Read majang Lukaas 9 Bible Online

Lukaas 9 - majang bible

Lukaas 9

¹Riykɓa Yeese nomtaanak sigɛ aarin a pɛɛyk agut omoŋ son lak sɛɛnik nɛɓa gaɓɛ sɛɛga ɓaŋkawuka a suumiikeen kɛnɔ ɔɔyɛr wɛɛŋa sigɔ somkaanakik baŋɛ kɛnɔ ebɔdiɗi meetanakɛ.

²Ɛɓa wosɛyɛ sɛɛg kɛnɔ rɔɔriya agut Burɛ Waakoyotoŋk ɛ ebɔdɛr joop sigɛ gorurk.

³Nɛɓa tonu sɛɛga kɛ, "Kat diilɛ gopɛ noŋk gumboy, kɛygun kosɛ, kɛygun ɗama, kɛygun wori, kɛygun abiyak.

⁴Saakɔɔ guugunyarɗɔ godeya omaltaak, in beeɗɛɛ saadi nɔkɔɔ ŋaararkiɗɔɔ katamɛɛ saak.

⁵Kɛygun wooɗ ɔkɔn kɔnu ki boŋiiɗiŋ, nɛ in tɛntɛŋɛɛrɛ duudur sinɛ latukari derakɛk saa ŋaararkiɗɔ saadik. Dakɛkoy sɛɛga sini a misikiri.

⁶Nɛɓa sɛɛk ŋaarar oko sinɛk nɛ ɗoyur sinɔɔnɛ mɛndɛrik a rɔɔriyaaɗ Pɛɛni sinɔ Ɓɛlkɛɛstank a ebɔdɛr gortaanak nyonitaak baŋɛ.

⁷Herodis sinɛɓa suumi ɗoo Gɛlilaak, tiyɛɓa any sinɛɓa ijaag Yeeseek baŋɛ, nɛɓa kiigeeɗ mɛlɛ, agut sinɔɓa joop a omoŋ omoŋ tonurɗu kɛ, "Ŋaarkikɔ Yowanis sinɛ A'aadiik ret walsak."

⁸Tonurɓa ɔgɔɔk kɛ, "Weeriikikɔ Eliyaas." Ma ɔgɔɔk tonur kɛ, "Ŋaarkikɔ ret walasa joope pɛrkaakoŋk sigaagɛɓa ɗeeŋk om."

⁹Nɛɓa Herodis tonu kɛ, "Ege sini Yowanis kan yawa ŋɔɗɔ nɛɛkik, nɛ ege sini wooɗ sini tiyii a tonɛɛ a ito sɛɛnik?" Nɛɓa ɗɛyɛ a gun dɛnɛ taamt nɛɛkɛk.

¹⁰Weeriikɓa nomtaana saadiɓa sɛɛg wosɛygiɗɛk, nɛ kurak tonur Yeeseya any sinɛkɔ ijaagirk. Nɛɓa boŋu sɛɛg nɛ kaar sɛɛg mowan katamɛya sinɔɔna riyɛ kɛ Beetɛ Saydaak.

¹¹Nɛɓa joop sigɛ ɓɔɔkaak ɗegerar sini, nɛ nomɛrɗiŋ. Nɛɓa Yeese boŋu sɛɛg, nɛ rɔɔriy sɛɛg agut Burɛ Waakoyotoŋk ɛɓa ebɔdɛ joop sigɛ ɗɛyɛ a ebɔdɛɛ sɛɛgŋɔŋk.

¹²Saaɓa kɔjururkuɗuk, nɛɓa wideetar ɛɛk nomtaanak sigɛ aarin a pɛɛyk son lak sɛɛnik nɛ tonurgeeɗ kɛ, "Agut sinɔ arkiɗii paatonk, toŋoɗar joop sigi nɔ kaar mɛndɛraka a kɛntɛya nɔ kaar warɛr ɗama a nyon ɗeegarɔɔnoŋk."

