Read majang Yowanis 3 Bible Online

Yowanis 3 - majang bible

Yowanis 3

¹Lakɛɓa iɗit Paarisik om sinɔ riyɛ kɛ Nikodimoosuk ɔɗɔweerɛ Ayuuduk egeɓa omaay sɛɛn.

²Nɛɓa kus kaalt son lak Yeeseek nɛ tongeeɗ kɛ, "Rɔɔriytaano, ɗegerii kɛ iin rɔɔriytan sinɔkan kus sooy lak Waakoyok. Agut sinɔ kɛɛ iɗit sinɔ ijaag sɔɔriyɛ sigikɔ sɛɛg ijaagink ɔkɔn moko sɛɛn a Waakoyo."

³Nɛɓa Yeese tongeeɗ kɛ, "Eekeer tona naaŋ. Ɔkɔn kɛɛ iɗit ɓartɛɛt kɛkarŋ, ki oolɛ akoy dɛnɛ burɛ Waakoyotoŋkuŋ."

⁴Nɛɓa Nikodimoos kɔɔniy Yeesee kɛ, "Anɛ ɔkɔnɓa iɗit gutarɛykiŋ, nɛ oolɛ a mur ɛmɛsa amɗa nɔ ɓartɛɛ kɛkar ɛk?

⁵Nɛɓa Yeese jumurgeeɗ kɛ, "Eekeer tona naaŋ. Ɔkɔn kɛɛ iɗit ɓartɛɛt maawɛ a Wɛɛŋa sigɔ Geetitaanakiŋ, ki oolɛ akoy guuguny burɛya Waakoyotoŋkuŋ.

⁶Ɓartɛr joop tɔɔmɔk joopoŋk, ma Wɛɛŋa sigɔ Geetitaanakik gaɓɛr wɛɛŋa joopa.

⁷Kat ŋaatin agut sinina tona kɛ, 'Ɗɛyɛna ani ɓartɛɛ kɛkark.'

⁸Yoŋgoy yoŋgoyɛ gɔɔta sinaana ɗɛyɛk nɛ tiyin koŋgoy nɛɛkiŋ, mayakana kin ɗegerɔɔn kɛ kus eet nɛ kɛɛ etena. Iɗit sinɔkan ɓartɛɛ Wɛɛŋakɛk kɛkark ɓɛɛlɛ oko sinɛk."

⁹Nɛɓa Nikodimoos kɔɔniy sɛɛn kɛ, "Nɛ sini oolɛ a gayɛ ɛk?"

¹⁰Nɛɓa Yeese jumurgeeɗ kɛ, "A iin rɔɔriytan Israeelik, nɛ kin sini ɗegerɔɔn?

¹¹Eekeer tona naaŋ, any sinɛ ɗegeriik toniiŋ, any sinɛkan dɛniik waasiiŋ, yakana sɔɔk kiir boŋiiɗ waasiyɛ gaŋk.

¹²Saa kɔna toniiɗa any ɗookoŋkuk ɔkɔn kiir ŋaaditiŋ, nɛ saa kɔna toniiɗa any dariyoŋkuk nɛkɔɔ ŋaadiir ɛk?

¹³Kɛɛ iɗit sinɔɓa ŋaar dariyaak, Toomoy Etoŋk sinaanɛɓa kus darik sɔgɔɔsɔyk.

¹⁴Ɗɛyɛ Tɔɔna Etoŋk a laalawɛɛ keet rakaay oko sinɛɓa laalawuɗu Muuse kooko awɛytoŋk keet rakaay paaton takik,

¹⁵kɛnɔ iɗit sinɔ ŋaadiɗi sɛɛnek, kɛnɔkoy laŋi wɛɛŋa sigɛkoy nɔkoy nɔkoyk.

¹⁶Agut sinɔ Waakoyo poru ɗoo jɛt, gakiɓa Tɔɔn nɛɛk sinɔ omoŋɔŋk, kɛnɔ iɗit sinɔ ŋaadiɗi Toomoy nɛɛkɛkik baŋɛ kikoy badɛ makoy laŋi wɛɛŋa sigɛkoy nɔkoy nɔkoyk.

¹⁷Mokoɓa Waakoyot wosɛyki Tɔɔn nɛɛk ɗooka kɛnɔ kus pɛrɛdɛ joope ɗookoŋk, ma kɛnɔ bɔdɛr joop ɗookoŋk ɔɔtɛ nɛɛkɛɛk.

¹⁸"Iɗit sinɔ ŋaadiɗi sɛɛnek kiidɛɛkoy pɛrɛdɛɛt, ma iɗit sinɔ ki ŋaadiɗiit sɛɛnek agut sinɔ kiiɗi ŋaadiɗiit Toomoy Waakoyotoŋk sinɔɔnɛ omoŋɔŋkuk pɛrɛdɛɗɛɛɓa ɗeeŋk.

