Read majang Lukaas 6 Bible Online

Lukaas 6 - majang bible

Lukaas 6

¹Ɓeny omalte ɗoyuɓa Yeese sinɔɔnɛ taawa takank waawuy Sambatɛyoŋk Ayuuduk, nɛɓa nomtaanak gɛɛnɛ kɛtɛrki taawakeer, nɛ porootɛr sɛɛg arnɛ gɛŋk, nɛ ɗamiŋ.

²Nɛɓa joope Paarisik a omoŋ omoŋ tonur kɛ, "Ijaagiir any sinɔɓa kɛɛ pɛgɛdɛɛt nɔ ijaagɛ waawuy Sambatɛyoŋkuk agut jikon?"

³Nɛɓa Yeese jumur sɛɛga kɛ, "Kiirɓa ambabɛɛt any sinɛɓa ijaag Daawit sɛɛn a joop sigɛɓa sɛɛg a sɛɛnik saaɓa latukuɗ ŋaawuk?

⁴Guugunyɓa godeya Waakoyotoŋk, nɛɓa boŋku nasi sinɔ geetitank sinɔɓa pɛgɛdɛɛ kɛnɔ ɗamar tapaak ŋaadiyɛɛkoŋk dakɛɗak nɛ ɗamŋ, nɛɓa ɓɔrɛ gaɓɛ joopa sigaagaɓa sɛɛg a sɛɛnikiŋ."

⁵Tonuɓa sɛɛga Yeese kɛ, "Ege Tɔn Etoŋk, Suumi waawuy Sambatɛyoŋk."

⁶Guugunyɓa waawuy Sambatɛyoŋk Ayuuduk omalte godeya tolɛɛɗoŋk Ayuuduk nɛ rɔɔriyaaŋ. Nɛɓa saadi lakɛ iɗit sinɔɓa sɛɛgiya ari nɛɛkɛ gɔɔ sinɛ ɗiɗikŋɔŋk.

⁷Nɛɓa ɗɛyɛr rɔɔriytaanak higi Muuseek a joop Paarisik kɛnɔgun laŋirkiɗ tikiyɛ sigɔ dariyɗiigeeɗŋɔŋk nɛɓa koorɛr kɛnɔ dɛnɛr kɛ ebɔdɛkɔɔŋ yoo waawuy Sambatɛyoŋkuŋ.

⁸Nɛɓa Yeese ɗeger koɓiɗak gɛŋk, nɛ tonu eta sinaanaɓa sɛɛgiya ari nɛɛkɛkik kɛ, "Ŋaari raŋana nɔ ɛtin joope gɛɛnɛ kɔɔr." Nɛ ŋaar raŋana nɛ ɛtɛŋ.

⁹Nɛɓa Yeese tonu sɛɛga kɛ, "In kɔnu kɔɔniya ant omalte, Pɛgɛdɛɛɓa a ijaagɛɛ waawuy Sambatɛyoŋk any sinɔ mentanŋɔŋk, maŋk any sinɔ ŋɛɛwɛnŋɔŋk? Ebɔdɛɛt wɛɛŋakoŋk, maŋk sɔɔkɛɛt wɛɛŋakoŋk?"

¹⁰Saaɓa Yeese mermenɗi sɛɛg baŋɛ tookɛɛtak baŋiya, nɛɓa tonu eta sinaana kɛ, "Ker ari nook." Nɛ ijaag oko sinɛkɔ tonguɗɛɛk, nɛɓa bɔdɛ ari nɛɛkɛŋ.

¹¹Nɛɓa joop gɛɛnɛ ŋadir nɛ waasiɗigeeɗ ɛkanɛɛkɛ gɛŋk sinɔ kɛ arir Yeesee ɛkik.

¹²Saadi baŋiya ɓeny omalte kɔtɔɔŋɛɓa Yeese kurkuma ɗanɗamɔɔna, nɛɓa aayirki kaay nɛɛk baŋɛ saadi a ɗanɗaɗami Waakoyota.

¹³Saaɓa aayirkiɗik, nɛɓa riyiri wosɛytaanak gɛɛŋk nɛ daam sɛɛge sigɛ aarin a pɛɛyk. Nɛɓa riy sɛɛg kɛ wosɛytaanak.

¹⁴Sɛɛg Simion sinɛɓa riy kɛ Petrosuk, Indiriyaas, manya Petrosa, Yaykoob, Yowanis, Pilipoos, Bɛrtɛloomiyos,

¹⁵Maatiyoos, Toomaas, Yaykoob tɔɔn Ilpiyoosuk, Simion sinɛɓa riyɛ kɛ palamɗi agut ɗoo nɛɛkik,

¹⁶Yuudaa tɔɔn Yaykoobuk, Yuudaa Keriyootuk sinɛkɔɔ gaɓɛ Yeeseek.

