Read majang Yowanis 20 Bible Online

Yowanis 20 - majang bible

Yowanis 20

¹Kɛɛɓa Maariyam Mɛgdooluk waawuy Sambatɛyoŋk kuleet a in kɔjuɗɛɛg saana lak pii Yeeseek. Saaɓa mɛlɛɛɗ saanak, nɛɓa dɛnɛ a kɔ girgiɗiik giɗee sinɛkan koriiɗɛɛ pii nɛɛkik ad nɛɛkɛɛŋ.

²Nɛɓa sɛŋk reeri son lak Simion Petrosuk a son lak nomtan nɛɛk om sinɔɓa poru Yeesek, nɛ tonu sɛɛga kɛ, "Boŋkɛɛkɔrɔ Suumi pii nɛɛkɛɛŋ, nɛ kii ɗegerɔɔn kɛ riiɓɛɛkɔ eet."

³Nɛɓa Petros a nomtan sinɛ omk ŋaararki nɛ kaar saana lak pii nɛɛkik

⁴Reerirɓa a getu pɛɛy. Nɛɓa nomtan sinɛ omaayk reeri a gorgor a kaalɛ Petros nɛ mɛlɛ saana ɔɗɔɔkɛ.

⁵Nɛɓa ruuɗe ɛɛk nɛ gimɗiir kaakaaka sinaanaɓa riiɓeeɗɛɛ Yeeseek nɛ dɛnɛɛr abii sinɛɓa ɓuweɗɛɛk saana, yakanaɓa ki guugunyɔn takana.

⁶Nɛɓa Simion Petros mɛlki sɛɛne baŋi nɛ guugunyuru kaakaaka nɛɛka takana. Nɛɓa ɓɔrɛ dɛnɛ abii sinɛɓa ɓuweɗɛɛk saadi,

⁷abii sinɛɓa tuseeɗɛɛ ɔɗɔ Yeeseek, mokoɓa atu a sinɛɓa ɓuweɗɛɛk agut omoŋ. Maɓa dɛnɛɛr a kɔ tintimɗiir nɛkɔ riiɓɛɛ nyon omalte.

⁸Nɛɓa saadi nomtan sinɛɓa mɛlɛ ɔɗɔɔkɛk guuguny kaakaaka nɛɛka takana, nɛ dɛnɛ nɛ ŋaadiŋ.

⁹Inɓa sɛɛga ki mɛlɛɛ pɛɛni sinɛɓa taapɛɛ Wargatɛɛ Waakoyotoŋk kɛ ɗɛygeeɗ a ŋaarki ret walsaaŋɔŋk.

¹⁰Saadi baŋiya weeriiɓa nomtaanak sigɛ pɛɛyk nɛ ŋaaŋarar nyakika gɛŋk.

¹¹Maariyam Mɛgdooluk ɛtɛtɛrɓa kaakaak nɛɛkɛ walas a kuɗeŋ, kuɗeɓa nɛ ruuɗe ɛɛk nɛ gimɗiir kaakaaka nɛɛka takana.

¹²Nɛɓa dɛnɛɛr wosɛytaanak Waakotoŋk a pɛɛy sigɔ latu abiyak sigɔ tupenyjuŋɔŋk a beebeɗar saadikan lak buusɛ Yeeseek, om goyse ɔɗɔwaak, ma om goyse derakaak.

¹³Nɛɓa sɛɛk tonur Maariyama kɛ, "Iin jarti sini, kuɗun agut jikon?" Nɛ jumur sɛɛga kɛ, "Boŋɛɛkɔrɔ Suumi naakiŋ. Nɛ kaa ɗegerɔɔn kɛ riiɓɛɛkɔ eet."

¹⁴Tonuɓa oko sinik nɛ kolɛɛnyɛ baŋiya, nɛ dɛnɛ Yeesee a ɛtɛtɛrŋ, yakanaɓa ki ɗegerɔɔn kɛ Yeesee.

¹⁵Nɛɓa Yeese tongeeɗ kɛ, "Iin jarti sini, kuɗun agut jikon? Ɗɛyin wooɗ?" Nɛɓa sɛŋk koɓu kɛ ijaagen sinɛ waayanakoŋk nɛ tongeeɗ kɛ, "Suumi naakɛ, ɔkɔnkɔ boŋun seŋk, yaaŋta saan kɔ riiɓeeɗink, nɔ kɛɛɗa boŋa."

¹⁶Nɛɓa Yeese tongeeɗ kɛ, "Maariyam." Nɛɓa sɛŋk kolɛnygeeɗ nɛ argeeɗ ad Ibiraystik kɛ, "Rabunii!" Wooran nɛɛk sigi kɛ Rɔɔriytaano.

¹⁷Nɛɓa Yeese tongeeɗ kɛ, "Inka ŋaarin son lak Baabɛɛk, nɛ katti kumun, mayakana mak son lak manyaakak eetaak nɔ kɛɛɗin tonun sɛɛga kɛ, 'Ŋaaraakɔɔ saak son lak Baabɛɛ a Ɓaaɓa noŋkuk, son lak Waakoyo naak a Waakoyo noŋkuk.' "

¹⁸Nɛɓa Maariyam Mɛgdooluk kɛɛ son lak nomtaanak gɛɛŋkik nɛ kɛɛ tonu sɛɛga any sinɛkɔ tongeeɗ Suumiik.

