Read majang Ijaag Wosɛytaanakoŋk 1 Bible Online

Ijaag Wosɛytaanakoŋk 1 - majang bible

Ijaag Wosɛytaanakoŋk 1

¹Iin Tewopiloos, taapɛɛraɓana jeemɛ wargatɛɛ naakɛ ola sigɛɓa Yeese tuke sɛɛg ijaagaak a sigɛɓa rɔɔriyaɗik baŋɛ,

²a inɓa ki ŋaarin dariya, ege sigi sekiyɛ sigɛɓa gaɓɛ sɛɛg Yeese Wɛɛŋakɛ sigɔɔgɛ Geetitaanakik baŋiyaak, nomtaanaka sigaagaɓa daam sɛɛgik.

³Saaɓa Yeese laŋkiɗ rakatɛk baŋiya, nɛɓa yaaŋɛ sɛɛga ɛɛk a ɓɛɛlɛ wɛɛŋakɛ misikiriyɛɛkɛ sigɔɔgɛ ɓɔɔkaaŋɔŋk. Nɛɓa yaaŋɛ sɛɛga ɛɛk a ɗoŋ pɔlpɔlɛ joop pɛɛyk, nɛɓa rɔɔriya agut burɛ Waakoyotoŋk.

⁴Ɓeny omalte saaɓa Yeesee a sɛɛg agut omoŋɔŋk nyon ɗamatoŋkuk, nɛɓa tonu sɛɛga kɛ, "Kat ŋaarirɛɛ Yorsaleeme. In koorɛɛ any sinɛkan tonu Baabɛk kɛ gaɓɛkɔɔ kɔnaŋɔŋk sinɛkan tiyɛɛr eeteek jeemɛk.

⁵Aadikan kɔnu Yowanis maawɛ, mayakana iinak aadɛɛkɔɔ kɔnu Wɛɛŋakɛ sigɔɔgɛ Geetitaanakik ɗoŋikɛ sigɔɔgɛ tekeriŋɔŋk baŋiya."

⁶Saaɓa nomtaanak gɛɛnɛ tolɗiɗ agut omoŋɔŋk, nɛɓa kɔɔniyar Yeesee kɛ, "Suumi naŋk, ɔɔtɛ sinɛkɔɔ jumurkuɗun joopa Israeelak ɗoo nɛŋkik sisɔ?"

⁷Nɛɓa Yeese jumur sɛɛga kɛ, "Kikɔna ɗɛyɛɛ a ɗegerari ɔɔtɛ a sayiti sinɛɓa gaamu Baabɛ ɓaŋkawukaat nɛɛkɛkik.

⁸Mayakana saakoy kɔna kurakiɗ Wɛɛŋa sigɔ Geetitaanakik raŋanaak nɛkoy boŋiir ɓaŋkawuka, nɛkoy waasiɗiikar agut eet sinɔɔnɛ Yorsaleemuk, sinɔɔnɛ ɗoo Yuudaak baŋɛ, sinɔɔnɛ Sɛmaariyaak, mɛlɛɛɗa kɛntɛya ɗookoŋk."

⁹Saaɓa Yeese toniiɗ sinik baŋiya, nɛɓa ŋaar dariya a dɛdɛnar, nɛɓa badɛɛr tiimana.

¹⁰Saaɓa ŋaarɗik nɛɓa sɛɛk mermena dariya, nɛɓa ɛtɛr sɛɛge jɔk joop a pɛɛy sigɔ latu abiyak sigɔ tupenyjuŋɔŋk.

¹¹Nɛɓa tonur sɛɛga kɛ, "Iinak joop Gɛlilaak, ɛtɛɛr a mermenaakari dariya agut jikon? Yeesee sini dɛnɛɛr saa ŋaarɗi dariyak weerikikoy oko sinɛ dɛnɛrɗɔ saa ŋaarɗik."

¹²Saadi baŋiya weerikɓa nomtaanak kurkum Dɛbirɛ Jɛytik Yorsaleema. Kurkum Dɛbirɛ Jɛytik ege yowɛrka nɛɛkɛ Yorsaleeme kiilo meeter omoŋ.

