Read majang Lukaas 3 Bible Online

Lukaas 3 - majang bible

Lukaas 3

¹Saaɓa ege Tiibariyoos Keesaar suumik emeyikɛ aarin a tuule nɛɛkɛ, egeɓa Pentenawi Pilatoos suumi ɗoo Yuudaak, maɓa ege Herodis suumi ɗoo Gɛlilaak, maɓɔrɛ manya Pilipoos Ituriyaasa Tirakonidosuk, maɓɔrɛ Lisaniyoos suumi Abilaniisik,

²ma Haana a Kɛyaapaa sɛɛg ɔɗɔweer tapa ŋaadiyɛɛkoŋk sigɛ boobɛrk. Saaɓak mɛlkiɓa pɛɛni Waakoyotoŋk tɔɔna Jakariyaasik, Yowanisa, ma ar paaton.

³Kɛɛɓa sɛŋk ɗokanɛka sigaaga atu sinɔɔnɛ Gɔrɔ Yordanoosuk baŋɛ, a waawas joopa kɛ, 'In kɔnu aadɛɛ nɔ weerikɛ tikiyɛɛkɛ Waakoyota, nɔkɔɔ laŋiir tɔŋɔɗ tikiyɛɛkoŋk.'

⁴Oko sinɛɓa taapɛɛɗɛɛ Wargatɛɛ Waakoyotoŋk, ete pɛrkaakoŋk Isaayasik kɛ, "Ege sini koŋgoy iɗit sinɔ oo'oy sinɔɔnɛ paatoonoŋk kɛ, 'In isiisɛɛ gopan Suumiyoŋk, in kekemɛ gopan nɛɛk.

⁵In enyɛɛri saagiyak ɓɛɛlɛr a utulakik baŋɛ, in isiisiɗi kurkumɛk a jumkuk baŋɛ nɔ ɓɛɛlɛ a teete. In kemɗi gar sinɛ ruruŋaak, in dortootur gopan sinɛ ŋasakawuk.

⁶Dɛnɛrkoy joop baŋɛ ebɔdɛɛt Waakoyotoŋk."'

⁷Tonuɓa Yowanis joopa sigaagaɓa kurak son lak sɛɛnik kɛnɔ aadi sɛɛgik kɛ, "Iinak sigi ito iinak kookowɛɛk! Wooɗ sinɛ kɔna yaaŋɛ gopan sinɛkoy bɔdɛrɗɔ goopan sinaanɛkoy mɛlkik?

⁸Sisɔ in ijaagɛ any sinɔ ɗegerɗɛ kɛ weerikɔɔkɔ tikiyɛɛkɛ Waakoyotak. Ma kat ŋɔɔlɛɛr ɛɛk ɓayɛtunɛɛkɛ goŋk kɛ, 'Eteŋk tɔɔmɔk Abrahamuk.' Tona kɔna kɛ Waakoyo oolɛ a ari giɗeekɛ sigeege tɔɔmɔka Abrahamukuŋ.

⁹Sisɔ ragadɛɛkɔ kabi sinɔ yawɛɛɗɛ kɛɛn tiltilɛɛkɛ gɛŋkiŋ, nɛ kɛɛt sinɔ ki riiɓɛ taamɛ sigɔ mentaanaŋɔŋkuk baŋɛ yawɛɛkoy nɛ orɛɛ maɗa."

¹⁰Nɛɓa joop sigɛ ɓɔɔkaak kɔɔniyar kɛ, "Anɛ ɗɛyɛ tina a ijaagii jikon?"

¹¹Nɛɓa Yowanis jumur sɛɛga kɛ, "Iɗit sinɛ lak abiyak a pɛɛyk, in kaasiɗi eta sinaana kiiɗɛk. Maɓɔrɛ iɗit sinɛ lak ɗamak, in ijaag oko sinɛk."

¹²Nɛɓa ɓɔrɛ joop sigɔ yayawar worik kurak son lak sɛɛnik kɛnɔ sɛɛg aadɛɛ nɛɓa tonurgeeɗ kɛ, "Rɔɔriytaano, ɗɛyɛ tina a ijaagii jikon?"

