Read majang Lukaas 15 Bible Online

Lukaas 15 - majang bible

Lukaas 15

¹Ɓeny omalte tolɛrɓa ɛɛk Yeesee tookɛɛta joop sigɔ yayawar worik a tikitaanak kɛnɔ geleewɛr pɛɛniya nɛɛkaak.

²Nɛɓa joop Paarisik a rɔɔriytaanak higi Muuseek laaganyar kɛ, "Boŋu iɗit sini tikitaanak, ɗami aasi a sɛɛg agut omoŋ!"

³Nɛɓa Yeese tonu sɛɛga rɔmɛ sini kɛ,

⁴"Iinakɛ kɔɔr ɔkɔn kɔne iɗit omaay lak jiŋkuyɛ a ɗibɛ, ɛ badɛɛɗ a omoŋ, wooɗ sinɛ ki toŋoɗ sigɛ pɔlpɔlɛ joop aŋank a aarin a tula aŋan teete, nɔ ki ŋaarin nɔ warɛ sinɛkɔ badɛk nɔkɔɔ laŋiɗik?

⁵Saa laŋkiɗik, nɛ ɗɔku tigonant a yaageeɗiŋ,

⁶nɛ jumurku nyaka nɛɛkaak, nɛ riy joop sigɛ porur sɛɛnik a joop sigɛ beeɗir jɔkikentik agut omoŋ nɛ tonu sɛɛga kɛ, 'Laŋakɔ jiŋkuykan naak badɛkiŋ nɛ in kɔna yaa a eet agut omoŋ.'

⁷Tona kɔnaaŋ, oko sinik yaa burɛɛ Waakoyotoŋk agut iɗit sinɔ tikitank sinɔ omoŋɔŋk sinɔ ɗɛygeeɗ a weerik tikiyɛɛkɛ Waakoyotak a kaalɛ joop sigɔ mentaana taamɛkɛ Waakoyotoŋk sigɔ ki ɗɛyɛ sɛɛga a weerik tikiyɛɛkɛ Waakoyotak sigɔ pɔlpɔlɛ joop aŋank a aarin a tula aŋank.

⁸"Maŋk jarti sinɔ lak taaribɛyɛ workeyoŋk a aarink. Ɔkɔn badɛɛɗi a omoŋ, jarti kɛ wooɗ sinɛ ki idaawit any sinɔ ɗaawuŋɔŋk nɔ ki gaalɛ gode nɛɛk jɛt nɔ ki wariit nɔkɔɔ laŋiɗik?

⁹Saa laŋiɗik, riy joop sigɛ porur sɛɛnik a joop sigɛ beeɗir jɔkikentik agut omoŋ nɛ tonu sɛɛga kɛ, 'Laŋaakɔ taaribɛ naak workeyoŋk kante badɛkiŋ, nɛ in kɔna yaa a eet agut omoŋ.'

¹⁰Tona kɔnaaŋ, oko sinik yaa taamɛkɛ wosɛytaanak Waakoyotoŋkuk agut iɗit sinɔ tikitank sinɔ omoŋɔŋk sinɔ weeriki tikiyɛɛkɛ Waakoyotak."

¹¹Tonuɓa sɛɛga Yeese kɛkar kɛ, "Lakɓa iɗit omaay tɔɔmɔk a pɛɛy.

¹²Nɛɓa sinɛ tɛmk tonu ɛpɛna kɛ, 'Baabɛ, gaɓta worii nookɛ ɔɔtɛ naak.' Nɛɓa ɛpɛna kaasɛ wori nɛɛk tɔɔmɔka gɛɛnaakiŋ.

¹³"Nɛɓa ɗoŋikɛ sigɔɔgɛ tekeriŋɔŋk baŋiya, tɔn nɛɛkɛ sinɛ tɛmk boŋu ɔɔtɛ nɛɛk baŋɛ nɛ ŋaar ɗooka sinɔɔna yowɛɛɗŋɔŋk. Nɛɓa saadi kɛɛ sɔɔkɛ wori nɛɛk baŋɛ sɔkɔn.

¹⁴Nɛ saaɓa ruumeeɗ wori sinɛɓa lakik baŋɛk, nɛɓa lakɛ ŋaawu sinɔ ɓaŋkawuŋɔŋk ɗook sinaanɛ baŋɛ. Nɛɓa sɛŋk guuguny rakatɛya.

¹⁵Nɛɓa wideer ɛɛk eta omalta sinɔɔna nyak nɛɛk ɗook saak, nɛɓa iɗit sinɛ wosɛyɛ taawa nɛɛka kɛnɔ irgeeɗ kuturɛ.

¹⁶Nɛɓa aasi tɔn sinɛ ɗɛyɛ ɗamata taamɛ kɛɛnoŋk sigɛ ɗamar kuturɛ gɛɛnɛkik. Nɛɓa aasi kɛɛ iɗit sinɔ gageeɗ any sinik.

