Read majang Yowanis 1 Bible Online

Yowanis 1 - majang bible

Yowanis 1

¹Olaatɛ baŋɛ tuki nɛɛkɛɛk lakɛɓa Pɛɛni. Pɛɛni nɛɛk arɓa sooy lak Waakoyok. Pɛɛni sini Waakoyoɓa.

²Sɛɛn a tukiɗi tuki nɛɛkɛ arɓa sooy lak Waakoyok.

³Riiɓeɓa Waakoyot ola baŋɛ sɛɛne. Olaatɛ sigaagɛɓa riiɓe Waakoyotuk baŋɛ kɛɛ any sinɔɓa riiɓɛɛ a kiiɗɛ sɛɛnik.

⁴Atuɓa wɛɛŋak sɛɛne, egeɓa wɛɛŋa sigi pɛɗɛrka joopoŋk.

⁵Tipeyɗi pɛɗɛrka nɛɛkɛ nyuugur tak, ki nyuugur nɛɛkɛ lɔsɛɛɗ pɛɗɛrka nɛɛk adaktan.

⁶Lakɛɓa iɗit sinɔɓa wosɛykɛɛ sooy lak Waakoyok sinɔɓa riyɛ kɛ Yowanisik.

⁷Kusɓa kɛnɔ waasiɗi agut pɛɗɛrka, kɛnɔ joop baŋɛ ŋaadiɗi ɔɔtɛ nɛɛkɛɛk.

⁸Mokoɓa pɛɗɛrka nɛɛk sɛɛn ɔɗɔwa nɛɛka, maɓa kus kɛnɔ waasiɗi agut pɛɗɛrka.

⁹Ɛnyɛnyɛkiɓa pɛɗɛrka sinɔ eekerkank ɗooka sinɔ tipɛyɗi joopa baŋɛk.

¹⁰Ɓɛɛlɛɓa pɛɗɛrka nɛɛkɛ ɗook raŋk, yakanaɓa ɗook ki sɛɛn ɗegerɔɔn kɛygunɓa riiɓkɛ sɛŋkiŋ.

¹¹Kusɓa son lak tekaaneer gɛɛŋkik, yakanaɓa kir sɛɛn boŋiiɗ tekaaner gɛɛnɛɛk.

¹²Yakana joop sigɛ boŋurk a sigɛ ŋaadiɗi tiriyaakɛ Gɛɛnɛkik baŋɛ, gaɓɛɓa sɛɛga ɓaŋkawuka sinɔ sɛɛg tɔɔmɔk Waakoyotoŋkuk.

¹³Ɓartɛɛɓa sɛɛg Waakoyote, ma mokoɓa sɛɛg ɓartɛɛ komoy etoŋk maŋk barɛɛɗ taaroŋk ɗɛɛyaan etoŋk.

¹⁴Nɛɓa gayɛ pɛɛnii a Iɗit nɛ enyɛɛri wookan a eekeer nɛ beeɗ eteŋkɛ kɔɔr. Nɛɓa dɛnii eemɛyɔn nɛɛkiŋ, oko eemɛyɔn Tɔɔn sinɔ omoŋɔŋk Ɛpɛneek, sinɛ ar sooy lak Ɛpɛnik.

¹⁵Waasɛɓa Yowanis agut sɛɛn kɛ, "Ege sini Iɗit sinɛkan kɔna tona kɛ mɛlkikɔɔ eete baŋik kaalɛ sɛŋk eetiŋ, agut sinɔɓa ɓɛɛlɛɛɗ eete jeemɛk."

¹⁶Boŋiikɔ wookan wookaana raŋana eteŋk baŋɛ enyaakaat mɛyin nɛɛkik.

¹⁷Agut sinɔ gaɓɛɛɓa higi goy Muuseek, ma wookan a eekeer kurakɓa goy Yeeseek.

¹⁸Kɛɛ iɗit sinɔɓa dɛnɛ Waakoyok adaktan, mayakana yaaŋɛɓa eteŋka Tɔɔn nɛɛk sinɔ omoŋɔŋk dakɛɗa sinɛ ar sooy lak Ɛpɛn Waakoyok.

¹⁹Saaɓa ɔɗɔweer Ayuuduk wosɛyɛrɗi tapa ŋaadiyɛɛkoŋk a joop Leewiik Yorsaleeme son lak Yowanisik kɛnɔ kaar kɔɔniyar kɛ sɛɛn wooɗuk,

²⁰nɛɓa sɛŋk ki kaadɛɛt, maɓa tonu kɛ, "Moko eet Keresee."

