Read majang Lukaas 21 Bible Online

Lukaas 21 - majang bible

Lukaas 21

¹Ɓɔŋgɔɔrɛɓa Yeese ɛɛk nɛ dɛnɗiir nɛ dɛnɛɛr joop sigɔ latu worik a gaɓɛɛtar tigi sanduka sinaana gagaɓguɗɛ tigi Gode sinɛ Geetitank takana.

²Nɛɓa ɓɔrɛ dɛnɛɛr jarti om sinɔ sankank sinɔɓa rɛr baabuy nɛɛkɛŋɔŋk a gaɓɛɛr taaribɛyɛ a pɛɛy sanduka sinaana gagaɓiigɗɛɛk takana.

³Nɛɓa Yeese tonu sɛɛga kɛ, "Eekeer tona kɔnaaŋ. Jarti sini sankank sinɔɓa rɛr baabuy nɛɛkɛŋɔŋk gaɓɛkɔ a kaalɛ joop baŋɛ.

⁴Agut sinɔ gaɓɛrkɔ joop ɔgɔɔk sinɛkɔ ŋayɗiiki wori nɛŋkik, ma sɛŋk sɛɛn sankan nɛkɔ gaɓɛ sinɛ lakik baŋɛ a kɛɛ sinɔ ŋɔrk."

⁵Joop a omoŋ omoŋ totoniɓa kɛ, "Gode sini Geetitank mentanŋ. Ŋaɗɛɛkan giɗeekɛ sigɔɔgɛ eemɛyɛŋɔŋk a olaatɛ sigɔɔgɛkan gaɓɛɛ a tigi Waakoyotak."

⁶Nɛɓa Yeese tonu kɛ, "Ola sigi dɛnɛɛrik baŋɛ mɛlkikoy ɔɔtɛ sinɔkoy kiiɗi giɗeet dakɛ giɗeet raŋk a kir aalɗiitikiŋ."

⁷Nɛɓa sɛɛk kɔɔniyar kɛ, "Rɔɔriytaano, gayɛkoy sini okoɗ? Sinɛkoy ɗegerɗii kɛ wɔɔŋku ɔɔtɛ nɛɛkɛŋɔŋk yaaŋtan nɛɛk jikon?"

⁸Nɛɓa sɛŋk jumur sɛɛga kɛ, "In koorɛɛ ɛɛk kɛnɔ mokoy badɛɛriɗ. Mɛlɛrkikoy joop a ɓɔɔkaaŋ tiriyaakɛ gaanɛɛk kɛ, 'Eet Keresee. Ɔɔtɛ nɛɛk wɔɔŋkuŋ.' Yakana iinak kat nomɛɛ joope sigaagɛ.

⁹Saakoy tiyɛrɗɔ ɔɔtɛ kaarinoŋk a any sinɔ ŋɛɛwɛnŋɔŋkuk, kat ŋaatɛ. Ege sini any sinɔ ɗɛyɛ a tɛɛnan jeemɛ ɓɛɛlɛŋɔŋk, yakanakɔ kigayɛ pedtan nɛɛkɛ sise."

¹⁰Tonuɓa sɛɛga Yeese kɛ, "Ŋaararkoy joop joope raŋk, a maŋgisti maŋgistii raŋk.

¹¹Lakɛkoy yike ɗookoŋk sinɔ obiiŋɔŋk, lakɛkoy nyonitaakɛ ŋaawu a gori, dɛnɛɛkoy ola sigɔ ɓurɛɛŋɔŋk a sɔɔriyɛ sigɔ boobɛrŋɔŋk dari.

¹²"Mayakana a in ki gayɛ sini, gaagamarkoy kɔnu joopuŋ epapayarkoy kɔnuŋ. Gaɓɛrkoy kɔnu godeya tolɛɛɗoŋk Ayuuduk a godeya korkoɗɔɔnoŋk. Diilerkoy kɔnu son lak tapa a ɗumaag ɗookak agut tiriya gaaŋk.

¹³Kɛnɔ waasɛɛr agut eet, ege kɔna sini milki sinɔ mentanŋɔŋk.

¹⁴Agut any sinɛ kɔna daariɗigiɗɛɛk, kat tɛɛnan jeemɛ ɓakɛyɗiikari kɛ, 'Jumuriikɔɔ jikon?',

¹⁵agut sinɔ gaɓaakoy kɔna pɛɛni a ɗegerɔn sinɔ kɛɛ iɗit sinɔ oolɛ a lɔsɛ a palamɗiik.

¹⁶Gaɓɛrkoy kɔnu ɓaaɓakak, a ŋaaŋakak, a masookoyak, a tekaaneer, a saakomak goŋk. Ɓokootɛkoy kɔne joop ɔgɔɔŋ.

¹⁷Ɓooyurkoy kɔnu joop baŋɛ agut tiriya gaaŋk.

¹⁸Yakana amun noŋk ɔɗɔwoŋk aasi a omoŋ ki badɛ.

¹⁹Baŋkaawurarkoy oolaan, nɛ ebɔdɛɛr wɛɛŋa goŋk.