¹³Nɛɓa Petros, a Yowanis, a Yaykoob, a Indiriyaas, a Pilipoos, a Toomaas, a Bɛrtɛloomiyos, a Maatiyos, a tɔɔn Ilpiyoosuk Yaykoob, Simion sinɛɓa palamɗi agut ɗoo nɛɛkik, a tɔɔn Yaykoobuk Yuudaa mɛlɛrkiɓa Yorsaleema nɛ teeŋɛr pooka sinaanaɓa beebeɗarɗik.

¹⁴Totoliiɓa sɛɛk ɗanɗamɔɔna ɓɛɛnyɔwɛ gɛɛŋk baŋɛ, a jartiyatɔk a omoŋ omoŋ, a Maariyam ɛmɛs Yeeseya, a ɓɔrɛ manyaakak Yeeseya agut omoŋ.

¹⁵Ɓeny omalte saaɓa tolɗiɗ ŋaadtaana sigɔ ɗibɛ omoŋ a ruumer iɗitik, nɛɓa Petros ɛtɛ sɛɛge kɔɔr nɛ tonu sɛɛga kɛ,

¹⁶"Iinak manyaakak eeta, gunkan dusanɛɛ pɛrka sigɛɓa tonur sɛɛg Wɛɛŋa sigɔ Geetitaanakik jeemɛ Daawite Wargatɛɛ sinɔɔnɛ Geetitank agut Yuudaa sinɛkan ɔɗɔwen joopa sigaagaɓa gaamur Yeeseekiŋ.

¹⁷Yuudaa sɛɛnkan a eteŋk agut omoŋ ijaag naŋk."

¹⁸Iɗit sini ɓaliɓa ɗoo worii sinaanɛɓa gagiɗɛ agut ijaag tikiyɛɛkoŋkuk, nɛɓa saadi muke tepeen nɛɛkɛ ɗoo, nɛɓa sarii ɛɛk nɛɛkɛk sɔ kɔɔroŋk, nɛɓa kɛɛtiɗi ɗikiny gɛɛnɛŋ.

¹⁹Nɛɓa ɗegerar any sini joop sigɛ beeɗir Yorsaleemek baŋɛ, nɛɓa riyɛɛ ɗoo sinɛ ad nɛŋk kɛ Akeldaama, wooran nɛɛk sinɔ kɛ Ɗoo Yɛromoŋkuk.

²⁰Nɛɓa tonu Petros kɛkar kɛ, "Nɔ ɓɛɛlɛɛɗ sinik oko sinɛɓa taapɛɛɗɛ Wargatɛɛ Iiliyagoŋk kɛ, 'In koy ɓɛɛlɛ gode nɛɛkɛ sɔkɔn, kat koy lakɛ iɗit sinɔ beeɗiiɗik.' Ɛɓa taapɛɛ kɛkar kɛ, 'In koy boŋiiɗ suumiikeen nɛɛk iɗit omaay.'

²¹"Agut sini ɗɛyɛ tina a daamii iɗit a omoŋ nyona Yuudaak, joope sigaagɛkan eteŋk a sɛɛgik saaɓa Suumi Yeese weeweriiɗ ɓɛɛnyɔwɛ gɛɛŋk baŋɛ eteŋkɛ kɔɔruk,

²²a tukiɗi aadiit Yowanisik mɛlɛɛɗa ɓɛɛnyɔwa sinaanakan Suumi Yeese ŋaarɗi dariyaak. Iɗit sinɔ sɛɛn a eteŋk kɛnɔ waasii ŋaarin nɛɛk ret walasak."

²³Saadi baŋiya wideetarɓa sɛɛk joop a pɛɛy, sɛɛg sigi, Yoosep sinɛɓa riyɛ kɛ Bersaabak maŋk Iyoostoosuk a Maatiyaas.

²⁴Ɗanɗamaaɓa saaɓak kɛ, "Iin Suumi sinɛ ɗeger ɓayɛ etoŋk baŋɛk. Yaaŋ tina iɗit sinɛkɔ daamun joope sigeege pɛɛyk,

²⁵yaaŋ tina iɗit sinɛkɔɔ boŋu nyon Yuudaak sinɛkɔ ŋɔr ijaag nɛɛk wosɛyɛɛtoŋk saakɔ ŋaarɗi nyona nɛɛkaakik."

²⁶Saadi baŋiya orurɓa ita nɛɓa ɗiiri ita nɛɛkɛ Maatiyaasa. Nɛɓa ikomɛɛ sɛɛn a wosɛytaanak sigɛ aarin a omoŋɔŋk agut omoŋ.