Read majang Lukaas 24 Bible Online

Lukaas 24 - majang bible

Lukaas 24

¹Boŋurɓa jartiyatɔ sigɛɓak reyaay sinɛɓa ragadirk, nɛ kaar romiɗ kuleet waawuy Sambatɛyoŋk saana lak pii nɛɛkik.

²Nɛɓa kaar laŋirki giɗee nɛɛk a kɔ girgiɗiik pii nɛɛkɛ adiŋ.

³Saaɓa guugunytarkiɗ takanak, nɛɓa kir laŋiiɗ buusɛ Suumi Yeeseek.

⁴Saaɓa sɛɛga kiiɗ mɛlɛ ɔɔtɛ nɛɛkɛkik, nɛɓa a gorgorŋ ɛtɛr sɛɛge jɔk joop a pɛɛy sigɔ latu abiyak sigɔ nyaalɛr jɛtik.

⁵Nɛɓa jartiyatɔk sigɛ ɓuri nɛ dakɛɛtar ɗooka. Nɛ joop sigɛ tonur sɛɛga kɛ, "Warɛɛr Yeesee sinɔ bɔdtank joope sigɔɔgɛkan rɛrarŋɔŋk kɔɔr agut jikon?

⁶Kɛɛ ara seedi! Ŋaarkikɔŋ! In koɓukɛɛ any sinɛkan kɔna tonu saakan arkiɗ Gɛlilaakeek,

⁷tonukan kɛ, 'Ɗɛyɛ Tɔɔna Etoŋk a kɔɔ gaɓɛɛ ariita tikitaanakoŋk, a kɔɔ laalawɛɛ, nɛkɔɔ ŋaarki ɗoŋikɛ sigɔɔgɛ jiitik ret walasa.' "

⁸Nɛɓa jartiyatɔ sigɛ sisa koɓurku pɛɛni sinɛ.

⁹Weeriikɓa jartiyatɔ sigɛ saadi lak pii nɛɛkik nɛ kurak tonur any sini baŋɛ nomtaanaka sigaaga aarin a omoŋɔŋk a joopa ɔgɔɔka baŋɛ.

¹⁰Joop sigɛɓa tonur any sini nomtaanakaak Maariyam Mɛgdooluk, a Yohaana, a Maariyam, ɛmɛs Yaykooba, lakɛɓa ɓɔrɛ jartiyatɔk sigɔɓa sɛɛg a sɛɛg agut omoŋɔŋk.

¹¹Yakanaɓa sɛɛg any sinɛ sɛɛga tonur jartiyatɔ sigɛk koɓur kɛ nyon, nɛ kir ŋaadiit.

¹²Yakanaɓa Petros ŋaar nɛ reeri saana lak pii nɛɛkik. Nɛɓa mɛlɛ nɛ ruuɗe ɛɛk nɛ guugunyur utula nɛɛka nɛ dɛnɛɛr abii sinɛ kɛwukɛwuŋɔŋk sinɛɓa ɓuwuɗɛɛ buusɛ nɛɛkik dakɛɗa. Nɛɓa weeri nyaka nɛɛka a reemɗi ɓayɛ nɛɛkɛ agut any sinɛ ɓɛɛlɛk.

¹³Ɓeny sinaanɛɓak nomtaanakɛ Yeeseek a pɛɛy kaarɓa Eemawusa. Eemawus mɛndɛr sinɔ ar soodi yowɛrka nɛɛkɛ Yorsaleeme kiilo meetera aarin a omoŋɔŋk.

¹⁴Waasiɗiiɓa sɛɛk ɛkanɛɛkɛ gɛŋk agut any sinɛkan ɓɛɛlɛ baŋɛk.

¹⁵Saaɓa tonɗiiɗik ɛ mermenarɗik, nɛɓa Yeese wideer ɛɛk nɛ ŋawiiter a sɛɛg agut omoŋ.

¹⁶Yakanaɓa sɛɛk dɛnɛr nɛ kir ɗegerɔɔn kɛ wooɗ, agut sinɔɓa miinyɗiiɗ taamɛ gɛŋkik.

¹⁷Nɛɓa sɛŋk tonu sɛɛga kɛ, "Jikon sinɛ waawasari ɛkanɛɛkɛ goŋk oko sinik ma atukari ŋawit gopan takank?" Nɛɓa sɛɛk sanɗi nɛ ɛtɛr kɛ many.