²⁰"Ɔkɔnkɔɔ dɛnɛɛr Yorsaleem a tookɛr amaasiniyɛk sigɔ gumakeerk, in ɗegerɛ kɛ wɔɔŋku badɛ nɛɛk.

²¹Saakoyk joop sigɛ atu Yuudaakek in koy gonar kurkumɛɛka, joop sigɛ atu katamɛɛk takik in koy ŋaararki saadi, joop sigɛ atu kɛntɛɛk katkoy kaar katamɛya.

²²Kɛnɔ dusanɛɛ pɛrka sigɛɓa taapɛɛk baŋɛ, ege sini ɔɔtɛ tiijeetoŋk a goopanoŋk.

²³Saakoyk duri koy joopa sigaaga laki amtunɛk a joopa sigaaga ŋeŋeetunuk. Agut sinɔ lakɛkoy ɗook raŋk rakatɛ sinɔ obiiŋɔŋk, mɛlkikoy goopan joopa sigeega ɓɔɔkaaŋɔŋk.

²⁴Ɓokootɛkoy sɛɛge a ɓɔɔkaaŋ aarɛɛkɛ, makoy ɔgɔ gaagamɛ sɛɛg nɛ diilɛ sɛɛg ɗokanɛka baŋɛ. Nɔkoy dusanɛɛɗɛ eme joop sigɔ moko Ayuuduk torokɛkoy Yorsaleem joope sigɔɔgɛ moko Ayuuduk."

²⁵"Dɛnɛɛkoy sɔɔriyɛ waawuy, a eye, a maryɔɔkɛ. Joop sigɛ atu ɗook raŋk baŋɛ ɓuriikoy a sanɗi agut ɗooran gɔrɔ sinɔ obiiŋɔŋk a apaniyoŋk.

²⁶Ɓuriikoy joop a koorɛr kɛ mɛlkikɔɔ ɗooka raŋana jikon, agut sinɔ yikiɗiikoy ɓaŋkawukaatak dariyoŋk.

²⁷Dɛnɛɛkoy Tɔɔn Etoŋk saakoy mɛlkiɗi gumoy tak ɓaŋkawukaat sinɔɔnɛ obiiŋɔŋk a eemɛyɔɔnkuŋ.

²⁸Saakoy sɔɔk dɛnɛrɗɔ a tukɛɛ dusanɛɛta ola sigik, in ɛtɛɛ kɛ sɛm in ɓɔŋgɔɔrɛɛ ɛkan goŋk rakaaya agut sinɔ wɔɔŋkuɗ bɔdɛ noŋkuk."

²⁹Tonuɓa sɛɛga rɔmɛ sini kɛkar kɛ, "In mermenɛɛ kɛɛt kɛ bɛlɛɛs, a kɛɛn ɔgɔ.

³⁰Saa reyɛrɗi peeŋɔk gɛɛnɛkik, nɛ ɗegerari kɛ wɔɔŋku maato.

³¹Ɛɓɔrɛ saakoy dɛnɛrɗɔ a dusanɛɛ ola sigiŋɔŋk, in ɗegerɛ kɛ wɔɔŋku Burɛ Waakoyotoŋk.

³²"Eekeer tona kɔnaaŋ, kirkoy ɗoyi joop eme sinik mɛlɛɛɗa nɔkoy dusanɛɛɗɛ ola sigi baŋɛk,

³³Ɗoyurkoy ɗook a dariŋ, mayakana pɛɛni naak kikoy ɗoyi adaktan.

³⁴Tonuɓa Yeese kɛkar kɛ "In koorɛɛ ɛɛk kɛnɔ kat bɔɔla ɓayɛtun goŋk, ɗamat a tuut sinɔɔnɛ boobɛŋɔŋk, a tɔpɔy a sɔɔkiyɛ a beeɗiit ɗookoŋk. Ma ɔkɔn koyŋ mɛlkikoy kɔna ɓɛɛnyɔ sinɛ a gorgorŋ a ito goomoy.

³⁵Agut sinɔ joop sigɛ atu ɗook raŋk baŋɛ gooɗkoy sɛɛg a gorgorŋ.

³⁶Agut sini in ɓaŋkaawurɛɛ, a ɗanɗamaakɛɛŋ ɓɛɛnyɔwɛ gɛɛŋk baŋɛ kɛnɔkoy laŋiir ɓaŋkawuka sinɔkoy bɔdɛrɗɔ ant sinɔɔnɛ ŋɛɛwɛnŋɔŋk sinaanɛkoy mɛlkik, ɛ kɛnɔkoy oolɛɛr ɛtɛɛ taamɛkɛ Tɔɔn Etoŋkuk."

³⁷Rɔririyiiɓa Yeese wawuykɛ Godeey sinaanɛ Geetitank, ma ajigeyɛkɛ kɔtɔtɔŋ kurkuma sinɔɔna riyɛ kɛ Dɛbirɛ Jɛytik nɛ ɗeegarŋ.

³⁸Gibibiyarkiɓa joop baŋɛ Godeya sinaana Geetitank son lak sɛɛnik kɛnɔ geleewɛrgeeɗ.