¹³Yakanaɓa Yeese tonu sɛɛga kɛ, "In gaɓɛɛ sɛɛga any sinɛ ɗamark sɔɔk." Nɛɓa sɛɛk tonurgeeɗ kɛ, "Lakii seek kiiwakɔ a tuul a oltiir a pɛɛy dakɛɗa. Ɔkɔnkɔɔ kɛɛɗii kiiki ɓaliiɗ ɗamaŋ nɛkɔɔ ki gayɛ joopa sigeega baŋɛ.

¹⁴Atuɓa joop gɛɛnɛ kumɛɛkɛ sigɔɔgɛ tuulk moojak dakɛɗa." Nɛɓa tonu Yeese nomtaanaka gɛɛna kɛ, "In arɛɛ joop gɛɛŋk a dokurɗe ponyakɔɔkɛ a atu sigɔɔgɛ pɔlpɔlɛ joop pɛɛyk a aarin pɔlpɔlɛ joop pɛɛyk a aarin."

¹⁵Nɛɓa nomtaanak gɛɛnɛ arir a dokurɗe joop gɛɛnɛ oko sinɛkɔ toniiɗɛ sɛɛgak.

¹⁶Nɛɓa gaamu kiiwakɔ sigɛ tuulk a oltiir sigɛ pɛɛyk, nɛ ɓɔŋgɔɔrɛ taamɛ gɛɛŋk rakaaya, nɛ pɔɔsɛ Waakoyo, nɛ ŋapati kiiwu nɛɛk, nɛ gaɓɛ nomtaanaka gɛɛnaak kɛnɔ gaɓɛr joopa gɛɛnak.

¹⁷Nɛɓa ɗami baŋɛ nɛ ɓooɗorarŋ, nɛɓa nomtaanak gɛɛnɛ tolɛr kootaayɔ sigɛɓa ŋayɗiikik a kantɛyɛ aarin a pɛɛy a enyaataŋ.

¹⁸Ɓeny omalte ɗanɗamaaɓa Yeese mowan, maɓa sɛɛn a nomtaanak gɛɛŋk agut omoŋ. Nɛɓa sɛŋk kɔɔniy sɛɛg kɛ, "Tonur joop kɛ eet nɔ wooɗ?"

¹⁹Nɛɓa sɛɛk tonurgeeɗ kɛ, "Tonur a omoŋ omoŋ kɛ Yowanis sinɛ A'aadiik, ma ɔgɔɔk tonur kɛ Eliyaas, ma ɔgɔɔk tonur kɛ joope pɛrkaakoŋk sigaagɛɓa ɗeeŋk ŋaarkikɔ om ret walasa."

²⁰Nɛɓa jumur sɛɛga kɛ, "Ma iinak toniir kɛ eet wooɗ?" Nɛɓa Petros jumurgeeɗ kɛ, "Iin Keresee sinɛ Waakoyok."

²¹Nɛɓa sɛɛga rɔɔrɔk Yeese a ɓaŋkawuŋ kɛnɔ kat lakɛ iɗit sinɔ tonurgeeɗ any sinik.

²²Ɛɓa tonu sɛɛga kɛ, "Ɗɛyɛ Tɔɔna Etoŋk a laŋk rakatɛ sinɔ obiiŋɔŋk ɛ daraayɛɛ gutarɛyɛɛkɛ, a ɔɗɔweerɛ tapa ŋaadiyɛɛkoŋk, a rɔɔriytaanakɛ higi Muuseek, ɛkɔɔ ɓokotɛɛ nɛkɔɔ ŋaarki ret walasa ɗoŋikɛ sigɔɔgɛ jiitik.

²³Tonuɓa sɛɛga baŋɛ kɛ, "Ɔkɔn lakɛ iɗit sinɔ ɗɛyɛ a nomɛ eeteekiŋ, in kaadɛ ola sigɛ ɗɛyɛ sɛɛgik, nɔ ragad ɛɛk rakatɛya a reta ɓɛɛnyɔwɛ gɛɛŋk baŋɛ, nɔ nomɛ eete.