¹⁷"Nɛɓa weeriki son lak koɓi nɛɛkik nɛ tonu kɛ, 'Ɗamar ijaager baabɛɛk kiiwu nɔ ŋayɗiiki sɛɛge, ma saak rɛɛra ŋaawu seedi.

¹⁸Gundɔɔ ŋaara waa baabɛɛkiŋ nɔ kɛɛɗa tonguɗa kɛ, "Baabɛ, tikiɗiikakɔ Waakoyote a iine taamɛkɛ.

¹⁹Seedi son ki gayɛ ati riyɛ kɛ tɔɔn nookkuŋ. Ikomutu a ito eet ijaagen nook om.'

²⁰"Nɛɓa ŋaar nɛ kɛɛ son lak ɛpɛnik. "Nɛɓa dɛnɛɛr ɛpɛna a in ar a yowɛɛɗiŋ nɛ sanɗigeeɗiŋ. Nɛ reerirgeeɗ, nɛ kɛɛ gaamku kokoma nɛ samɓoyŋ.

²¹"Nɛɓa tɔn nɛɛkɛ tongeeɗ kɛ, 'Baabɛ, tikiɗiikakɔ Waakoyote a iine taamɛkɛ, nɛɓɔ seedi son ki gayɛ ati riyɛ kɛ tɔɔn nookkuŋ.'

²²"Yakanaɓa ɛpɛna tonu ijaageera gɛɛna kɛ, 'In kɛɛɗɛɛ a gorgorŋ nɔ kɛɛɗɛɛ ɗɔkɛɛ abii sinɛ mentan sɛɛge baŋɛk, nɔ gagiɗɛɛ ɛɛka ɛ gagiɗɛɛ kati pɔlpɔlta ɛ gagiɗɛɛ saamɛyɛ deraka.

²³In kɛɛɗɛɛ ɗɔkɛɛ tɔɔn sinɛ taŋoŋk mooyk gɔɔnŋɔŋk, nɔ kusɛɛ ŋɔɔlɛɛ, nɔ ɗamikii ɛ in tina yaa.

²⁴Rɛrgunkan Tɔn naak siniŋ, nɛɓɔ bɔdɛ sisɔŋ. Badikɛɛkanŋ, nɛkɔɓɔ laŋɛɛŋ.' Nɛ sɛɛga saadi yaaŋ.

²⁵"Arɓa tɔn sinɛ bɔɔlɔŋk ɔɔtɛ sinaanɛ taawoy. Saaɓa weerikiɗik nɛ saaɓa wɔɔŋkuɗ waak, nɛ tiyki koŋgoy iiliyakoŋk a duubiyeetoŋk.

²⁶Nɛɓa sɛŋk riyiri ijaageerɛ gɛɛnɛ om nɛ kus kɔɔniy kɛ, 'Ege sini jikon?'

²⁷Nɛɓa tongeeɗ ijaagen sinɛ kɛ, 'Mɛlkikɔ masookoy. Nɛ agut sinɔkɔ mɛlkiɗi bɔdɛɛɗik, nɛkɔ ɓaaɓa ŋɔɔlgeeɗ tɔɔn taŋoŋk sinɛ mooyk gɔɔnŋɔŋk.

²⁸"Nɛɓa manya sinɛ bɔɔlɔŋk ŋadiŋ aɓa kiɗɛyɛ a guuguny godeyaŋ. Nɛɓa ɛpɛna ŋaarki walasa nɛ kalɛyi kɛnɔ guuguny.

²⁹Nɛɓa sɛŋk jumur ɛpɛna kɛ, 'Ijaagɗika kɔna a emeyi ɛtɛr oko sinik a ito eet laaŋoyen, kɛɛ sekiyɛɛkɛ sinɔ omoŋɔŋk sinɔkɔ sɔɔkaak. Nɛ seŋk aasi kinkɔta gaamit tɔɔn kemtoŋk a omoŋ kɛnɔta yaa eet a joop sigɛti porurk.

³⁰Mayakana tɔɔn nook sini kɛɛkɔ sɔɔkɛ wori nook sɛɛn a ruunykaanak, nɛ mɛlki nɛ kusun ŋɔɔlguɗun tɔɔn taŋoŋk sinɛ mooyk gɔɔnŋɔŋk.'

³¹"Nɛɓa tongeeɗ ɛpɛna kɛ, 'Tɔn naakɛk, iin a eet ɓɛɛnyɔwɛ gɛɛŋk baŋɛ, ege any sinɔ naakik baŋɛ nook.

³²Ɗɛyɛ a tina yaa jɛt agut sinɔ masookoy sini rɛrgunkan, nɛ bɔdɛŋ. Badɛɛkanŋ, nɛkɔɓɔ laŋɛɛŋ agut sini ɗɛyɛ a tina yaa jɛt."'