¹³Nɛɓa sɛŋk tonu sɛɛga kɛ, "Kat tolɛɛ wori a kaalɛ sinɛkɔ kɔna tonɛɛk.'

¹⁴Nɛɓa ɓɔrɛ amaasiniyɛk kɔɔniyar kɛ, "Ma eteŋk?" Nɛɓa sɛŋk Yowanis tonu sɛɛga kɛ, "Kat epɛɛrɛ ɛɛk nɔ boŋɛ wori etoŋk. Kat daariyɗiikɛɛ eta nyonɛ. In kɔna gayɛ wori sinɛ kɔna koyɛɛk."

¹⁵Saaɓa joop sigɛ ɓɔɔkaak atukuɗ koorɛɛt kɛ mɛlkikɔɔŋɔŋk nɛɓa sɛɛk baŋɛ koɓur ɓayɛtunɛɛkɛ gɛŋk Yowanis kɛ, "Anɛ eeta Keresee?"

¹⁶Nɛɓa Yowanis jumur sɛɛga baŋɛ kɛ, "Aada saak kɔnu maawɛ, mayakana mɛlkikɔɔ iɗit sinɔ kaalɛ eetikiŋ kaa saak oolɛ a woora melti saamɛyɛ gɛɛŋkiŋ. Aadikɔɔ kɔnu sɛŋk Wɛɛŋakɛ sigɔɔgɛ Geetitaanakik a maɗ.

¹⁷Lak Sɛŋk perɛ nɛɛk ariit kɛnɔkɔɔ pey ɗama nɛɛk, nɛ gaɓɛ anta, ma moɗɛ pɛtɛɛkak gɛɛŋk maɗ sinaanɛ koy ki laarink."

¹⁸Rɔɔriyɓa sɛɛg Yowanis olaatɛ ɔgɔɔkɛ sigɔɔgɛ ɓɔɔkaaŋɔŋk waasɛɓa sɛɛga Pɛɛni sinɔ Ɓɛlkɛɛstank.

¹⁹Mayakanaɓa Yowanis goop Herodis sinɛ suumi Gɛlilaak agut sinɔɓa boŋiɗ jarti manyaak Pilipoosuk Herodiyadaak, ɛ agut sinɔɓa ijaagiɗ ola ɔgɔ sigɔ ŋɛɛwɛnŋɔŋk a ɓɔɔkaaŋɔŋk.

²⁰Nɛɓa tuukeer Herodis any sinɔ ŋɛɛwɛnŋɔŋk omalta raŋana, gaɓɛɓa Yowanis godeya korkoɗɔɔnoŋk.

²¹Saaɓa aadiiɗɛ joop sigɛ ɓɔɔkaak baŋɛk baŋiya, nɛɓa aadɛɛ Yeesee. Saaɓa arkiɗ ɗanɗamɔɔnuk, nɛɓa tayɗi dari,

²²nɛɓa kurak Wɛɛŋa sigɔ Geetitaanakik a ito kulɓeer sɛɛna raŋana. Nɛɓa tiyɛɛ koŋgoy dari sinɔ tonu kɛ, "Iin Tɔɔn naak sinɛ poraak, yaataaŋ iine."

²³Saaɓa Yeese tukeeɗ rɔɔriyɔnk, atuɓa emeyi gɛɛnɛ sigɔɔgɛ ruumer iɗit a aarink. Koɓurkɛɓa joop sigɛ ɓɔɔkaak kɛ tɔɔn Yoosepuk. Egeɓa Yoosep tɔɔn Eeliik.

²⁴Egeɓa Eelii tɔɔn Maatiik. Egeɓa Maati tɔɔn Leewiik. Egeɓa Leewi tɔɔn Milkiik. Egeɓa Milkii tɔɔn Yoonaak. Egeɓa Yoona tɔɔn Yoosepuk.

²⁵Egeɓa Yoosep tɔɔn Maatatiyuuk. Egeɓa Maatatiyu tɔɔn Amoosuk. Egeɓa Amoos tɔɔn Nahoomuk. Egeɓa Nahoom tɔɔn Esilimik. Egeɓa Esilim tɔɔn Naageek.

