Read majang Yowanis 12 Bible Online

Yowanis 12 - majang bible

Yowanis 12

¹Saaɓa dakɛɛtarkiɗ ɗoŋ a tula om Ba'aala Ɗoyiɗoŋk, nɛɓa Yeese ŋaar Bitaniyaaka. Bitaniyaa mɛndɛr sinɛ beeɗiɗ Alaajaar sinɛɓa boŋku Yeese ret walasak.

²Ragadɛɛɓa saadi ɗama ajigeyoŋk Yeeseya. Nɛɓa Martaa wɔɔriiŋ, beeɗirɓa Alaajar a Yeesee agut omoŋ nyon ɗamatoŋk.

³Saaɓak boŋuɓa Maariyam reyaay sinɔ obi gati nɛɛkɛ jɛtik sinɔ riyɛ kɛ nardoosuk sinɔ mentanŋɔŋk a bitak liitirii, nɛ ɗonyɛɛɗ derak Yeeseek nɛ poosɛ sɛɛg amikɛ gɛɛnɛk. Nɛɓa gode nɛɛkɛ ŋaaɗɛ reyaay dakɛɗa.

⁴Nomtaanakɛ gɛɛnɛ om, Yuudaa Keriyootuk sinɛkɔɔ gaɓɛ Yeeseek tonuɓa kɛ,

⁵"Mokɔ ɓalɗiiɗikɛɛ reyaaye sineene a biriyatɔk ɗibɛɛ jiit, nɔ gaɓɛɛ wori nɛɛk sankaanakaak?"

⁶Nɔɓa toniiɗ sinik mokoɓa sanɗigeeɗ sankaanak, ma agut sinɔɓa sɛɛn agaltik. Lolowiɓa kosɛ sinɛ woriyoŋk sɛɛn. Nɛɓa barɛ any sinɔ boŋku wori sinɛ gagaɓɛɛ saanak.

⁷Nɛɓa Yeese tonu kɛ, "In ŋɔɗurɛɛ agut sinɔkɔ ijaagiiɗ ragad ɓɛɛnyɔwa sinaakɔɔtu kɔwuɗɛɛkik.

⁸Sankaanak sɛɛg a iinak agut omoŋ ɓɛɛnyɔwɛ gɛɛŋk baŋɛ, ma eet kɛɛ kɔɔtu a iinak agut omoŋ ɓɛɛnyɔwɛ gɛɛŋk baŋɛ."

⁹Saaɓak joop Ayuuduk a ɓɔɔkaaŋ ɗegerarɓa kɛ ar Yeese Bitaniyaake nɛ kurakiŋ. Mokoɓa kurak agut Yeesee dakɛɗa, kurakɓa omaay kɛnɔ dɛnɛr Alaajaar sinɛkan boŋku Yeese ret walasak.

¹⁰Ɔɗɔweer tapa ŋaadiyɛɛkoŋk waasiɗiiɓa kɛnɔ ɓɔrɛ ɓokotɛɛ Alaajaar,

¹¹agut sinɔɓa joop Ayuuduk a ɓɔɔkaaŋ kurakiɗ son lak Yeeseek, nɛ ŋaadir agut sɛɛnik.

¹²Alɛ nɛɛkɛɛk joop a ɓɔɔkaaŋ sigɛɓa kurak Ba'aala Ɗoyiɗoŋk tiyɛrɓa kɛ mɛlkikɔɔ Yeese Yorsaleemaŋ.

¹³Nɛɓa ŋaararki a latu rɛkɛnak bɔdɛyɛɛkoŋk kɛnɔ boŋur, nɛɓa ooyɛr kɛ, "In dakɛr pɔɔsiyɛɛk Waakoyota! Geetitan iɗit sinɔ kus tiriyaakɛ Suumiyoŋkuk! Suumi Israeelik geetitan!"

¹⁴Laŋkiɓa Yeese tɔɔn kuroyoŋk nɛ beeɗiɗ raŋk, nɔ ɓɛɛlɛɛɗ sinik oko sinɛɓa taapɛɛɗɛɛ Wargatɛɛ Waakoyotoŋk kɛ,

¹⁵"Kat ɓuriikɛɛ, iinak joop Yorsaleemuk. In dɛnɛɛko Suumi noŋk kusuŋ, a beeɗ toomoy kuroyoŋk raŋk."

¹⁶Nomtaanak gɛɛŋk kiɓa sɛɛga tuki nɛɛkɛ mɛlɛɛ any sini. Yakana saaɓa Yeese guugunyɗu nyona eemɛyɔɔnoŋk baŋiya, nɛɓa koɓurku kɛ taapɛɛɓa any sini agut sɛɛn ɛ kɛ ijaagɛɛkɔ sɛɛna.