¹⁸Sɛɛge om iɗit sinɔɓa riyɛ kɛ Kɛlɛyoopaak, tongeeɗɓa kɛ, "Ɗoŋikɛ sigeege any sinɛkɔ ɓɛɛlɛ seedi Yorsaleemek kin ɗegeeraat iin dakɛɗa?"

¹⁹Nɛɓa sɛŋk tonu sɛɛga kɛ, "Jikon any sinɛkɔ ɓɛɛlɛk?" Nɛɓa sɛɛk jumurargeeɗ kɛ, "Any sinɛkɔ ijaagɛɛ Yeesee Naajreetik raŋk. Sɛɛnkan sɛŋk iɗit pɛrkaakoŋk sinɔkan ɓaŋkaawur pɛɛnii a ijaag Waakoyote a joope baŋɛ taamɛkɛk.

²⁰Yakana ɔɗɔweer tapa ŋaadiyɛɛkoŋk a suumiyɛ gaŋk gaɓɛrkan pirdiya retoŋk, nɛ laalawarŋ.

²¹Ma seek eteŋk joop Israeelik ŋaadiikan kɛ ebɔdɛkoy tin sɛɛn. Yakana sinɛkɔ ijaagiiɗɛɛ any sinik ege ɓenyse ɗoŋ jiit.

²²Maɓɔrɛ reemɗi tin ɓayɛtun agut jartiyatɔk a omoŋ omoŋ sigɔ atu eteŋkɛ kɔɔruk, kaarkɔ kuleet saana lak pii nɛɛkik,

²³yakanakɔ kir laŋiiɗ buusɛ nɛɛk weerikikɔ nɛ tonur kɛ, "Dɛniikɔ wosɛytaanak Waakoyotoŋk sigɔ tonur kɛ ɓɛɛlɛ wɛɛŋakɛɛk."

²⁴Eteŋkɛ joop a omoŋ omoŋ kaarkɔ saana lak pii nɛɛkik, nɛ kaar laŋirki a ɓɛɛlɛ oko sinɛkɔ tonurɗu jartiyatɔ sigɛk. Yakanakɔ kir taanta Yeesee."

²⁵Nɛɓa Yeese tonu sɛɛga kɛ, "Iinak sigi kiir koɓiitik a sigi gaalaakari ant sinaanɛɓa tonur joop pɛrkaakoŋkuk!

²⁶Ki ɗɛyɛɛ Kereseya a laŋk rakatɛ sini a guugunyɔn eemɛyɔɔna nɛɛkaakik?"

²⁷Kɔnyɛɗɓa sɛɛg any sinɛɓa taapɛɛ Wargatɛɛ Waakoyotoŋk baŋɛ agut sɛɛn a tukiɗi Muusee a joope pɛrkaakoŋk baŋɛk.

²⁸Saaɓa woontukuɗ mɛndɛra sinaanaɓa kaargeeɗik, nɛɓa koɓɛɛ kɛ ɗoyukɔɔ Yeese a gopan,

²⁹yakanaɓa sɛɛk kaaɓur a ɓaŋkawuŋ kɛ, "Kɔjururuŋ ɗiirirkɔ waawuy nɛɛkɛkiŋ, koy ɗeegarii a eteŋk." Nɛɓa guuguny godeya kɛnɔ ɗeegarar a sɛɛg.

³⁰Saaɓa beeɗirɗi a sɛɛg agut omoŋ nyon ɗamatoŋkuk, nɛɓa ɓɔŋgɔɔrɛ kiiwu nɛɛk, nɛ geetiŋ nɛ ŋapati nɛ gaɓɛ sɛɛgaŋ.

³¹Nɛɓa sisa ɓuukiɗi taamɛ gɛɛŋk, nɛ ɗegerar kɛ sɛɛn Yeesee. Nɛɓa sɛŋk dugiɗi sɛɛgeŋ.

³²Nɛɓa sɛɛk tonur ɛkanɛɛkɛ gɛŋk kɛ, "Mokoto arkii gopɛ tak nɛkɔ tina waawasi nɛ wooru Wargatɛ Waakoyotoŋk nɛ tin kɔnyɛɛɗ nɛ tin moɗi ɓayɛtun a ito maɗ?"

³³Ŋaararɓa sayitii sinaanɛ nɛ weeri Yorsaleema. Nomtaanak gɛɛŋk sigɛ aarin a omoŋɔŋk a joop sigɛɓa sɛɛg a sɛɛn agut omoŋɔŋk. Laŋirkiɓa sɛɛg saadi a kɔ tolɗi agut omoŋ.

