Read majang Yowanis 21 Bible Online

Yowanis 21 - majang bible

Yowanis 21

¹Saadi baŋiya yaaŋɛɓa ɛɛk Yeese nomtaanaka gɛɛna kɛkar Goroo sinɔɔnɛ obiiŋɔŋk kɛ Tibiriyadoosuk jɔk,

²Simion Petros, a Toomaas sinɛɓa riyɛ kɛ Didimoosuk, a Naatinael Gɛlilaa Kaanaak, a tɔɔmɔk Jɛbdiyoosuk, a nomtaanak ɔgɔ a pɛɛy ɓɛɛlɛrɓa agut omoŋ.

³Nɛɓa Simion Petros tonu kɛ, "Kɛɛɗa saak kondiyeeta oltiira." Nɛɓa ɓɔrɛ sɛɛk tonurgeeɗ kɛ, "Kɛɛɗii a iin agut omoŋ." Nɛ ŋaararki nɛ kaar teeŋɛr emɗa raŋana. Mayakanaɓa kir laŋiiɗ olt sinɔ omoŋɔŋk kaalt sinaanɛ.

⁴Saaɓa aayirkiɗik, nɛɓa Yeese ɛtɛ goroo sinaanɛ obiiŋɔŋk kɛntɛɛ, yakanaɓa nomtaanak gɛɛnɛ kir ɗegerɔɔn kɛ Yeesee.

⁵Nɛɓa Yeese tonu sɛɛga kɛ, "Tɔɔmɔko, latukari oltiiriŋ?" Nɛɓa sɛɛk tonurgeeɗ kɛ, "Kɛɛ tine ara."

⁶Nɛɓa sɛŋk tonu sɛɛga kɛ, "In oriirɛɛ any sinɛ kondiyeetoŋk emɗ nɛɛkɛ gɔɔta sineena ɗiɗikaak, laŋiirkɔɔ oltiiriŋ!" Nɛɓa oriitar any sinɛ kondiyeetoŋk gɔrɔwa sinɔɔna obiiŋɔŋk takana, nɛɓa kirki oolɛ puruuteet any sinɛ kondiyeetoŋkuk agut sinɔɓa boŋkuɗ oltiir a ɓɔɔkaaŋɔŋk jɛtik.

⁷Ɔɔtɛ sinaanɛ tonuɓa nomtan sinɛɓa poru Yeesek Petrosa kɛ, "A Suumire!" Saaɓa Petros tiyɛɛɗ sinɛɓa tonuk, nɛ agut sinɔɓa boŋkuɗ abii nɛɛk ɗooka agut any sinɛɓa ijaagik, nɛɓa gaɓɛ abii nɛɛk ɛɛka, nɛ teemiir gɔrɔwa sinɔɔna obiiŋɔŋk.

⁸Agut sinɔɓa nomtaanak sigɛɓa ɔgɔɔk yowɛrjukuɗ walasa a meetera ɗibɛ dakɛɗak, nɛɓa puruuter any sinɛ kondiyeetoŋk nɛ ŋaartar emɗ walasa.

⁹Saaɓa orurkuɗ ɛɛk emɗ nɛɛkɛkik ɗookaak, nɛɓa dɛnɛr rɛɛrɛmi sigɔ latu oltiir raŋk a kiiwuk.

¹⁰Nɛɓa Yeese tonu sɛɛga kɛ, "In ɗɔkɛɛ oltiir sigɛkɔ kondiyerkɔ sisɔk."

¹¹Nɛɓa Simion Petros teeŋɛ emɗa nɛɛka, nɛ puruuteer walasa any kondiyeetoŋk sinɔ lak oltiir sigɔ boobɛrŋɔŋk a ɗibɛ omoŋ a pɔlpɔlɛ joop pɛɛy a aarin a jiitik. Yakanaɓa any sinɛ kondiyeetoŋk ki pɔɔpɔkiit, kɛygunɓa ɓɔɔkaakɛ oltiir gɛɛnɛk oko sinɛkiŋ.

¹²Saadi baŋiya tonuɓa sɛɛga Yeese kɛ, "In kusɛɛ ɗamikɛɛ ɗama." Nɛɓa aasi nomtaanakɛ gɛɛnɛ kɛɛ sinɔ omoŋɔŋk sinɔ paari kɔɔniyɔɔna kɛ, "Iin wooɗuk" agut sinɔɓa ɗegerarɗi sɛɛg baŋɛ kɛ Suumi Yeeseek.

¹³Nɛɓa Yeese mɛlki nɛ boŋku kiiwu nɛɛk a olt nɛɛk nɛ gaɓɛ sɛɛgaaŋ.