²⁶Egeɓa Naagee tɔɔn Ma'aatik. Egeɓa Ma'aat tɔɔn Mataatiyuuk. Egeɓa Mataatiyuu tɔɔn Seemeeyik. Egeɓa Seemeey tɔɔn Yoosepuk. Egeɓa Yoosep tɔɔn Yoodaak.

²⁷Egeɓa Yoodaa tɔɔn Yoonaanik. Egeɓa Yoonaan tɔɔn Reesik. Egeɓa Rees tɔɔn Jɛrubabeelik. Egeɓa Jɛrubabeel tɔɔn Selatiyaalik. Egeɓa Sɛlatiyaal tɔɔn Neeriik.

²⁸Egeɓa Neerii tɔɔn Miiliik. Egeɓa Miilii tɔɔn Hadiik. Egeɓa Hadii tɔɔn Yoosasik. Egeɓa Yoosas tɔɔn Kosaamuk. Egeɓa Kosaam tɔɔn Elmodaamuk. Egeɓa Elmodaam tɔɔn Eerik.

²⁹Egeɓa Eer tɔɔn Yoosek. Egeɓa Yoosei tɔɔn Elajeerik. Egeɓa Elajer tɔɔn Yooramuk. Egeɓa Yooram tɔɔn Maataatik. Egeɓa Maataat tɔɔn Leewiik.

³⁰Egeɓa Leewi tɔɔn Simionuk. Egeɓa Simion tɔɔn Yuudaak. Egeɓa Yuuda tɔɔn Yoosepuk. Egeɓa Yoosep tɔɔn Yoonanik. Egeɓa Yoonan tɔɔn Eliyakeemuk.

³¹Egeɓa Eliyakeem tɔɔn Meliyaak. Egeɓa Meliyaa tɔɔn Maynaanik. Egeɓa Maynaan tɔɔn Maataatik. Egeɓa Maataat tɔɔn Naataanik. Egeɓa Naataan tɔɔn Daawitik.

³²Egeɓa Daawit tɔɔn Iseyk. Egeɓa Isey tɔɔn Iyoobedik. Egeɓa Iyoobed tɔɔn Boeejik. Egeɓa Boeej tɔɔn Salmoonuk. Egeɓa Salmoon tɔɔn Nɛasoonuk.

³³Egeɓa Nɛasoon tɔɔn Aminadaabuk. Egeɓa Aminadaab tɔɔn Araamuk. Egeɓa Araam tɔɔn Aaroonuk. Egeɓa Aaron tɔɔn Esroomuk. Egeɓa Esroom tɔɔn Pareesik. Egeɓa Parees tɔɔn Yuudaak.

³⁴Egeɓa Yuuda tɔɔn Yaykoobuk. Egeɓa Yaykoob tɔɔn Yisihaakik. Egeɓa Yisihaak tɔɔn Abrahamuk. Egeɓa Abraham tɔɔn Taaraak. Egeɓa Taaraa tɔɔn Nakooruk.

³⁵Egeɓa Nakoor tɔɔn Seerooguk. Egeɓa Seeroog tɔɔn Ragaawuk. Egeɓa Ragaaw tɔɔn Paleekik. Egeɓa Paleek tɔɔn Eebeerik. Egeɓa Eebeer tɔɔn Saalaak.

³⁶Egeɓa Saalaa tɔɔn Kaayinik. Egeɓa Kaayin tɔɔn Arpaksidik. Egeɓa Arpaksad tɔɔn Seemuk. Egeɓa Seem tɔɔn Noohk. Egeɓa Nooh tɔɔn Lameehk.

³⁷Egeɓa Lameeh tɔɔn Matusaalak. Egeɓa Matusaala tɔɔn Henookuk. Egeɓa Henook tɔɔn Yaareedik. Egeɓa Yaareed tɔɔn Mɛlalieelik. Egeɓa Mɛlalieel tɔɔn Kaynaanik.

³⁸Egeɓa Kaynaan tɔɔn Henoosuk. Egeɓa Henoos tɔɔn Seetik. Egeɓa Seet tɔɔn Adamuk. Egeɓa Adam tɔɔn Waakoyotoŋk.