinɛ lakik baŋɛk ki gayɛ a dakɛ a nomtan naakiŋ."

³⁴"Mentan mooyiŋ. Ɔkɔn ki mooyi luuluwukaaŋ, nɛkɔɔ oolɛ a luuluwe kɛkar ɛk?

³⁵Agut sinɔ kiiɗ gayɛ ɗooka taawak, a any sinɔ ari a ɓɔlɔɔrɛr ŋɔnyik, nɛ oriirɛ walasa. Iɗit sinɔ lak weena sinɔ tiiɗiŋɔŋk, in tiyɛɗ."