²⁴Agut sinɔ iɗit sinɔ ɗɛyɛ a ebɔdɛ wɛɛŋa gɛɛŋkik baŋɛ sɔɔkɛ sɛɛgiŋ. Mayakana iɗit sinɔ sɔɔkɛ wɛɛŋa gɛɛŋk agut eetik, ebɔdɛ sɛɛgiŋ.

²⁵Iɗit ɔkɔn laŋi wori ɗookoŋk baŋɛ, ma sanɛ wɛɛŋa gɛɛŋkiŋ, nɛ kɔnyageeɗ jikon?

²⁶Iɗit sinɔ lak keeny eete a pɛɛni naakɛk baŋɛ, lageeɗkoy keeny Tɔn Etoŋk saakoy mɛlkiɗik eemɛyɔɔn nɛɛkɛ a eemɛyɔɔn Ɛpɛnaak a wosɛytaanak gɛɛŋk sigɔ geetitaanakik.

²⁷Eekeer tona kɔnaaŋ, joope sigeege ɛtɛr seedik kɔɔr a omoŋ omoŋ dɛnɛrkoy Burɛ Waakoyotoŋk a mɛlki a in kir rerin.

²⁸Saaɓa Yeese toniiɗ sinik ɗoŋikɛ sigɔɔgɛ tula jiitik baŋiya, diileɓa Petros, a Yowanis, a Yaykoob nɛ kɔtɔɔŋɛr kurkuma omalta ɗanɗamɔɔna.

²⁹Saaɓa arkiɗ ɗanɗamɔɔnuk, mɛyɛrɓa taamɛ gɛɛnɛkiŋ, nyaalɛɓa abii nɛɛkɛ a tupeenyiŋ.

³⁰Dɛnɛɛɓa joop a pɛɛy Muusee a Eliyaas a waawasi a sɛɛn.

³¹Yaaŋɛrɓa ɛɛk pɛɗɛrkaat eemɛyɔɔnoŋk nɛ waasiɗi agut sinɛkɔɔ Yeese laŋkiɗ rakatɛ a sinɛkɔɔ rɛrɗik Yorsaleemek.

³²Maɓa Petros lak ɗoŋ sɛɛn a joop sigɛɓa sɛɛg a sɛɛnik. Saaɓa ɓeɗirkiɗik, dɛnɛrɓa pɛɗɛrka eemɛyɔn nɛɛkik a joop a pɛɛy sigɔ ɛtɛtɛɗar a sɛɛnik.

³³Saaɓa joop sigɛ pakatirɗi ɛɛk Yeesee nɔ ŋaarark, nɛɓa Petros tonu Yeeseya kɛ, "Rɔɔriytaano, mentan tina beeɗit seedikiŋ. Nɛkoo kɛnyii paapɛɛ a jiit, nɛ omaay nook, ma omaay Muuseek, ma omaay Eliyaasik." Kiɓa ɗegerɔɔn any sinɛ tonuk.

³⁴Aɓa ar waasiyɛɛkɛ any sinik, nɛɓa mɛlki gumoy nɛ miinye sɛɛgiŋ. Saaɓa sɛɛg miinyeeɗ gumoy nɛɛkɛkik, nɛɓa ɓuriiŋ.

³⁵Nɛɓa tiyɛɛ koŋgoy gumoy nɛɛkɛ tak sinɔ ɗooru kɛ, "Tɔɔn naak sinɛkan daamaak sɛɛn sini, in geleewɛɛ sɛɛna."

³⁶Saaɓa nyɛyɛɛɗ koŋgoy nɛɛkɛkik, nɛɓa sɛɛk laŋirki Yeesee a sɛɛn mowan. Nɛɓa nomtaanak gɛɛnɛ ɔɔtɛ sinaanɛ dakɛr kɛ many a kɛɛ iɗit sinɔ tonurgeeɗ any sinɛkan dɛnɛrk.