¹⁷Joop sigɛɓa ɓɛɛlɛr agut omoŋ saaɓa Yeese riyiirkiɗ Alaajaar piya nɔɓa boŋkuɗ ret walasak, waawasarɓa ɔɔtɛ Yeeseek.

¹⁸Joop a ɓɔɔkaaŋ nɔɓa ŋaararkiɗ nɔ boŋurk agut sinɔɓa tiyɛrɗi kɛ ijaagkɔ any sinɔ reemɗi ɓayɛk.

¹⁹Joop Paarisik tonurɓa ɛkanɛɛkɛ gɛŋk kɛ, "Dɛnɛɛriŋ dɔɔs a seek arii jikon. Nomɛrɗi joop ɗookoŋk baŋɛ sɛɛn!"

²⁰Ɔɔtɛ sinaanɛɓa Ba'aal Ɗoyiɗoŋk joope sigaagɛɓa kurak Yorsaleema kɛnɔ eemɛyar Ba'aal nɛɛkik kɔɔr egeɓa a omoŋ omoŋ joop Giriikik.

²¹Nɛɓa sɛɛk wideetar ɛɛk son lak Pilipoosuk, nɛ kalɛyir kɛ, "Suumi naakɛ, ɗɛyii a dɛnii Yeese." Pilipoos nyakɓa nɛɛk Gɛlilaake Beetɛ Saydaake.

²²Nɛɓa Pilipoos kɛɛ nɛ kɛɛ tonu Indiriyaasa, nɛ Indiriyaas a Pilipoos kaar agut omoŋ nɛ kaar tonur Yeeseya.

²³Nɛɓa Yeese tonu sɛɛga kɛ, "Gayɛkɔ sayiti sinɔ eemɛyɗɛɛ Tɔɔn Etoŋkuŋ.

²⁴Eekeer tona kɔnaaŋ, ɔkɔn taama ŋeɗenytoŋk kiiki ɗiirin ɗooka nɔ rɛrŋ, nɛkoy dakɛ mowan. Ma ɔkɔn rɛrŋ, nɛkoy gaɓɛ taamɛ a ɓɔɔkaaŋ.

²⁵Iɗit sinɔ poru wɛɛŋa gɛɛŋkik, sɔɔkɛ sɛɛgiŋ. Mayakana iɗit sinɔ ɓooyu wɛɛŋa gɛɛŋk ɗook sineene raŋk, laŋkoy wɛɛŋa sigɛkoy nɔkoy nɔkoyk.

²⁶Iɗit sinɔ ɗɛyɛ ijaag eetaak, in nomɛɛ eete, arkoy ɓɔrɛ ijaagen naakɛ saadi arkiɗaak. Iɗit sinɔ ijaagɗi eetaak, eemɛy Baabɛɛŋ.

²⁷"Sisɔ sanɗi wɛɛŋa gaanɛŋ jɛt. Anɛ ɗanɗamaaka kɛ, 'Iin Baabɛɛ naak, koolutu sayitii sineeneŋ'? Yakana kat. Agut sinɔ kan kusuɗa agut sayiti sini rakatɛyoŋk.

²⁸Iin Baabɛɛ naak, eemɛy tiriya gooŋk." Nɛɓa saadi baŋiya kus koŋgoy dari sinɔ tonu kɛ, "Eemɛyaɓa tiriya gaaŋkiŋ, ɛkɔɔ eemɛya sɛɛg kɛkar."

²⁹Joop sigɛɓa ɛtɛtɛɗar saadik saaɓa tiyɛrɗi sinik, nɛɓa tonur kɛ, "Tɛɓɛr talaloŋk." Ma ɔgɔɔk tonur kɛ, "Tonɗi sɛɛna wosɛytan Waakoyotoŋk."

³⁰Nɛɓa Yeese jumur sɛɛga kɛ, "Kuskɔ koŋgoy sini agut iinak, ma mokokɔ agut eet.

³¹Ɔɔtɛ sinɔ pɛrɛdɛɗɛɛ ɗookuk sɛɛn sini sisɔk. Ɔɗɔwen ɗoo sinik setan ɔɔyɛɛrɛ walasa sisɔ.

³²Saati laalawuɗɛɛ ɗook sineene rakaayk, nɛkɔɔ puruutuka joop baŋɛ son lak eetik."

³³Nɔɓa Yeese toniiɗ sinik, yaaŋɛɓa sinɔ kɛ rɛrkɔɔ rer sinɔ ɓɛɛlɛ ɛkik.

³⁴Nɛɓa tonurgeeɗ joop gɛɛnɛk kɛ, "Taapɛɛɓa higii naŋk kɛ Keresee beeɗkoy nɔkoy nɔkoyk. Anɛ seŋk tonun kɛ ɗɛyɛ Tɔɔna Etoŋk a laalawɛɛ rakaay ɛk? Ma ege Tɔn sini Etoŋk wooɗ?"