³⁴Tonurɓa sɛɛk nomtaanak sigɛ aarin a omoŋɔŋk kɛ, "Ŋaarkikɔ Suumii eekeerɛ! Yaaŋɛkɔ ɛɛk Simionaaŋ."

³⁵Nomtaanak sigɔ pɛɛyk waasɛrɓa sɛɛga any sinɛkan ɓɛɛlɛ gopɛk a sinɛɓa ɗegerarɗi Yeesee saakan ŋapatiiɗ kiiwu nɛɛkik.

³⁶Saaɓa atukuɗ waasiyɛɛkɛ any sinik, nɛɓa Yeese ɔɗɔwa nɛɛka sisa ɛtɛ sɛɛge kɔɔr nɛ tonu sɛɛga kɛ, "Digoy kɔna!"

³⁷Yakanaɓa sɛɛk koɓurkɛ dɛnɛr wɛɛŋa, nɛ ɓuriiŋ jɛt.

³⁸Nɛɓa sɛŋk tonu sɛɛga kɛ, "Ɓuriikari agut jikon? Latukari ɓayɛtun nɛɛkɛ goŋk koɓiɗak a pɛɛy agut jikon?

³⁹In dɛnɛɛ arin gaaŋk, a derak gaaŋk nɔ ɗegerɛɛ kɛ eet. Inti kumɛɛ nɔtu dɛnɛɛ oko sini dɛnɛrɗɔ eeteek, kɛɛ wɛɛŋakɛ buusɛ a ɛmɛɛk."

⁴⁰Tonu oko sinɛk nɛ yaaŋɛ sɛɛga arin gɛɛŋk a derak gɛɛŋk.

⁴¹Agut sinɔɓa sɛɛga yaakiɗ, ɛ ŋaatirɗiŋɔŋk, nɛɓa tɛɛnan kir ŋaadiit. Nɛɓa Yeese kɔɔniy sɛɛg kɛ, "Latukari any sinɔ ɗamɛŋɔŋk sinɔ balaaŋɔŋkuŋ seediiŋ?"

⁴²Nɛɓa sɛɛk gaɓɛrgeeɗ olt sinɔ tɛmŋɔŋk sinɔkan tuujɛɛŋɔŋk.

⁴³Nɛɓa sɛŋk boŋu nɛ ɗam sɛɛge taamɛkɛ.

⁴⁴Nɛɓa sɛŋk tonu sɛɛga kɛ, "Saakan eet a iinakik pɛɛni naak sinɛkan kɔna tona kɛ any sinɛɓa taapɛɛ Higii Muuseek, a Pɛrkaakɛɛk, a Iiliyakɛɛk ɗɛyɛ a dusanɛɛŋɔŋk. Sɛɛn sini."

⁴⁵Saadi baŋiya ɓuukeɓa kalbiyɛ gɛŋk kɛnɔ oolɛr gaamit Wargatɛ Waakoyotoŋkuk.

⁴⁶Tonuɓa sɛɛga kɛ, "Taapɛɛɓa Wargatɛɛ Waakoyotoŋk kɛ, 'Laŋkikoy Kerese rakatɛ, ŋaarkikoy ret walasa ɗoŋikɛ jiiteene nɛɛkɛk.

⁴⁷A tukiɗi Yorsaleeme waasɛɛkoy weerɛɛt tikiyɛɛkɛ Waakoyotak a ranyjɛɛt tikiyɛɛkoŋk joopa baŋɛ tiriyaakɛ gɛɛnɛk.'

⁴⁸Ɗegerari any sini baŋɛ sɔɔk.

⁴⁹Sisɔ wosɛykaakɔɔ kɔna any sinɛɓa kuumɗigeeɗ Baabɛɛkiŋ. In beeɗikuunɛɛ katamɛɛ Yorsaleemuk, mɛlɛɛɗa nɔkɔɔ kɔna gakiɗɛ ɓaŋkawuka darikk."

⁵⁰Saadi baŋiya diileɓa sɛɛg mɛlɛɛɗa Bitaniyaaka, ɓɔŋgɔɔrɛɓa arin gɛɛŋk, nɛ geeti sɛɛgiŋ.

⁵¹Aɓa geeget sɛɛgiŋ, nɛɓa pakat sɛɛge ɛɛk nɛ ŋaar dariya.

⁵²Nɛɓa sɛɛk ugumergeeɗiŋ, nɛ weeri Yorsaleema yaakaat sinɔɔnɛ obiiŋɔŋk.

⁵³Atuɓa Godeey sinaanɛ Geetitank ɓɛɛnyɔwɛ gɛɛŋk baŋɛ a pɔɔpɔsar Waakoyo.