¹⁷Ɓurɓuɗiikɓa Yeese a sɛɛg kurkum raŋk, nɛ ɛtɛ ɗook soodi ɓɛɛlɛ kɛ ɗɛrɛkik. Ɓɛɛlɛrɓa nomtaanak gɛɛnɛk a ɓɔɔkaaŋ saadi, ɛɓa ɓɔrɛ lakɛ joop a ɓɔɔkaaŋ sigɔɓa kurak Yuudaake baŋɛ, a Yorsaleeme, a Tiiroosek a Sidoonaakek sigɛ atu goroo sinɔɔnɛ obiiŋɔŋk kɛntɛɛk.

¹⁸Kurakɓa joop sigi baŋɛ kɛnɔ geleewɛrgeeɗ ɛ kɛnɔ bɔdɛrki goriɗakɛ gɛŋk, nɛɓa bɔdɛrki joop sigɛɓa rakatɛr wɛɛŋakɛ sigɔɔgɛ somkaanakik.

¹⁹Ɗɛyɛrɓa joop baŋɛ a kumer Yeesee, agut sinɔɓa ŋaarkiɗ sɛɛne ɓaŋkawuka ebɔdɛɛtoŋk, nɛ ebɔdɛ sɛɛg baŋɛk.

²⁰Mermenaɓa Yeese son lak nomtaanak gɛɛŋkik nɛ tonu sɛɛga kɛ, "Ege Burɛ Waakoyotoŋk noŋk, iinak joop sigɛ sankaanakik, iinak geetitaanak.

²¹Iinak geetitaanak, iinak joop sigɛ latukari ŋaawu sisɔk, agut sinɔ ɓooɗorarkoyŋ. Iinak geetitaanak, iinak joop sigɛ kuɗer sisɔk, agut sinɔ rɔgɛɛrkoyŋ.

²²Iinak geetitaanak saa kɔnu ɓooyurɗu joop, a saa kɔne pakatirɗi ɛɛkik a saa kɔnu laaganyarɗik, a saa sɔɔkɛrɗi tiriya goŋkuk agut Tɔɔn Etoŋkuk.

²³"In kɔna yaa a in teemɛɛ raŋana ɓeny sinaanɛ, agut sinɔ obi gati sinɛkoy laŋiir darikiŋ. Ijaagirɓa ɔrɛyak gɛŋk joopa pɛrkaakoŋk any sinɔ ŋɛɛwɛnŋɔŋk oko sinɛk.

²⁴"Mayakana duri koy kɔna, iinak joop sigɛ latu worik, agut sinɔ laŋiirkɔ any sinɛ kɔna yaak baŋɛ ɗook sineene raŋk.

²⁵Duri koy kɔna iinak joop sigɛ ɓooɗorar sisɔk, agut sinɔ latukarkoy ŋaawu baŋiya. Duri koy kɔna, iinak joop sigɛ rɔgɛɛr sisɔk, agut sinɔ sanɗikarkɔɔ baŋiyaaŋ, kuɗeer kɔɔŋ.

²⁶Duri koy kɔna, saa kɔnu tonurɗu joop baŋɛ a mentanŋɔŋk. Ijaagirɓa ɔrɛyak gɛŋk joopa pɛrkaakoŋk sigɔɔga nyonkaanakik oko sinɛk.

²⁷"Yakana tona kɔnaaŋ iinak joop sigɛta geleewɛrk, in porɛɛ gumaakeer goŋk. In ijaagɛɛ any sinɔ mentanŋɔŋk joopa sigaaga kɔnu ɓooyurk.

²⁸In geetɛɛ joop sigɛ kɔnu koonyɛrk. In ɗanɗamaakɛɛ joopa sigaaga kɔna ijaagir any sinɔ ŋɛɛwɛnŋɔŋkuk.

²⁹Iɗit sinɔ paaŋi pariiwan nookuk, weergeeɗ gɔɔ om nɔ paaŋiɗ. Iɗit sinɔne boŋu abii nook sinɛ raŋanenk, gageeɗ abii nook sinɛ takanenk.

³⁰Tigi joop sigɛni kalɛyirk baŋɛ. Iɗit sinɔne boŋu wori nookuk, kat kɔɔniyin nɔna jumur.

³¹Any sinɛ ɗɛyɛɛr a kɔna ijaagir joopk, in ɓɔrɔ ijaagɛ sɛɛga oko sinɛk.

³²"Ɔkɔn poriir joop sigɛ kɔnu porurk, kiirkoy laŋiiɗ pɔɔsiyɛ. Porur aasi tikitaanak joop sigɛ porur sɛɛgik.

³³Ɔkɔn ijaagiir any sinɔ mentanŋɔŋk joopa sigaaga kɔna ijaagir any sinɔ mentanŋɔŋk, kiirkoy laŋiiɗ pɔɔsiyɛ. Ijaagir aasi tikitaana oko sinik.

³⁴Ɔkɔn gaɓɛɛr masɛ joopa sigaaga koɓiir kɛ, 'Jumurarkɔɔ tinaŋɔŋk', nɛkɔ latukar pɔɔsiyɛ kɛ jikonak? Gaɓɛr tikitaana masɛ tikitaanaka kɛnɔ sɛɛga jumurɛ sinɛkɔ gaɓɛrk.