³⁵Nɛɓa Yeese tonu sɛɛga kɛ, "Sisɔ ɔɔtɛya sinɔɔna balaaŋɔŋk ɓɛɛlɛkɔɔ pɛɗɛrkaat sooy lak iinakikiŋ. In weeweriikɛɛ, a in kɔna ɓɛɛlɛ pɛɗɛrkaatiŋ kɛnɔ mokɔɔ kɔna mɛlki nyuugur. Iɗit sinɔ weeweri nyuugurk, ki ɗegerɔɔn kɛ kɛɛ etena.

³⁶In ŋaadiɗiikɛɛ pɛɗɛrkaat a in ɓɛɛlɛ pɛɗɛrkaatiŋ, kɛnɔkɔɔ iinak tɔɔmɔk pɛɗɛrkaatoŋk." Saaɓa Yeese toniiɗ sinik baŋiya, nɛɓa ŋaar nɛ dugiɗi sɛɛgeeŋ.

³⁷Kɛygunɓa Yeese ijaagkɛ sɔɔriyɛ sigɔ ɛtɛr oko sinik sɛɛge taamɛkɛŋ, nɛɓa sɛɛk kir sɛɛn ŋaadit.

³⁸Nɔ ɓɛɛlɛɛɗ sinik kɛnɔ dusanɛɛ pɛɛni sinɛɓa tonu iɗit pɛrkaakoŋk Isaayas kɛ, "Suumi naakɛ, ŋaadi waasiyɛ gaŋk wooɗ? Yaaŋɛɓa ɛɛk ɓaŋkawuka Waakoyotoŋk wooɗa?"

³⁹Agut sini kirɓa oolɛ ŋaadiyɛ agut sinɔɓa taapɛɛɗ Isaayas kɛkar kɛ,

⁴⁰"Miinyeɓa Suumii taamɛ gɛŋk nɛ sɛɛg kir dɛnɗiit. Ariɓa ɓayɛtun gɛŋk a kilararŋ nɛ kir koɓiit, nɛ kirki weeriit kɛnɔ kat ebɔdɛ sɛɛg Suumii."

⁴¹Nɔɓa Isaayas toniiɗ sinik agut sinɔɓa dɛnɛɛɗ eemɛyɔn, nɛɓa tonu sini agut sɛɛn.

⁴²Ŋaadirɓa aasi Yeesee ɔɗɔweer Ayuuduk a ɓɔɔkaaŋ. Yakanaɓa ɓurer joop Paarisik kɛnɔ kat ɔɔyɛrki sɛɛg godeey tolɛɛɗoŋk Ayuuduk, nɛɓa kir waasɛt ɔɔtɛ nɛɛk a ɗegerɛɛŋ.

⁴³Joop sigi porurɓa eemɛyɔn sinɔ laŋɛɛ etek a kaalɛ eemɛyɔn sinɔ laŋɛɛ Waakoyotek.

⁴⁴Tonuɓa Yeese a ɗooruŋ kɛ, "Iɗit sinɔ ŋaadi eetik, moko ŋaadi eet dakɛɗa. Ŋaadiɗi ɓɔrɛ Baabɛye sinaanɛkanti wosɛykkiŋ.

⁴⁵Iɗit sinɔ dɛnɛ eetik, dɛnɛ Waakoyo sinɛkanti wosɛykik.

⁴⁶Kusaakan saak a pɛɗɛrka ɗooka kɛnɔ iɗit sinɛ ŋaadi eetik baŋɛ, nɔ kat beeɗ nyuugur.

⁴⁷Iɗit sinɔ tiyɛ pɛɛni naak nɛ ki ijaagɛk, mokokoy pɛrɛdɛɛɗa saak agut sinɔ kusaakan saak kɛnɔ ebɔda joop ɗookoŋk, ma mokokan kɛnɔ pɛrɛda joope ɗookoŋk.

⁴⁸Iɗit sinɔ ki ɗɛyɛ eetik ɛ ki boŋiiɗ pɛɛni naakik, ɓɛɛlɛ any sinɛkoy pɛrɛdɛ sɛɛnekiŋ. Pɛɛni sinɛkan waasaak pɛrɛdɛkoy sɛɛne ɓeny sinaanɛkoy pediyoŋkuŋ.

⁴⁹Moko tonɗiiɗa ɓaŋkawuka naak, any sinɛ rɔɔrɔkaak sekiyɛ sigɛ kanta gaɓɛ Baabɛɛ sinɛkanti wosɛykik.

⁵⁰Ɗegera kɛ sekiyɛ gɛɛŋk laŋiiɗɛɛkoy wɛɛŋa sigɛkoy nɔkoy nɔkoyk, agut sini tona any sinɛkanta tonu Baabɛɛk."