²¹Nɛɓa sɛɛk kɔɔniyar kɛ, "Anɛ iin wooɗ? Iin Eliyaas?" Nɛ jumur sɛɛga kɛ, "Moko eet sɛɛn." Nɛɓa tonurgeeɗ kɛ, "Iin iɗit Pɛrkaakoŋk sinɛɓa tonɛɛ kɛ mɛlkikoynɔŋɔŋk?" Nɛ tonu kɛ, "Moko eet sɛɛn."

²²Nɛɓa sɛɛk tonurgeeɗ kɛ, "Anɛ iin wooɗ? Tonun agut ɛɛk nook ɛk kɛnɔ kɛɛɗii jumurii joopa sigaagakɔ tin wosɛyɛrkik?"

²³Nɛɓa Yowanis jumur pɛɛni iɗit pɛrkaakoŋk Isaayasik kɛ, "Eet koŋgoy iɗit sinɔ oo'oy sinɔɔnɛ paatoonoŋk kɛ, 'In isiisɛɛ gopan Suumiyoŋk."'

²⁴Wosɛykɛɛɓa joop gɛɛŋk sooy lak joop Paarisik

²⁵Nɛɓa kɔɔniyar kɛ, "Nɛ ɔkɔn moko iin Keresee maŋk Eliyaas maŋk iɗit Pɛrkaakoŋk sinɛɓa tonɛɛ kɛ mɛlkikoynɔŋɔŋk, anɛ aadiɗiikin agut jikon?"

²⁶Nɛɓa Yowanis jumur sɛɛga kɛ, "Aada saak kɔnu maawɛ, mayakana iɗit sinɔ kiir ɗegerɔɔnuk ɛtɛ kɔne kɔɔr.

²⁷Mɛlkikɔɔ sɛŋk eete baŋi, kaa saak oolɛ a woora melti saamɛyɛ gɛɛŋkikŋ."

²⁸Arɓa any sini Bitaniyaake sinaanɛ ar ɗeesɔ Gɔrɔ Yordanoos sinɛɓa aadiɗiiɗ Yowanisik.

²⁹Alɛ nɛɛkɛɛk dɛnɛɓa Yowanis Yeesee a kus son lak sɛɛnik nɛ tonu kɛ, "In dɛnɛɛko! Jiŋkuy Waakoyotoŋk sinɛkɔɔ ɔɔyɛ tikiyɛ ɗookoŋkuk sɛɛn sini!

³⁰Sɛɛn sinɛɓa kɔna tona kɛ, 'Iɗit sinɛkɔɔ mɛlki eete baŋik kaalɛ eet agut sinɔ ɓɛɛlɛɓa eete jeemɛk.'

³¹Kaaɓa ɓɔra sɛɛn ɗegerɔɔn, mayakana kusaakan a aadiɗiika maawɛ kɛnɔ sɛŋk yaaŋɛ ɛɛk joopa Israeelik."

³²Saadi waasɛɓa Yowanis kɛ, "Dɛnaakan Wɛɛŋa sigɔ Geetitaanakik a kurak sɛɛna raŋana dari a ito kulɓeer.

³³Kaaɓa ɓɔra ɗegerɔɔn mayakana iɗit sinɛkanti wosɛyki kɛnɔ aadiɗiika maawɛɛk tonukanta sɛŋk kɛ, 'Dɛninkɔɔ Wɛɛŋa sigɔ Geetitaanakik a kurak nɛ dokur ete omalte raŋk, nɛ iɗit sinɛ sɛɛn sinɛkɔɔ aadiɗi Wɛɛŋakɛ sigɔɔgɛ Geetitaanakik.'

³⁴Dɛnaakan ɓɔra siniŋ, nɛ waasa kɛ sɛɛn Tɔɔn Waakoyotoŋk."

³⁵Alɛ nɛɛkɛɛk ɛtɛrɓa Yowanis a nomtaanak gɛɛŋk sigɔ pɛɛyk saadi kɛkar.

³⁶Dɛnɛɓa Yowanis Yeesee saa ɗoyiɗ sinaanɛk nɛɓa tonu kɛ, "In dɛnɛɛko, Jiŋkuy Waakoyotoŋk!"

³⁷Nomtaanak Yowanisik sigɛ pɛɛyk tiyɛrɓa saa toniiɗ Yowanis any sinik, nɛɓa nomɛrɗi Yeesee.