¹⁹Pirdi nɛɛk sini. Kusɓa pɛɗɛrka ɗooka, yakanaɓa joop porur nyuugur a kaalɛ pɛɗɛrka agut sinɔɓa ijaag nɛngk tikiyɛɛk.

²⁰Iɗit sinɔ ijaag tikiyɛɛk ɓooyu pɛɗɛrka, kiiki deran pɛɗɛrkaata kɛnɔ kat yaaŋgɛɛɗ ɛɛk ijaag nɛɛkɛɛk.

²¹Ma iɗit sinɔ ijaag any sinɔ eekeerik kus pɛɗɛrkaata, nɔ kusuɗ pɛɗɛrkaataak kɛnɔ yaaŋɛ ɛɛk any sinɛɓa ijaagik kɛ ar sekiyɛɛkɛ Waakoyotoŋk."

²²Saadi baŋiya kaarɓa Yeese a nomtaanak gɛɛŋk ɗooka Yuudaak. Nɛɓa beeɗ saadi a balaaŋ a sɛɛg agut omoŋ, ɛɓa aadi joop.

²³Nɛɓa Yowanis aadiɗi soodi ar Saaleeme jɔkuk, soodi riyɛ kɛ Heenoonuk agut sinɔɓa lakiɗɛ maawu a ɓɔɔkaaŋɔŋk, nɛɓa ɛnyɛnyɛkarki joop saana son lak sɛɛnik.

²⁴A inɓa Yowanis kɛɛ gaamit godeya korkoɗɔɔnoŋk.

²⁵Tukɛɛɓa palamɛ agut ŋaɗɛ barɛɗoŋk nomtaanakɛ Yowanisik a ete Ayuuduk omalte kɔɔr.

²⁶Wideetarɓa ɛɛk nomtaanak Yowanisik son lak sɛɛnik nɛ tonurgeeɗ kɛ, "Rɔɔriytaano, Aadiɗi ɓɔrɛ iɗit kɔ iin a sɛɛn ɗeesɔ Yordanoosuk, iɗit kɔ waasigiɗin agut ɔɔtɛ nɛɛkiŋ. Kaar joop baŋɛ son lak sɛɛnik."

²⁷Nɛɓa Yowanis jumur kɛ, "Kɛɛ iɗit sinɔ oolɛ a laŋi any omk ɔkɔn moko gageeɗ Waakoyo dariyoŋk."

²⁸Iinak ɔɗɔwa noŋk dakɛɛrta a misikiriyɛ oko sinɛkan kɔna toniiɗa kɛ, 'Moko eet, wosɛykɛɛ kanti sɛɛne ɔɗɔɔkɛ.'

²⁹Iɗit sinɛ waawuguɗɛɛkik, nɛ sɛɛn tagoon. Ma piraa iɗit sinɛ waawuguɗɛɛk ɛtɛ sɛɛne jɔk, nɛ geleewugeeɗ nɛ tiyɛ wɛɛŋa gɛɛŋk nɛ yaageeɗiŋ. Nɛ yaa eetaaŋ oko sinik oko sɛɛn.

³⁰Ɗɛyɛ sɛɛna a ɓɔŋgɔɔrɛ ɛɛk rakaaya, ma eeta ɗɛyɛ a rikita ɛɛk ɗooka.

³¹"Iɗit sinɔ kus rakaayk ar rakaay olaatɛ baŋɛ. Iɗit sinɔ ar ɗookuk iɗit ɗookoŋk, waasɛ any ɗookoŋk. Iɗit sinɔ kus darik ar rakaay olaatɛ baŋɛ.

³²Waasɛ sɛŋk any sinɛkan dɛnɛk a sinɛkan tiyɛk, yakana kɛɛ iɗit sinɔ boŋu waasiyɛ gɛɛŋkik.

³³Iɗit sinɔ boŋu waasiyɛ gɛɛŋkik yaaŋɛ kɛ ege Waakoyot eekerkan.

³⁴Iɗit sinɛɓa wosɛyki Waakoyotuk waasɛ pɛɛni Waakoyotoŋk. Gageeɗ Waakoyot Wɛɛŋa sigɔ Geetitaanakik a kiiɗɛ suk.

³⁵Poru Ɛpɛna Tɔɔn nɛɛkiŋ, gageeɗɓa ɓaŋkawuka baŋɛ ariita.

³⁶Iɗit sinɔ ŋaadiɗi Toomoy Waakoyotoŋkuk, lak wɛɛŋa sigɛkoy nɔkoy nɔkoyk. Mayakana iɗit sinɔ ki ŋaadiɗiit Toomoy Waakoyotoŋkuk, kikoy laŋiiɗ wɛɛŋa, ma lak goopan Waakoyotoŋk raŋk."