³⁵Mayakana in sɔɔk porɛɛ gumaakeer goŋk! In ijaagɛ sɛɛga any sinɔ mentanŋɔŋk! In gaɓɛɛ masɛ ma kat lakɛ koɓi sinɔ kɛ jumurɛ kɔɔ tinaŋɔŋk! Ɔkɔnkɔɔ ijaagiir oko sinikiŋ obiikoy gati noŋkuŋ, iinak koy tɔɔmɔk Waakoyo sinɛ ar darik, agut sinɔ sɛŋk mentankiɗ joopa sigaaga kɛɛ sɛɛg pɔɔsɛɛtik a joopa sigaaga ŋɛɛwɛkiŋ.

³⁶In iinak maariytaanak oko sinɛ ege Ɓaaɓa noŋk maariytank.

³⁷"Kat pɛrɛdɛɛ joope ɔgɔɔkɛ kɛnɔ mokoy kɔne pɛrɛdɛɛ. In ŋɔɗiirɛ kɛnɔkoy kɔne ŋɔɗiirɛ.

³⁸In gijiɗiikɛɛ kɛnɔkoy kɔnu gijɛ. Saparɛɛkoy ɓɔrɛ kɔna ant sinaanɛ saparɛrɗɔk, saparɛɛkoy nɛ kɔna gaɓɛɛ ant sinɔɔnɛ mentanŋɔŋk a siikɛ a ŋayɗiikiŋ."

³⁹Tonuɓa ɓɔrɛ sɛɛga Yeese rɔmɛ kɛ, "Mot oolɛ a diile motuŋ? Moko gaagami a getu pɛɛy nɛ ɗiirtar utula?

⁴⁰Ki kaalɛɛt bartaan rɔɔriytan nɛɛk. Mayakana ɔkɔn rɔɔriyɛ bartan jɛtiŋ, nɛkɔɔ ito rɔɔriytan nɛɛk.

⁴¹"Dɛnin aalaakan sinɛ lak masookooy taamtuk, ma kin taanta doori sinɛ lakin taamt nookɛkik agut jikon?

⁴²Oolun ɛk a tonun masookoya kɛ, 'Manya eeta, in reene boŋka aalaakan sinɛ lakin taamtuk.' A kin taanta doori sinɛ lakin taamt nookɛkik? Iin iɗit sinɛ gaayin iɗit sinɔ mentanŋɔŋkuk, boŋa tɛɛnan jeemɛ doori sinɛ lakin taamt nookɛkik, nɔkɔɔ ɓaane boŋkun aalaakan sinɛ lak masookooy taamtuk ma dɛnin kɛ ɗɔm.

⁴³"Kɛɛt sinɔ mentanŋɔŋk ki gaamit taamɛ sigɔ ŋɛɛwɛnŋɔŋk, maɓɔrɛ kɛɛt sinɔ ŋɛɛwɛnŋɔŋk ki gaamit taamɛ sigɔ mentaanaŋɔŋk.

⁴⁴Ɗegerɛ kɛɛt baŋɛ taamɛkɛ gɛɛnɛk. Ki riiɓɛ ɓɛyint taamɛ bɛlɛɛsik, maɓɔrɛ ki riiɓɛ ɓɛyint taamɛ wɛynik.

⁴⁵Iɗit sinɔ mentanŋɔŋk ŋaarkiɗi ɓayaay nɛɛkɛ sinaanɛ mentanŋɔŋk any sinɔ mentanŋɔŋk, ma iɗit sinɔ ŋɛɛwɛnŋɔŋk ŋaarkiɗi ɓayaay nɛɛkɛ sinaanɛ ŋɛɛwɛnŋɔŋk any sinɔ ŋɛɛwɛnŋɔŋk. Agut sinɔ tonu iɗit ad nɛɛkɛ any sinɛkɔ enyɛɛri ɓayaay nɛɛkɛkik.

⁴⁶"Riyarti kɛ, 'Suumi naakɛ, suumi naakɛ,' agut jikon, ma kiir ijaagɛ any sinɛ kɔna tonaak?

⁴⁷Iɗit sinɔ kus son lak eetik, nɔ tiyɛ pɛɛni naak, nɔ ijaagik baŋɛ, in kɔna tona kɛ gayi a wooɗ.

⁴⁸Gayi a iɗit sinɔkan kɛny gode talaaɗɛ raŋk a kɔwu a ɓukuurŋɔŋk. gonarki maaw teeteyoŋk nɛ direr maawu gɛɛnɛ gode sinɛ, nɛkan ki oolɛ a ɓeesiɗiiŋ agut sinɔkan kɛnyɗɛ soodi ɓaŋkawuŋɔŋkuk.

⁴⁹Mayakana iɗit sinɔ tiyɛ pɛɛni naak nɛ ki ijaagɛɛk, gayi a iɗit sinɔkan kɛny gode nɛɛk ɗook soodi kiiɗɛ nyon sinɔ ɓaŋkawuŋɔŋkuk. Mɛlɛrki maawu gɛɛnɛ nɛ direr gode sinɛ, nɛ ɗiiri sisa nɛ ɗiirin nɛɛkɛ ɓaŋkawu jɛt."