³⁸Nɛɓa Yeese kolɛɛnyɛ nɛ dɛnɛ sɛɛg saa nomɛrɗik, nɛ tonu sɛɛga kɛ, "Ɗɛyɛɛr jikon?" Nɛɓa sɛɛk tonurgeeɗ kɛ, "Iin Rabi ɓɛɓɛlin eet?" See kɛ Rabik sigi kɛ rɔɔriytank.

³⁹Nɛɓa Yeese tonu sɛɛga kɛ, "In kusɛɛ dɛnɛɛ." Nɛɓa kaar a sɛɛn agut omoŋ nɛ kaar dɛnɛr kɛ ɓɛɓɛl eet, nɛɓa ɓeny sinaanɛ gaala a sɛɛn agut omoŋ. Maɓa ar ɔɔtɛ nɛɛkɛ sayitiyɛɛkɛ sigɔɔgɛ aarink.

⁴⁰Joop sigɛɓa tiyɛr pɛɛni sinɛɓa tonu Yowanisik nɔɓa nomɛr Yeeseek, egeɓa omaay Indiriyaas, manya Simion Petrosa.

⁴¹Tuki nɛɛkɛ kɛɛɓa Indiriyaas son lak manyaak Simionuk, nɛ tongeeɗ kɛ, "Laŋiikɔ Mɛsiiŋ." See kɛ Mɛsiik sigi kɛ Kereseek.

⁴²Saadi baŋiya ɗɔkuɓa Indiriyaas Simion son lak Yeeseek. Nɛɓa Yeese mermen jɛt, nɛ tongeeɗ kɛ, "Iin Simion, tɔɔn Yoonaak, mayakana a tukiɗi sisɔ riyɛni kɛ Keepaa." See kɛ Keepaak sigi kɛ Petros maŋk talaaɗɛk.

⁴³Alɛ nɛɛkɛ ɗɛyɛɓa Yeese ɛnyɛ Gɛlilaakaak. Nɛɓa laŋki Pilipoos nɛ tongeeɗ kɛ, "Nomate."

⁴⁴Pilipoos iɗitɓa Beetɛ Saydaak, katamɛ wɛy Indiriyaas a Petrosuk.

⁴⁵Laŋkiɓa Pilipoos Naatinaeel nɛ tongeeɗ kɛ, "Laŋkiikɔ iɗit sinɛɓa taapɛ Muuse Wargatɛɛ Higiyoŋk maɓa ɓɔrɛ joop pɛrkaakoŋk taapɛr Wargatɛɛ Pɛrkaakoŋk agut sɛɛnik. Sɛɛn Yeesee Naajreetik tɔɔn Yoosepuk."

⁴⁶Nɛɓa Naatinael tonu Pilipoosa kɛ, "Oolɛ aasi a laŋɛɛ Naajireete any sinɔ mentanŋɔŋkuŋ?" Nɛ Pilipoos tongeeɗ kɛ, "Waɗ dɛnik."

⁴⁷Saaɓa Yeese dɛnɛɛɗ Naatinaeel a kus son lak sɛɛnik, nɛɓa tonu agut sɛɛn kɛ, "Ege sini iɗit Israeelik sinɔ eekerkank, ɛ kiiɗɛ koɓi sinɔ ŋɛɛwɛnŋɔŋk."

⁴⁸Nɛɓa Naatinael tongeeɗ kɛ, "Ɗegerinti ɛk?" Nɛɓa Yeese jumurgeeɗ kɛ, "Dɛnɛɛra kɔnu a arkin keet bɛlɛɛsik derɛ, a in kɔnu Pilipoos kiir tirii."

⁴⁹Ɔɔtɛ sinaanɛ tonuɓa Naatinael kɛ, "Rɔɔriytaano, iin Tɔɔn Waakoyotoŋk! Iin Suumi Israeelik!"

⁵⁰Nɛɓa Yeese tongeeɗ kɛ, "Ŋaadin agut sinɔ kɔna toniiɗa kɛ, 'Dɛnɛɛra kɔnu a arkin keet bɛlɛɛsik derɛk.' Dɛninkɔɔ ola sigɔ kaalɛr sinik.

⁵¹Nɛɓa tonu kɛ, "Eekeer tona kɔnaaŋ, dɛnɛɛrkɔɔ a tayɗi dari, nɛ ŋaararki wosɛytaanak Waakoyotoŋk nɛ kurak Tɔɔna Etoŋk."