Read majang Lukaas 4 Bible Online

Lukaas 4 - majang bible

Lukaas 4

¹Enyɛɛriɓa Yeese Wɛɛŋa sigɔ Geetitaanakik, nɛɓa weeriki Goroo Yordanoosuk. Nɛɓa arir Yeesee Wɛɛŋa sigɔ Geetitaanak kɛnɔ kɛɛ paatoona,

²nɛɓa paari sɛɛn setan kɛnɔ gun ijaag tikiyɛ a ki ɗamit a wawuy pɔlpɔlɛ joop pɛɛyk a kaayetun pɔlpɔlɛ joop pɛɛyk nɛɓa pediya nɛɛka lak ŋaawu.

³Nɛɓa tongeeɗ setan kɛ, "Ɔkɔnɓɔ iin Tɔɔn Waakoyotoŋk, tonutɔ giɗeyta sineena nɔ mɛyɛ a kiiwu."

⁴Nɛɓa Yeese jumurgeeɗ kɛ, "Taapɛɛɓa Wargatɛɛ Waakoyotoŋk kɛ, 'Ki iɗit beeɗit kiiwe dakɛɗa."'

⁵Nɛɓa setan diile Yeesee soona ar rakaayk nɛ yaaŋgeeɗ maŋgistiyɛ ɗookoŋk baŋɛ a ito nyaalan.

⁶Nɛ setan tongeeɗ kɛ, "Gaɓaakɔɔna ɓaŋkawuka a eemɛyɔn sini baŋɛ agut sinɔɓata gaɓɛɛɗɛ sigi baŋɛk, nɛ oola a gaɓa eta sinaana ɗɛyakiŋ.

⁷Nɛ ɔkɔnta ugumun, ege kɔɔ sini baŋɛ nook."

⁸Nɛɓa jumurgeeɗ Yeese kɛ, "Taapɛɛɓa Wargatɛɛ Waakoyotoŋk kɛ, 'Ugumu Suumiya nooka Waakoyota, ijaaga sɛɛna dakɛɗa."'

⁹Nɛɓa saadi setan diile Yeesee Yorsaleema, nɛɓa boŋu sɛɛn ajeeranta Gode sinɛ Geetitank, nɛ tongeeɗ kɛ, "Ɔkɔnɓɔ iin tɔɔn Waakoyotoŋk, orartɔ ɛɛk seedi ɗooka,

¹⁰agut sinɔ taapɛɛɓa Wargatɛɛ Waakoyotoŋk kɛ, 'Tonukoy Waakoyot wosɛytaanaka gɛɛnak, kɛnɔnu koorɛr kɛ ɗɔm.

¹¹Tawɛrkɔɔnu arnɛ gɛŋk, kɛnɔ kat dertɛ deran nookɛ giɗeet."'

¹²Nɛɓa Yeese jumurgeeɗ kɛ, "Tonɛɛɓa Wargatɛɛ Waakoyotoŋk kɛ, 'Kat paarin Waakoyo, Suumi nook."'

¹³Saaɓa setan ruumeeɗ paariit nɛɛkik, nɛɓa ŋɔr Yeesee nɛ ŋaarŋ saadi ɔɔtɛya sinɔɔna balaaŋɔŋk.

¹⁴Enyɛɛriɓa Yeese ɓaŋkawuka Wɛɛŋa Sigɔ Geetitaanakik, nɛɓa weeri Gɛlilaaka. Nɛɓa tiyɛɛ ɔɔtɛ nɛɛk ɗoo nɛɛk baŋɛ.

¹⁵Rɔɔriyaaɓa godeey nɛŋk tolɛɛɗoŋk Ayuuduk nɛɓa pɔɔsɛɛ joop baŋɛ.

¹⁶Mɛlɛɓa Yeese katamɛya sinaanaɓa ɓɔlɔɔrɛɗik Naajireeta. Nɛɓa guuguny godeya tolɛɛɗoŋk Ayuuduk waawuy Sambatɛyoŋk oko sinɛɓa barɛɗik, nɛɓa ŋaar raŋana kɛnɔ ambabɛ Wargatɛ Waakoyotoŋk.

