Read majang Yowanis 16 Bible Online

Yowanis 16 - majang bible

Yowanis 16

¹Tonuɓa Yeese kɛkar kɛ "Nɔkan kɔna toniiɗa sini baŋɛk kɛnɔ kat ɓeesiɗi ŋaadiyɛ goŋk nɔ ŋɔɗari sɛɛg.

²Boŋurkukoy kɔnu godeyikɛ tolɛɛɗoŋk Ayuuduk walasa nɛ kɔnu ɔɔyɛrŋ. Oko sinɛk mɛlkikoy ɔɔtɛ sinɔ joop sigɛ kɔnu ɓokootark baŋɛ arirɗi ɛɛk a ito joop sigɔ ijaagɗi Waakoyotaak.

³Nɔ ijaagirɗi any sinik agut sinɔ kirɗi ɗegerɔɔn Baabɛɛk kɛygun eetik.

⁴Nɔ kɔna toniiɗa sinik kɛnɔ koy koɓurkɔɔ kɛ tonakan kɔna jikon, saakoy gayɛɛɗ ɔɔtɛ nɛɛkɛkik. Nɔkan kɔna kiiɗa sini toniiɗ jeemɛk agut sinɔkan eet a iinak agut omoŋɔŋk.

⁵"Yakana sisɔ ŋaara son lak Baabɛɛ sinɛkanti wosɛykik, nɛ iinakɛ kɛɛ iɗit sinɔtu kɔɔniy kɛ, 'Ŋaarin etenak?'

⁶Agut sinɔkan kɔna toniiɗa sini baŋɛŋɔŋk, nɛ sanɗi ɓayɛtun goŋk jɛt.

⁷Yakana tona kɔna saak eekeer, kɔnyɛ kɔnu ŋaarin naakɛɛŋ agut sinɔ ɔkɔn kaa ŋaarinŋ, nɛkɔɔ kiiki mɛlɛɛ Gaanantan nɛɛkɛ son lak iinakik. Ma yakana ɔkɔn ŋaaraaŋ, nɛkɔɔ wosɛyka son lak iinakikiŋ.

⁸Saakɔɔ sɛŋk mɛlkiɗik, nɛkɔɔ yaaŋɛ joopa ɗookoŋk tikiyɛ a mentanka a pirdi kɛ moko liki.

⁹Nɔkɔɔ yaaŋɛɛɗ ɔɔtɛ tikiyɛɛkoŋkuk kɛ moko likik agut sinɔ kirɗi ŋaadit eetik.

¹⁰Nɔkɔɔ yaaŋɛɛɗ ɔɔtɛ mentanka taamɛkɛ Waakoyotoŋkuk agut sinɔ ŋaarɗa son lak Baabɛɛk, ɛ agut sinɔ kɔɔtu kirɗɔ taanta a tukiɗi sisɔɔk.

¹¹Nɔkɔɔ yaaŋɛɛɗ ɔɔtɛ pirdiyoŋkuk agut sinɔɓa pɛrɛɗɛɗɛɛ ete sinaanɛ ɓali ɗoo sinik.

¹²"Lakɛ any sinɔkɔɔ kɔna tonaŋɔŋk a obiiŋ, yakana ɓaŋkawu kɔna sisɔŋ.

¹³Saakɔɔ mɛlɛrkiɗ wɛɛŋa eekeeroŋkuk, diilerkɔɔ kɔnu eekeera. Agut sinɔ waasɛr sɛɛk any sinɔkan tiyɛrk, ma moko any nɛŋk, tonurkɔɔ kɔna ola sigɔkoy ɓɛɛlɛr ɔɗɔɔkak.

¹⁴Agut sinɔ boŋiiɗ any sinɔ naak nɛ tonu iinakaak, nɛ eemɛy eet.

¹⁵Any Baabɛɛkik baŋɛ nɛ naak. Nɔkɔ kɔna toniiɗa kɛ, 'Boŋu any sinɔ naak nɛ tonu iinakaak,' agut sini."

¹⁶Tonuɓa Yeese kɛkar kɛ, "Ɔɔtɛ sinɔɔnɛ balaaŋɔŋk baŋiya kiir kɔɔtu taanta, maɓɔrɛ ɔɔtɛ sinɔɔnɛ balaaŋɔŋk baŋiya dɛnɛɛr kɔɔtuŋ."

¹⁷Tonurɓa nomtaanak gɛɛŋk a omoŋ omoŋ ɛkanɛɛkɛ gɛŋk kɛ, "Jikon sini tina tonu kɛ, 'Ɔɔtɛ sinɔɔnɛ balaaŋɔŋk baŋiya kiirkɔɔtu taanta, maɓɔrɛ ɔɔtɛ sinɔɔnɛ balaaŋɔŋk baŋiya dɛnɛɛrkɔɔtuŋɔŋk ɛ ɓɔrɛ kɛ ŋaara son lak Baabɛɛk'?"