³⁷Alɛ nɛɛkɛ, saaɓa ɓurɓuɗiikiɗ kurkumk baŋiya, nɛɓa kurak joop a ɓɔɔkaaŋ nɛ lalaŋi a Yeesee.

³⁸Nɛɓa sisa joope gɛɛnɛ kɔɔr tonu iɗit omaay a ɗooruŋ kɛ, "Rɔɔriytaano, tɔɔn naak sɛɛn sini dakɛɗa, kalɛyaan kɛnɔta dɛnin.

³⁹Gaamurkɔre sɛɛn wɛɛŋa sigɔ somkaanakik a gorgorŋ nɛ ooyɛŋ. Nɛ dirkiya a kusuɗ kuru, nɛ ari ɛɛk nɛɛk a doosoyɛŋ. Nɛ ki toŋoɗ kɛ many nɔkɔɔ bɔɔlaaɗ jɛtik.

⁴⁰Nɛkɔre kalɛykaaya nomtaanak gooŋk kɛnɔ gun ɔɔyɛrkiɗiɗ, nɛkɔ kir oolɛ."

⁴¹Nɛɓa Yeese tonu kɛ, "Iinak joop sigi kir ŋaadiɗitik, beeɗiikoy Eet a iinak agut omoŋ nɔkoy okoɗak? Ɓaŋkaawurakoy kɔna nɔkoy okoɗak? Diilak tɔɔn nook seena."

⁴²Saaɓa ɗɔkuɗɛ tɔɔn nɛɛkik, nɛɓa orur sɛɛn wɛɛŋa sigɛ somkaanakik ɗook nɛ dirkiyaŋ. Nɛɓa Yeese lamɛ wɛɛŋa sigɛ somkaanakik nɛ ebɔdɛ tɔɔn nɛɛk, nɛ gaɓɛ ɛpɛna.

⁴³Nɛɓa reemɗi ɓayɛtun joop gɛɛŋkik baŋɛ agut ɓaŋkawuka Waakoyotoŋk sinɔ obiiŋɔŋk. Saaɓa joop baŋɛ atukuɗ reemit ɓayaayoŋk agut any sinɛɓa ijaagik baŋɛk, nɛɓa Yeese tonu nomtaanaka gɛɛna kɛ,

⁴⁴"In gaamɛ any sini kɔna tonaak ɓayɛtunɛɛkɛ goŋk kɛ ɗɔm, Gaɓɛɛkɔɔ Tɔɔn Etoŋk ariita joopoŋk."

⁴⁵Yakanaɓa sɛɛk ki sɛɛga mɛlɛ any sinɛ tonɛɛ sɛɛgak. Dugiɗiiɓa sɛɛge any sinɛ sɛɛga tonɛɛk kɛnɔ kat mɛlɛ sɛɛga. Nɛgun ɓɔrɛ kɔɔniyaŋ nɛ ɓuriiŋ.

⁴⁶Ŋaarkiɓa nomtaanakɛ gɛɛnɛ kɔɔr palamɛ kɛ, "Wooɗ sinɛ kaalɗi eteŋkɛ baŋɛk?"

⁴⁷Nɛɓa Yeese ɗeger koɓiɗak ɓayɛtun gɛŋkik, nɛ ɗɔku tɔɔn om nɛ ari a ɛtɛ sɛɛne jɔk.

⁴⁸Nɛ tonu sɛɛga kɛ, "Iɗit sinɔ boŋu tɔɔn sini tiriyaakɛ gaanɛkik, boŋu Eet. Iɗit sinɔ boŋu Eetik, boŋu Waakoyo sinɛ kanti wosɛykik. Iɗit sinɛ bala iinakɛ baŋɛk kaalɗi sɛɛn joope baŋɛ."