¹⁷Gagiɗɛɛɓa wargatɛ iɗit pɛrkaakoŋk Isaayasik sinɔ tintimtank, nɛɓa ɓarɓaɗɛ nɛ laŋki soonɓa taapɛɛɗɛ kɛ,

¹⁸"Atu Wɛɛŋa Suumiyoŋk eete raŋk, agut sinɔ suumekɔtu kɛnɔ waasa Pɛɛni sini Ɓɛlkɛɛstank sankaanaka. Wosɛykikanti kɛnɔ laaganya, kɛnɔ woori joop sigɛɓa korkoɗɛɛk, kɛnɔ dɛnɗi joop sigɛ motakik kɛkar, kɛnɔ ŋaararki joop sigɛ atu laaŋoyk yaakata,

¹⁹ɛɓɔrɛ wosɛykikanti kɛnɔ kusa waasa ɔɔtɛ sinɔ Waakoyot ebɔdɛɛɗ joop gɛɛŋkik."

²⁰Nɛɓa miinye wargatɛ nɛɛk, nɛ gaɓɛ ijaagenta nɛɛka, nɛ dokuɗe. Nɛɓa mermenar sɛɛn joop sigɛ atu godeey sinaanɛ tolɛɛɗoŋk Ayuuduk baŋɛ kɛ ɗɔm.

²¹Nɛɓa tonu sɛɛga kɛ, "Dusanɛɛ pɛɛnii sineene ɓenysek pɛɛni sinɛɓa taapɛɛk sini tiyɛɛr wenanɛ goŋkuk."

²²Tonurɓa sɛɛg baŋɛ any sinɔ mentanŋɔŋk agut sɛɛn reemɗiɓa ɓayɛtun gɛŋk agut any sinɛɓa waasɛk mentanŋɔŋk. Nɛ tonur kɛ, "A moko ege sini tɔɔn Yoosepuk?"

²³Nɛɓa tonu sɛɛga Yeese kɛ, "Ŋaada kɛ toniirti rɔmɛɛɗ kɛ, 'Iin ɗumaat korusaka, ebɔdu ɛɛk nook. Ijaag ɓɔrɛ katamɛɛ sineene nyaki nookɛkik any sinɛkan tiyiik ijaagin Kipirnahoomek.

²⁴Eekeer tona kɔnaaŋ, iɗit pɛrkaakoŋk kɛɛ eemɛyɔɔn ɗook nɛɛkɛk.

²⁵Eekeerɛ eme sinaanɛɓa Eliyaasik sinaanɛɓa koriiɗ dari a emeyi jiit a ɛyɛkeer tula omk sinaanɛɓa lakiɗɛ ŋaawu sinɔ ɓaŋkawuŋɔŋk ɗook nɛɛkɛ baŋɛk, lakɛɓa Israeele jartiyatɔk sigɔɓa rɛrar babuy gɛŋkŋɔŋk a ɓɔɔkaaŋ.

²⁶Kɛɛɓa wosɛyɛt Eliyaas son lak omuk sigeege. Maɓa wosɛyɛ son lak jarti sinɔɓa rɛr baabuy nɛɛkɛŋɔŋk dakɛɗa sinɔ ar ɗook Sidoonaak mɛndɛre Sɛraptaak.

²⁷Maɓɔrɛ eme sinaanɛɓa iɗit pɛrkaakoŋk Elsaak, lakɛɓa joop sigɔ latu dɔɔɓɔyk a ɓɔɔkaaŋ Israeele, nɛ kɛɛ iɗit sinɔɓa bɔduku sɛɛgek bɔdukuɓa Niiman iɗit Sooriyaak dakɛɗa."

²⁸Joop sigɛɓa atu godeey tolɛɛɗoŋk Ayuuduk saaɓa tiyɛrɗi any sinik, nɛɓa ŋadir jɛt.

²⁹Ŋaararɓa nɛ puruuter Yeesee, nɛ boŋitar katamɛɛ walasa. Ɗɛyɛrɓa a gun oriitar saakoya, nɛɓa diiler sirpɛya sinɔɔnaɓa ijaagɛ katamɛɛ nɛɛkɛkik.

³⁰Yakanaɓa sɛŋk ɗoyu sɛɛge takan nɛ ŋaarŋ.

³¹Ŋaarɓa Yeese nɛ kɛɛ katamɛya Kipirnahoomuk sinaana ar ɗook Gɛlilaak, nɛɓa saadi rɔɔriy joop sigɛ ɓɔɔkaak waawuy Sambatɛyoŋk.