¹⁸Tonurɓa kɛ, "Sisɔ jikon sinɛ tonu kɛ, 'ɔɔtɛ sinɔɔnɛ balaaŋɔŋk'? Kii ɗegerɔɔn any sinɛ tonuk."

¹⁹Nɛɓa Yeese ɗeger kɛ ɗɛyɛr sɛɛn kɔɔniyɔɔna agut any sini, nɛ tonu sɛɛga kɛ, "Nɔ kɔniniyiɗɔ ɛkanɛɛkɛ goŋkuk agut sinɔkɔ kɔna toniiɗa kɛ, 'Ɔɔtɛ sinɔɔnɛ balaaŋɔŋk baŋiya, kiir kɔɔtu taanta, maɓɔrɛ ɔɔtɛ sinɔɔnɛ balaaŋɔŋk baŋiya dɛnɛɛrkɔɔtuŋɔŋk'?

²⁰Eekeer tona kɔnaaŋ, kuɗeerkɔɔ sɔɔkuŋ, makɔɔ sɛŋk yaa joopa ɗookoŋkuŋ. Sanɗikarkɔɔ sɔɔkuŋ, mayakana san noŋk weerɛkɔɔ ɛɛk a yaakata.

²¹Saa jartii ɗɛyɛɛɗ ɓartɛɛtik, nɛ saa gayɛɛɗ ɔɔtɛ sinɛ ɓartɛɛɗik nɛ ɓakɛyɗiiŋ. Ma saakɔɔ ɓartɛɛɗik baŋiya, nɛ yaageeɗ a kiiki koɓiiɗ ɓakɛy sinɛkɔ nɛɛk agut sinɔkɔ ɓartɛɛɗɛɛ tɔɔn ɗook raŋk.

²²Maɓɔrɛ iinak sanɗikar sisɔŋ, dɛnaakɔɔ kɔnu kɛkarŋ. Yaakɔɔ ɓayɛ noŋkuŋ. Kɛɛ iɗit sinɔkɔɔ kɔne boŋu yaaka noŋkuk.

²³Waawuy sinaanɛkoy kɛɛ any sinɔkoy kalɛyiir eeteek. Eekeer tona kɔnaaŋ, any sinɛ kalɛyiir Baabɛye tiriyaakɛ gaanɛkik baŋɛ gaɓɛkɔɔ kɔnaaŋ.

²⁴In kɛɛ any sinɔkan kalɛyiir tiriyaakɛ gaanɛkik nɔ mɛlɛɛɗa sisɔwa. In kalɛyɛɛ, gaɓɛɛkɔɔ kɔnaaŋ, enyaakɔɔ yaaka noŋkuŋ.

²⁵"Tonɗiikaakan kɔna rɔmɛɛɗ nɔ mɛlɛɛɗa sisɔwa, a tukiɗi sisɔ mɛlkikɔɔ ɔɔtɛ sinɔkɔɔ kiiɗa tonɗiit rɔmɛɛɗikiŋ. Mayakana tona kɔna any baŋɛ a mɛlɛŋ agut Baabɛɛ.

²⁶Saakoyk kalɛyiirkoy tiriyaakɛ gaanɛk. Kaakoy kɔna toniiɗ kɛ kalɛyakɔɔ kɔna Baabɛɛŋ.

²⁷Poru kɔnu Baabɛɛ agut sinɔtu porurɗɔ, ɛ ŋaadiir kɛ kusaakan sooy lak Waakoyok.

²⁸Ŋaarkakan sooy lak Baabɛɛk nɛ mɛlka ɗooka sineena. Nɛkɔɔ ŋɔɗa ɗoo sini kɛkar nɛ ŋaara son lak Baabɛɛk."

²⁹Nɛɓa nomtaanak gɛɛnɛ tonur kɛ, " Tonɗiikinkɔ sisɔ a mɛlɛŋ a moko rɔmɛɛɗ.

³⁰Ɗegerii sisɔ kɛ ɗegerin any baŋɛ a kɛɛ iɗit sinɔ ɗɛygeeɗ ani kɔɔniyŋɔŋk. Agut sini ŋaadii kɛ kusunkan sooy lak Waakoyok."

³¹Nɛɓa Yeese jumur sɛɛga kɛ, "Ŋaadiɗiikari sisɔŋ!

³²Mɛlkikɔɔ ɔɔtɛ sinɔkɔɔ kɛɛtiɗiiɗɔ iinak a omoŋ omoŋ ɛkana goŋk, nɔkɔɔtu ŋɔɗari mowankiŋ. Sisɔ gayɛkɔ ɔɔtɛ nɛɛkɛɛŋ. Yakana moko eet mowan agut sinɔ Baabɛɛ a eet agut omoŋɔŋk.

³³Nɔkan kɔna toniiɗa sinik kɛnɔ atukari eete nɔ laŋiir yaaka. Saa atukuɗɔɔ ɗook raŋk nɛ latukari rakatɛ, mayakana kɛɛ any lɔsaakan saak ɗooŋ."