¹⁹Ɓeny sinaanɛɓak waawuy Sambatɛyoŋk ajige tolɗiiɓa nomtaanak gɛɛnɛ godeey tak agut omoŋ. Aɓa kortaanak tugaateer gɛɛnɛk agut sinɔɓa ɓurerɗi ɔɗɔweer Ayuuduk. Nɛɓa Yeese guugunyuru godeya sinaanakan tolɛrɗi ɛɛk nomtaanak gɛɛnɛkik nɛɓa ɛtɛ sɛɛge kɔɔr nɛ tonu sɛɛga kɛ, "Digoy kɔna."

²⁰Tonuɓa oko sinɛk nɛ yaaŋɛ sɛɛga arin gɛɛŋk a kooltun nɛɛk. Nɛ saaɓa nomtaanak gɛɛnɛ dɛnɛrɗi Suumik nɛɓa yaa sɛɛgaaŋ.

²¹Nɛɓa tonu sɛɛga Yeese kɛkar kɛ, "Digoy kɔna. Wosɛyakɔɔ ɓɔra kɔnuŋ, oko sinɛkanti wosɛykiɗi Baabɛɛk."

²²Saadi baŋiya tonuɓa sɛɛga oko sinɛk nɛ ubuuge sɛɛg nɛ tonu sɛɛga kɛ, "In boŋɛɛ Wɛɛŋa sigɔ Geetitaanak."

²³Ɔkɔn ŋɔɗutaarɔ tikiyɛ joopoŋkuŋ, nɛkɔɔ ɓɔrɛ kɔne ŋɔɗurɛɛ tikiyɛ goŋkuŋ. Ma ɔkɔnkɔɔ kiitaarɔ toŋoɗ tikiyɛ joopoŋkuŋ, nɛkɔɔ ɓɔrɛ kɔne kiirɛɛ toŋoɗ tikiyɛ goŋk."

²⁴Saaɓa Yeese mɛlkiɗ son lak nomtaanak gɛɛŋkik, nɛ nomtaanakɛ sigaagɛɓa aarin a pɛɛyk om Toomaas sinɛɓa riyɛ kɛ Didimoosuk, kɛɛɓa sɛɛn a sɛɛg.

²⁵Nɛɓa nomtaanak sigɛ ɔgɔɔk tonurgeeɗ kɛ, "Dɛniikɔ seek Suumiŋ." Nɛɓa sɛŋk tonu sɛɛga kɛ, "Ɔkɔnkɔɔ kaa taanta saan kan malɛrgiɗɛɛ awɛykiŋ, ɛ ɔkɔnkɔɔ kiigiɗa gaamit pɔlpɔl naakiŋ, ɛ ɔkɔnkɔɔ kaa gaamit ari naak doosoya sinaana kooltuntkuŋ, nɛkɔɔ kaa ŋaadiit."

²⁶Ɗoŋikɛ sigɔɔgɛ tula jiitik baŋiya, atuɓa nomtaanak gɛɛnɛ godeey tak kɛkar. Maɓa ɓɔrɛ Toomaas a sɛɛg agut omoŋ. Aɓa ɓɛɛlɛr tugaater gɛɛnɛ a kortaanak, nɛɓa mɛlki Yeese nɛ ɛtɛ sɛɛge kɔɔr nɛ tonu sɛɛga kɛ, "Digoy kɔna."

²⁷Saadi baŋiya tonuɓa Toomaasa kɛ, "Gaɓa pɔlpɔl nook seena nɔ dɛnin arin gaaŋk. Gaɓa ari nook nɔ gaɓun kooltunta naaka. Ŋaada, ma kat ɓɛɛlin ane kɛɛ ŋaadiyɛ."

²⁸Nɛɓa Toomaas jumurgeeɗ kɛ, "Suumi naakɛ, ɛ Waakoyo naakɛ!"

²⁹Nɛɓa Yeese tonu Toomaasa kɛ, "Ŋaadin agut sinɔ kɔtu dɛnɛɛɗinŋɔŋk? Geetitaanak joop sigɔ ŋaadiɗi mati kir taantak.

³⁰Ijaagɓa Yeese sɔɔriyɛ a ɓɔɔkaaŋ nomtaanakɛ gɛɛnɛ taamɛkɛ, sigɔɓa sɛɛg kɛɛ taapɛɛt Wargatɛya sineenak.

³¹Yakana taapɛɛɓa sini kɛnɔ ŋaadiir Yeesee Keresee kɛ sɛɛn Tɔɔn Waakoyotoŋk, nɔ ŋaadiir kɛnɔkoy laŋiir tiriyaakɛ gɛɛnɛk wɛɛŋa sigɛkoy nɔkoy nɔkoyk.