¹⁴Ege sini dɛnɛɛ jiiteen nɛɛk sinɛɓa dɛnɛrɗi nomtaanak gɛɛnɛkik oko sinɛɓa ŋaarkiɗ Yeese ret walasak.

¹⁵Saaɓa ɗamiiɗik baŋiya, nɛɓa Yeese tonu Simion Petrosa kɛ, "Iin tɔɔn Yoonaak Simion, poruntu a kaalɛ sinɛti porurɗu joop sigikiŋ?" Nɛɓa sɛŋk jumurgeeɗ kɛ, "Ii, Suumi naakɛ. Ɗegerin seŋk kɛ poraaniŋ." Nɛɓa Yeese tongeeɗ kɛ, "Aawoyuta tɔɔmɔk jiŋkuyoŋk gaaŋk."

¹⁶Nɛ tongeeɗ Yeese kɛkar gut pɛɛyeen nɛɛk kɛ, "Iin tɔɔn Yoonaak Simion, poruntuŋ?" Nɛɓa sɛŋk jumurgeeɗ kɛ, "Ii, Suumi naakɛ. Ɗegerin seŋk kɛ poraaniŋ. Nɛ tongeeɗ Yeese kɛ, "Kooruta tɔɔmɔk jiŋkuyoŋk gaaŋk."

¹⁷Nɛ tongeeɗ gut jiiteen nɛɛk kɛ, "Iin tɔɔn Yoonaak Simion, poruntuŋ?" Agut sinɔɓa tongeeɗ gut jiiteen nɛɛk kɛ, "Poruntuŋ?", nɛɓa Petros sanɗi nɛ tongeeɗ kɛ, "Suumi naakɛ, ɗegerin seŋk any baŋɛ. Ɗegerin seŋk kɛ poraaniŋ." Nɛɓa Yeese tongeeɗ kɛ, "Irita jiŋkuyɛ gaaŋk.

¹⁸Eekeer tona naaŋ, a in iin ateeny gunkɔ tusun teeɓɛ nook ariit nookɛ, nɛ kɛɛɗin saana ɗɛyink. Ma saakoy gutarɛykiɗink nɛkoy kerin arin gooŋk nɛna tusiɗi teeɓɛ nook iɗit om nɛni diile soonakɔ kin ɗɛyɛɛk."

¹⁹Nɔɓa toniiɗ sinik yaaŋɛɓa sinɔ kɛ ɗɛyɛ a eemɛy Petros Waakoyo ret sinɔɔnɛ ɓɛɛlɛ ɛkik. Nɛɓa saadi baŋiya tonu Petrosa kɛ, "Nomate."

²⁰Kolɛɛnyɛɓa Petros nɛ dɛnɛ nomtan sinɛɓa poru Yeesek a nomɛɛɗiŋ. Ege sini nomtan siniɓa wideer ɛɛk Yeeseya weenta saaɓa ɗamiiɗɛ ajigek, nɔɓa kɔɔniy kɛ, "Suumi naakɛ, wooɗ sinɛ kɔɔnu gaɓɛkik?"

²¹Nɛɓa Petros dɛnɛ nɛ kɔɔniy Yeese kɛ, "Suumi naakɛ, ɓɛɛlɛkoy iɗit sini ɛk?"

²²Nɛɓa Yeese tongeeɗ kɛ, "Ɔkɔn ɗɛyɛ a beeɗ nɔkoy mɛlkiɗaakiŋ mee iina jikon? Nomate seŋk."

²³Agut sini mɛlɛɓa manyaakaka kɔɔra toni sinɔ kɛ nomtan sini kikoy rerink. Ma mokoɓa Yeese tonu kɛ, "Kikoy rerin," maɓa yakana tonu kɛ, "Ɔkɔn ɗɛyɛ a beeɗ nɔkoy mɛlkiɗaakiŋ, mee iina jikon?"

²⁴Sinɛɓa waasɛ ola sigi baŋɛk, ɛɓa taapɛ ola sigi baŋɛk nomtan sini. Ɗegerii waasiyɛ gɛɛŋk kɛ eekeer.

²⁵Lakɛ ɓɔrɛ ola ɔgɔ a ɓɔɔkaaŋ sigɔɓa ijaag sɛɛg Yeeseek. Koɓa saak kɛ ɔkɔn taapɛɛ ola sigɛɓa sɛɛg ijaagik baŋɛ a omoŋ omoŋ, nɛ gunkɔɔ ki oolɛ ɗook a ɓataki wargatɛyɛ sigɛ taapɛɛ sɛɛgikiŋ.