⁴⁹Tonuɓa Yowanis Yeeseya kɛ, "Suumi naakɛ, dɛniikɔ iɗit sinɔ ɔɔyku wɛɛŋa sigɔ somkaanakik tiriyaakɛ goonɛkik. Yakanakɔ ɓaarɗiiŋ agut sinɔkɔ moko sɛɛn a eteŋk agut omoŋɔŋk."

⁵⁰Nɛɓa Yeese tonu kɛ, "Iɗit sinɛ kɔnu ki ɓooyɛɛk agut sinɔ sɛɛn a iinakik nɛ kat ɓaarɗɛ."

⁵¹Saaɓa wɔɔŋkuɗ ɔɔtɛ sinɔ ŋaarɗi Yeese Dariyaak, nɛɓa yawɛ ɔɔtɛ sinɔ ŋaarɗi Yorsaleemak nɛ ŋaarŋ.

⁵²Maɓa wosɛykun wosɛytaanak ɔɗɔɔkɛ son nɛɓa kaar mɛndɛra omalta sinɔɔna ar Sɛmaariyaakek kɛnɔ kaar ragadir sɛɛna any baŋɛ.

⁵³Yakanaɓa joop sigɛ atu mɛndɛre saak kir boŋiɗ agut sinɔɓa kɛɛɗi Yorsaleemak.

⁵⁴Nɛ saaɓa nomtaanak gɛɛnɛ Yaykoob a Yowanis dɛnɛrɗi any sinik, nɛɓa tonurgeeɗ kɛ, "Suumi naŋk, pɛgɛdin kɛnɔ tonii nɔ ɗirki maɗ rakaay nɔ moɗɛ sɛɛg [oko sinɛɓa ijaagiiɗ Eliyaasikiŋ]?"

⁵⁵Nɛɓa Yeese kolɛɛnyɛ nɛ goop sɛɛg [nɛ tonu sɛɛga kɛ, "Kiir ɗegerɔɔn kɛ atukuɗɔɔ wɛɛŋa wook. Kusɓa Tɔn Etoŋk kɛnɔ ebɔdɛ wɛɛŋa joopoŋk, ma moko kɛnɔ sɔɔkɛ sɛɛg."]

⁵⁶Nɛɓa kaar mɛndɛra omalta.

⁵⁷Saaɓa kaarɗi Yeese a nomtaanak gɛɛŋk gopɛk, nɛɓa widiki ɛɛk iɗit om nɛ tongeeɗ kɛ, "Noma kɔɔreene gopɛ sinaanɛ kɛɛɗink baŋɛ."

⁵⁸Nɛɓa Yeese tongeeɗ kɛ, "Latu waŋgoya utulakiŋ, maɓɔrɛ latu teetɔɔk wɛykɔkuŋ, ma kɛɛ aasi Toomoy Etoŋk nyon sinɔ imiinyeeɗik."

⁵⁹Maɓa tonu eta omalta kɛ, "Nomate." Nɛɓa iɗit sinɛ tongeeɗ kɛ, "Suumi naakɛ, pɛgɛdita kɛnɔ tɛɛnan kɛɛɗa kɔɔwa baabɛɛ."

⁶⁰Nɛɓa Yeese tongeeɗ kɛ, "Toŋoɗu reteer nɔ sɛɛg kɔwar reter gɛŋk, ma seŋk mak nɔ kɛɛɗin rɔɔriyaakin agut burɛ Waakoyotoŋk."

⁶¹Maɓa iɗit omaay tongeeɗ kɛ, "Suumi naakɛ, noma kɔɔreeneŋ, mayakana pɛgɛdita nɔ muura nɔ tɛɛnan kɛɛɗii pakakatikii a joop wɛy naakik."

⁶²Yakanaɓa Yeese tongeeɗ kɛ, "Ɔkɔn iɗit omaay tuke nomɛ eetek ɛ kolɛɛnyɛ baŋiyaaŋ, nɛ iɗit sinɛ ki gayɛ burɛya Waakoyotoŋk."