³²Nɛɓa reemɗi ɓayɛtun gɛŋk agut rɔɔriyɔn nɛɛk, agut sinɔɓa rɔɔriyɗi sɛɛg ɓaŋkawukaatik.

³³Lakɛɓa godeey sinaanɛ tolɛɛɗoŋk iɗit sinɔɓa gaamur wɛɛŋa sigɔ somkaanakik, nɛɓa ooyɛ a ɗooruŋ kɛ,

³⁴"Iin Yeesee Naajireetik, ɗɛyin jikon sooy lak eteŋkik? Kusunkɔ kɛnɔ tin sɔɔkun? Ɗegera kɛ iin wooɗuŋ. Iin Tɔɔn Waakoyotoŋk sinɛ Geetitank."

³⁵Nɛɓa Yeese lamɛ kɛ, "In dakɛɛ kɛ many, nɔ ŋaarari ete sineene!" Nɛɓa wɛɛŋa sigɛ somkaanakik iber iɗit sinɛ nɛ ŋɔɗar nɛ ŋaararŋ, ma kɛɛ soon kɔ arɗiiɗik.

³⁶Nɛɓa reemɗi ɓayɛtun joop gɛɛŋkik baŋɛ nɛ totoni ɛkanɛɛkɛ gɛŋk kɛ, "Ege sini pɛɛni kɛ jikon tonɗi wɛɛŋaka sigɔɔga somkaanakik Suumiikent a ɓaŋkawukaat nɛ ŋaararŋ?"

³⁷Nɛɓa tiyɛɛ ɔɔtɛ Yeeseek ɗook nɛɛkɛ baŋɛ tookɛɛta.

³⁸Ŋaarkiɓa Yeese godeey tolɛɛɗoŋk nɛ kɛɛ guuguny waa Simionuk. Maɓa saadi keerɛɛk Simionuk goru moɗɛ ɛɛkoŋk a ɓaŋkawuŋ, nɛɓa kalɛyir sɛɛn kɛnɔ ebɔdɛɗ.

³⁹Nɛɓa Yeese wideer ɛɛk, nɛ ɛtɛ sɛɛne jɔk, nɛ lamɛ moɗɛ sinɛ ɛɛkoŋk. Nɛɓa sɛɛn ŋɔr sisa, nɛ ŋaar raŋana nɛ wɔɔrɛ sɛɛgiŋ.

⁴⁰Saaɓa ɗiirirkiɗ waawuyk, nɛɓa ɗɔkarki joo joop sigɔɓa gaamur sɛɛg goriɗak sigɔ ɓɛɛlɛr kundiyaakɛk baŋɛ son lak Yeeseek. Nɛɓa sɛŋk riiɓe sɛɛge ari a omoŋ omoŋ nɛ ebɔdɛ sɛɛgiŋ.

⁴¹Nɛɓa ɓɔrɛ wɛɛŋa sigɔ somkaanakik duriyer a ŋaarark joope sigɔɔgɛ ɓɔɔkaaŋɔŋk a tonur kɛ, "Iin sɛŋk Tɔɔn Waakoyotoŋk!" Nɛɓa sɛŋk lamɛ sɛɛgiŋ. Nɛɓa ɓaarɗi sɛɛg kɛnɔ kat lakɛ any sinɔ tonurk, agut sinɔɓa ɗegerarɗi kɛ Kereseek.

⁴²Saaɓa aayirkiɗik, nɛɓa ŋaar Yeese saadi soona ɓɛɛlɛ mowank. Nɛɓa warɛr joop sigɛ ɓɔɔkaakiŋ, nɛ saaɓa laŋirɗik, nɛɓa tonurgeeɗ kɛnɔ kat pakat sɛɛge ɛɛk.

⁴³Nɛɓa sɛŋk Yeese tonu sɛɛga kɛ, "Ɗɛyɛta a kɛɛɗa katamɛɛka ɔgɔɔka nɔ kɛɛɗa waasa Pɛɛni sini Ɓɛlkɛɛstank Burɛ Waakoyotoŋkuŋ agut sinɔ wosɛykɛkanti agut any sini."

⁴⁴Nɛɓa rɔririyii sinɔɔnɛ godeyi tolɛɛɗoŋk Ayuuduk ɗook Yuudaak.